1 Kɔ̀ɖéíntĩ̀ɔ̀ 6 - Ɓǎsɔ́ɔ̀ Báɓòɔ̀

Nyɔ ɓě se Gèɖèpɔ́ɔ̀ dyí dyuòɛɛ zaa gbo-kpa-kpa

¹ Ɔ jǔ ké ɓěɛ̀ nyɔ ɖò kè ɔ mǔè ɖò dyi zaa ɖò dyí ɓɛ̀ɖɛ̀ìn ní, ɔ se fɛ̃̀ìn ɓɛ́ ɔ kéɛ gɔ̌mànà ɓě seà Gèɖèpɔ́ɔ̀ dyí dyuò wɛɛ gbo kpaà? Ɔ seɛ Gèɖèpɔ́ɔ̀-nyɔ̀ ɓě gbo kpaa ɓɛ́ìne?

² Ɓě seɛ dyí dyuò kà Gèɖèpɔ́ɔ̀-nyɔ̀ ɓěɔ̀ mɔ̀ nyɔ mu ɓóɖó-kpàà zaa wɔ̃ poùn wɛ̃ɛ̀? Kɛɛ ɔ jǔ ké ɓě dyi ɓóɖó-kpàà zaa wɔ̃ poɛ́ muín, nìí, ɓě se ɔ nyɔ mɛ́nɛ́-mɛ́nɛ́ ɓěa wɔ̃ poɛ ɓɛ́ìne?

³ Ɓě seɛ dyí dyuò kà à mɔ̀ nyɔ mu ínjà ɓěɔ̀ zaa wɔ̃ poùn wɛ̃ɛ̀? Ɔ dyi ná nìǐn, à se ɓóɖó-kpàà ɖɛ ɓěɔ̀ wɔ̃ poɛ ɓɛ́ìne?

⁴ Ɔ jèɛɛ, ɓě dyi ɓóɖó-kpàà ɖɛ ɓěɔ̀ jè zaa ɖò ɓéɖéín, nìí, ɖɛ́ kɔ̃̀ jè ɓě kpaà nyɔ ɓě se ɖɛ kpa ɖé cɔ́cì-nyɔ̀ ɓěɔ̀ gboɛɛ gbo kɛ́?

⁵ Ḿ cɛ̃ ɖɛa, ɓɛ́ ḿ ké ɓě dɛ̃ nyùìn. Ɓě se hwòɖǒ-fɔ̀nɔ̀-nyɔ̀ dyúáɖò dyéɛ ɓɛ́ìn dyɛ ɖé ɓě hwìɛ̀, ɓɛ́ ɔ ké ɖɛ nì ɖíí sɔ̃́ pṹa kɛɛ wɔ̃ poò?

⁶ Ɓěɛ̀ nyɔ ɖò ɓéɖé ɓɛ́ ɔ ké ɔ ɖíí-gàà gɔ̌mànà gbo kpae? Ɔ ɓéɖé ɓɛ́ ɔ ké ɔ gɔ̌mànà-nyɔ̀ ɓě seà Gèɖèpɔ́ɔ̀ hwìɖǐǐ taɓaa gbo kpae?

⁷ Ɓě kè ɓěɛ̀ ɖííɔ̀ dyi zaa ɖò gɔ̌mànà gbo kpa ní, nìí, ɔ xwíníín mɔ̀ ɓě se toɔ̀ ɖuɛń nì fɔɔ. Ɖɛ́ kɔ̃̀ jè ɓě ní wɔ̃́ ɓɛ́ wa ní nyu ɓě ɖɛ gbà bũ̌ pū kɛ́? Ɖɛ́ kɔ̃̀ jè ɓě ní wɔ̃́ ɓɛ́ wa ní nyu kpoɖo-ɖɛ̀ ɓě bũ̌ pū kɛ́?

⁸ Kɛɛ ɓě seɛ náa nyu. Ɓě mìɔùn nì nyɔǔn ɓě ɖɛ gbà bũ̌ nyuɛń, ké ɓě nì nyɔǔn kpoɖo-ɖɛ̀ bũ̌ nyuɛń. Ké nyɔ ɓě ɓɛ́ ɓě nyuà ɖɛ ɓěa bũ̌ɛɛ, wa mɔ̀ ɓě mìɔùn nììn ɖíí ɓě.

⁹ Ɓě seɛ dyí dyuò kà se-dyí-sɛ́ɖɛ́ìn-nyɔ̀ ɓěɔ̀ se ɖé Gèɖèpɔ́ɔ̀ kã́á-ɓòɖòɔ̀ kɔ̃ pá ɖò kɔ̃̀ɔ̌ muɛɛ̀? Ɓěǐn wɔ̃́ ɓɛ́ nyɔ ɖò ké ɓě cá. Gbàɖàùn-po-nyɔ̀ mɔɔ kũùn-kpò-ɓiè-nyɔ̀ mɔɔ gmaɖe-po-nyɔ̀ mɔɔ nyɔ ɓě nyuà wa mǔè dɛ̃-ɖɛ̀ bũ̌ɛ mɔɔ nyɔ ɓě wɔ̃́à ɓɛ́ wa kéà wa bũ̌ nyuɛ

¹⁰ mɔɔ dyíɖíí-nyɔ̀ mɔɔ ɖɛ-séín-mɔ́-nyɔ̀ mɔɔ nɔmɔɔ-ná-nyɔ̀ mɔɔ nyɔ-wuɖuún-ɖaɓa-nyɔ̀ ɔ kè nyɔ-ɖɛ-gana-xwa-zàìn-nyɔ̀ ɓěɔ̀ ɖò se pá ɖò ɖé Gèɖèpɔ́ɔ̀ kã́á-ɓòɖòɔ̀ kɔ̃ ɓéɖéɛ mu fɔɔ.

¹¹ Kǎà ɓě ɖíɛ́ ɓě nyu ma nìɛ̀. Kɛɛ ɓěɛ̀ nàmàǔn ɓěɔ̀ ɖǎ ɓě bũ̌in dèɖè, ké ɓě ɖǎ ma Gèɖèpɔ́ɔ̀ kɔ̃̀ɔ̀-ɖɛ̀ jǔ, ké ɓě ɖǎ ma dyí sɛ́ɖɛ́ìn ɓó Gèɖèpɔ́ɔ̀ gbo, ɖé Bounɓo Jízɛ̀ Kɛ́ɖɛ́ì nyɛ́nɛ́ɔ̀ mú ɔ kè ɖé à Gèɖèpɔ́ɔ̀ Zùùɔ̀ mú.

Ɓěɛ̀ kpóɖó-dyùàɔ̀ nyuu-ɖɛ̀ mɛ nyuɛ ɓɛ́ Gèɖèpɔ́ɔ̀ ké ɓàìn-ɓàìn dyé

¹² Ɓě ɖá, “À ɓéɖé kpé ɓɛ́ à ké ɖɛ séín nyu.” Ǹdye, kà ɔ nì, kɛɛ ɖɛ ɓěɔ̀ séín ní kpá ná nyɔ gbo. Ḿ ɓéɖé kpé ɓɛ́ ḿ ké ɖɛ séín nyu jǎà jɛ́ɛ́, kɛɛ ḿ se ɖɛ séín ɖòɛ̀ gǐì jǔɛ mu.

¹³ Ɓě ɖá, “Ɖii-ɖɛ̀ mɔ̀ ɓó xwíɖíɔ̀ bìì, ké xwíɖíɔ̀ mɔ̀ùn nì ɓó ɖii-ɖɛ̀ bìì.” Kɛɛ Gèɖèpɔ́ɔ̀ mu wa sɔ̃́ɔ̀ jè dyi zĩ̀ìn. Kɛɛ kpóɖó-dyùàɔ̀ se nì ɓó gbàɖàùn po jè. Ɔ nì ɓó Bounɓoɔ̀ jè. Ké Bounɓoɔ̀ nì ɓó kpóɖó-dyùàɔ̀ bìì.

¹⁴ Gèɖèpɔ́ɔ̀ sɔ̀ìn ma Bounɓoɔ̀ dyí, ké ɔ kpéɔ̀ mu à mɔ̀ùn dyí sɔ̀ìn ɖekè.

¹⁵ Ɓě seɛ dyí dyuò kà ɓɛ́ ɓěɛ̀ kpóɖó-dyùàɔ̀ mɔ̀ Kɛ́ɖɛ́ì nììn kpóɖó-dyùàɔ̀ wáká ɖòɛɛ̀? Kà ɔ nìà náa, nìí, ḿ mɛ ɖú Kɛ́ɖɛ́ì wáká ɓěɔ̀ ɖò dyí, ɓɛ́ ɔ kè gbàɖàùn-màà ké nyɔ dyúáɖò jǔù? Hée.

¹⁶ Ɓě seɛ dyí dyuò kà nyɔ ɖò kè gbàɖàùn-màà dyi xwaún kpáìn ní, nìí, waà kpóɖó-dyùàɔ̀ mɔ̀ ɖɛ dyúáɖò pūɛɛ̀? Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Wa sɔ̃́ɔ̀ mu nyɔ dyúáɖò jǔùn.”

¹⁷ Kɛɛ nyɔ mɔ̀ nyɔ ɓɛ́ ɔ kè Bounɓoɔ̀ mɔ̀à nyɔ dyúáɖò kɛɛ, waà zùùɔ̀ nì dyúáɖò.

¹⁸ Ɓě mɛ fɛ̃̀ìn gbàɖàùn-po-po dyi ti séín. Nàmàǔn tɔ̀ɔ̀ séín ɓɛ́ nyɔǔn nyuɛɛ, wa seɛ wa mìɔùn nììn kpóɖó-dyùàɔ̀ bũ̌ nyu. Kɛɛ gbàɖàùn-po-nyɔ̀ɔ̀ nyu ɔ mìɔùn nììn kpóɖó-dyùàɔ̀ nàmàǔn bũ̌.

¹⁹ Ɓě seɛ dyí dyuò kà ɓɛ́ ɓěɛ̀ kpóɖó-dyùàɔ̀ mɔ̀ Zùù Hwɛ̀ǐn-hwɛ̀ǐn nìà ɖé ɓě múɛɛ gbǒɛɛ̀? Ké Gèɖèpɔ́ɔ̀ mɔ̀ nyɔ nyí ma ɓě Zùù Hwɛ̀ǐn-hwɛ̀ǐnɔ̀. Ɓě se ɓě mìɔùn kɔ̃̀.

²⁰ Gèɖèpɔ́ɔ̀ ɖǎ ɓě dɔ̃. Ɔ jèɛɛ, ɓěɛ̀ kpóɖó-dyùàɔ̀ nyuu-ɖɛ̀ mɛ nyuɛ ɓɛ́ Gèɖèpɔ́ɔ̀ ké ɓàìn-ɓàìn dyé.