1 Kɔ̀ɖéíntĩ̀ɔ̀ 8 - Ɓǎsɔ́ɔ̀ Báɓòɔ̀

Ɖɛ ɓá ɖii-ɖɛ̀ ɓɛ́ wa zàìn kũùn-kpò gbo sáa kɛɛ jè dyíɛ

¹ Ɖɛ ḿ mɛ cɛ̃ ɓá ɖii-ɖɛ̀ wa ɖǎ kũùn-kpò gbo sáa zàìn nyɛɛ jè dyíɛɛ, ɔ kɛ̀. À dyuòɛ̀ kà à séín ɓéɖé fɔ̀nɔ̀-hwòɖǒɛ. Hwòɖǒ-fɔ̀nɔ̀-fɔ̀nɔ̀ ɓúáìn nyɔ dyí, kɛɛ ɖɛ̀ɓɛ̀ǐn-ɖɛ̀ɓɛ̀ǐn kùìn nyɔ dyi.

² Nyɔ ɖò dyiɛ hwìɖǐi poìn kà ɔ dyuò ɖɛ kɛɛ ní, ɔ séèɛ̀ dyí dyuò ke kà ɔ ɓéɖé ɓɛ́ ɔ kéɛ dyí dyuòɛ̀ nyuɛ.

³ Kɛɛ ɔ jǔ ké nyɔ ɖò dyi Gèɖèpɔ́ɔ̀ mú ɖɛ̀ɓɛ̀ǐn, nìí, Gèɖèpɔ́ɔ̀ dyuò ɔ mɔ̀ùn dyí.

⁴ Ɔ jèɛɛ, ɓá ɖii-ɖɛ̀ ɓɛ́ wa ɖǎ kũùn-kpò gbo sáa zàìn nyɛɛ jè dyíɛɛ, à dyuòɛ̀ dyí kà kũùn-kpò se ɖɛ ɖò nɔ̄ ɓóɖó-kpàà kɔ̃ɛ. Ké à dyuòɛ̀ dyí kà Gèɖèpɔ́ɔ̀ nì dyúáɖò, ké gèɖèpɔ́ɔ̀ kà kò ɖò seó ɔ wáún nì ɖeɛ.

⁵ Ɖɛ ɓě ɓɛ́ nyɔǔn ɖáìn gèɖèpɔ́ɔ̀ ɓěɛɛ, ɖíɛ́ ɓě ɓɛ́ìn ɖé dyɔún nìɛ̀, ké ɖíɛ́ ɓě ɓɛ́ìn nɔ̄ ɓóɖó-kpàà kɔ̃ nìɛ̀, kà ɓɛ́ gèɖèpɔ́ɔ̀ pàɖǎ kè nyɔ-wuɖuí-kɔ̃̀-nyɔ̀ pàɖǎ nìà jǎà kɛ.

⁶ Kɛɛ Gèɖèpɔ́ɔ̀ nì dyúáɖò ɓó à mɔ̀ùn bìì. Ɔ mɔ̀ à Ɓǎ, nyɔ kɔ̃̀ mú ɓɛ́ à dyéà ɖɛ séín nyɛ, ké nyɔ kɔ̃̀ bìì ɓɛ́ à nìà kɛ. Ké Bounɓo dyúáɖò nyɛ̀nɛ̀ɛ̀ nì. Ɔ mɔ̀ Jízɛ̀ Kɛ́ɖɛ́ì. Ɖɛ séín dyììn ɖé ɔ mú. Ké à mɔ̀ùn cĩ́ dyììn ɖé ɔ mú.

⁷ Kɛɛ nyɔ séín se ɖɛ nìà kɛ dyí dyuò. Kũùn-kpò ɖǎ nyɔ ɖíɛ́ ɓě hwòɖǒǔn dyi dyuòìn. Ɔ jèɛɛ, wa dyi ɖii-ɖɛ̀ɔ̀ ɖiín, ɔ nì kà ɖɛ wa ɖǎà kũùn-kpò gbo sáa zàìn jɛ́ɛ́ kɛɛ nìà kɛɛ ɖé wa gbo. Ké wa hwòɖǒ gbà, sepóɛɖé waà hwòɖǒɔ̀ se dyi ku jè.

⁸ Ɖii-ɖɛ̀ se à Gèɖèpɔ́ɔ̀ gbo dyàà ɓɛ́ìn. Kɛbì à mɛ se ɖɛ ɖiɛɛ, ɔ seɛ nyuɛ́ mu ɓɛ́ à ké se ɖɛ ɖò dyé, mɔɔ kɛbì à mɛ ɖiɛ kɛɛ, ɔ se à bìì ɖɛ ɖò nyuɛ ɓɛ́ìn.

⁹ Kɛɛ ɓě mɛ ma mú, ɓɛ́ kpé ɓɛ́ ɓě ɓéɖéà kɛɛ ní kɔ̃̀ɔ̀ ɖà nyu ɓɛ́ nyɔ ɓě seà dyi kuɛɛ ké ɓuɖu.

¹⁰ Sepóɛɖé nyɔ ɖò se dyi ku, ké ɔ dyi mɔ̀ mɔ̀ nyɔ ɓéɖéà hwòɖǒ-fɔ̀nɔ̀-fɔ̀nɔ̀ kɛɛ ɖɛ ɖiɛ dyé ɖé kũùn-gbò ɖò múín, nìí, ɖɛ nìà kɛ se ɔ kpéí poɛ́ mu, ɓɛ́ ɔ ké ɖii-ɖɛ̀ ɓɛ́ wa ɖǎ kũùn-kpò gbo sáa zàìn nyɛɛ ɖiì?

¹¹ Ɔ jèɛɛ, nì hwòɖǒ-fɔ̀nɔ̀-fɔ̀nɔ̀ɔ̀ mɔ̀ nyɔ nyuɛ ké gàa se dyi kuɔ̀ gbɔɔ̀ mú. Ɔ mɔ̀ nì ɖíí kɔ̃̀ bìì ɓɛ́ Kɛ́ɖɛ́ì mɛ́à kɛ.

¹² Ɓě dyi ɓěɛ̀ ɖííɔ̀ nàmàǔn nì kà kɛɛ bũ̌ nyu, ké ɔ dyiɛ nyu ké ɔ hwòɖǒ se dyi kuɔ̀ dyi síà ní, nìí, ɓě nyu Kɛ́ɖɛ́ì nàmàǔn bũ̌.

¹³ Ɔ jèɛɛ, ɖɛ ḿ ɖiɛɛ jè dyiɛ nyu ké ḿ ɖííɔ̀ dyi ɓuɖuín, ḿ se dyɛ suaɖɛ̀ ɖò ɖiɛ́ mu ɖe, mɔ́ún kɔ̃̀ɔ̀ ɖà nyuín, ḿ ɖííɔ̀ ní kɔ̃̀ ɖà ɓuɖu.