1 Kánáníkɔ̀ 23 - Ɓǎsɔ́ɔ̀ Báɓòɔ̀

Ɖíìváà-nyɔ̀ ɓěɔ̀ nììn kũ̀à

¹ Ti ɓɛ́ Dèɓéɛ̀ zɔ̃ ɖǎ ma dyí vòɛ̌n zi, ké ɔ ɖǎ ma nyɛ mìɔ kɛɛ, ɔ nyu ma ɔ dyú-gàà Sã́ɖómà kã́á mú ɓó Éézùɖùɛ̀-ɓòɖòɔ̀ kɔ̃in.

² Ké Dèɓé poìn ma Éézùɖùɛ̀-nyɔ̀ ɓěɔ̀ nyɔ vɛ̀nɛ̀ séín ɓěɔ̀ kè sáa-zà-nyɔ̀ ɓěɔ̀ ɔ kè Ɖíìváà-nyɔ̀ ɓěɔ̀ dyí.

³ Ké wa zɛɖɛ ma Ɖíìváà-nyɔ̀ ɓěɔ̀ gàa ɓě nyuá zɔ̃ kpáɖá-nyɔ ɓaɖa-bùè kè zi kɔ̃ɛ. Ké wa mɔ̀ ma gàa táázĩ̀ìn kpáɖá-nyɔ ɓaɖa-bùè sè mɛ̀nɛ̌ìn-tã.

⁴ Dèɓé nyu ma gàa ɓěa nyɔ táázĩ̀ìn kpáɖá-nyɔ sè hĩinyɛ kũ̀à ɓě nì ɖé Bounɓoɔ̀ gbǒɔ̀ múɛɛ jè gbo-gmɔ̀-nyɔ̀ ɓě mú. Ké ɔ nyu waà nyɔ-kpò táázĩ̀ìn mɛ̀nɛ̌ìn-ɖò gɔ̌mànà-nyɔ̀ ɓě kè tɔ̀ɔ̀-ɓìɔ̀ ɓě mú.

⁵ Ké ɔ nyu ma waà nyɔ-kpò táázĩ̀ìn hĩinyɛ Bounɓoɔ̀ gbǒɔ̀ dyí-gmɔ̀-nyɔ̀ ɓě mú. Ké waà nyɔ-kpò táázĩ̀ìn hĩinyɛ mɔ̀ ma Bounɓoɔ̀ ɓàìn-nyɔ̀ ɓě dyììn ɖé ɓaɖaa-ɖɛ̀ ɓě ɓɛ́ Dèɓé nyu ma ɓó Bounɓoɔ̀ ɓàìn jèɛɛ mú.

⁶ Ké Dèɓé ɓéɖé ma wa kpoo ɓě mú poɛń dyììn ɖé kà Ɖíìváà nììn dyú-gàà ɓěɔ̀ nyu ɖeín dyi deɛ̀n nyɛɛ mú. Wa mɔ̀ Gésɔ̀ùn kè Kóhà ɔ kè Mɛ̀wáɖáwìɖì.

⁷ Gésɔ̀ùn nììn dyú-gàà ɓěɔ̀ mɔ̀ Ɖáɖàùn kè Símì.

⁸ Ké Ɖáɖàùn wóɖóìn ma gàa-dyù tã. Wa mɔ̀ Jɛ̀híò ɓɛ́ ɔ mɔ̀ ma ɔ nyíɔ́-dyù kɛ kè Zéfɔ̀ùn ɔ kè Jóɛ̀.

⁹ Gàa ɓěɛ̀ mɔ̀ Ɖáɖàùn nììn gbǒ-xwíníínɔ̀ nyɔ vɛ̀nɛ̀ ɓě. Símì wóɖóìn ma gàa-dyù tã. Wa mɔ̀ Sɛ̀ɖómɔ̀ kè Házìè ɔ kè Háwàɖàùn.

¹⁰ Ké Símì wóɖóìn ma gàa-dyù hĩinyɛ ɓó kɔ̃in ɖe. Wa mɔ̀ Jáhà kè Zízà kè Jɛ́dyù ɔ kè Bɛ̀wíɖíà.

¹¹ Jáhà mɔ̀ ma nyíɔ́-dyùɔ̀, ké Zízà mɔ̀ ma dyúɔ̀ sɔ̃́ nììnɔ̀. Jɛ́dyù kè Bɛ̀wíɖíà se ma gàa-dyù pàɖǎ wóɖóìn. Ɔ jèɛɛ, wa sṹìn ma wa xwíníín, ké wa mɔ̀ ma gbǒ-xwíníín dyúáɖò.

¹² Kóhà wóɖóìn ma gàa-dyù hĩinyɛ. Wa mɔ̀ Ámànàùn kè Ízà kè Hɛ́bɔ̀nɔ̀ ɔ kè Dyùzíè.

¹³ Ké Ámànàùn nììn dyú-gàà ɓěɔ̀ mɔ̀ Eɖóún kè Mózè. Ké Eɖóún kè ɔ dyú-gàà ɓěɔ̀ mɔ̀ùn kpá ma wáká, ɓɛ́ wa ké ɖɛ ɓěɛ̀ nyu kánáá pū. Ɖɛ ɓěɔ̀ mɔ̀, ɓɛ́ wa ké ɖɛ zi mú hwɛ̀ǐn ɓěɔ̀ wáká-po-nyɔ̀ jǔ, ɓɛ́ wa ké sáa-zà-nyɔ̀ jǔ ɓó Bounɓoɔ̀ dyúa, ɓɛ́ wa ké ɔ kũ̀à nyu, ɓɛ́ wa ké nyɔ ɓě mana-kɔ̃-po-nyɔ̀ jǔ ɖé ɔ nyɛ́nɛ́ɔ̀ mú.

¹⁴ Mózè mɔ̀à Gèɖèpɔ́ɔ̀-gààɔ̀ kɛɛ nììn dyú-gàà ɓěɔ̀ nyɛ́nɛ́ nì ma Ɖíìváà nììn xwéɖé-dùɔ̀ mú ɖekè.

¹⁵ Mózèɛ̀ dyú-gàà ɓěɔ̀ mɔ̀ Gésɔ̃̀ kè Ɛ̀ɖìɛ́zɛ̀.

¹⁶ Ké Gésɔ̃̀ɛ̀ nyíɔ́-dyù-gàà mɔ̀ ma Sɛ̀ɓúè.

¹⁷ Ké Ɛ̀ɖìɛ́zɛ̀ wóɖóìn ma Wɛ́ɖɛ́hàɓíà. Ɛ̀ɖìɛ́zɛ̀ se ma gàa-dyù ɖò ɓéɖé ɖe, kɛɛ Wɛ́ɖɛ́hàɓíà nììn dyú-gàà ɓě zi ma dyí vòɛ̌n mìɔ.

¹⁸ Ízà mɔ̀à Kóhàà dyú-gàà ɓěɔ̀ sɔ̃́ nììnɔ̀ kɛɛ nììn nyíɔ́-dyù-gàà mɔ̀ ma Sɛ̀ɖómìtì.

¹⁹ Ké Hɛ́bɔ̀nɔ̀ mɔ̀à Kóhàà dyú-gàà ɓěɔ̀ tã nììnɔ̀ kɛɛ nììn dyú-gàà ɓěɔ̀ mɔ̀ Jɛ̀wíɖíà mɔ̀à nyíɔ́-dyùɔ̀ kɛ kè Ámàwíɖíà mɔ̀à dyúɔ̀ sɔ̃́ nììnɔ̀ kɛ kè Jàházìè mɔ̀à dyúɔ̀ tã nììnɔ̀ kɛ ɔ kè Jɛ́kàmɛ́àùn mɔ̀à dyúɔ̀ hĩinyɛ nììnɔ̀ kɛ.

²⁰ Ké Dyùzíè mɔ̀à Kóhàà dyú-gàà ɓěɔ̀ hĩinyɛ nììnɔ̀ kɛɛ nììn dyú-gàà ɓěɔ̀ mɔ̀ Mákà mɔ̀à nyíɔ́-dyùɔ̀ kɛ kè Ìsíà mɔ̀à dyúɔ̀ sɔ̃́ nììnɔ̀ kɛ.

²¹ Mɛ̀wáɖáwìɖì nììn dyú-gàà ɓěɔ̀ mɔ̀ Máɖì kè Músì. Ké Máɖì nììn dyú-gàà ɓěɔ̀ mɔ̀ Ɛ̀ɖɛ̀ázà kè Kísì.

²² Ɛ̀ɖɛ̀ázà mɔ̀ùn mɛ́ ma, ké ɔ se ma dyú-gàà ɖò ɓíɖíi sè, ɔ sèìn ɔ dyú-màà ɓě. Ɔ ɖíí-gàà mɔ̀à Kísì kɛɛ nììn dyú-gàà ɓě kpɔ̃ ma màa-dyù ɓěɔ̀ dyi.

²³ Músì wóɖóìn ma gàa-dyù tã. Wa mɔ̀ Máɖì kè Éɖɛ̀ ɔ kè Jɛ̀wíɖímɔ̀.

²⁴ Nyɔ ɓěɛ̀ mɔ̀ ma Ɖíìváà xwíníín-dyù ɓěɔ̀. Wa mɔ̀ ma waà gbǒ-xwíníín ɖò-ɖò ɓěɔ̀ nyɔ vɛ̀nɛ̀. Waà nyɔ ɓě nyuá ma zɔ̃ kpáɖá-nyɔ kè zi kɔ̃ɛɛ ɖò-ɖò séín céè ma waà nyɛ́nɛ́ ɓíɖíi, ké wa mɔ̀ nyɔ ɓě ké kũ̀à ɓě nì ɖé Bounɓoɔ̀ gbǒɔ̀ múɛɛ nyuɛ.

²⁵ Ké Dèɓé cɛ̃ɛ ma, ké ɔ ɖá, “Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɖǎa nyu ké ɔ nyɔ ɓěɔ̀ cĩ́ ɖé gìɖìǐ mú, ké ɔ cĩ́ nɔ̄ Jùɖúsɛ̀ɖɛ̀ìn-hwɔ̀ɖɔ̀ɛ̀ mú kánáá pū.

²⁶ Ɔ jèɛɛ, Ɖíìváà-nyɔ̀ ɓěɔ̀ se ɓéɖé ɓɛ́ wa ké Bounɓoɔ̀ jàɖàìn-gbòɔ̀ kè ɖɛ ɓě ɓá jàɖàìn-gbòɔ̀ kũ̀à ɓě dyíɛɛ daí zàìn ɖe.”

²⁷ Dyììn ɖé Dèɓéɛ̀ wuɖu hwɛ̀ìn-gbɔɔ̀ múɛɛ, wa zɛɖɛ ma Ɖíìváà-nyɔ̀ ɓěɔ̀ nyɔ ɓě nyuá zɔ̃ kpáɖá-nyɔ kè zi kɔ̃ɛ, ɓɛ́ wa ké ɖé Bounɓoɔ̀ gbǒɔ̀ mú kũ̀à nyu.

²⁸ Waà kũ̀à mɔ̀ ɓɛ́ wa ké Eɖóúnɛ̀ xwíníín-dyù ɓěɔ̀ gbo kpá ɓá kũ̀à ɓě nì ɖé Bounɓoɔ̀ gbǒɔ̀ múɛɛ jè dyí. Wa mɔ̀ nyɔ ké ma gbǒɔ̀ kɔ̃̀pã́ùnɔ̀ kèɛ̀ ɓí-dyù ɓěɔ̀ xwa nɔ̀mɔ̀ìn, ɓɛ́ wa ké mú-hwɛ̀-ɖɛ̀ séín ɓěɔ̀ dyí gmɔ̀, ɓɛ́ ɖɛ ɓěɔ̀ ké mú hwɛ̀ kánáá pū, ɓɛ́ wa ké kũ̀à tɔ̀ɔ̀ ɓě ɓá Gèɖèpɔ́ɔ̀ gbǒɔ̀ dyíɛɛ jè gbo gmɔ̀.

²⁹ Wa mɔ̀ nyɔ ɓéɖé ma bɛɖɛɛ̀ kéà ɓó téɓèɖèɔ̀ kɔ̃ nì teeɛɛ jè, kè fáɖáɓà ɓó ɖii-ɖɛ̀-sàǎ-zàìn-ɖɛ̀ jè, kè bɛɖɛɛ̀-kpò pɛɛ́-pɛɛ́ se dyáìn-ɖɛ̀ gbo nìɔ̀ jè, kè bɛɖɛɛ̀ nyɔ wa ké pĩɛɛ jè, ɔ kè fáɖáɓà caìn cánáɔ̀ jè kpé gbo. Ké wa kɔ̃̀ ma ɖɛ-mú-ɖàɓàìn-ɖɛ̀ dú kò-kò séín ɓěɔ̀ jè kpé gbo ɖekè, kɛbì ɔ mɛ mɔ̀ kà wa nyu jĩ̀ɛ̀ kɛ, mɔɔ kà wa nyu ɓɛ́ɛ kɛ.

³⁰ Ké wa mɔ̀ nyɔ ké dyi nyànà gànà-kṹún ti séín, ɓɛ́ wa ké Bounɓoɔ̀ zùo po, ɓɛ́ wa ké ɔ ɓàìn. Ké kà dyúáɖòɔ̀ kǎà wa kéɛ nyu ɓó hwìo ɖekè.

³¹ Ké wa ɓéɖé wa ké hwɔìn-ɖɛ̀ dyúáɖòɔ̀ nyu ti séín wa mu fɔ̃ɔ-sàǎ-zàìn-ɖɛ̀ ɓě nyuùn ɓó Bounɓoɔ̀ bìì ɓó ɔ fɔ̀-wè ɓěɔ̀ ɓaɖa, mɔɔ ɓó Dɛ̀nɛ̀-Ɖìè-Hwèɖè-hwɔ̀ ɓěɔ̀ ɓaɖa, mɔɔ ɓó hwɔ-wè tɔ̀ɔ̀ ɓěɔ̀ ɓaɖaa. Ɖíìváà-nyɔ̀ jĩ̀ kà kɔ̃̀ wa ké ma kũ̀à ɓěɛ̀ nyuɛɛ nyuɛ ma kánáá pū ɓó Bounɓoɔ̀ dyúa kà wa nyuɛ ma kà wa gbo cɛ̃ɛ kɛ.

³² Kǎà wa nyu ma jàɖàìn-gbò kɔ̃̀ mú ɓɛ́ Bounɓoɔ̀ kè ɔ nyɔ ɓěɔ̀ dyéàìn nyɛ kè Bounɓoɔ̀ gbǒɔ̀ jè gbo gmɔ̀ɔ̀. Wa kpá Eɖóúnɛ̀ xwíníín-dyù ɓě mɔ̀à waà ɖíí-gàà ɓěɔ̀ kɛɛ gbo ɓá kũ̀à ɓě nì ɖé Bounɓoɔ̀ gbǒɔ̀ múɛɛ jè dyí.