1 Kɔ̀ɖéíntĩ̀ɔ̀ 14 - Ɓǎsɔ́ɔ̀ Báɓòɔ̀

Ɖɛ ɖíɛ́ ɓě ɓá ɖɛ Zùùɔ̀ nyí nyɔǔn ɓěɛɛ jè dyíɛ

¹ Ɓě mɛ vɔ̃ ɓɛ́ ɓě ké ɖɛ̀ɓɛ̀ǐn-ɖɛ̀ɓɛ̀ǐn ɓéɖé, ké nyíí-ɖɛ̀ ɓě ɓɛ́ Zùùɔ̀ nyí nyɔǔn wɛ̃ɛ, wa jè mɛ kpɔ̃ ɓě hwòɖǒ. Ɔ nyɔ jɛ́ɛ́ kɔ̃̀ jè mɛ kpɔ̃ ɓě hwòɖǒɛɛ mɔ̀ ɖɛ ɓɛ́ Gèɖèpɔ́ɔ̀ dèìn ɓě wĩín nyɛɛ cɛ̃-cɛ̃.

² Nyɔ mɔ̀ nyɔ ɓɛ́ ɔ wùɖùìn wuɖu kà kò ɖò múɛɛ, Zùùɔ̀ nyuɛ ké ɔ cɛ̃ ɖɛ vǐè ma nyɔǔn dyí kĩ́ín nyɛ. Kɛɛ ɔ wùɖù Gèɖèpɔ́ɔ̀ gbo, ké ɔ se nyɔǔn gbo wùɖù, sepóɛɖé wuɖu ɓě ɓɛ́ ɔ poà kɛɛ, nyɔǔn ní wɔ̃́ɔ múin.

³ Kɛɛ nyɔ mɔ̀ nyɔ ɓɛ́ ɔ cɛ̃ ɖɛ ɓɛ́ Gèɖèpɔ́ɔ̀ dèìn ɔ wĩín nyɛɛ, ɔ wùɖù nyɔǔn gbo. Ké ɔ wuɖu ɓěɔ̀ kùìn wa dyi, ké ɔ po wa kpéí, ké ɔ dè wa hwòɖǒ dyi.

⁴ Nyɔ mɔ̀ nyɔ ɓɛ́ ɔ wùɖùìn wuɖu kà kò ɖò múɛɛ, ɔ kùìn ɔ mìɔùn dyi, kɛɛ nyɔ mɔ̀ nyɔ ɓɛ́ ɔ cɛ̃ ɖɛ ɓɛ́ Gèɖèpɔ́ɔ̀ dèìn ɔ wĩín nyɛɛ, ɔ kùìn cɔ́cì-nyɔ̀ ɓěɔ̀ dyi.

⁵ Ní mɔ́ ɓɛ́ ɓě séín kéɔ́ wuɖu kà kò ɖò mú wùɖùìn, kɛɛ ɖɛ ɓɛ́ ní mɔ́ ɓɛ́ ɓě ké nyu jɛ́ɛ́ kɛɛ, ɔ mɔ̀, ɓɛ́ ɓě ké wuɖu ɓě ɓɛ́ Gèɖèpɔ́ɔ̀ mu ɓě wĩín dèìn nyɛɛ cɛ̃. Nyɔ mɔ̀ nyɔ nyu ɖɛa kɛɛ, ɔ kpa ɖɛ mìɔ ké ɔ zi nyɔ mɔ̀ nyɔ ɓɛ́ ɔ wùɖùìn kà wuɖu kà kò ɖò múɛɛ dyí, nyɔ ɖò zà dyɛ ɔ wuɖuún hwɛ̀, ɓɛ́ cɔ́cì-nyɔ̀ ɓěɔ̀ ké dyi-kùìn-ɖɛ̀ ɓéɖé.

⁶ Kàǔn wɛ̃ɛ, ḿ ɖíí ɓě, ɔ jǔ ké ḿ dyié ɓě gbo dyi, ké ḿ dyi wuɖu kà kò ɖò mú wùɖùìn, ké ḿ se ɓě dyí-tɛ̀mɛ̀ìn-ɖɛ̀ mɔɔ hwòɖǒ-fɔ̀nɔ̀-fɔ̀nɔ̀ mɔɔ cɛ̃́ɛ́-ɖɛ̀ mɔɔ ɖɛ ɓɛ́ Gèɖèpɔ́ɔ̀ dèìn ḿ wĩín nyɛɛ ɓě gbo dyà ní, xwɛ̌ ḿ ɓɛ́ìn ɓě gbo kpáa nyuɛ kɛ́?

⁷ Kà dyúáɖòɔ̀ kǎà ɖɛ ɓě se fɛ̀ɛ̀ ɓéɖé, kɛɛ wa ɓéɖé wuɖuɛɛ nì. Ɔ jǔ ké péé-poo kè gbǎɖí se wuɖu kò-kò ɓě ɓéɖéɛ kpaín, nìí, xwɛ̌ nyɔ ɖò ɓɛ́ìn wɛ́ɖɛ́ wa ɓeɖeà kɛɛ dyí dyuòɛ̀ nyuɛ kɛ́?

⁸ Ké ɖeɛɛ, ɔ jǔ ké wa se ɖɔ-kpaɔ̀ ɓaɖa nɔ̀mɔ̀ dyíin ní, nìí, nyɛ́ mu ti dyéìn ɓó to vɔ̃ jèɛ́?

⁹ Kà ɔ nyu nìɛ̀ ɖé ɓě mìɔùn gbo. Ɔ jǔ ké wuɖu ɓě poà kɛɛ se xwíníín ɖò kɔ̃̀ ní, nìí, xwɛ̌ wa mu ɖɛ ɓě nìà cɛ̃iń nyɛɛ dyí dyuòɛ̀ nyuùn wɛ̃́? Nìí, ɓě mu wùɖùùn pídyi.

¹⁰ Wuɖu kò-kò ɓáún-ɓáún ɓɛ́ìn ɓóɖó-kpàà kɔ̃ nìɛ̀, ké wa séín ɓéɖé xwíníín kìɖì.

¹¹ Kɛɛ ɔ jǔ ké ḿ se wuɖuɔ̀ múin wɔ̃́ ní, nìí, ḿ mɔ̀ ɓóɖó-dù kà kò ɖòɛ̀ nyɔ ɓó nyɔ poà wuɖuɔ̀ kɛɛ gbo, ké ɔ mɔ̀ùn mɔ̀ ɓóɖó-dù kà ɖòɛ̀ nyɔ ɓó mɔ́ún gbo ɖekè.

¹² Kǎà ɔ nì ɖé ɓě mìɔùn gbo. Ɓě nyu cɛ-cɛ ɓó nyíí-ɖɛ̀ ɓě ɓɛ́ Zùùɔ̀ tòà kɛɛ dyé jè. Ɔ jèɛɛ, ɓě mɛ vɔ̃ ɓɛ́ ɓě ké cɔ́cì-nyɔ̀ ɓěɔ̀ dyi kùɛ̌n zi.

¹³ Ɔ jèɛɛ, nyɔ mɔ̀ nyɔ ɓɛ́ ɔ wùɖùìn wuɖu kà kò ɖò múɛɛ, ɔ mɛ ɓaà, ɓɛ́ ɔ ké kpé ɓéɖé, ɓɛ́ ɔ kéɛ mú zà.

¹⁴ Ḿ dyi wuɖu kà kò ɖò mú ɓaàìn ní, nìí, ní zùùɔ̀ nì ɓaàǔn, kɛɛ ní fɔ̀nɔ̀-hwòɖǒɔ̀ seɛ ɖɛ ɖò kɔ̃ún dyé.

¹⁵ Ɖɛ́ kɔó dyíɛ́? Ní zùùɔ̀ mu ɓaàùn. Ní mu ɓaàùn ɖé ɖɛ-múin-wɔ̃́-wɔ̃́ mú ɖekè. Ní zùùɔ̀ mu ɓeɖeìn. Ní mu Gèɖèpɔ́ɔ̀ gbo ɓèɖèìn ɖé ɖɛ-múin-wɔ̃́-wɔ̃́ mú ɖekè.

¹⁶ Kɛɛ ɔ jǔ ké m̀ dyi Gèɖèpɔ́ɔ̀ zùo po ɖé nì zùùɔ̀ múín, nìí, xwɛ̌ nyɔ nìà ɓó, ké ɔ seà nyíí-ɖɛ̀ɔ̀ ɓéɖéɛɛ ɓɛ́ìn “Kǎà ɔ mɛ nì” poɛ kɛ́? Ɔ seɛ nyuɛ ɓɛ́ìn, sepóɛɖé ɔ se ɖɛ m̀ nìà cɛ̃iń nyɛɛ múin wɔ̃́.

¹⁷ M̀ ɓɛ́ìn zùo poɛ nɔ̀mɔ̀ dyíin pū, kɛɛ ɔ se nyɔ tɔ̀ɔ̀ ɓě gbo kpá.

¹⁸ Mɔ́ún po Gèɖèpɔ́ɔ̀ zùo, sepóɛɖé ḿ wùɖùìn wuɖu kà kò ɖò mú mìɔ ké ḿ zi ɓě séín dyí.

¹⁹ Kɛɛ wɛ̃́ɛ́ kɛɛ, ɖé mɔ́ún gboɛɛ, ɔ muɔ́ dyíin nɔ̀mɔ̀ùn ɓɛ́ ḿ kéɔ́ wuɖu-kpò hm̀m̌ ɓɛ́ nyɔǔn ɓɛ́ìn múin wɔ̃́ɔ, ké ɔ ɓɛ́ìn wa ɖɛ tɛ̀mɛ̀ìn nyɛɛ cɔ́cì-nyɔ̀ ɓěɔ̀ hwìɛ̀ cɛ̃, ké ɔ zi ɓɛ́ ḿ ké wuɖu-kpò táázĩ̀ìn ɓaɖa-bùè ɖé wuɖu kà kò ɖò mú wùɖùìn nyɛɛ dyí.

²⁰ Ní ɖíí ɓě, ɓěǐn ɖá ɓɛ́ ɓě ké ɖɛ hwìɖǐi poìn dyú-gbɔ́ɔ́-kà. Ɓě mɛ jǔ dyú-pɛ̀ɖɛ̀ ɖé ɖɛ-gbà-nyu-nyu mú, kɛɛ ɖé ɓěɛ̀ hwìɖǐi-poìn-poìn múɛɛ, ɓě mɛ hwɛ̀ ɖɛ.

²¹ Ɖɛ céè ɖé gma-cèè-ɖɛ̀ɔ̀ múɛɛ ɖá, “Bounɓoɔ̀ ɖá, ‘Ní mu ɓóɖó-dù kà kò ɖòɛ̀ nyɔ ɓě ɓɛ́ wa po wuɖu kà kò ɖò ɓěɛɛ kũ̀à mú nyùìn, ɓɛ́ ḿ ké nyɔ ɓěɛ̀ ɖɛ tɛ̀mɛ̀ìn. Kɛɛ wɛ̃́ɛ́ kɛɛ, wa se ní wuɖuɔ̀ ɖùǔ gbo tòɛ̀ mɔ́.’ ”

²² Ɔ jèɛɛ, wuɖu kà kò ɖò mú-wùɖùìn-wùɖùìn mɔ̀ ɖàɓàìn-ɖɛ̀ ɖé nyɔ ɓě seà Gèɖèpɔ́ɔ̀ hwìɖǐǐ taɓaa gbo. Kɛɛ ɔ se ɓó nyɔ ɓě taɓaà Gèɖèpɔ́ɔ̀ hwìɖǐǐɛɛ bìì. Kɛɛ ɖɛ ɓɛ́ Gèɖèpɔ́ɔ̀ dèìn nyɔǔn wĩín nyɛɛ cɛ̃-cɛ̃ se nyɔ ɓě seà Gèɖèpɔ́ɔ̀ hwìɖǐǐ taɓaa bìì. Ɔ mɔ̀ nyɔ ɓě taɓaà Gèɖèpɔ́ɔ̀ hwìɖǐǐɛɛ bìì.

²³ Ɔ jèɛɛ, ɔ jǔ ké cɔ́cì-nyɔ̀ séín ɓěɔ̀ dyi dyí poìn, ké wa séín dyi wuɖu kà kò ɖò mú wùɖùìn, ké nyɔ ɓě seà ɖɛ ɓěa jè múin wɔ̃́ɛ ɔ kè nyɔ ɓě seà Gèɖèpɔ́ɔ̀ hwìɖǐǐ taɓaa dyi gbǒɔ̀ mú dyáín, wa seɛ cɛ̃ɛ́ mu kà sã̀à nyu ɓěɛe?

²⁴ Kɛɛ ɔ jǔ ké nyɔ séín dyi ɖɛ ɓě ɓɛ́ Gèɖèpɔ́ɔ̀ dèìn wa wĩín nyɛɛ cɛ̃iń nìǐn, nìí, ɖɛ ɓě ɓɛ́ wa séín muà cɛ̃ìn nyɛɛ muɛ nyuùn ɓɛ́ píé-nyɔ̀ dyáà ɖéɛɛ ké ɔ ɖɛ gbà ɓěɔ̀ dyí dyuò, ɓɛ́ ɔ ké ɔ mìɔùn múin gmɔìn.

²⁵ Ké ɔ muɛ nyuùn ké vǐè-ɖɛ̀ ɓě nìà ɖé ɔ hwòɖǒ-dyùà múɛɛ mu píé wóɖóùn. Ɔ jèɛɛ, ɔ mu dyi jìɖǐìn, ké ɔ mu Gèɖèpɔ́ɔ̀ ɓièìn, ké ɔ muɛ cɛ̃ìn, ɓɛ́ ɔ ké níiń, “Gèɖèpɔ́ɔ̀ nì ɓě hwìɛ̀ jǎà.”

Kà ɖɛ ɓě ké ɖeín dyi deɛ̀n nyu ɖé cɔ́cìɔ̀ múɛ

²⁶ Ɖɛ́ kɔó dyíɛ́, ɖíí ɓě? Ɓě dyi dyí poìn ní, nìí, ɓě ɖò-ɖò ɓéɖé wɛ́ɖɛ́ kè cɛ̃́ɛ́-ɖɛ̀, ké ɖò mɔ̀ùn ɓéɖé dyí-tɛ̀mɛ̀ìn-ɖɛ̀ kè wuɖu kà kò ɖò ɔ kè wuɖu ɓěɔ̀ mú-zà-zà. Ɓě ɓéɖé ɓɛ́ ɓě kéɔ́ ɖɛ ɓě nìà kɛ nyu ɓɛ́ cɔ́cì-nyɔ̀ ɓěɔ̀ kéɔ́ dyi ku jè.

²⁷ Nyɔ ɖò dyi wuɖu kà kò ɖò mú wùɖùìn ní, nìí, ɔ mɛ mɔ̀ nyɔ sɔ̃́ mɔɔ nyɔ tã nyɛ̀nɛ̀ɛ̀, ké nyɔ ɓěɔ̀ mɛ kpa waà wuɖu ɖò-ɖò, ké nyɔ-kpò dyúáɖò mɛ zà wa wuɖuɔ̀ mú.

²⁸ Kɛɛ ɔ jǔ ké wa se wuɖuún-zà-nyɔ̀ ɖò ɓéɖéín, nìí, wa mɛ ɓɔ́ wùɖùɛ̀ ɖé cɔ́cì-nyɔ̀ ɓěɔ̀ hwìɛ̀. Wa mɛ wùɖù Gèɖèpɔ́ɔ̀ gbo ɖé wa ɖòùn gbo.

²⁹ Kpáá-ɖɛ̀-cɛ̃-nyɔ̀ ɓěɔ̀ sɔ̃́ kè tã mɛ wùɖù, ɓɛ́ nyɔ tɔ̀ɔ̀ ɓěɔ̀ mɔ̀ùn ké ɖɛ wa muà cɛ̃ìn nyɛɛ múin gmɔìn.

³⁰ Ɔ jǔ ké Gèɖèpɔ́ɔ̀ dyi ɔ mǔè ɓě dèɖěà dyaa ɖò ɖɛ ɖò dyí tɛ̀mɛ̀ìn ní, nìí, nyɔ mɔ̀ùn muà wùɖùɛ̌n nììn nyɛɛ mɛ ɓɔ́ ɓɛ́ nyɔɔ̀ mɔ̀ùn ké wùɖù.

³¹ Ɓě séín ɓɛ́ìn ɖɛ Gèɖèpɔ́ɔ̀ mu ɓě wĩín dèìn nyɛɛ cɛ̃ɛ ɖò-ɖò, ɓɛ́ ɓě séín ké ɖɛ ɖò cɛ̃́, ɓɛ́ ɓě ké kpéí kpá.

³² Kpáá-ɖɛ̀-cɛ̃-nyɔ̀ ɓěɔ̀ kɔ̃̀ wa zùù ɓěɔ̀ wuɖuí,

³³ sepóɛɖé Gèɖèpɔ́ɔ̀ se wĩín-dyi-wùɖù Gèɖèpɔ́ɔ̀, kɛɛ ɔ mɔ̀ gìɖìǐ Gèɖèpɔ́ɔ̀. Kà ɓɛ́ ɔ nyuà nìɛ̀ ɖé Gèɖèpɔ́ɔ̀-nyɔ̀ ɓěɔ̀ dyí-poìn-poìn séín ɓěɔ̀ hwìɛ̀ kɛɛ, kǎà ɔ mɛ nyu ɓě hwìɛ̀ nìɛ̀.

³⁴ Màa ɓěɔ̀ mɛ nì gìɖìǐ ɖé cɔ́cì-nyɔ̀ ɓěɔ̀ dyí-poìn-poìn ɓěɔ̀ hwìɛ̀. Wa se kpé ɓéɖé ɓɛ́ wa ké ɖɛ ɖò cɛ̃. Wa mɛ dyà wa mìɔùn ɓíɖíi, kǎà Gèɖèpɔ́ɔ̀ gmaɔ̀ ɖá.

³⁵ Ɔ jǔ ké wa dyi mɔ́ ɓɛ́ wa ké ɖɛ ɖò múin wɔ̃́ ní, wa mɛ diè waà dyú-ɓǎ ɓěɔ̀ dyi ɖé wa ɓíɖí-taún. Sepóɛɖé ɔ nì dɛ̃ ɓɛ́ màa ɓěɔ̀ ké ɖɛ ɖò cɛ̃ ɖé cɔ́cì-nyɔ̀ ɓěɔ̀ hwìɛ̀.

³⁶ Kē! Gèɖèpɔ́ɔ̀-wùɖùɔ̀ sɔ̀ ma ɖé ɓě hwìɛ̀ kĩ́íne? Ɓě ɖòùn kɔ̃̀ gbo Gèɖèpɔ́ɔ̀-wùɖùɔ̀ dyi ma kà kɛɛ̀?

³⁷ Ɔ jǔ ké nyɔ ɖò dyiɛ hwìɖǐi poìn kà ɔ mɔ̀ kpáá-ɖɛ̀-cɛ̃-nyɔ̀, mɔɔ ɔ mɔ̀ nyɔ ɓɛ́ ɔ ɓéɖé nyíí-ɖɛ̀ ɓɛ́ Zùùɔ̀ nyí ɔ kɛɛ ní, nìí, ɔ mɛ dyuòɛ̀ dyí kà ɖɛ ɓɛ́ ḿ nìà ɓě gbo cɛ̃iń nyɛɛ, ɔ mɔ̀ ɖɛ ɓɛ́ Bounɓoɔ̀ cɛ̃ɛ.

³⁸ Ɔ jǔ ké nyɔ ɖò seɛ náa dyí dyuò jɛ́ɛ́ ní, nìí, wa mɛ ɓɔ́ ɔ mɔ̀ùn dyí dyuòɛ̀.

³⁹ Ɔ jèɛɛ, ḿ ɖíí ɓě, ɖɛ ɓě ɓɛ́ Gèɖèpɔ́ɔ̀ dèìn ɓě wĩín nyɛɛ cɛ̃-cɛ̃ mɛ kpɔ̃ ɓě hwòɖǒ. Ké ɓě ní po nyɔ ɓě mɔ́ ɓɛ́ wa ké wuɖu kà kò ɖò mú wùɖùìn nyɛɛ ɓɔ́í.

⁴⁰ Kɛɛ ɓě mɛ nyu ɖɛ séín nɔ̀mɔ̀ dyíin, ɔ kè kà ɓɛ́ ɓě ɓéɖé ɓɛ́ ɓě ké wa nyuɛ.