1 Kánáníkɔ̀ 21 - Ɓǎsɔ́ɔ̀ Báɓòɔ̀

Dèɓé zɛɖɛ ɔ nyɔ ɓěɔ̀

¹ Wé ɖòɛ̀ ɓaɖaa, Nɔɔ́-nàmàǔn sɔ̀ ma dyí, ɓɛ́ ɔ ké ma Éézùɖùɛ̀-nyɔ̀ ɓěɔ̀ fũ̀à-fṹá nyùìn. Ɔ jèɛɛ, ɔ po ma Dèɓé vã kɔ̃, ɓɛ́ Dèɓé ké ma Éézùɖùɛ̀-nyɔ̀ ɓěɔ̀ zɛɖɛ.

² Ké Dèɓé cɛ̃ɛ ma Jóà kè ɔ sójà-nàìn-nyɔ̀ tɔ̀ɔ̀ ɓěɔ̀ gbo, ké ɔ ɖá, “Ɓě mu, ɓɛ́ ɓě ké Éézùɖùɛ̀-nyɔ̀ ɓěɔ̀ zɛɖɛ sɔ̀ìn ɖé Bèsíɓà-hwɔ̀ɖɔ̀ɔ̀ mú muà ɖé Dɛ̃́ìn-hwɔ̀ɖɔ̀ɔ̀ múɛ, ɓɛ́ ɓě ké ḿ wuɖu gbo ɖe dyà, ɓɛ́ ḿ ké kà nyɔ ɓěɔ̀ nyu jĩ̀ɛ̀ kɛɛ dyuò.”

³ Kɛɛ Jóà cɛ̃ɛ ma ɔ gbo, ké ɔ ɖá, “Ɓɔ̌ɔ̀, Bounɓoɔ̀ mɛ zaìn ɔ nyɔ ɓěɔ̀ dúún kpa hɔ̃dɛ̀ɖɛ̀ ɖò. Má, wa séín mɔ̀ mɔ̀ mɔ̀à ní kã́áɔ̀ kɛɛ gbo-nì-nyɔ̀e? Kà ɔ nìà náa, ɓɔ̌ɔ̀, ɖɛ́ kɔ̃̀ jè nì mɔ́ ɖɛ nìà kɛ kéà ná nì wɛ̃́ɛ́ kɛ́? Ɖɛ́ kɔ̃̀ jè m̀ kéà Éézùɖùɛ̀-nyɔ̀ ɓěɔ̀ zaa-dúún-wáɖá-wáɖá kɔ̃ dyà kɛ́?”

⁴ Kɛɛ wɛ̃́ɛ́ kɛɛ, kã́áɔ̀ wuɖuɔ̀ sèìn ma Jóà nììn wuɖuɔ̀ kɔ̃in. Ɔ jèɛɛ, Jóà sɔ̀ ma dyí, ké ɔ mu ma Éézùɖùɛ̀-ɓòɖòɔ̀ dà séín, ké ɔ dyi ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe.

⁵ Ké Jóà cɛ̃ɛ ma Dèɓé gbo kà nyɔ ɓě ɓɛ́ìn to vɔ̃ɔ ɖé Éézùɖùɛ̀-ɓòɖòɔ̀ kɔ̃ɛɛ mɔ̀ ma gàa méɔ̀ùn dyúáɖò kè táázĩ̀ìn hɔ̃dɛ̀ɖɛ̀ ɖò, ké nyɔ ɓě ɓɛ́ìn ma to vɔ̃ɔ ɖé Júɖà-ɓòɖòɔ̀ kɔ̃ɛɛ mɔ̀ ma gàa táázĩ̀ìn hɔ̃dɛ̀ɖɛ̀ hĩinyɛ kè táázĩ̀ìn kpáɖá-nyɔ tã ɓaɖa-bùè kɛ.

⁶ Kɛɛ Jóà se ma Ɖíìváà-nyɔ̀ ɓěɔ̀ kè Bɛ̃́címà-nyɔ̀ ɓěɔ̀ zɛɖɛ, sepóɛɖé ɖɛ kã́áɔ̀ cɛ̃ ma kà kɛɛ se ma Jóàà hwòɖǒ-gbo-wɔ̃́ìn-ɖɛ̀ jè.

⁷ Gèɖèpɔ́ɔ̀ hwòɖǒ se ma ɖɛ nìà kɛ múin dèìn jèɛɛ, ɔ tò ma Éézùɖùɛ̀-nyɔ̀ ɓěɔ̀ gǎ kɔ̃.

⁸ Hwɛ̀ ké Dèɓé cɛ̃ɛ ma Gèɖèpɔ́ɔ̀ gbo, ké ɔ ɖá, “Ḿ ɖǎ nàmàǔn vɛ̀nɛ̀ ɖò nyu dyììn ɖé ɖɛ ḿ ɖǎà nyuɛɛ mú. Ɓó kàǔn wɛ̃ɛ, ḿ ɓaà m̀ ní, ɓɛ́ m̀ ké ní ɖɛ gbàɔ̀ kɔ̃in zĩ̀ìn, sepóɛɖé ḿ ɖǎ zuɖuu-ɖɛ̀ vɛ̀nɛ̀ ɖò nyu.”

⁹ Ké Bounɓoɔ̀ cɛ̃ɛ ma Gáà mɔ̀à Dèɓéɛ̀ kpáá-ɖɛ̀-dyé-nyɔ̀ɔ̀ kɛɛ gbo, ké ɔ ɖá,

¹⁰ “Mu, ɓɛ́ m̀ kéɛ Dèɓé gbo cɛ̃ kà ḿ ɖá ḿ po ɖɛ tã ɓó ɔ dyúa dyiɛ. Ɔ mɛ gã dyúáɖò, ɓɛ́ ḿ kéɛ ɔ bũ̌ nyu.”

¹¹ Ɔ jèɛɛ, Gáà mu ma ɖé Dèɓé gbo, ké ɔ ɖá, “Bounɓoɔ̀ ɖá ɔ po ɖɛ tã ɓó m̀ dyúa dyi. M̀ mɛ gã ɓó nyɔ nì hwòɖǒ mɔ́ɛ.

¹² Ɖɛ ɓěɔ̀ mɔ̀, mɔ́-vɔ̃-zɔ̃̀ tã ké ɓóɖóɛ̀ kɔ̃ dyi, mɔɔ nì mú-nyɛ́-nyɔ̀ ɓěɔ̀ sɔ̃ ké m̀ wɔ̃ zi ɓó dɛ̀nɛ̀ tã xwíníín, ɓɛ́ wa ké nì nyɔ ɓěɔ̀ mú gbɔɔ̀ǔn dyi gã̀ tee, mɔɔ Bounɓoɔ̀ sɔ̃ ké m̀ kɔ̃ nì ɓó wé tã xwíníín, ɓɛ́ ɔ ké ɓóɖóɛ̀ wɛ́ nyìnììn dyíin kɔ̃ tò, ɓɛ́ dyììn ɖéɛ múɛɛ, ɔ ínjàɔ̀ ké nyɔǔn-dyù mú gbɔɔ̀ ɖé Éézùɖùɛ̀-ɓòɖòɛ̀ dà séín. Ɓó kàǔn wɛ̃ɛ, m̀ mɛ poìn hwìɖǐi, ɓɛ́ m̀ ké ɓó ɖò gã, ɓɛ́ m̀ ké gɔ̃̌-jǔ-wùɖù ɓɛ́ ḿ ké nyɔ ɖoɓoà ḿ wɛ̃ɛ gbo ɖe kpa kɛɛ ḿ nyí.”

¹³ Hwɛ̀ ké Dèɓé jǔ ma Gáà gɔ̃̌, ké ɔ ɖá, “Ḿ ɖǎ gboɛ vɛ̀nɛ̀ ɖò mú kpá. Ḿ mɛ kpá ɖé Bounɓoɔ̀ xwaún dyi, sepóɛɖé ɔ ɓéɖé wìì vɛ̀nɛ̀. Kɛɛ ḿ mɛ ɓɔ́ ḿ mǔè-nyɔ̀ǔn-dyù xwaún dyi kpáa.”

¹⁴ Ɔ jèɛɛ, Bounɓoɔ̀ tò ma wɛ́ nyìnììn dyíin ɖò Éézùɖùɛ̀-nyɔ̀ ɓěɔ̀ kɔ̃, ké nyɔ-kpò táázĩ̀ìn kpáɖá-nyɔ tã ɓaɖa-bùè mɛ́ ma.

¹⁵ Ké Gèɖèpɔ́ɔ̀ tò ma ɔ ínjàɔ̀ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ ɔ ké ma hwɔɖɔɔ̀ wáɖá. Kɛɛ ti ɓɛ́ ɔ nìǎ ma hwɔɖɔɔ̀ wáɖáuń muɛń nyɛɛ, Bounɓoɔ̀ kpá ma wìǐn ɓó gǎ vɛ̀nɛ̀ dyi ma kà nyɔ ɓěɔ̀ kɔ̃ɛɛ jè, ké ɔ cɛ̃ɛ ma ínjàɔ̀ gbo, ké ɔ ɖá, “Kǎ ɔ mɛ jĩ̀. Jiɖi nì sɔ̃ɔ̀ ɖe.” Ɓó tia ɓaɖaa, Bounɓoɔ̀ ínjàɔ̀ nyànà ma ɓó Àwáɖánà mɔ̀à Jɛ́ɓù-nyɔ̀ɔ̀ kɛɛ mɔɔ́-dyí-síìn-naínɔ̀ dyi.

¹⁶ Ké Dèɓé ɖú ma dyéɖé dyií, ké ɔ dyé ma Bounɓoɔ̀ ínjàɔ̀ ɓó ɓóɖó-kpàà kè dyɔɔ̀ pṹa dyi nyànàà, ké gàsíà zà kpaɖaún ɖò nì ma ɔ xwa. Ɔ pɛ́ɛ̀ ma sɔ̃, ké ɔ tòɛ̀ ma Jùɖúsɛ̀ɖɛ̀ìn-hwɔ̀ɖɔ̀ɔ̀ kɔ̃in. Ké Dèɓé kè nyɔ vɛ̀nɛ̀ ɓě ɓɛ́ ɔ kè wa po ma ɖɔ-zɔ̃̀ múɛɛ jìɖǐ ma ɓó ɓíɖíi dyi.

¹⁷ Ké Dèɓé cɛ̃ɛ ma Gèɖèpɔ́ɔ̀ gbo, ké ɔ ɖá, “Má, mɔ̄ mɔ̀ nyɔ tòà wuɖu, ɓɛ́ wa kéà nyɔ ɓěɔ̀ zɛɖɛ kɛ̀e? Mɔ̄ mɔ̀ nyɔ nyuà nàmàǔn, ké ḿ nyuà hwòɖǒ-kɔ̃in-nyìnììn-ɖɛ̀ ɓɛ́ kà nìà kɛ̀. Kɛɛ ɖɛ́ nì nyɔ ɓě nìà kɛ nyuɛ́? Óó Bounɓo ní Gèɖèpɔ́ɔ̀, ní ɓaà m̀ ní, nì gǎ-sɔ̃̀ɔ̀ mɛ pɛ̃́ ḿ kè ní gbǒ-xwíníín-nyɔ̀ ɓěɔ̀ ɖòùn kɔ̃, kɛɛ wɛ́ nyìnììn dyíinɔ̀ mɛ ɓɔ́ nì nyɔ ɓěɔ̀ kɔ̃ nìɛ̀.”

¹⁸ Hwɛ̀ ké Bounɓoɔ̀ ínjàɔ̀ cɛ̃ɛ ma Gáà gbo, ɓɛ́ ɔ kéɛ Dèɓé gbo cɛ̃ kà Dèɓé mɛ mu ɓɛ́ ɔ ké sáa-kɔ̃-zàìn-gbàà ɖò po ɓó Bounɓoɔ̀ bìì ɖé Àwáɖánà mɔ̀à Jɛ́ɓù-nyɔ̀ɔ̀ kɛɛ mɔɔ́-dyí-síìn-naínɔ̀ kɛ.

¹⁹ Ké Dèɓé mu ma ɖé kà Gáà nyuɛ ma kà cɛ̃ɛ dyììn ɖé Bounɓoɔ̀ nyɛ́nɛ́ɔ̀ múɛ.

²⁰ Ɓó tia ɓaɖaa, Àwáɖánà nì ma ɔ hwítì dyí síɛń. Ɔ gmɔ̀ ma ɖe, ké ɔ dyé ma ínjàɔ̀. Ké ɔ dyú-gàà hĩinyɛ nì ma ɓó ɔ gboɛɛ vǐè ma.

²¹ Ti ɓɛ́ Dèɓé nì ma Àwáɖánà wɔ̃ dyiɛń nyɛɛ, Àwáɖánà ɖú ma dyéɖé dyií, ké ɔ dyé ma Dèɓé. Ké Àwáɖánà sɔ̀ ma ɓó dɛ̀ ɔ nì ma kà hwítì dyí síɛń nyɛ, ké ɔ mu, ké ɔ taɓa ma dú hwuɖu ɓó Dèɓé dyúa.

²² Ké Dèɓé cɛ̃ɛ ma Àwáɖánà gbo, ké ɔ ɖá, “Pèɖèìn nì mɔɔ́-dyí-síìn-naínɔ̀ ḿ gbo, ɓɛ́ ḿ ké ɓó sáa-kɔ̃-zàìn-gbàà ɖò po ɓó Bounɓoɔ̀ bìì, nìí ɓɛ́ wɛ́ nyìnììn dyíinɔ̀ ké nyɔ ɓěɔ̀ kɔ̃ sɔ̀. Cɛ̃ wíɖí jĩ̀ kà ɔ kpaa ḿ gbo.”

²³ Hwɛ̀ ké Àwáɖánà cɛ̃ɛ ma Dèɓé gbo, ké ɔ ɖá, “Ɓɔ̌ɔ̀, ɖúɛ dyí. M̀ mɛ nyu ɖɛ nì hwòɖǒ mɔ́ ɓɛ́ m̀ ké nyuɛ. Gmɔ̀ nɔ̄, ḿ nyí m̀ ɓìɖǐ ɓíɔ́ ɓě nìà kɛ ɖekè, ɓɛ́ wa ké fɔ̃ɔ-sàǎ-zàìn-ɖɛ̀ jǔ, ké mɔɔ́-dyí-síìn-ɖɛ̀ ɓěɔ̀ kɛà kɛ̀, ɓɛ́ m̀ ké wa nyɛ mú nyu, ké ḿ nyí m̀ hwítì nìà kɛ, ɓɛ́ ɔ ké ɖii-ɖɛ̀-sàǎ-zàìn-ɖɛ̀ jǔ. Ḿ nyí m̀ ɖɛ séín ɓě nìà kɛ ní.”

²⁴ Kɛɛ Kã́á Dèɓé jǔ ma Àwáɖánà gɔ̃̌, ké ɔ ɖá, “Gbào, ní mu wíɖí jĩ̀ kà ɓɛ́ ɔ kpa kɛɛ pɛ́ɛ̀ìn, sepóɛɖé ḿ se ɖɛ mɔ̀ nì kɔ̃̀ɔ̀-ɖɛ̀ kɛɛ dyí ɖúɛ mu ɓó Bounɓoɔ̀ bìì, mɔɔ ké ḿ se fɔ̃ɔ-sàǎ-zàìn-ɖɛ̀ ɓě ɓɛ́ wa se ḿ ɖɛ ɖò mú zà kɛɛ Bounɓoɔ̀ nyíɛ mu.”

²⁵ Ɔ jèɛɛ, Dèɓé pɛ́ɛ̀ ma Àwáɖánà góò-cɛ̀kò hɔ̃dɛ̀ɖɛ̀ mɛ̀nɛ̌ìn-ɖò ɓó páɔ̀ jè.

²⁶ Ké Dèɓé po ma ɓó sáa-kɔ̃-zàìn-gbàà ɖò ɓó Bounɓoɔ̀ bìì, ké ɔ nyùìn ma ɓó fɔ̃ɔ-sàǎ-zàìn-ɖɛ̀ ɓě kè gbo-kpɔ̃ìn-sàǎ-zàìn-ɖɛ̀ ɓě. Ké ɔ ɓaàìn ma ɓó Bounɓoɔ̀, ké Bounɓoɔ̀ jǔ ma ɔ gɔ̃̌ dyììn ɖé nyɛ sɔ̀ dyɔún wɛ̃ɛ mú, ké nyɛɔ̀ dyi ma ɓó gbàà kɔ̃̀ kɔ̃ mɔ̀ ma kà fɔ̃ɔ-sàǎ-zàìn-ɖɛ̀ nyùìn-naín nyɛ.

²⁷ Hwɛ̀ ké Bounɓoɔ̀ po ma ínjàɔ̀ ɓɔ́í, ké ínjàɔ̀ po ma ɔ gàsíàɔ̀ kpaɖaún ɖe.

²⁸ Ti ɓɛ́ Dèɓé dyéɛ ma kà Bounɓoɔ̀ ɖǎ ma ɔ gɔ̃̌ jǔ ɓó Àwáɖánà mɔ̀à Jɛ́ɓù-nyɔ̀ɔ̀ kɛɛ mɔɔ́-dyí-síìn-naínɔ̀ kɛɛ, púɛɛ, ɔ nyùìn ma ɓó sáa-zàìn-ɖɛ̀ ɖíɛ́ ɓě ɖe.

²⁹ Ɓó tia ɓaɖaa, Bounɓoɔ̀ jàɖàìn-gbò ɓɛ́ Mózè nyu ma kà ɖé gbǎùn-fúɖúáɔ̀ kɔ̃ɛ kè gbàà kɔ̃̀ kɔ̃ mɔ̀ ma kà fɔ̃ɔ-sàǎ-zàìn-ɖɛ̀ nyùìn-naín nyɛɛ nì ma ɖé toɖoɔ̀ dya ɖé Gíɓìɔ̀ùn-hwɔ̀ɖɔ̀ɔ̀ mú ke.

³⁰ Kɛɛ Dèɓé se ma ɖé muɛ ɓɛ́ìn, ɓɛ́ ɔ ké ma Gèɖèpɔ́ɔ̀ ɖɛ zɔ̀, sepóɛɖé ɔ fɛ̃̀ìn ma ní ɓó gàsíà nì ma kà Bounɓoɔ̀ ínjàɔ̀ xwa kɛɛ jè.