1 Kɔ̀ɖéíntĩ̀ɔ̀ 16 - Ɓǎsɔ́ɔ̀ Báɓòɔ̀

Nyíí-ɖɛ̀ Kɛ́ɖɛ́ì ɖeín-sí-nyɔ̀ ɓě ké tòɛɛ jè

¹ Ɓá wíɖí ɓě ɓɛ́ ɓě ké kpɔ̃ ɓó Gèɖèpɔ́ɔ̀-nyɔ̀ ɓěɔ̀ bììɛɛ, ɔ jè ɖɛ ḿ mu cɛ̃ìn nyɛɛ, ɔ kɛ̀. Ɓě mɛ nyu ɖɛ ɓɛ́ ḿ cɛ̃ ma cɔ́cì-nyɔ̀ ɓě nì ɖé Gàɖézìà-ɓòɖòɔ̀ kɔ̃ɛɛ gboɛ.

² Ɖɛ ḿ cɛ̃ maa, ɔ mɔ̀, ɓě ɖò-ɖò ɓě mɛ po wíɖí ɖò wáká ɓó wíkì séínɛ̀ wé kĩ́ín-kĩ́ínɔ̀ ɓaɖa. Jĩ̀ kà ɓɛ́ ɓě mu dyéìn nyɛɛ, ɖéɛ̀ ɓě mɛ zà ɖò, ɓɛ́ ɓě kéɛ dyi dè, ɓɛ́ ḿ dyié dyiɛń nìǐn, ɓě ké se wíɖí ɖò kpɔ̃ ɖe.

³ Ḿ dyié dyiín, ní mu gàa ɓě ɓɛ́ ɓě hwòɖǒ dèàìn múin nyɛɛ Jùɖúsɛ̀ɖɛ̀ìn-hwɔ̀ɖɔ̀ɔ̀ mú tòùn, ɓɛ́ wa ké ɓěɛ̀ nyíí-ɖɛ̀ ɓě ɓɛ́ ɓě muà tòùn wɛ̃ɛ ɖé kpa. Ní mu wa céè-ɖɛ̀ ɓě xwa dèìn.

⁴ Ɔ dyi dyíin nɔ̀mɔ̀, ɓɛ́ ḿ ké mu ɖekè ní, nìí, ḿ kè wa mu muùn.

Pɔ́ɔ̀ dyí-sɔ́-ɖɛ̀

⁵ Ḿ dyi Màsèdónìà-ɓòɖòɔ̀ kɔ̃ zĩ̀ìn ní, nìí, ní mu ɖé ɓě gbo dyiìn, sepóɛɖé ḿ nì ɖé Màsèdónìà-ɓòɖòɔ̀ kɔ̃ zĩ̀ɛ̌n muɛń.

⁶ Ti ɖòɛ̀ ɓaɖaín, ní mu ɖé ɓě gbo ti goun nyuùn. Ké ti ɖòɛ̀ ɓaɖaín, ní mu ɖé sɔ̃̀ɔ̀-tì gànáɔ̀ nyuùn. Pūín, ḿ kè ɓě mu cuòìn, hwɛ̀ ɓɛ́ ḿ ké dɛ̀ ní muà muùn wɛ̃ɛ mu.

⁷ Sepóɛɖé ḿ se mɔ́ ɓɛ́ ḿ ké ɓě dyé, ɓɛ́ ḿ ké zi pū. Kɛɛ ní mɔ́ ɓɛ́ ḿ ké ɖé ɓě gbo hwèɖèìn goun, ɔ jǔ ké ɔ dyi Bounɓoɔ̀ mɔ́ɔ́-ɖɛ̀ jǔǐn.

⁸ Kɛɛ ḿ ɖǎa hwìɖǐi poìn, ɓɛ́ ḿ ké nɔ̄ Ɛ́fɛ́sà-hwɔ̀ɖɔ̀ɛ̀ mú nì, ɓɛ́ Pɛ́nɛ́kɔ̀-wèɔ̀ ké dyi.

⁹ Hwìè ɖò ɖǎ ḿ bìì kaà, ɓɛ́ ḿ ké kũ̀à vɛ̀nɛ̀ ɖò nyu, ɓɛ́ kũ̀àɔ̀ ké ɖɛ ɖò nyu. Ké nyɔ ɓáún-ɓáún nìɛ̀ gbo vɔ̃uń.

¹⁰ Tímétè dyié ɓě gbo dyiín, ɓě mɛ nyuɛ ɓɛ́ ɔ ké se fã̀à peɖe, sepóɛɖé ɔ nì Bounɓoɔ̀ bìì kũ̀à nyuɛń kà ḿ nìà nyuɛń nyɛ.

¹¹ Ɓěɛ̀ nyɔ ɖò ní ɖá ɓɛ́ ɓě ké ɔ zùǔn zàìn. Ɔ dyiá ɖé ɓě gbo sɔ̀ǔn nìǐn, ɓě mɛ cuò ɔ ɖé gìɖìǐ mú, ɓɛ́ ɔ ké nɔ̄ ḿ gbo ɖe dyi, sepóɛɖé ḿ nì ɔ kè à ɖíí ɓěɔ̀ dyi jèɔ̀ hwìɖǐi dèɛ̌n.

¹² Ɓá à ɖíí-gàà Àpɔ́ɖè jè dyíɛɛ, ḿ cɛ̃ɛ ɔ gbo kóɖó-kóɖó, ɓɛ́ ɔ kè à ɖíí tɔ̀ɔ̀ ɓěɔ̀ ké ɓě gboi té. Kɛɛ ɔ se mɔ́ ɓɛ́ ɔ ké dyi kàǔn. Ɔ dyi tiɔ̀ ɓéɖéín, nìí, ɔ mu ɖé dyiìn.

Wuɖu hwɛ̀ìn-gbɔɔ̀

¹³ Ɓě mɛ nì ɓɛ́ɖɛ́ kɔ̃. Ɓě mɛ nyànà dyi gãun-gãun ɖé ɖɛ hwìɖǐǐ-taɓa-taɓa mú. Ɓě mɛ ɓéɖé gàa hwòɖǒ-dyùà. Ɓě mɛ ku dyi.

¹⁴ Ɖɛ séín ɓě mu nyuùn wɛ̃ɛ, ɓě mɛ nyu wa ɖé ɖɛ̀ɓɛ̀ǐn-ɖɛ̀ɓɛ̀ǐn mú.

¹⁵ Ɓě dyuò Sɛ́ɖɛ́fínà kè ɔ ɓíɖí-gbǒ-xwíníín-nyɔ̀ ɓěɔ̀ jè. Wa mɔ̀ ma nyɔ kĩ́ín-kĩ́ín ɓě taɓa ma Kɛ́ɖɛ́ì hwìɖǐǐ ɖé Àkédyà-ɓòɖòɔ̀ kɔ̃ɛ. Wa ɖǎ wa mìɔùn tò cá, ɓɛ́ wa ké Gèɖèpɔ́ɔ̀-nyɔ̀ ɓěɔ̀ gbo kpá.

¹⁶ Ḿ ɖíí ɓě, ní ɓaà ɓě, ɓɛ́ ɓě ké nyɔ ɓě nìà kà kɛ ɔ kè nyɔ ɓě kè wa nyuà kũ̀à dyúáɖò kɛɛ xwíɖíi nì.

¹⁷ Ḿ kpá múàǔn ɓó Sɛ́ɖɛ́fínà kè Fɔ̀tùnétà ɔ kè Àkéékà dyi jè. Wìì ɓɛ́ ḿ kpá ma kà mú, sepóɛɖé ɓě se ma nɔ̄ nì jèɛɛ, waà dyi-dyiɔ̀ ɖǎa nyu ké ní wììɔ̀ ɖǎ múà mú zɛ̃̀ìn.

¹⁸ Wa ɖǎ ní hwòɖǒɔ̀ dyi dè kà wa nyuà ɓě nììn hwòɖǒɔ̀ dyi dèɛ̀ kɛ. Ɓě mɛ kpɔ̃ nyɔ nì kà ɓěa jè dyi.

¹⁹ Cɔ́cì-nyɔ̀ ɓě nìà ɖé Ésìà-ɓòɖòɔ̀ kɔ̃ɛɛ zà ɓě nyíɔún. Àkúɖà kè Pìɖìsíɖà ɔ kè cɔ́cì-nyɔ̀ ɓě poìn kà dyí ɖé wa ɓíɖí-taún teeɛɛ zà ɓě nyíɔún mìɔ ɖé Bounɓoɔ̀ mú.

²⁰ À ɖíí séín ɓě nì nɔ̄ kɛɛ zà ɓě nyíɔún. Ɓě zaìn zàìn nyíɔún ɖé wɔ̃-nyá-nyá mú ɓó dyí-sɛ́ɖɛ́ìn-kà.

²¹ Mɔ̄ Pɔ́ɔ̀, ḿ mìɔùn nì ɓě nyíɔún-zà-zà nyɔà gbo céèɛ̌n cá.

²² Nyɔ ɖò se Bounɓoɔ̀ mú ɖɛ̀ɓɛ̀ǐn, gboò-wùɖù nì ɔ kɔ̃. Bounɓo, dyiáo!

²³ Bounɓo Jízɛ̀ɛ̀ mana mɛ nì ɓě kɔ̃.

²⁴ Ní ɖɛ̀ɓɛ̀ǐn-ɖɛ̀ɓɛ̀ǐnɔ̀ nì ɓě séín kɔ̃ ɖé Kɛ́ɖɛ́ì Jízɛ̀ mú.