1 Kánáníkɔ̀ 26 - Ɓǎsɔ́ɔ̀ Báɓòɔ̀

Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓě

¹ Ɓó tia ɓaɖaa, wa po ma Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ kpoo ɖò-ɖò ɓě mú ɖekè. Kǎà kpoo ɖò-ɖò ɓěɔ̀ jè nyu kà nìɛ̀. Mɛ̀sɛ́ɖɛ̀míà mɔ̀ ma Kówèɖèɛ̀ dyú-gàà, ɓɛ́ ɔ mɔ̀ ma Ásàfìɛ̀ xwíníín-dyù ɓěɔ̀ ɖò ké ɔ sɔ̀ ma ɖé Kówàɖà nììn gbǒ-xwíníínɔ̀ múɛɛ mɔ̀ nyɔ wa gã ma kĩ́ín.

² Mɛ̀sɛ́ɖɛ̀míà wóɖóìn ma gàa-dyù ɓě. Wa mɔ̀ Zɛ́kɔ̀wáɖádyà mɔ̀à nyíɔ́-dyùɔ̀ kɛ, kè Jɛ̀ɖíàè mɔ̀à dyúɔ̀ sɔ̃́ nììnɔ̀ kɛ, kè Zɛ́ɓàɖíà mɔ̀à dyúɔ̀ tã nììnɔ̀ kɛ, kè Jánìè mɔ̀à dyúɔ̀ hĩinyɛ nììnɔ̀ kɛ,

³ kè Éɖàùn mɔ̀à dyúɔ̀ hm̀m̌ nììnɔ̀ kɛ, kè Jɛ́hòhánà mɔ̀à dyúɔ̀ mɛ̀nɛ̌ìn-ɖò nììnɔ̀ kɛ, ɔ kè Ɛ́ɖìɛ̀hòénàì mɔ̀à dyúɔ̀ mɛ̀nɛ̌ìn-sɔ̃́ nììnɔ̀ kɛ.

^4-5 Ké Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ sɔ̃́ nììn ɓɛ́ wa gã ma kɛɛ mɔ̀ Óɓè-Íɖɔ̀ùn. Óɓè-Íɖɔ̀ùn mɔ̀ùn wóɖóìn ma gàa-dyù ɓě ɖekè, sepóɛɖé Gèɖèpɔ́ɔ̀ po ma ɔ mana kɔ̃. Ɔ nyíɔ́-dyùɔ̀ mɔ̀ ma Sɛ̀mádyà, ké ɔ dyúɔ̀ sɔ̃́ nììnɔ̀ mɔ̀ ma Jɛ̀hózáɓà, ké ɔ dyúɔ̀ tã nììnɔ̀ mɔ̀ ma Jóàà, ké ɔ dyúɔ̀ hĩinyɛ nììnɔ̀ mɔ̀ ma Sákà, ké ɔ dyúɔ̀ hm̀m̌ nììnɔ̀ mɔ̀ ma Nɛ̀fánìò, ké ɔ dyúɔ̀ mɛ̀nɛ̌ìn-ɖò nììnɔ̀ mɔ̀ ma Àmíè, ké ɔ dyúɔ̀ mɛ̀nɛ̌ìn-sɔ̃́ nììnɔ̀ mɔ̀ ma Ɛ́sàkà, ké ɔ dyúɔ̀ mɛ̀nɛ̌ìn-tã nììnɔ̀ mɔ̀ ma Pɛ̀dyúɖɛ̀fàì.

^6-7 Ké Sɛ̀mádyà mɔ̀à Óɓè-Íɖɔ̀ùnɛ̀ nyíɔ́-dyùɔ̀ kɛɛ mɔ̀ùn wóɖóìn ma gàa-dyù ɓě ɖekè. Ɔ dyú ɓěɔ̀ mɔ̀ Ófìnì kè Wɛ́ɖɛ́fàè kè Óɓè kè Ɛ̀záɓà kè Ɛ̀ɖíhù ɔ kè Sɛ́màkíà. Wa mɔ̀ ma waà gbǒ-xwíníín ɓěɔ̀ nyɔ vɛ̀nɛ̀, sepóɛɖé wa mɔ̀ ma gàa-zà-nyɔ̀ ɓě.

⁸ Nyɔ séín ɓěɛ̀ mɔ̀ ma Óɓè-Íɖɔ̀ùnɛ̀ xwíníín-dyù ɓěɔ̀. Wa kè wa nììn dyú ɓě kè waà ɖíí-gàà ɓě mɔ̀ ma gàa-zà-nyɔ̀ ɓě ɓɛ́ wa ɓɛ́ìn kpé ɓó kũ̀àɔ̀ nyu jèɛ. Óɓè-Íɖɔ̀ùnɛ̀ xwíníín-dyù ɓěɔ̀ poìn dyí mɔ̀ ma nyɔ-kpò kpáɖá-nyɔ tã sè sɔ̃́.

⁹ Ké Mɛ̀sɛ́ɖɛ̀míà nììn dyú-gàà ɓěɔ̀ kè ɔ ɖíí-gàà ɓěɔ̀ mɔ̀ ma gàa-zà-nyɔ̀ ɓě ɖekè. Wa mɔ̀ ma nyɔ-kpò ɓaɖa-bùè sè mɛ̀nɛ̌ìn-tã.

^10-11 Ké Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ tã nììn ɓɛ́ wa gã ma kɛɛ mɔ̀ ma Hósà ɓɛ́ ɔ mɔ̀ ma Mɛ̀wáɖáwìɖì nììn xwíníín-dyù ɓěɔ̀ ɖòɛ. Hósà mɔ̀ùn wóɖóìn ma gàa-dyù ɓě ɖekè. Wa mɔ̀ Sĩ́wìɖì kè Hìòkíà kè Tɛ̀ɓàɖíà ɔ kè Zɛ́kɔ̀wáɖádyà. Sĩ́wìɖì se ma nyíɔ́-dyùɔ̀ dyɛo, kɛɛ ɔ ɓǎ nyu ma ɔ waà nyɔ vɛ̀nɛ̀ mú. Hósàà dyú-gàà ɓěɔ̀ kè ɔ ɖíí-gàà ɓěɔ̀ poìn dyí mɔ̀ ma nyɔ-kpò ɓaɖa-bùè sè tã.

¹² Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ kpoo ɓěa mùìn ma waà nàìn-nyɔ̀ ɓěɔ̀ nyɛ́nɛ́ín. Wa ɓéɖé ma waà kũ̀à ɓě ɖé Bounɓoɔ̀ gbǒɔ̀ mú kà waà ɖíí-gàà ɓěɔ̀ mɔ̀ùn nyu ma kà nìɛ̀ kɛ.

¹³ Wa séín nyu ma gbo-ɖàɓàìn-ɖɛ̀ ɓó waà gmɔ-wɔ̃̀ ɓěɔ̀ jè, waà nyɔ vɛ̀nɛ̀ kè nyɔ dyùwè, dyììn ɖé waà gbǒ-xwíníín ɓěɔ̀ mú.

¹⁴ Gbo-ɖàɓàìn-ɖɛ̀ ɓá gmɔ-wɔ̃̀ nìà ɖé dyóɖó-xwáɖáún-wóɖóìn-naínɔ̀ kɛɛ jè dyíɛɛ kpɔ̃ ma Mɛ̀sɛ́ɖɛ̀míà. Ké wa nyu ma gbo-ɖàɓàìn-ɖɛ̀ ɓó ɔ dyú-gàà Zɛ́kɔ̀wáɖádyà jè ɖekè. Ɔ mɔ̀ ma nyɔ-náún-po-nyɔ̀ ɓɛ́ ɔ fɔ̀nɔ̀ hwòɖǒ mìɔ kɛ. Ké gbo-ɖàɓàìn-ɖɛ̀ɔ̀ kpɔ̃ ma ɔ ɓó gmɔ-wɔ̃̀ɔ̀ nyɔ nìà ɖé xwía kɛɛ jè.

¹⁵ Ké gbo-ɖàɓàìn-ɖɛ̀ɔ̀ kpɔ̃ ma Óɓè-Íɖɔ̀ùn ɓó gmɔ-wɔ̃̀ɔ̀ nyɔ nìà ɖé zɔ̃̌in nyɛɛ jè. Ké gbo-ɖàɓàìn-ɖɛ̀ɔ̀ kpɔ̃ ma ɔ dyú-gàà ɓěɔ̀ ɓó ɖɛín-dyi-dèìn-naín ɓěɔ̀ jè.

¹⁶ Ké gbo-ɖàɓàìn-ɖɛ̀ɔ̀ kpɔ̃ ma Súpììn kè Hósà ɓó gmɔ-wɔ̃̀ɔ̀ nyɔ nìà ɖé dyóɖó-dyi-kpáìn-naínɔ̀ kɛ kè Sáɖɛ̀kɛ̀-gmɔ̀-wɔ̃̀ nìà hwìè muà ɖé toɖoɔ̀ dya ɖé Gèɖèpɔ́ɔ̀ gbǒɔ̀ gboɛ kɔ̃ɛɛ jè. Gmɔ-wɔ̃̀-dyí-gmɔ̀-nyɔ̀ ɓěɔ̀ ɖò sɔ̀ ma ɓó ní, ɖò mɔ̀ùn kɔ ɓó dyí.

¹⁷ Ɓó wé kè wé xwíníín nyɛɛ, nyɔ-kpò mɛ̀nɛ̌ìn-ɖò mɔ̀ ma gmɔ-wɔ̃̀ nìà ɖé dyóɖó-xwáɖáún-wóɖóìn-naínɔ̀ kɛɛ dyí-gmɔ̀-nyɔ̀, ké nyɔ-kpò hĩinyɛ nì ma ɖé xwía-gmɔ̀-wɔ̃̀ɔ̀ gbo, ké nyɔ-kpò hĩinyɛ nì ma ɖé zɔ̃̌in-gmɔ̀-wɔ̃̀ɔ̀ gbo. Ké nyɔ sɔ̃́-sɔ̃́ mɔ̀ ma ɖɛín-dyi-dèìn-naín sɔ̃́ ɓěɔ̀ dyí-gmɔ̀-nyɔ̀ ɓó wé kè wé xwíníín.

¹⁸ Ké nyɔ-kpò hĩinyɛ nì ma ɖé hwìè muà ɖé Gèɖèpɔ́ɔ̀ gbǒɔ̀ kɔ̃̀pã́ùn nìà ɖé dyóɖó-dyi-kpáìn-naínɔ̀ kɛɛ dyí, ké nyɔ-kpò sɔ̃́ nì ma ɖé kɔ̃̀pã́ùnɔ̀ kɔ̃.

¹⁹ Kǎà Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓě nìà ɖé Kówàɖàà xwíníín-dyù ɓěɔ̀ kè Mɛ̀wáɖáwìɖìɛ̀ xwíníín-dyù ɓěɔ̀ hwìɛ̀ kɛɛ kpoo-dù kò-kò ɓěɔ̀ jè nyu nìɛ̀.

Gèɖèpɔ́ɔ̀ gbǒɔ̀ kũ̀à ɖíɛ́ ɓě ɖe

²⁰ Ké wa mǔè Ɖíìváà-nyɔ̀ ɖíɛ́ ɓě mɔ̀ ma dɛ̀ wa dèìn ma kà ɖɛ ɓě ɓɛ́ wa nyùìn kũ̀à mú ɖé Gèɖèpɔ́ɔ̀ gbǒɔ̀ múɛ kè dɛ̀ wa dèìn ma ɖɛ ɓě ɓɛ́ wa kpá wáká ɓó Gèɖèpɔ́ɔ̀ bììɛ dyiɛɛ kɔ̃in-nyɔ̀ ɓě.

^21-22 Jɛ̀híò kè Zéfɔ̀ùn ɔ kè Jóɛ̀ mɔ̀à Ɖáɖàunɛ̀ dyú-gàà ɓěɔ̀ kɛ kè Jɛ̀híòɛ̀ dyú-gàà ɓěɔ̀ mɔ̀ ma ɖɛín-dyi-dèìn-naín ɓě nìà ɖé Bounɓoɔ̀ gbǒɔ̀ múɛɛ kɔ̃in-nyɔ̀ ɓě. Wa mɔ̀ ma gbǒ-xwíníín ɓě sɔ̀ ma ɖé Ɖáɖàùn mɔ̀à Gésɔ̀ùnɛ̀ dyú-gààɔ̀ kɛ múɛɛ nyɔ vɛ̀nɛ̀ ɓě.

²³ Ámànàùn nììn xwíníín-dyù ɓěɔ̀ kè Ízà nììn xwíníín-dyù ɓěɔ̀ kè Hɛ́bɔ̀nɔ̀ nììn xwíníín-dyù ɓěɔ̀ ɔ kè Dyùzíè nììn xwíníín-dyù ɓěɔ̀ mɔ̀ ma ɖɛín-dyi-dèìn-naín ɓě nìà ɖé Bounɓoɔ̀ gbǒɔ̀ múɛɛ kɔ̃in-nyɔ̀ ɓě ɖekè. Gàa ɓěɛ̀ xwíníín-dyù ɓě nì ma kà kũ̀àɔ̀ kɔ̃in nyɛɛ kɛà kɛ̀.

²⁴ Sɛ̀ɓúè mɔ̀à Mózèɛ̀ nyúà-dyú, kɔ̃̀ ɓǎ mɔ̀à Gésɔ̃̀ kɛɛ mɔ̀ ma ɖɛín-dyi-dèìn-naín ɓěɔ̀ nyɔ vɛ̀nɛ̀.

²⁵ Sɛ̀ɖómɔ̀ ɓǎ nììn ɓǎ ɓěɔ̀ gbǒ-xwíníínɔ̀ kɛà kɛ̀. Ɛ̀ɖìɛ́zɛ̀ mɔ̀à Gésɔ̃̀ɛ̀ ɖíí-gààɔ̀ kɛɛ wóɖóìn ma Wɛ́ɖɛ́hàɓíà, ké Wɛ́ɖɛ́hàɓíà wóɖóìn ma Jɛ̀sádyà, ké Jɛ̀sádyà wóɖóìn ma Jówàɖàùn, ké Jówàɖàùn wóɖóìn ma Zíkìɖì, hwɛ̀ ké Zíkìɖì wóɖóìn ma Sɛ̀ɖómɔ̀.

²⁶ Sɛ̀ɖómɔ̀ kè ɔ ɖíí-gàà ɓěɔ̀ mɔ̀ ma dɛ̀ wa dèìn ma kà ɖɛ séín ɓě ɓɛ́ Kã́á Dèɓé kè gbǒ-xwíníín ɖò-ɖòɛ̀ nyɔ vɛ̀nɛ̀ ɓěɔ̀ kè sójà táázĩ̀ìn ɓě wuɖuí-kɔ̃̀-nyɔ̀ ɓěɔ̀ kè sójà hɔ̃dɛ̀ɖɛ̀ ɓě wuɖuí-kɔ̃̀-nyɔ̀ ɓěɔ̀ ɔ kè sójà-wuɖuí-kɔ̃̀-nyɔ̀ tɔ̀ɔ̀ ɓěɔ̀ ɖǎ ma kà wáká po ɓó Gèɖèpɔ́ɔ̀ bììɛ dyiɛɛ kɔ̃in-nyɔ̀ ɓě.

²⁷ Wa po ma waà to-gbo-zà-ɖɛ̀ ɓěɔ̀ ɖíɛ́ ɓě wáká ɓó Bounɓoɔ̀ bìì, ɓɛ́ wa kéɛ kũ̀à mú nyùìn ɓó Bounɓoɔ̀ gbǒɔ̀ xwa nɔ̀mɔ̀ìn jè.

²⁸ Ɖɛ séín ɓě ɓɛ́ Sámíò mɔ̀à kpáá-ɖɛ̀-dyé-nyɔ̀ɔ̀ kɛ kè Sɔ́ɔ̀ mɔ̀à Kísìɛ̀ dyú-gààɔ̀ kɛ kè Áɓínɛ̀ mɔ̀à Néɔ̀ɛ̀ dyú-gààɔ̀ kɛ kè Jóà kɔ̃̀ ɖe mɔ̀à Zɛ̀wúɖúdyà kɛ ɔ kè nyɔ tɔ̀ɔ̀ ɓěɔ̀ ɖǎà wáká po ɓó Bounɓoɔ̀ bììɛɛ, Sɛ̀ɖómɔ̀ kè ɔ ɖíí-gàà ɓěɔ̀ mɔ̀ ma wa kɔ̃in-nyɔ̀ ɓě.

Ɖíìváà-nyɔ̀ ɖíɛ́ ɓě nììn kũ̀à ɖe

²⁹ Ké wa gã ma Kɛ́nàníà kè ɔ dyú-gàà ɓěɔ̀ sɔ̀ìn ɖé Ízà nììn xwíníín-dyù ɓěɔ̀ hwìɛ̀, ɓɛ́ wa ké kũ̀à ɓě nì ɖé Gèɖèpɔ́ɔ̀ gbǒɔ̀ píéɛɛ nyu-nyɔ̀ jǔ ɓó Éézùɖùɛ̀-nyɔ̀ ɓěɔ̀ bìì. Wa mɔ̀ ma gɔ̌mànà ɓě kè tɔ̀ɔ̀-ɓìɔ̀ ɓě.

³⁰ Ké wa gã ma Hàsáɓíà kè ɔ ɖíí-gàà ɓěɔ̀ sɔ̀ìn ɖé Hɛ́bɔ̀nɔ̀ nììn xwíníín-dyù ɓěɔ̀ hwìɛ̀, ɓɛ́ wa ké Éézùɖùɛ̀-ɓòɖòɔ̀ wáká nìà ɖé Jɔ́nì-nìɔ̀ dyóɖó-dyi-kpáìn-naínɔ̀ kɛɛ kɔ̃in-gmɔìn-nyɔ̀ ɓě jǔ ɓá Bounɓoɔ̀ kũ̀à séín ɓěɔ̀ kè ɓá kã́áɔ̀ kũ̀à séín ɓěɔ̀ jè dyí. Wa mɔ̀ ma gàa ɓɛ́ìn kpé táázĩ̀ìn ɖò kè hɔ̃dɛ̀ɖɛ̀ mɛ̀nɛ̌ìn-sɔ̃́.

^31-32 Ɖé Dèɓéɛ̀ Éézùɖùɛ̀-ɓòɖòɔ̀ wuɖuí-kɔ̃̀-zɔ̃̀ɔ̀ kpáɖá-nyɔ sɔ̃́ nììnɔ̀ xwíníín nyɛɛ, wa gmɔìn ma kpáá-ɖɛ̀-sùà-cèè-ɖɛ̀ɔ̀ múin, ké dyììn ɖéɛ múɛɛ, Dèɓé gã ma Jɛ̀wíɖíà kè ɔ ɖíí-gàà ɓěɔ̀. Ɔ gã ma wa, ɓɛ́ wa ké ma Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáún nìà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ kɔ̃in-gmɔìn-nyɔ̀ ɓě jǔ ɓá Bounɓoɔ̀ kũ̀à séín ɓěɔ̀ kè ɓá kã́áɔ̀ kũ̀à séín ɓěɔ̀ jè dyí. Wa mɔ̀ ma nyɔ-kpò táázĩ̀ìn sɔ̃́ kè hɔ̃dɛ̀ɖɛ̀ mɛ̀nɛ̌ìn-sɔ̃́. Wa mɔ̀ ma gàa ɓɛ́ìn kpé ɓě, ké wa mɔ̀ ma waà gbǒ-xwíníín ɓěɔ̀ nyɔ vɛ̀nɛ̀ ɓě. Wa sɔ̀ ma ɖé Jázè-hwɔ̀ɖɔ̀ nìà ɖé Gíɖèà-ɓòɖòɔ̀ kɔ̃ɛɛ mú. Wa mɔ̀ ma Hɛ́bɔ̀nɔ̀ɛ̀ xwíníín-dyù ɓě, ké Jɛ̀wíɖíà mɔ̀ ma waà nyɔ vɛ̀nɛ̀.