1 Jɔ̃́ɔ́ 2 - Ɓǎsɔ́ɔ̀ Báɓòɔ̀

Kɛ́ɖɛ́ì wùɖù à bìì

¹ Ní dyú ɓě, ḿ céè ɓě ɖɛ nìà kɛ gbo, ɓɛ́ ɓě ní kɔ̃̀ ɖà nàmàǔn nyu. Kɛɛ ɔ jǔ ké nyɔ ɖò dyi nàmàǔn nyuín, nìí, à ɓéɖé Jízɛ̀ Kɛ́ɖɛ́ì mɔ̀à dyí-sɛ́ɖɛ́ìn-nyɔ̀ɔ̀ kɛ, ké ɔ wùɖù Ɓǎɔ̀ gbo ɓó à bìì.

² Sepóɛɖé dyììn ɖé Kɛ́ɖɛ́ì múɛɛ, Gèɖèpɔ́ɔ̀ ɖǎ à nàmàǔn ɓěɔ̀ kɔ̃in zĩ̀ìn. Ɔ se à nàmàǔn ɓěɔ̀ ɖòùn, kɛɛ ɔ mɔ̀ ɓóɖó-kpà gànáà nyɔ ɓěɔ̀ nììn nàmàǔn ɓěɔ̀ ɖekè.

³ Ɔ jǔ ké à dyi ɖɛ ɓě ɓɛ́ Gèɖèpɔ́ɔ̀ cɛ̃à kɛɛ nyuín, à dyuòɛ̀ dyí jɛ́ɛ́ kà ɓɛ́ à dyuò ɔ dyíɛ.

⁴ Nyɔ ɖò dyiɛ cɛ̃, ké ɔ dyi níiń, ɔ dyuò ɔ dyí, kɛɛ ɔ se ɖɛ ɔ cɛ̃à kɛɛ nyuín, nìí, ɔ mɔ̀ se-tɔ́mɔ́-nyɔ̀, ké jǎà ɖò se ɔ mú nì.

⁵ Kɛɛ nyɔ mɔ̀ nyɔ ɓɛ́ ɔ nyu ɔ wuɖuɔ̀ kɛɛ mɔ̀ nyɔ kɔ̃̀ Gèɖèpɔ́ɔ̀ mú-ɖɛ̀ɓɛ̀-ɖɛ̀ɓɛ̀ɔ̀ ɖǎà gbɔ hwɛ̀ kɛ. Kà à ɓɛ́ìn dyí dyuòɛ̀ nyuɛ kà ɓɛ́ à cĩ́ ɖé Gèɖèpɔ́ɔ̀ múɛɛ kɛà kɛ̀.

⁶ Nyɔ mɔ̀ nyɔ cɛ̃ɛ kà ɓɛ́ ɔ cĩ́ ɖé Gèɖèpɔ́ɔ̀ mú teeɛɛ, ɔ ɓéɖé ɓɛ́ ɔ ké cĩ́ kà ɓɛ́ Jízɛ̀ Kɛ́ɖɛ́ì cĩ́ ma kà kɛ.

Gma ɖìèɔ̀

⁷ Ní ɖɛ̀ɓɛ̀-nyɔ̀ ɓě, gma ɓɛ́ ḿ nìà ɓě gbo céèɛ̌n nyɛɛ se gma ɖìè ɖò. Ɔ mɔ̀ gma sùà ɓɛ́ ɓě ɓéɖé ma sɔ̀ìn ɖé ɖɛ-gbɔ-dè-dè múɛ. Gma sùàɔ̀ mɔ̀ wuɖu ɓě wɔ̃́ ma kɛ.

⁸ Kɛɛ ɔ jèɛɛ, gma ḿ nìà ɓě gbo céèɛ̌n nyɛɛ mɔ̀ gma ɖìè. Ɔ mɔ̀ ɖɛ ɓɛ́ ɔ mɔ̀ jǎà ɖé Kɛ́ɖɛ́ì mú ɔ kè ɖé ɓě múɛ. Sepóɛɖé tíe-kpòɔ̀ nìǎ dyi pauń, ké ce jɛ́ɛ́ɔ̀ nìǎ fãuń kàǔn.

⁹ Nyɔ mɔ̀ nyɔ cɛ̃à kà ɔ nì ceɔ̀ mú, ké ɔ nyɛ́à ɔ ɖíí-gàà múɛɛ, ɔ nì tíe-kpòɔ̀ mú ke.

¹⁰ Nyɔ ɓɛ́ ɔ ɖɛ̀ɓɛ̀ ɔ ɖíí-gàà múɛɛ nì ceɔ̀ mú. Ɔ jèɛɛ, ɖɛ kéɛ nyu ɓɛ́ nyɔ ɖò ké gbǒɛɛ ɖò se ɖé ɔ mú nì.

¹¹ Kɛɛ nyɔ mɔ̀ nyɔ nyɛ́ ɔ ɖíí-gàà múɛɛ nì ɖé tíe-kpòɔ̀ mú. Ɔ nà tíe-kpòɔ̀ mú, ké ɔ se dɛ̀ ɔ nìà muɛń nyɛɛ dyuò, sepóɛɖé tíe-kpòɔ̀ ɖǎ ɔ dyéɖéín dyi kpèìn.

¹² Ní dyú ɓě, ḿ céè ɓě gbo, sepóɛɖé Gèɖèpɔ́ɔ̀ ɖǎ ɓěɛ̀ nàmàǔn ɓěɔ̀ kɔ̃in zĩ̀ìn ɓó Kɛ́ɖɛ́ì nyɛ́nɛ́ɔ̀ jè.

¹³ Ɓǎ ɓě, ḿ céè ɓě gbo, sepóɛɖé ɓě dyuò nyɔ nìà sɔ̀ìn ɖé ɖɛ-gbɔ-dè-dèɔ̀ múɛɛ dyí. Gàa-dyù gmɔ̀ ɓě, ḿ céè ɓě gbo, sepóɛɖé ɓě ɖǎ Ɖɛ-gbà-nyu-nyɔ̀ɔ̀ toún ɖu.

¹⁴ Dyú ɓě, ḿ céè ɓě gbo, sepóɛɖé ɓě dyuò Ɓǎɔ̀ dyí. Ɓǎ ɓě, ḿ céè ɓě gbo, sepóɛɖé ɓě dyuò nyɔ nìà sɔ̀ìn ɖé ɖɛ-gbɔ-dè-dèɔ̀ múɛɛ dyí. Gàa-dyù gmɔ̀ ɓě, ḿ céè ɓě gbo, sepóɛɖé ɓě ku dyi. Gèɖèpɔ́ɔ̀-wùɖùɔ̀ nì ɓě mú, ké ɓě ɖǎ Ɖɛ-gbà-nyu-nyɔ̀ɔ̀ toún ɖu.

¹⁵ Ɓěǐn ɖá ɓɛ́ ɓě ké ɓóɖó-kpàà mú ɖɛ̀ɓɛ̀. Ɓěǐn ɖá ɓɛ́ ɓě ké ɖɛ ɓě nìɛ̀ múɛɛ ɖò mú ɖɛ̀ɓɛ̀. Ɓě dyi ɓóɖó-kpàà mú ɖɛ̀ɓɛ̀ǐn, nìí, Ɓǎɔ̀ mú-ɖɛ̀ɓɛ̀-ɖɛ̀ɓɛ̀ɔ̀ se ɖé ɓě mú nì.

¹⁶ Ɖɛ séín ɓě nìà ɓóɖó-kpàà mú, ɓɛ́ wa mɔ̀à ɖɛ gbà ɓě ɓɛ́ nyɔǔn-dyùɛ̀ mɔ́ɔ́-ɖɛ̀ mɔ́à kɛ kè ɖɛ nyɔ ɓěɔ̀ dyé ké wa mɔ́ kɛ ɔ kè ɖɛ ɓě kɔ̃̀ jè nyɔǔn ɓɔ́ɖɔ́à kɛɛ, wa se ɖé Ɓǎɔ̀ gbo sɔ̀ìn. Wa séín sɔ̀ìn ɖé ɓóɖó-kpàà mú.

¹⁷ Ɓóɖó-kpàà kè ɖɛ séín ɓě nìɛ̀ mú, ɓɛ́ wa kɔ̃̀ tóɛ̀ nyuà nyɔǔn wɛ̃ɛ jè nì dyi ziɛń. Kɛɛ nyɔ mɔ̀ nyɔ ɓɛ́ ɔ nyu ɖɛ ɓɛ́ Gèɖèpɔ́ɔ̀ mɔ́ kɛɛ, ɔ mu nììn kánáá pū.

Kɛ́ɖɛ́ì Gbo-vɔ̃-nyɔ̀ɔ̀

¹⁸ Ní dyú ɓě, ti hwɛ̀ìn-gbɔɔ̀ ɖǎ dyi. Wa cɛ̃ɛ ma ɓě gbo kà ɓɛ́ Kɛ́ɖɛ́ì Gbo-vɔ̃-nyɔ̀ɔ̀ mu ma dyiìn nyɛ. Kàǔn wɛ̃ɛ, Kɛ́ɖɛ́ì gbo-vɔ̃-nyɔ̀ ɓáún-ɓáún ɖǎ dyi. Ɔ jèɛɛ, à dyuòɛ̀ dyí kà ti hwɛ̀ìn-gbɔɔ̀ ɖǎ dyiɛ.

¹⁹ Nyɔ ɓě nìà kɛ se ma à nììn nyɔ ɓě. Wa sɔ̀ ma à hwìɛ̀. Wa dyi ma à nyɔ ɓě jǔ jɛ́ɛ́ ní, nìí, wa mu ma à gbo nììn kánáá pū. Kɛɛ wa sɔ̀ ma à hwìɛ̀, ɓɛ́ ɔ kéɛ nyɔǔn dyí tɛ̀mɛ̀ìn kà wa se ma à ɖò fɔɔ kɛ.

²⁰ Kɛɛ Zùù Hwɛ̀ǐn-hwɛ̀ǐn sɔ̀ìn ɖé Nyɔ Hwɛ̀ǐn-hwɛ̀ǐnɔ̀ gboɛɛ ɖǎ ɓě kɔ̃ dyi. Ɔ jèɛɛ, ɓě séín ɓéɖé hwòɖǒ-fɔ̀nɔ̀-fɔ̀nɔ̀.

²¹ Ɖɛ kɔ̃̀ jè ḿ nìà ɓě gbo céèɛ̌n nyɛɛ, ɔ se ɖɛ ɓɛ́ ɓě ké se jǎàɔ̀ dyí dyuò wɛ. Kɛɛ ɔ mɔ̀, sepóɛɖé ɓě dyuòɛ̀ dyí jè. Ké ɓě dyuòɛ̀ dyí kà se ɖò ní sɔ̀ ɖé jǎàɔ̀ múɛ.

²² Nyɛ́ mɔ̀à se-tɔ́mɔ́-nyɔ̀ɔ̀ kɛ́? Ɔ mɔ̀ nyɔ cɛ̃à, ké ɔ dyià níiń, Jízɛ̀ seà Kɛ́ɖɛ́ìɔ̀ kɛ. Nyɔ nìà kɛ mɔ̀ Kɛ́ɖɛ́ì Gbo-vɔ̃-nyɔ̀ɔ̀. Ɔ ɓɔ́ Ɓǎɔ̀ kè Dyúɔ̀ ní.

²³ Nyɔ ɓɛ́ ɔ ɓɔ́ Dyú-gààɔ̀ kɛɛ se Ɓǎɔ̀ ɓéɖé. Nyɔ ɓɛ́ ɔ kpɔ̃ Dyúɔ̀ jè dyiɛɛ, ɔ ɓéɖé Ɓǎɔ̀ ɖekè.

²⁴ Ɖɛ ɓě wɔ̃́ ma kà sɔ̀ìn ɖé ɖɛ-gbɔ-dè-dè múɛɛ, ɔ mɛ nì ɓě hwìɖǐi kánáá pū. Ɔ jǔ ké ɖɛ ɓě wɔ̃́ ma kà sɔ̀ìn ɖé ɖɛ-gbɔ-dè-dè múɛɛ dyi ɓě hwìɖǐi nì kánáá pū ní, nìí, ɓě mɔ̀ùn mu Dyúɔ̀ kè Ɓǎɔ̀ mú nììn tee.

²⁵ Ɖɛ ɓɛ́ Kɛ́ɖɛ́ì mìɔùn ɖáìn ma à nyɛ́nɛ́ín nyɛɛ mɔ̀ sè-ná-sèɛ̀ fɛ̀ɛ̀.

²⁶ Ḿ céè ɓě ɖɛ nìà kɛ gbo ɓá nyɔ ɓě ɓɛ́ wa nìà mɔ́uń ɓɛ́ wa kéà ɓě cáa jè dyí.

²⁷ Kɛɛ ɔ dyi ɓě mɔ̀ùn jè jǔǐn, Zùù sɔ̀àìn ɖé Kɛ́ɖɛ́ì gboɛɛ ɖǎ ɓě kɔ̃ dyi. Kà ɔ Zùùɔ̀ muà ɓě mú nììn nyɛɛ, ɓě se nyɔ ké ɓě ɖɛ tɛ̀mɛ̀ìn nyɛɛ ɖò mɔ́ɔ mu. Sepóɛɖé Zùùɔ̀ tɛ̀mɛ̀ìn ɓě ɖɛ séín, ké ɖɛ ɔ tɛ̀mɛ̀ìn ɓěɛɛ mɔ̀ jǎà. Ɔ se se. Kà ɓɛ́ ɔ tɛ̀mɛ̀ìn ma ɓě ɖɛɛ, ɓě mɛ nì ɖé Kɛ́ɖɛ́ì mú kánáá pū.

²⁸ Kàǔn wɛ̃ɛ, ní dyú ɓě, ɓě mɛ nì ɖé ɔ mú kánáá pū, ɓɛ́ ɔ jǔ ké ɔ dyi xwáɖáún wóɖóín, kpé ké à dyí kpá. Ké dɛ̃ se à nyuɛ́ mu ɓɛ́ à ké ɔ gbo sɔ̀ ɓó ti ɔ mu dyiìn nyɛ.

²⁹ Ɓě dyuò kà Kɛ́ɖɛ́ì mɔ̀ dyí-sɛ́ɖɛ́ìn-nyɔ̀ kɛ. Ɓě dyiɛ náa dyuò ní, nìí, ɓě mɛ dyuòɛ̀ dyí kà nyɔ ɓě nyu dyí-sɛ́ɖɛ́ìn-ɖɛ̀ kɛɛ mɔ̀ ɔ wóɖóìn-dyùɛ.