1 Kánáníkɔ̀ 27 - Ɓǎsɔ́ɔ̀ Báɓòɔ̀

Sójà ɓě kè gɔ̌mànà-kpòò ɓě

¹ Éézùɖùɛ̀-kã̀ǎɔ̀ sójà ɓěɔ̀ ge ma mú kpoo ɓaɖa-bùè sè sɔ̃́. Kpoo ɖò-ɖò séín ɓéɖé ma sójà táázĩ̀ìn kpáɖá-nyɔ sè hĩinyɛ. Ké kpoo ɖò nììn kũ̀à-tì dyi ɓó nyini ní, ɔ nyu kũ̀à ɓó dɛ̀nɛ̀ dyúáɖò xwíníín ɖé zɔ̃ séín mú. Kpoo ɖò-ɖò ɓěɔ̀ ɓéɖé ma gbǒ-xwíníín ɓěɛ̀ nyɔ vɛ̀nɛ̀ ɓě kè sójà hɔ̃dɛ̀ɖɛ̀ ɓě wuɖuí-kɔ̃̀-nyɔ̀ ɓě kè sójà táázĩ̀ìn ɓě wuɖuí-kɔ̃̀-nyɔ̀ ɓě ɔ kè sójà-nàìn-nyɔ̀ tɔ̀ɔ̀ ɓě. Kpoo ɖò-ɖò ɓěɔ̀ wuɖuí-kɔ̃̀-nyɔ̀ ɓěɔ̀ kɛà kɛ̀.

² Jàsóɓèàùn ɓɛ́ ɔ mɔ̀ ma Zàɖíèɛ̀ dyú-gàà kɛɛ kɔ̃̀ ma kpoo kĩ́ín-kĩ́ínɔ̀ wuɖuí ɖé dɛ̀nɛ̀ kĩ́ín-kĩ́ínɔ̀ xwíníín. Nyɔ-kpò táázĩ̀ìn kpáɖá-nyɔ sè hĩinyɛ nì ma ɖé ɔ nììn kpooɔ̀ mú.

³ Ɔ mɔ̀ ma Pɛ́wɛ̀ɖɛ̀ nììn xwíníín-dyù ɓěɔ̀ ɖò, ké ɔ mɔ̀ ma sójà-wuɖuí-kɔ̃̀-nyɔ̀ séín ɓěɔ̀ nììn nyɔ vɛ̀nɛ̀ ɖé dɛ̀nɛ̀ kĩ́ín-kĩ́ínɔ̀ xwíníín.

⁴ Ké Dóɖò mɔ̀à Àhóà-nyɔ̀ɔ̀ kɛɛ mɔ̀ nyɔ kɔ̃̀ ma kpooɔ̀ nyɔ kɔ ma ɓó dyíɛɛ wuɖuí ɖé dɛ̀nɛ̀ sɔ̃́ nììnɔ̀ xwíníín, ké Míkɔ̀ɖɔ̀ mɔ̀ ma ɔ sɔ̃-xwíɖíi-dè-nyɔ̀. Nyɔ-kpò táázĩ̀ìn kpáɖá-nyɔ sè hĩinyɛ nì ma ɖé ɔ nììn kpooɔ̀ mú.

⁵ Ké Bɛ̀nádyà mɔ̀à Jɛ̀hódyáɖà mɔ̀à sáa-zà-nyɔ̀ vɛ̀nɛ̀ɔ̀ kɛɛ dyú-gààɔ̀ kɛɛ mɔ̀ nyɔ kɔ̃̀ ma kpooɔ̀ tã nììnɔ̀ wuɖuí ɖé dɛ̀nɛ̀ tã nììnɔ̀ xwíníín. Nyɔ-kpò táázĩ̀ìn kpáɖá-nyɔ sè hĩinyɛ nì ma ɖé ɔ nììn kpooɔ̀ mú.

⁶ Bɛ̀nádyà nìà kɛ mɔ̀ ma kà gàa-zà-nyɔ̀ vɛ̀nɛ̀ɔ̀ ɖé gàa-zà-nyɔ̀ kpáɖá-nyɔ ɓaɖa-bùè ɓěɔ̀ hwìɛ̀ kɛ̀. Ɔ kɔ̃̀ ma wa wuɖuí. Ɔ dyú-gàà Àmìzáɓà mɔ̀ ma ɔ sɔ̃-xwíɖíi-dè-nyɔ̀.

⁷ Ké Àsáhèò mɔ̀à Jóàà ɖíí-gààɔ̀ kɛɛ mɔ̀ nyɔ kɔ̃̀ ma kpooɔ̀ hĩinyɛ nììnɔ̀ wuɖuí ɖé dɛ̀nɛ̀ hĩinyɛ nììnɔ̀ xwíníín. Ɔ dyú-gàà Zɛ́ɓàɖíà mɔ̀ ma ɔ sɔ̃-xwíɖíi-dè-nyɔ̀. Nyɔ-kpò táázĩ̀ìn kpáɖá-nyɔ sè hĩinyɛ nì ma ɖé ɔ nììn kpooɔ̀ mú.

⁸ Ké Sã́hù ɓɛ́ ɔ mɔ̀ ma Ízàɖà-nyɔ̀ ɖò kɛɛ mɔ̀ nyɔ kɔ̃̀ ma kpooɔ̀ hm̀m̌ nììnɔ̀ wuɖuí ɖé dɛ̀nɛ̀ hm̀m̌ nììnɔ̀ xwíníín. Nyɔ-kpò táázĩ̀ìn kpáɖá-nyɔ sè hĩinyɛ nì ma ɖé ɔ nììn kpooɔ̀ mú.

⁹ Ké Dyíwàɖà mɔ̀à Íkèɛ̀ dyú-gàà, ɓɛ́ ɔ sɔ̀à ɖé Tèkóà-hwɔ̀ɖɔ̀ɔ̀ múɛɛ mɔ̀ nyɔ kɔ̃̀ ma kpooɔ̀ mɛ̀nɛ̌ìn-ɖò nììnɔ̀ wuɖuí ɖé dɛ̀nɛ̀ mɛ̀nɛ̌ìn-ɖò nììnɔ̀ xwíníín. Nyɔ-kpò táázĩ̀ìn kpáɖá-nyɔ sè hĩinyɛ nì ma ɖé ɔ nììn kpooɔ̀ mú.

¹⁰ Ké Hɛ́ɖɛ̀ mɔ̀à Ífèɖèìn-nyɔ̀, ɓɛ́ ɔ sɔ̀à Páɖɛ̀-hwɔ̀ɖɔ̀ɔ̀ múɛɛ mɔ̀ nyɔ kɔ̃̀ ma kpooɔ̀ mɛ̀nɛ̌ìn-sɔ̃́ nììnɔ̀ wuɖuí ɖé dɛ̀nɛ̀ mɛ̀nɛ̌ìn-sɔ̃́ nììnɔ̀ xwíníín. Nyɔ-kpò táázĩ̀ìn kpáɖá-nyɔ sè hĩinyɛ nì ma ɖé ɔ nììn kpooɔ̀ mú.

¹¹ Ké Sìɓɛ́kàì mɔ̀à Zɛ́wàɖàà xwíníín-dyù ɓěɔ̀ ɖò, ɓɛ́ ɔ sɔ̀à ɖé Húsà-hwɔ̀ɖɔ̀ɔ̀ múɛɛ mɔ̀ nyɔ kɔ̃̀ ma kpooɔ̀ mɛ̀nɛ̌ìn-tã nììnɔ̀ wuɖuí ɖé dɛ̀nɛ̀ mɛ̀nɛ̌ìn-tã nììnɔ̀ xwíníín. Nyɔ-kpò táázĩ̀ìn kpáɖá-nyɔ sè hĩinyɛ nì ma ɖé ɔ nììn kpooɔ̀ mú.

¹² Ké Áɓìɛ́zɛ̀ mɔ̀à Bɛ̃́címà-nyɔ̀, ɓɛ́ ɔ sɔ̀à ɖé Ànáfò-hwɔ̀ɖɔ̀ɔ̀ múɛɛ mɔ̀ nyɔ kɔ̃̀ ma kpooɔ̀ mɛ̀nɛ̌ìn-hĩinyɛ nììnɔ̀ wuɖuí ɖé dɛ̀nɛ̀ mɛ̀nɛ̌ìn-hĩinyɛ nììnɔ̀ xwíníín. Nyɔ-kpò táázĩ̀ìn kpáɖá-nyɔ sè hĩinyɛ nì ma ɖé ɔ nììn kpooɔ̀ mú.

¹³ Ké Màháwàɖàì mɔ̀à Zɛ́wàɖàà xwíníín-dyù ɓěɔ̀ ɖò, ɓɛ́ ɔ sɔ̀à ɖé Nɛ̀tófà-hwɔ̀ɖɔ̀ɔ̀ múɛɛ mɔ̀ nyɔ kɔ̃̀ ma kpooɔ̀ ɓaɖa-bùè nììnɔ̀ wuɖuí ɖé dɛ̀nɛ̀ ɓaɖa-bùè nììnɔ̀ xwíníín. Nyɔ-kpò táázĩ̀ìn kpáɖá-nyɔ sè hĩinyɛ nì ma ɖé ɔ nììn kpooɔ̀ mú.

¹⁴ Ké Bɛ̀nádyà mɔ̀à Ífèɖèìn-nyɔ̀, ɓɛ́ ɔ sɔ̀à ɖé Pìwáɖáfàùn-hwɔ̀ɖɔ̀ɔ̀ múɛɛ mɔ̀ nyɔ kɔ̃̀ ma kpooɔ̀ ɓaɖa-bùè sè ɖò nììnɔ̀ wuɖuí ɖé dɛ̀nɛ̀ ɓaɖa-bùè sè ɖò nììnɔ̀ xwíníín. Nyɔ-kpò táázĩ̀ìn kpáɖá-nyɔ sè hĩinyɛ nì ma ɖé ɔ nììn kpooɔ̀ mú.

¹⁵ Ké Héɖàì mɔ̀à Àníèɛ̀ xwíníín-dyù ɓěɔ̀ ɖò, ɓɛ́ ɔ sɔ̀à ɖé Nɛ̀tófà-hwɔ̀ɖɔ̀ɔ̀ múɛɛ mɔ̀ nyɔ kɔ̃̀ ma kpoo ɓaɖa-bùè sè sɔ̃́ nììnɔ̀ wuɖuí ɖé dɛ̀nɛ̀ ɓaɖa-bùè sè sɔ̃́ nììnɔ̀ xwíníín. Nyɔ-kpò táázĩ̀ìn kpáɖá-nyɔ sè hĩinyɛ nì ma ɖé ɔ nììn kpooɔ̀ mú.

Éézùɖùɛ̀-xwèɖè-dù ɓěɔ̀ wuɖuí-kɔ̃̀-nyɔ̀ ɓě

¹⁶ Éézùɖùɛ̀-xwèɖè-dù ɓěɔ̀ wuɖuí-kɔ̃̀-nyɔ̀ ɓěɔ̀ kɛà kɛ̀. Ɛ̀ɖìɛ́zɛ̀ mɔ̀ ma Zíkìɖìɛ̀ dyú-gàà kɛɛ kɔ̃̀ ma Wuɖuɓíín nììn xwéɖé-dùɔ̀ wuɖuí. Ké Sɛ̀fátìà mɔ̀ ma Máákàà dyú-gàà kɛɛ kɔ̃̀ ma Símìɔ̀ nììn xwéɖé-dùɔ̀ wuɖuí.

¹⁷ Ké Hàsáɓíà mɔ̀ ma Kɛ̀múèɛ̀ dyú-gàà kɛɛ kɔ̃̀ ma Ɖíìváà nììn xwéɖé-dùɔ̀ wuɖuí. Ké Záɖò kɔ̃̀ ma Eɖóún nììn xwíníín-dyù ɓěɔ̀ wuɖuí.

¹⁸ Ké Ɛ̀ɖíhù mɔ̀ ma Dèɓéɛ̀ ɖíí-gàà ɓěɔ̀ ɖòɛɛ kɔ̃̀ ma Júɖà nììn xwéɖé-dùɔ̀ wuɖuí. Ké Ɔ̃́wìɖì mɔ̀ ma Makɔ́ɛ̀ dyú-gàà kɛɛ kɔ̃̀ ma Ɛ́sàkà nììn xwéɖé-dùɔ̀ wuɖuí.

¹⁹ Ké Ìmádyà mɔ̀ ma Òbòdádyàà dyú-gàà kɛɛ kɔ̃̀ ma Zɛ́ɓíúɖɔ̀ùn nììn xwéɖé-dùɔ̀ wuɖuí. Ké Jɛ̀wíɖímɔ̀ mɔ̀ ma Àzíɖíèɛ̀ dyú-gàà kɛɛ kɔ̃̀ ma Náfátàɖì nììn xwéɖé-dùɔ̀ wuɖuí.

²⁰ Ké Hòséà mɔ̀ ma Ázàzíàà dyú-gàà kɛɛ kɔ̃̀ ma Ífèɖèìn nììn xwéɖé-dùɔ̀ wuɖuí. Ké Jóɛ̀ mɔ̀ ma Pɛ̀dyáɖàà dyú-gàà kɛɛ kɔ̃̀ ma Mànásìɛ̀ xwéɖé-dù fáún-fáún nìà ɖé Jɔ́nì-nìɔ̀ dyóɖó-dyi-kpáìn-naínɔ̀ kɛɛ wuɖuí.

²¹ Ké Íɖò mɔ̀ ma Zɛ́kɔ̀wáɖádyàà dyú-gàà kɛɛ kɔ̃̀ ma Mànásìɛ̀ xwéɖé-dù fáún-fáún tɔ̀ɔ̀ nìà ɖé Gíɖèà-ɓòɖòɔ̀ kɔ̃ɛɛ wuɖuí. Ké Jáásìè mɔ̀ ma Áɓínɛ̀ɛ̀ dyú-gàà kɛɛ kɔ̃̀ ma Bɛ̃́címà nììn xwéɖé-dùɔ̀ wuɖuí.

²² Ké Àzáwèɖèò mɔ̀ ma Jɛ̀ɖóhã̀à dyú-gàà kɛɛ kɔ̃̀ ma Dɛ̃́ìn nììn xwéɖé-dùɔ̀ wuɖuí. Nyɔ ɓěa mɔ̀ ma Éézùɖùɛ̀-xwèɖè-dù ɓěɔ̀ wuɖuí-kɔ̃̀-nyɔ̀ ɓěɔ̀.

²³ Ti ɓɛ́ Dèɓé zɛɖɛ ma kà Éézùɖùɛ̀-nyɔ̀ ɓěɔ̀ kɛɛ, ɔ se ma nyɔ ɓě ɓɛ́ wa séè zɔ̃ kpáɖá-nyɔ nyuɛɛ zɛɖɛ, sepóɛɖé Bounɓoɔ̀ ɖǎa ma Éézùɖùɛ̀-nyɔ̀ ɓěɔ̀ nyɛ́nɛ́ín ɖáìn kà ɔ muɛ nyuùn ɓɛ́ wa ké dyí vòɛ̌n zi kà dɛ̀nɛ̀ mɛ́nɛ́ɛ́ nìà ɖé dyɔɔ̀ dyíɛɛ nyuà nìɛ̀ kɛ.

²⁴ Jóà kɔ̃̀ ɖe mɔ̀à Zɛ̀wúɖúdyà kɛɛ dè ma wa zɛɖɛɛ gbɔ, kɛɛ ɔ seɛ ma dyí hwɔ, sepóɛɖé Gèɖèpɔ́ɔ̀ dyoɖoɔ̀ dyi ma nyɔ ɓěɔ̀ kɔ̃ ɓóɛ jè. Ɔ jèɛɛ, kà wa nyu jĩ̀ɛ̀ kɛɛ se ma ɖé Kã́á Dèɓéɛ̀ kpáá-ɖɛ̀-sùà-cèè-ɖɛ̀ɔ̀ mú céè.

Kã́áɔ̀ kɔ̃̀ɔ̀-ɖɛ̀ ɓě jè gbo-gmɔ̀-nyɔ̀ ɓě

²⁵ Nyɔ ɓě ɓɛ́ wa gmɔ̀ ma kã́áɔ̀ kɔ̃̀ɔ̀-ɖɛ̀ ɓěɔ̀ jè gboɛɛ kɛà kɛ̀. Àmávɛ̀ mɔ̀ ma Áɖìèɛ̀ dyú-gàà kɛɛ mɔ̀ ma kã́á-gbòɔ̀ ɖɛín-dyi-dèìn-naínɔ̀ jè gbo-gmɔ̀-nyɔ̀. Ké Jònétɔ̃̀ mɔ̀ ma Dyùzíàà dyú-gàà kɛɛ mɔ̀ ma ɓóɖóɔ̀ ɖɛín-dyi-dèìn-naín ɓě nì ma ɖé hwɔɖɔ vɛ̀nɛ̀ ɓěɔ̀ mú kè ɖé hwɔɖɔ-kpàǎ ɓěɔ̀ kɔ̃ ɔ kè ɖé to-pèɖèìn-naín ɓěɔ̀ kɛɛ jè gbo-gmɔ̀-nyɔ̀.

²⁶ Ké Ɛ́zìɖì mɔ̀ ma Kíɖùɛ̀ dyú-gàà kɛɛ mɔ̀ ma geɖe-nyu-nyɔ̀ ɓěɔ̀ wuɖuí-kɔ̃̀-nyɔ̀.

²⁷ Ké Símì mɔ̀ ma Wáɖámàà-hwɔ̀ɖɔ̀ɔ̀ nyɔ ɖò kɛɛ mɔ̀ ma géɖéè-gbǎ ɓěɔ̀ jè gbo-gmɔ̀-nyɔ̀. Ké Záɖì mɔ̀ ma Sífímì-nyɔ̀ ɖò kɛɛ mɔ̀ ma géɖéè ɓě sɔ̀ ɖé géɖéè-gbǎ ɓě kɔ̃̀ mú ɓɛ́ wa ké wã́ìn zà kɛɛ jè gbo-gmɔ̀-nyɔ̀.

²⁸ Ké Béò-Hánà mɔ̀ ma Géɖɛ̀-nyɔ̀ ɖò kɛɛ mɔ̀ ma ɔ́ɖè-gbǎ ɓě kè síkímɔ̀-gbǎ ɓě nìà ɖé bɔɔ-kpà hwɔà ɖé Júɖà Toɖo-ɓòɖòɔ̀ dyóɖó-dyi-kpáìn-naínɔ̀ dyíɛ kɔ̃ɛɛ jè gbo-gmɔ̀-nyɔ̀. Ké Jóàsì mɔ̀ ma cáná-dyi-dèìn-naín ɓěɔ̀ jè gbo-gmɔ̀-nyɔ̀.

²⁹ Ké Sìtáɖàì mɔ̀ ma Sáwɔ̀ɖɔ̀ùn-nyɔ̀ ɖò kɛɛ mɔ̀ ma nyúà-ɖɛ̀ ɓě ɓɛ́ wa ɖi ma dyi ɖé Sáwɔ̀ɖɔ̀ùn-pàɔ̀ múɛɛ jè gbo-gmɔ̀-nyɔ̀. Ké Sáfà mɔ̀ ma Áɖàìɛ̀ dyú-gàà kɛɛ mɔ̀ ma nyúà-ɖɛ̀ ɓě ɓɛ́ wa ɖi ma dyi ɖé bɔɔ-kpà ɓěɔ̀ kɔ̃ɛɛ jè gbo-gmɔ̀-nyɔ̀.

³⁰ Ké Óɓìò mɔ̀ ma Ésìméò-nyɔ̀ ɖò kɛɛ mɔ̀ ma sǒ-nì-gbu-kɔ̃ún ɓěɔ̀ jè gbo-gmɔ̀-nyɔ̀. Ké Jɛ̀ɖɛ́dyà mɔ̀ ma Mèwóɖónɔ̀-nyɔ̀ ɖò kɛɛ mɔ̀ ma jǎkasì ɓěɔ̀ jè gbo-gmɔ̀-nyɔ̀.

³¹ Ké Jázì mɔ̀ ma Hágìɖì-nyɔ̀ ɖò kɛɛ mɔ̀ ma ɓáɖáá ɓěɔ̀ kè wiɖi ɓěɔ̀ jè gbo-gmɔ̀-nyɔ̀. Nyɔ séín ɓěa mɔ̀ ma Kã́á Dèɓéɛ̀ kɔ̃̀ɔ̀-ɖɛ̀ ɓěɔ̀ jè gbo-gmɔ̀-nyɔ̀.

Dèɓéɛ̀ náún-po-nyɔ̀ ɓě

³² Ké Jònétɔ̃̀ mɔ̀à Dèɓéɛ̀ ɓǎ ɖíí-gààɔ̀ kɛɛ mɔ̀ ma ɔ náún-po-nyɔ̀ ɓěɔ̀ ɖò. Ɔ fɔ̀nɔ̀ ma hwòɖǒ mìɔ, ké ɔ dyuò ma céè-ɖɛ̀. Jònétɔ̃̀ kè Jɛ̀híò mɔ̀ ma Hámɔ̀nìɛ̀ dyú-gàà kɛɛ mɔ̀ ma kã́áɔ̀ dyú-gàà ɓěɔ̀ ɖɛ-tɛ̀mɛ̀ìn-nyɔ̀.

³³ Ké Àhìtófɛ̀ mɔ̀ ma kã́áɔ̀ náún-po-nyɔ̀ ɓěɔ̀ ɖò. Ké Húsàì mɔ̀à Ákì-nyɔ̀ɔ̀ kɛɛ mɔ̀ ma kã́áɔ̀ ɓǎto.

³⁴ Ké nyɔ ɓě ɓɛ́ wa sè ma Àhìtófɛ̀ bɛ̃̌ǐn nyɛɛ mɔ̀ ma Jɛ̀hódyáɖà mɔ̀ ma Bɛ̀nádyàà dyú-gàà kɛ kè Ábìáfà. Ké Jóà kɔ̃̀ ma kã́áɔ̀ sójà séín ɓěɔ̀ wuɖuí.