1 Jɔ̃́ɔ́ 3 - Ɓǎsɔ́ɔ̀ Báɓòɔ̀

Gèɖèpɔ́ɔ̀ dyú ɓě

¹ Ɓě dyéɛ kà ɓɛ́ Ɓǎɔ̀ nyu à mú ɖɛ̀ɓɛ̀ɛ̀ mìɔ kɛɛ jèɛɛ, à nyɛ́nɛ́ mɔ̀ǎ Gèɖèpɔ́ɔ̀ dyú ɓě. Ké kǎà à nì. Ɖɛ kɔ̃̀ jè ɓóɖó-kpàà nyɔ ɓě seà à dyí dyuò wɛɛ, ɔ mɔ̀, sepóɛɖé wa se ma Gèɖèpɔ́ɔ̀ dyí dyuò jè.

² Ní ɖɛ̀ɓɛ̀-nyɔ̀ ɓě, ɓěà mɔ̀ Gèɖèpɔ́ɔ̀ dyú ɓě kàǔn. Kɛɛ ɖɛ à ké jǔɛ muɛɛ, à séèɛ̀ dyí dyuò jɛ́ɛ́ ke. Kɛɛ ɖɛ à dyuò dyíɛɛ, ɔ kɛ̀. Ɔ mɔ̀, ti ɓɛ́ Kɛ́ɖɛ́ì muà xwáɖáún wóɖóùn wɛ̃ɛ, à kèɔ̀ kè mu hwɔìn, sepóɛɖé à mu ɔ dyéìn kà ɔ nyu nìɛ̀ kɛ.

³ Ké nyɔ séín ɓě ɓɛ́ wa mu hwòɖǒ-kɔ̃-dè-ɖɛ̀ɛ̀ ɓéɖéìn ɖé Kɛ́ɖɛ́ì múɛɛ hwɔ wa mìɔùn mú kà ɓɛ́ Kɛ́ɖɛ́ì hwɛ̀à múɛ.

⁴ Nyɔ séín ɓě ɓɛ́ wa nyu nàmàǔn wɛ̃ɛ wáɖá Gèɖèpɔ́ɔ̀ gma, sepóɛɖé nàmàǔn mɔ̀ gmaɔ̀ wáɖá-wáɖá.

⁵ Ɓě dyuòɛ̀ kà Kɛ́ɖɛ́ì wóɖó ma xwáɖáún, ɓɛ́ ɔ ké à nàmàǔn ɓěɔ̀ à bũ̌in zàa, ɔ kè kà ɓɛ́ nàmàǔn ɖò se ɔ mú nìɛ.

⁶ Nyɔ kã̀ìn séín ɓě cĩ́ ɖé ɔ múɛɛ ní nyu nàmàǔn. Kɛɛ nyɔ ɓɛ́ ɔ nyu nàmàǔn wɛ̃ɛ séè ɔ dyé ke, ké ɔ se ɔ dyí dyuò.

⁷ Ní dyú ɓě, ɓě ní wɔ̃́ ké nyɔ ɖò ní cá ɓě. Nyɔ séín ɓě ɓɛ́ wa nyu dyí-sɛ́ɖɛ́ìn-ɖɛ̀ kɛɛ sɛ́ɖɛ́ìn dyí kà ɓɛ́ Kɛ́ɖɛ́ì sɛ́ɖɛ́àìn dyí kɛ.

⁸ Nyɔ ɓɛ́ ɔ nyu nàmàǔn teeɛɛ mɔ̀ Nɔɔ́-nàmàǔnɛ̀ nyɔ, sepóɛɖé Nɔɔ́-nàmàǔn nyu nàmàǔn sɔ̀ìn ɖé ɖɛ-gbɔ-dè-dèɔ̀ mú. Ɖɛ kɔ̃̀ jè Gèɖèpɔ́ɔ̀ Dyú-gààɔ̀ wóɖó ma xwáɖáún wɛ̃ɛ, ɔ mɔ̀, ɓɛ́ ɔ ké Nɔɔ́-nàmàǔn nyuu-ɖɛ̀ ɓěɔ̀ mú gbɔɔ̀.

⁹ Nyɔ mɔ̀ nyɔ ɓɛ́ Gèɖèpɔ́ɔ̀ wóɖóìn nyɛɛ ní nyu nàmàǔn tee, sepóɛɖé ɖɛ ɓɛ́ Gèɖèpɔ́ɔ̀ nyuɛɛ nì ɔ mú. Ké ɔ se nàmàǔn nyuɛ ɓɛ́ìn, sepóɛɖé Gèɖèpɔ́ɔ̀ wóɖóìn ɔ jè.

¹⁰ Ɖɛ tɛ̀mɛ̀ìn nyɔǔn dyí kà ɓɛ́ nyɔ ɖò mɔ̀ Gèɖèpɔ́ɔ̀ dyú mɔɔ ɔ mɔ̀ Nɔɔ́-nàmàǔn dyú kɛɛ, ɔ kɛà kɛ̀. Nyɔ séín ɓě ɓɛ́ wa se ɖɛ mɔ̀ dyí-sɛ́ɖɛ́ìn-ɖɛ̀ kɛɛ nyu kɛ kè nyɔ ɓě ɓɛ́ wa se wa ɖíí-gàà mú ɖɛ̀ɓɛ̀ kɛɛ, wa se Gèɖèpɔ́ɔ̀ dyú.

Ɓě mɛ ɖɛɓɛìn ɖɛ̀ɓɛ̀ìn mú

¹¹ Bɔ̃̌ ɓɛ́ ɓě wɔ̃́ ma sɔ̀ìn ɖé ɖɛ-gbɔ-dè-dè múɛɛ kɛà kɛ̀. Ɔ mɔ̀, à mɛ ɖɛɓɛìn ɖɛ̀ɓɛ̀ìn mú.

¹² À mɛ ɓɔ́ nìɛ̀ kà Kĩ́ìn nì ma kà kɛ. Kĩ́ìn mɔ̀ Ɖɛ-gbà-nyu-nyɔ̀ɔ̀ nyɔ ɖò, ké ɔ ɖáɓá ma ɔ ɖíí-gààɔ̀. Ɖɛ́ kɔ̃̀ jè ɔ ɖáɓá ma kà ɔ kɛ́? Ɔ mɔ̀, ɔ nyuu-ɖɛ̀ ɓěɔ̀ nyìnììn ma dyíin, ké ɔ ɖíí-gàà nyuu-ɖɛ̀ ɓěɔ̀ nɔ̀mɔ̀ ma dyíin jè.

¹³ Ní ɖíí ɓě, ɓóɖó-kpàà nyɔ ɓě dyi ɓě mú nyɛ́ín, ɔ ní ɖá ɓɛ́ ɔ ké ɓě dyi giniìn.

¹⁴ À dyuò kà à ɖǎ mɛ́-mɛ́ mú sɔ̀, ké à ɖǎ fɛ̀ɛ̀ mú dyiɛ. À dyuòɛ̀ dyí, sepóɛɖé à ɖɛ̀ɓɛ̀ à ɖíí ɓě mú. Nyɔ ɓɛ́ ɔ se ɖɛ̀ɓɛ̀ǐn-ɖɛ̀ɓɛ̀ǐn ɓéɖéɛɛ, ɔ nì mɛ́-mɛ́ mú ke.

¹⁵ Nyɔ nyɛ́ ɔ ɖíí-gàà múɛɛ, ɔ mɔ̀ kú-ɖáɓá-nyɔ̀. Ké ɓě dyuòɛ̀ kà kú-ɖáɓá-nyɔ̀ ɖò se sè-ná-sèɛ̀ fɛ̀ɛ̀ ɓéɖé ɖé ɔ múɛ.

¹⁶ Kà à nyu ɖɛ ɖɛ̀ɓɛ̀ǐn-ɖɛ̀ɓɛ̀ǐn jǔ kɛɛ dyí dyuòɛ̀ kɛɛ, ɔ kɛ̀. Kɛ́ɖɛ́ì tò ma ɔ fɛ̀ɛ̀ɔ̀ ɓó à bìì. Ké à mɔ̀ùn ɓéɖé ɓɛ́ à kéɔ́ à fɛ̀ɛ̀ɔ̀ tò ɓó à ɖíí-gàà ɓěɔ̀ bìì.

¹⁷ Kɛɛ ɔ jǔ ké nyɔ ɖò dyi ɓóɖó-kpàà ɖɛ ɓě ɓéɖé, ké ɔ dyiɛ dyé kà ɓɛ́ ɔ ɖíí-gààɔ̀ kɔ̃̀ ɔ kéɔ́ ɖɛ ɖò dyéɛɛ, ké ɔ se ɔ jè gbo kɔ̃̀ ní, nìí, xwɛ̌ Gèɖèpɔ́ɔ̀ ɖɛ̀ɓɛ̀ǐn-ɖɛ̀ɓɛ̀ǐnɔ̀ nyuà ɖé ɔ mú nìɛ̀ kɛ́?

¹⁸ Ní dyú ɓě, ɓěà ɖɛ̀ɓɛ̀ǐn-ɖɛ̀ɓɛ̀ǐnɔ̀ se ɓéɖé ɓɛ́ ɔ ké wuɖu fóɖóún jǔ pū. Kɛɛ ɔ mɛ mɔ̀ jǎà, ké ɔ mɛ kɔ̃̀ nyuu-ɖɛ̀.

À se fɛ̃̀ìn ɓó Gèɖèpɔ́ɔ̀ dyúa

¹⁹ Kà à muɛ kà dyí dyuòɛ̀ nyuùn kà ɓɛ́ à nì ɖé jǎà múɛ. Ké kǎà à muɛ kà nyuɛ nyuùn, ɓɛ́ à hwòɖǒ-dyùàɔ̀ ké dyi dè ɖé Gèɖèpɔ́ɔ̀ gbo.

²⁰ Sepóɛɖé ɔ jǔ ké à hwòɖǒ-dyùàɔ̀ dyi à zaa dúún wáɖáín, nìí, à dyuòɛ̀ dyí kà Gèɖèpɔ́ɔ̀ kpa ɖɛ ké ɔ zi à hwòɖǒ-dyùàɔ̀ dyí, ké ɔ dyuò ɖɛ séín dyíɛ.

²¹ Ní ɖɛ̀ɓɛ̀-nyɔ̀ ɓě, ɔ jǔ ké à hwòɖǒ-dyùàɔ̀ se à zaa dúún wáɖáín, nìí, à se fɛ̃̀ìn ɓó Gèɖèpɔ́ɔ̀ dyúa.

²² Ké ɖɛ séín ɓě ɓɛ́ à zɔ̀ ɔ̀ kɛɛ, ɔ muɛ à nyíìn, sepóɛɖé à nyu ɖɛ ɔ cɛ̃ɛ, ké à nyu ɖɛ dè ɔ hwòɖǒ dyiɛ.

²³ Ɖɛ ɔ cɛ̃ɛ kɛà kɛ̀. Ɔ mɔ̀, kà ɓɛ́ à ké ɔ Dyú Jízɛ̀ Kɛ́ɖɛ́ì nyɛ́nɛ́ɔ̀ hwìɖǐǐ taɓaa nyuɛ, ɔ kè ɓɛ́ à ké mú ɖɛɓɛìn ɖɛ̀ɓɛ̀ìn kà Kɛ́ɖɛ́ì nyuà à gbo cɛ̃ɛ kɛ.

²⁴ Nyɔ séín ɓě ɓɛ́ wa nyu ɖɛ ɓɛ́ Gèɖèpɔ́ɔ̀ cɛ̃ɛ, wa cĩ́ ɖé Gèɖèpɔ́ɔ̀ mú, ké Gèɖèpɔ́ɔ̀ cĩ́ ɖé wa mɔ̀ùn mú. Ké kà à nyuɛ dyí dyuòɛ̀ kà ɓɛ́ Gèɖèpɔ́ɔ̀ cĩ́ ɖé à múɛɛ, ɔ kɛà kɛ̀. Zùù ɓɛ́ ɔ nyí à kɛɛ nyuɛ ké à dyuòɛ̀ dyí.