1 Kɔ̀ɖéíntĩ̀ɔ̀ 7 - Ɓǎsɔ́ɔ̀ Báɓòɔ̀

Dyi-diè-ɖɛ̀ ɓá nyɔ́nɔ́ dyi kpɔ̃ jè dyíɛ

¹ Ɓá ɖɛ ɓě kɔ̃̀ jè ɓě céè ma kà ḿ gboɛ dyíɛɛ, ɔ kɔ̃̀ jè ḿ nìà ɓě gbo céèɛ̌n nyɛ̀. Ɔ nɔ̀mɔ̀ dyíin ɓɛ́ nyɔ ɖò ké seɔ́ nyɔ́nɔ́ dyi kpɔ̃.

² Kɛɛ kà ɓɛ́ kpeɖe-gbà-nyu-nyɔ̀ vòà dyí mìɔ kɛɛ, gàa séín mɛ ɓéɖé wa mìɔùn nììn nyɔ́nɔ́, ké màa séín mɛ ɓéɖé wa nììn dyú-ɓǎ.

³ Gàaɔ̀ mɛ nyu ɖɛ ɓɛ́ ɔ mɔ̀ùn ɓéɖé ɓɛ́ ɔ ké nyuɛɛ ɓó ɔ gmààɔ̀ bìì. Ké kǎà màaɔ̀ mɛ nyuɛ ɖekè.

⁴ Sepóɛɖé màaɔ̀ se ɔ mìɔùn nììn kpóɖó-dyùàɔ̀ kpé kɔ̃ún kɔ̃̀. Ɔ dyú-ɓǎɔ̀ kɔ̃̀ ɔ kpé kɔ̃ún. Ké kǎà dyú-ɓǎɔ̀ se ɔ mìɔùn nììn kpóɖó-dyùàɔ̀ kpé kɔ̃ún kɔ̃̀, kɛɛ ɔ gmààɔ̀ kɔ̃̀ ɔ kpé kɔ̃ún.

⁵ Ɓěǐn ɖá ɓɛ́ ɓě ké kɛ́ɛ́ mú nyuìn nyùìn, ɔ sèìn ɓě sɔ̃́ɔ̀ mɛ wɔ̃́ ɓó ti wè xwíníín hwɛ̀, ɓɛ́ ɓě ké ɓě mìɔùn xwáɖáún zà, ɓɛ́ ɓě ké ɓaà. Kɛɛ ɔ ɖǎ ná nìǐn, nìí, ɓě mɛ kpáìn xwaún ɖe, ɓɛ́ Sétɔ̃̀ ní kɔ̃̀ ɖà ɓě mú dɔ̃̌, ɔ jǔ ké ɓě se ɓě mìɔùn dyí kpɔ̃ɔ ɓɛ́ìn ɖe ní.

⁶ Ḿ cɛ̃ɛ náa pū, kɛɛ ḿ se níiń, ɔ mɔ̀ nyuu-ɖɛ̀ wɛ̃́ɛ́.

⁷ Sepóɛɖé nyɛ́ ɖá nyɔ séín nìɔ̌ má kà ɓɛ́ mɔ́ún nìà kɛɛ kɛ́? Kɛɛ nyɔǔn séín ɓéɖé ɖɛ ɓɛ́ Gèɖèpɔ́ɔ̀ nyí wa kɛ, ké nyíí-ɖɛ̀ ɓěɔ̀ kpa kòɛ̀ ɖò-ɖò.

⁸ Nyɔ ɓě séèà gbo-kpá-nyɔ̀ ɖò ɓéɖéɛ kè jɔ̌ɔ̀-màà ɓěɔ̀, ḿ cɛ̃ɛ wa gbo kà ɔ nɔ̀mɔ̀ dyíin ɓɛ́ wa mɔ̀ùn ké nì kà mɔ́ún nìà kɛɛ ti séín.

⁹ Kɛɛ wa se wa mìɔùn dyí kpɔ̃ɔ ɓɛ́ìn ní, nìí, wa ɓéɖé wa ké gbo-kpá-nyɔ̀ ɓéɖé. Sepóɛɖé ɔ nɔ̀mɔ̀ dyíin ɓɛ́ nyɔ ké gbo-kpá-nyɔ̀ ɓéɖé, ké ɔ zi ɓɛ́ nyɔ́nɔ́-dyi-kpɔ̃-tò mɔɔ dyú-ɓǎ-dyi-kpɔ̃-tò ké wa nyu teeɛɛ dyí.

¹⁰ Ɖɛ ní mu nyɔ ɓě ɓéɖéà gbo-kpá-nyɔ̀ kɛɛ gbo cɛ̃ìn nyɛɛ, ɔ kɛ̀. Ɔ se ḿ mìɔùn nììn wuɖu, kɛɛ ɔ mɔ̀ Bounɓoɔ̀ wuɖu. Ɔ mɔ̀, màaɔ̀ se ɓéɖé ɓɛ́ ɔ ké ɔ dyú-ɓǎɔ̀ dyi táà.

¹¹ Kɛɛ ɔ dyiɛ náa nyuín, nìí, ɔ mɛ sè xwíáún. Ɔ se ná nìǐn, nìí, ɔ mɛ mu ɔ dyú-ɓǎɔ̀ gbo ɖe. Ké dyú-ɓǎɔ̀ mɔ̀ùn ní ɖá ɔ ké ɔ gmààɔ̀ ɓɔ́.

¹² Ní mu nyɔ nìà kɛ nyɔ tɔ̀ɔ̀ ɓěɔ̀ gbo cɛ̃ìn. Ɔ mɔ̀ ḿ mìɔùn nììn wuɖu. Ɔ se Bounɓoɔ̀ wuɖu. À ɖíí cɔ́cì-nyɔ̀ ɖò dyi màa ɓɛ́ ɔ séè Gèɖèpɔ́ɔ̀ hwìɖǐǐ taɓa keɛɛ ɓéɖé, ké ɔ dyi mɔ́ ɓɛ́ ɔ kèɔ̀ kè ké mú niìn ní, nìí, ɔ mɛ ɓɔ́ ɔ ɓɔ́ɔ.

¹³ Ké màa ɖò dyi dyú-ɓǎ ɓɛ́ ɔ séè Gèɖèpɔ́ɔ̀ hwìɖǐǐ taɓa keɛɛ ɓéɖé, ké ɔ dyi mɔ́ ɓɛ́ ɔ kèɔ̀ kè ké mú niìn ní, nìí, ɔ mɛ ɓɔ́ ɔ ɓɔ́ɔ.

¹⁴ Sepóɛɖé gàa mɔ̀ nyɔ ɓɛ́ ɔ séèà Gèɖèpɔ́ɔ̀ hwìɖǐǐ taɓa keɛɛ, Gèɖèpɔ́ɔ̀ ɖǎ ɔ kɔ̃̀ dyììn ɖé ɔ gmààɔ̀ mú. Ké màa mɔ̀ nyɔ ɓɛ́ ɔ séèà Gèɖèpɔ́ɔ̀ hwìɖǐǐ taɓa keɛɛ, Gèɖèpɔ́ɔ̀ ɖǎ ɔ kɔ̃̀ dyììn ɖé ɔ dyú-ɓǎɔ̀ mú. Ɔ seɔ́ ná nìǐn, ɓě dyú ɓěɔ̀ seɔ́ Gèɖèpɔ́ɔ̀ kɔ̃̀ɔ̀-ɖɛ̀ jǔɛ mu. Kɛɛ kà ɔ nìà náa, Gèɖèpɔ́ɔ̀ kɔ̃̀ǎ wa.

¹⁵ Kɛɛ ɔ jǔ ké nyɔ séèà Gèɖèpɔ́ɔ̀ hwìɖǐǐ taɓa keɛɛ dyi mɔ́ ɓɛ́ ɔ ké ɔ gbo-kpá-nyɔ̀ɔ̀ dyi táà ní, nìí, ɓě mɛ wɔ̃́ ɓɛ́ ɔ ké mu. Nyɔ ɖò se à ɖíí cɔ́cì-nyɔ̀ɔ̀ dyi kpɔ̃ɔ ɓɛ́ìn ɖé ɖɛ nì kà kɛɛ mú. Sepóɛɖé Gèɖèpɔ́ɔ̀ ɖǎ à ɖá ɓɛ́ à ké cĩ́ ɖé gìɖìǐ mú.

¹⁶ Noò, m̀ se dyuò kɛbì mɔ̀ muɛ nyuùn ɓɛ́ nì dyú-ɓǎɔ̀ ké pó ní. Ké ɓɔ̌ɔ̀, m̀ se dyuò kɛbì mɔ̀ muɛ nyuùn ɓɛ́ nì gmààɔ̀ ké pó ní.

À mɛ sí ɖɛ ɓɛ́ Bounɓoɔ̀ ɖà à nyíɛɛ kíɖíí ɓɛ́ à ké cĩ́

¹⁷ Kɛɛ kà ɖɛ ɓɛ́ Bounɓoɔ̀ nyí nyɔǔn wɛ̃ɛ nyu nìɛ̀ kɛɛ, ɔ kè kà nyɔǔn nyu ma nìɛ̀ ti ɓɛ́ Gèɖèpɔ́ɔ̀ ɖá ma wa kɛɛ, kǎà wa mɛ nyu cĩ́ɛ. Ɖɛa kɛɛ, ḿ cɛ̃ɛ cɔ́cì-nyɔ̀ ɓě nì dà séín nyɛɛ gbo.

¹⁸ Nyɔ ɖò mɛ́ ma sàà hwɛ̀ ké Gèɖèpɔ́ɔ̀ ɖá ma kà ɔ kɛɛ̀? Ɔ dyi ná nìǐn, ɔ mɛ ɓɔ́ ɔ sàà-ɖáɓá-bɛ̃̀ɔ̀ ɓó zàà. Nyɔ ɖò se sàà mɛ́, ké Gèɖèpɔ́ɔ̀ ɖá ma kà ɔ kɛɛ̀? Ɔ dyi ná nìǐn, ɔ ní ɖá ɔ ké vɔ̃ ɓó sàà mɛ́ jè.

¹⁹ Sàà-mɛ́-mɛ́ mɔɔ se sàà mɛ́, wa sɔ̃́ɔ̀ se ɖɛ kpa. Ɖɛ mɔ̀ ɖɛ kpa ɖɛ kɛɛ mɔ̀ Gèɖèpɔ́ɔ̀ wuɖu-nyu-nyu.

²⁰ Nyɔ séín mɛ nì kà wa nyu ma nìɛ̀ ɓɛ́ Gèɖèpɔ́ɔ̀ dyi ma kà wa ɖáa.

²¹ M̀ mɔ̀ ma gǐì, ké Gèɖèpɔ́ɔ̀ ɖá ma kà m̀ kɛ̀e? Ɔ dyi ná nìǐn, mɔ̀ǔn ɖá ɓɛ́ m̀ kéɛ jè hwìɖǐi poìn. Kɛɛ ɔ jǔ ké m̀ dyi kpé ɓéɖé ɓɛ́ m̀ kéɛ xwaún pó ní, nìí, m̀ mɛ póɛ xwaún.

²² Sepóɛɖé nyɔ ɓɛ́ ɔ mɔ̀ ma gǐì ti ɓɛ́ Gèɖèpɔ́ɔ̀ ɖá ma ɔ ɓɛ́ ɔ ké Bounɓoɔ̀ gbo dyiɛɛ, ɔ mɔ̀ǎ buɛ̀-nyɔ̀ ɓó Bounɓoɔ̀ gbo. Kà dyúáɖòɔ̀ kǎà nyɔ ɓɛ́ ɔ mɔ̀ ma buɛ̀-nyɔ̀ ti ɓɛ́ Gèɖèpɔ́ɔ̀ ɖá ma ɔ kɛɛ, ɔ mɔ̀ Kɛ́ɖɛ́ìɛ̀ gǐì.

²³ Gèɖèpɔ́ɔ̀ dɔ̃ ma ɓě. Ɓěǐn ɖá ɓɛ́ ɓě ké nyɔǔn-dyùɛ̀ gǐì jǔ.

²⁴ Ɔ jèɛɛ, ɖíí ɓě, kà ɓɛ́ ɓě nyu ma nìɛ̀ ɖò-ɖò hwɛ̀ ɓɛ́ Gèɖèpɔ́ɔ̀ dyi ma kà ɓě ɖáa, kǎà ɓě mɛ nyu nìɛ̀ ɓó Gèɖèpɔ́ɔ̀ gbo tee.

Nyɔ ɓě se dyú-ɓǎ ɓéɖéɛ kè jɔ̌ɔ̀-màà ɓě jè

²⁵ Ɓó nyɔ ɓě séè toɖo kɔ̃ jè dyí dyuò keɛ jèɛɛ, Bounɓoɔ̀ se ḿ ɖɛ ɖò gbo cɛ̃ ɓó wa jè. Kɛɛ ḿ nì ɖɛ mɔ́ún poìn hwìɖǐiɛɛ cɛ̃iń, sepóɛɖé Bounɓoɔ̀ nyɔ-wìǐn-dyé-dyéɔ̀ nyuɛ ké ḿ mɔ̀ hwòɖǒ-kɔ̃-dè-nyɔ̀ ɖé nyɔǔn dyéɖéín.

²⁶ Ɖɛ ḿ poìn kà hwìɖǐiɛɛ, ɔ mɔ̀ ɔ nɔ̀mɔ̀ dyíin ɓɛ́ nyɔǔn ké nì kà ɔ nyu nìɛ̀ kɛɛ tee. Ti kàmàǔn-kàmàǔn ɓě ɓɛ́ nyɔ nìà mú kàǔn wɛ̃ɛ jèɛɛ, ɔ mɛ sè ná.

²⁷ M̀ ɖǎ nyɔ́nɔ́ dyi kpɔ̃ɔ̀? Ɔ dyi ná nìǐn, mɔ̀ǔn vɔ̃ ɔ dyi táà jè. M̀ se nyɔ́nɔ́ ɓéɖéè? Ɔ dyi ná nìǐn, ɓɔ́ nyɔ́nɔ́ ɖò dyi mɔ́ɔ.

²⁸ Ɔ jǔ ké m̀ dyi nyɔ́nɔ́ dyi kpɔ̃ ní, m̀ se nàmàǔn nyu. Ké màa-dyù ɖò dyi dyú-ɓǎ ɖò dyi kpɔ̃ ní, ɔ se nàmàǔn nyu. Kɛɛ nyɔ ɓě nyuà ɖɛa kɛɛ, wa mu fũ̀à-fṹá dyéìn nɔ̄ ɓóɖó-kpàà kɔ̃, ké ḿ mɔ́ ɓɛ́ ɓě kéɛ xwaún pó.

²⁹ Ḿ cɛ̃ɛ náa, ḿ ɖíí ɓě, sepóɛɖé ti sèà ɓó kàǔn wɛ̃ɛ, ɔ se ɓoún tɔ̀mɔ̀ ɖe. Ɔ jèɛɛ, nyɔ ɓě ɓɛ́ wa ɓéɖéà nyɔ́nɔ́ kɛɛ, wa mɛ nì kà nyɔ seà nyɔ́nɔ́ ɓéɖéɛɛ nìà kɛ.

³⁰ Nyɔ ɓě ɓɛ́ wa vĩ̌ɛɛ, wa mɛ nì pū kà nyɔ seà vĩ̌ɛń nìɛ. Nyɔ ɓě ɓɛ́ wa kpáà múàǔn wɛ̃ɛ, wa mɛ nì kà nyɔ seà múàǔn kpáa. Nyɔ ɓě ɓɛ́ wa dɔ̃ ɖɛɛ, wa mɛ nì pū kà nyɔ seà ɖɛ kɔ̃̀ɛ.

³¹ Ké nyɔ ɓě nyùàìn ɓóɖó-kpàà ɖɛ ɓě kũ̀à múɛɛ, ɓóɖó-kpàà ɖɛ ɓě kũ̀à mú nyùìn jè mɛ ɓɔ́ wa wuɖuí kɔ̃̀ɔ̀. Sepóɛɖé ɓóɖó-kpàà kpeɖe séín ɓěɔ̀ mu dyi ziìn.

³² Ní mɔ́ ɓɛ́ ɓě ké hwìɖǐi-poìn-ɖɛ̀ kúɖúú ɓěɔ̀ xwaún buɛ̀. Gàa ɓɛ́ ɔ seà nyɔ́nɔ́ ɓéɖéɛɛ, ɔ kɔ̃̀ Bounɓoɔ̀ ɖɛ ɓěɔ̀ jè gbo mìɔ. Ɔ mɔ́ ɓɛ́ ɔ ké Bounɓoɔ̀ hwòɖǒ dyi dè.

³³ Kɛɛ nyɔ mɔ̀ nyɔ ɓɛ́ ɔ ɓéɖéà nyɔ́nɔ́ɛɛ, ɔ kɔ̃̀ ɓóɖó-kpàà ɖɛ ɓě jè gbo mìɔ, sepóɛɖé ɔ mɔ́ ɓɛ́ ɔ ké ɔ gmààɔ̀ hwòɖǒ dyi dè.

³⁴ Ké ɔ ní poìn ɖɛ dyúáɖò jè hwìɖǐi. Ké màa seà dyú-ɓǎ ɓéɖéɛ mɔɔ màa-dyùɛ̀ nyɔ seà toɖo kɔ̃ jè dyí dyuò wɛɛ, ɔ kɔ̃̀ Bounɓoɔ̀ ɖɛ ɓěɔ̀ jè gbo mìɔ. Ɔ mɔ́ ɓɛ́ ɔ ké ɔ kpóɖó-dyùà gànáɔ̀ kè ɔ hwòɖǒ-dyùàɔ̀ Bounɓoɔ̀ xwáɖáún zàìn. Kɛɛ màa ɓɛ́ ɔ kɔ̃̀à dyú-ɓǎ kɛɛ, ɔ kɔ̃̀ ɓóɖó-kpàà ɖɛ ɓě jè gbo mìɔ, sepóɛɖé ɔ mɔ́ ɓɛ́ ɔ ké ɔ dyú-ɓǎɔ̀ hwòɖǒ dyi dè.

³⁵ Ḿ cɛ̃ɛ náa, ɓɛ́ ɔ ké ɓě gbo kpá. Ḿ seɛ cɛ̃, ɓɛ́ ɔ ké ɓě dyí kpɔ̃, kɛɛ ɓɛ́ ɖɛ ké dyíin nɔ̀mɔ̀, ɓɛ́ ɖɛ ɖò ké se ɓě fũ̀à-fṹá nyùìn, ɓɛ́ ɓě ké Bounɓoɔ̀ mɔ́ɔ́-ɖɛ̀ nyuɛ ɓɛ́ìn.

³⁶ Ɔ jǔ ké gàa ɖò dyiɛ hwìɖǐi poìn kà ɓɛ́ ɔ se ɔ mìɔùn dyí gmɔ̀ nɔ̀mɔ̀ dyíin ɓó màa-dyù ɓɛ́ ɔ kpɔ̃à ɓéeín nyɛɛ gbo, ké ɔ se ɔ mìɔùn dyí kpɔ̃ɔ ɓɛ́ìn, ké ɔ dyi ɓéɖé ɓɛ́ ɔ ké ná nìǐn, nìí, ɔ mɛ nyu ɖɛ ɔ mɔ́à kɛ. Wa mɛ kpɔ̃̀ìn dyi. Ɔ dyiɛ náa nyuín, ɔ se nàmàǔn nyu.

³⁷ Kɛɛ nyɔ mɔ̀ nyɔ ɓɛ́ ɔ ku dúún, ké ɖɛ ɖò seɛ nyu ɓɛ́ ɔ ké ɖɛ ɔ nìà nyuɛń nyɛɛ nyu, kɛɛ ɔ kpɔ̃ ɔ mìɔùn dyí, ké ɔ hwòɖǒ ɖǎa gbɔ po ɖé ɔ mìɔùn mú, ɓɛ́ ɔ ké se màa-dyùɔ̀ dyi kpɔ̃ ní, nìí, ɔ mu dyíin nɔ̀mɔ̀ùn.

³⁸ Ɔ jèɛɛ, nyɔ ɓɛ́ ɔ kèɔ̀ kè niìn kà wuɖuún wɛ̃ɛ dyi dyi kpɔ̃̀ìn ní, nìí, ɔ nyu ɖɛ nɔ̀mɔ̀ dyíin. Kɛɛ nyɔ ɓɛ́ ɔ kèɔ̀ kè niìn kà wuɖuún wɛ̃ɛ se dyi kpɔ̃̀ìn ní, nìí, ɖɛ ɔ nyuà ná kɛɛ nɔ̀mɔ̀ dyíin mìɔ.

³⁹ Màa ɓɛ́ ɔ nì ɔ dyú-ɓǎɔ̀ xwa kɛɛ se buɛ̀, kà ɓɛ́ ɔ dyú-ɓǎɔ̀ nì cĩ́ɛń keɛ. Kɛɛ ɔ jǔ ké ɔ dyú-ɓǎɔ̀ dyi mɛ́ín, nìí, ɔ ɓɛ́ìn nyɔ ɔ mɔ́ dyi kpɔ̃ɔ dyiɛɛ dyi kpɔ̃ɔ. Kɛɛ nyɔ ɔ muà dyi kpɔ̃ùn wɛ̃ɛ, ɔ mɛ mɔ̀ Gèɖèpɔ́ɔ̀-nyɔ̀.

⁴⁰ Kɛɛ ɔ jǔ ké ɔ dyi ná ɔ ɖɛ sèǐn, nìí, ɔ mu múà ɓéɖéìn. Ɖɛa ɖé mɔ́ún poìn hwìɖǐi, ké ɖeɛɛ, ḿ poìn hwìɖǐi kà ɓɛ́ ḿ ɓéɖé Gèɖèpɔ́ɔ̀ Zùùɔ̀ ɖekèɛ.