1 Jɔ̃́ɔ́ 4 - Ɓǎsɔ́ɔ̀ Báɓòɔ̀

Jǎà Zùùɔ̀ kè se zùùɔ̀

¹ Ní ɖɛ̀ɓɛ̀-nyɔ̀ ɓě, ɓěǐn ɖá ɓɛ́ ɓě ké zùù séínɛ̀ wuɖu jǎà po pū, kɛɛ ɓě mɛ dɔ̃̌ wa mú, ɓɛ́ ɓě kéɛ dyé kɛbì wa sɔ̀ Gèɖèpɔ́ɔ̀ gbo jǎà ní. Sepóɛɖé nyɔ ɓě ɓɛ́ wa ɖáìn wa mìɔùn kpáá-ɖɛ̀-cɛ̃-nyɔ̀, ké wa seà ɔ mɔ̀ɛɛ ɖǎ ɓóɖó-kpàà dà séín mu.

² Kà ɓě muɛ dyí dyuòɛ̀ nyuùn kà ɓɛ́ ɔ mɔ̀ Gèɖèpɔ́ɔ̀ Zùùɔ̀ kɛɛ, ɔ kɛ̀. Zùù séín ɓɛ́ wa wɔ̃́ìn mú kà ɓɛ́ Jízɛ̀ Kɛ́ɖɛ́ì dyììn ma ɖé nyɔǔn-dyùɛ̀ kpóɖó-dyùà múɛɛ sɔ̀ìn Gèɖèpɔ́ɔ̀ gbo.

³ Kɛɛ zùù séín ɓě ɓɛ́ wa se kà Jízɛ̀ jè mú wɔ̃́ìn nyɛɛ, wa se Gèɖèpɔ́ɔ̀ gbo sɔ̀. Zùù nìà kɛ sɔ̀ìn Kɛ́ɖɛ́ì Gbo-vɔ̃-nyɔ̀ɔ̀ gbo. Ɓě wɔ̃́ kà ɓɛ́ ɔ mu ma dyiìn nyɛ, ké ɔ ɖǎ ɓóɖó-kpàà kɔ̃ nì kàǔn.

⁴ Ní dyú ɓě, ɓě mɔ̀ Gèɖèpɔ́ɔ̀ nyɔ ɓě, ké ɓě ɖǎ nyɔ ɓě ɓɛ́ wa ɖáìn wa mìɔùn kpáá-ɖɛ̀-cɛ̃-nyɔ̀ ɓěɛɛ toún ɖu, sepóɛɖé nyɔ nìà ɖé ɓě múɛɛ ɓéɖé kpé mìɔ ké ɔ zi nyɔ nìà ɓóɖó-kpàà múɛɛ dyí.

⁵ Wa mɔ̀ ɓóɖó-kpàà nyɔ ɓě. Ɔ jèɛɛ, ɖɛ wa cɛ̃ɛ mɔ̀ ɓóɖó-kpàà ɖɛ ɓě, ké ɓóɖó-kpàà nyɔ ɓě tò waà wuɖu ɓěɔ̀ ɖùǔ gbo.

⁶ À mɔ̀ùn mɔ̀ǎ Gèɖèpɔ́ɔ̀ nyɔ ɓě. Nyɔ séín ɓě dyuò Gèɖèpɔ́ɔ̀ dyíɛɛ, wa tò à wuɖu ɓěɔ̀ ɖùǔ gbo. Nyɔ se Gèɖèpɔ́ɔ̀ nyɔ kɛɛ, ɔ ní tò à wuɖu ɓěɔ̀ ɖùǔ gbo. Kǎà à ɓɛ́ìn jǎà Zùùɔ̀ kè se zùùɔ̀ dyí dyuòɛ̀.

Gèɖèpɔ́ɔ̀ mɔ̀ ɖɛ̀ɓɛ̀ǐn-ɖɛ̀ɓɛ̀ǐn

⁷ Ní ɖɛ̀ɓɛ̀-nyɔ̀ ɓě, ɓěà mɛ ɖɛɓɛìn ɖɛ̀ɓɛ̀ìn mú, sepóɛɖé ɖɛ̀ɓɛ̀ǐn-ɖɛ̀ɓɛ̀ǐn sɔ̀ìn ɖé Gèɖèpɔ́ɔ̀ gbo. Nyɔ séín ɓě ɓéɖé ɖɛ̀ɓɛ̀ǐn-ɖɛ̀ɓɛ̀ǐn nyɛɛ mɔ̀ Gèɖèpɔ́ɔ̀ wóɖóìn-dyù ɓě, ké wa dyuò Gèɖèpɔ́ɔ̀ dyí.

⁸ Nyɔ mɔ̀ nyɔ se ɖɛ̀ɓɛ̀ǐn-ɖɛ̀ɓɛ̀ǐn ɓéɖéɛɛ se Gèɖèpɔ́ɔ̀ dyí dyuò, sepóɛɖé Gèɖèpɔ́ɔ̀ mɔ̀ ɖɛ̀ɓɛ̀ǐn-ɖɛ̀ɓɛ̀ǐn.

⁹ Kà Gèɖèpɔ́ɔ̀ nyu ɔ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ɔ ɓéɖé à bììɛɛ à dyí tɛ̀mɛ̀ìn nyɛɛ, ɔ kɛ̀. Ɔ ɖoɓo ma ɔ Dyú-gàà dyúáɖòɔ̀ nɔ̄ ɓóɖó-kpàà kɔ̃, ɓɛ́ à ké cĩ́ dyììn ɖé ɔ mú.

¹⁰ Ɖɛ ɓɛ́ ɖɛ̀ɓɛ̀ǐn-ɖɛ̀ɓɛ̀ǐn jǔɛɛ, ɔ kɛ̀. Ɔ se ɖɛ ɓɛ́ à ké ma Gèɖèpɔ́ɔ̀ mú ɖɛ̀ɓɛ̀ɛ̀, kɛɛ ɔ mɔ̀ nyɔ ɖɛ̀ɓɛ̀ ma à mú, ké ɔ tò ma ɔ Dyú-gààɔ̀, ɓɛ́ dyììn ɖé ɔ múɛɛ, Gèɖèpɔ́ɔ̀ ké à nàmàǔn ɓěɔ̀ kɔ̃in zĩ̀ìn.

¹¹ Ní ɖɛ̀ɓɛ̀-nyɔ̀ ɓě, Gèɖèpɔ́ɔ̀ dyi ma kà à mú ɖɛ̀ɓɛ̀ǐn, nìí, à ɓéɖé à kéɔ́ mú ɖɛɓɛìn ɖɛ̀ɓɛ̀ìn ɖekè.

¹² Nyɔ ɖò séè Gèɖèpɔ́ɔ̀ dyé ɖò. Ɔ jǔ ké à dyi mú ɖɛɓɛìn ɖɛ̀ɓɛ̀ìn ní, nìí, Gèɖèpɔ́ɔ̀ cĩ́ ɖé à mú, ké ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ hwɛ̀ gbɔ ɖé à mú.

¹³ Kà à nyuɛ dyí dyuòɛ̀ kà ɓɛ́ à cĩ́ ɖé Gèɖèpɔ́ɔ̀ mú, ké ɔ cĩ́ ɖé à múɛɛ, ɔ kɛ̀. Ɔ mɔ̀, ɔ nyí ɔ Zùùɔ̀ à.

¹⁴ Ké à ɖǎa dyé, ké à nyuɛ zàse kà ɓɛ́ Ɓǎɔ̀ tò ma ɔ Dyúɔ̀, ɓɛ́ ɔ ké ɓóɖó-kpàà Póìn-nyɔ̀ jǔɛ.

¹⁵ Nyɔ séín ɓě ɓɛ́ wa wɔ̃́ìn mú kà ɓɛ́ Jízɛ̀ mɔ̀ Gèɖèpɔ́ɔ̀ Dyú-gààɔ̀ kɛɛ, Gèɖèpɔ́ɔ̀ cĩ́ ɖé wa mú, ké wa cĩ́ ɖé Gèɖèpɔ́ɔ̀ mú.

¹⁶ À dyuòɛ̀ dyí, ké à dè ɖɛ̀ɓɛ̀ǐn-ɖɛ̀ɓɛ̀ǐn ɓɛ́ Gèɖèpɔ́ɔ̀ ɓéɖé à bììɛɛ hwòɖǒ kɔ̃. Gèɖèpɔ́ɔ̀ mɔ̀ ɖɛ̀ɓɛ̀ǐn-ɖɛ̀ɓɛ̀ǐn, ké nyɔ séín ɓě cĩ́ ɖé ɖɛ̀ɓɛ̀ǐn-ɖɛ̀ɓɛ̀ǐn múɛɛ cĩ́ ɖé Gèɖèpɔ́ɔ̀ mú, ké Gèɖèpɔ́ɔ̀ cĩ́ wa mú.

¹⁷ Ɖɛ kɔ̃̀ jè ɖɛ̀ɓɛ̀ǐn-ɖɛ̀ɓɛ̀ǐn hwɛ̀à gbɔ ɖé à múɛɛ, ɔ kɛ̀. Ɔ mɔ̀, ɓɛ́ à ké se fɛ̃̀ìn ɓó zaa-wɔ̃-po-wèɔ̀ xwíníín, sepóɛɖé kà Kɛ́ɖɛ́ì nyu nìɛ̀ kɛɛ, kǎà à nyuà nìɛ̀ nɔ̄ ɓóɖó-kpàà kɔ̃ɛ̀.

¹⁸ Fã̀à ɖò se ɖɛ̀ɓɛ̀ǐn-ɖɛ̀ɓɛ̀ǐn mú nì. Ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ɔ hwɛ̀ gbɔɛɛ kúmú fã̀à séín, sepóɛɖé nyɔǔn-gǎ-dyéìn-dyéìn nì fã̀à-peɖe-peɖe mú. Ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ɔ nì fã̀à-peɖe-nyɔ̀ múɛɛ se gbɔ hwɛ̀.

¹⁹ À ɓéɖé ɖɛ̀ɓɛ̀ǐn-ɖɛ̀ɓɛ̀ǐn, sepóɛɖé Gèɖèpɔ́ɔ̀ ɖɛ̀ɓɛ̀ ma à mú kĩ́ín.

²⁰ Nyɔ ɖò dyiɛ cɛ̃, ké ɔ dyi níiń, “Ḿ ɖɛ̀ɓɛ̀ Gèɖèpɔ́ɔ̀ mú,” ké ɔ dyi ɔ ɖíí-gàà mú nyɛ́ín, ɔ mɔ̀ se-tɔ́mɔ́-nyɔ̀. Sepóɛɖé nyɔ mɔ̀ nyɔ se ɔ ɖíí-gàà ɓɛ́ ɔ ɖǎ dyéɛɛ mú ɖɛ̀ɓɛ̀ kɛɛ se Gèɖèpɔ́ɔ̀ ɓɛ́ ɔ séèà dyé ɖòɛɛ mú ɖɛ̀ɓɛ̀ɛ̀ ɓɛ́ìn.

²¹ Ɖɛ nìà kɛ mɔ̀ ɖɛ ɓɛ́ ɔ cɛ̃ à gbo, ɓɛ́ à kéɛ nyuɛ. Ɔ ɖá nyɔ ɓɛ́ ɔ ɖɛ̀ɓɛ̀ Gèɖèpɔ́ɔ̀ múɛɛ mɛ ɖɛ̀ɓɛ̀ ɔ ɖíí-gàà mú ɖekè.