1 Kánáníkɔ̀ 20 - Ɓǎsɔ́ɔ̀ Báɓòɔ̀

Dèɓé ɖu Wáɖáɓà-hwɔ̀ɖɔ̀ɔ̀ toún

¹ Zɔ̃ɔ̀ nyɔ kɔ ma ɓó dyíɛɛ, ti ɓɛ́ kã́á ɓě mu to gboɛɛ, Jóà ɖú ma sójà ɓěɔ̀ dyí, ké wa kpa ma Ámànà-ɓòɖòɔ̀ to kɔ̃. Ké wa mu, ké wa gbǎìn ma Wáɖáɓà-hwɔ̀ɖɔ̀ɔ̀ wɔ̃, kɛɛ Dèɓé sè ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ké Jóà po ma Wáɖáɓà-hwɔ̀ɖɔ̀ɔ̀ to kɔ̃, ké ɔ wáɖáa ma.

² Ké Dèɓé zà ma Wáɖáɓà-hwɔ̀ɖɔ̀ɔ̀ kã́áɔ̀ góò-gbàǎɔ̀ dú. Góò-gbàǎɔ̀ xwa-ku-ku mɔ̀ ma pṹá-dyèɖè kpáɖá-nyɔ tã ɓaɖa-bùè sè hm̀m̌, ké sɔ́ɔ́ kpa ɖɛ ɖò nì ma gbàǎɔ̀ bũ̌, ké wa dèìn ma gbàǎɔ̀ Dèɓé dú. Ké Dèɓé zà ma hwu-ɖɛ̀ kúɖúú ɖé hwɔɖɔɔ̀ mú.

³ Ké ɔ kpa ma nyɔ ɓě nì ma ɖé hwɔɖɔɔ̀ múɛ, ké ɔ po ma wa kũ̀à ɖò-ɖò ɓě gbo. Ɔ nyuɛ ké nyɔ ɖíɛ́ ɓě nyùìn ma sɔ́ɔ̀ kũ̀à mú, ké ɖíɛ́ ɓě nyùìn ma káɖá kũ̀à mú, ké ɖíɛ́ ɓě nyùìn ma jùɛ̀ kũ̀à mú. Ɔ nyu ma ɖɛ dyúáɖòɔ̀ nyɔ ɓě nì ma ɖé Ámànà-nyɔ̀ ɓěɔ̀ hwɔɖɔ tɔ̀ɔ̀ ɓěɔ̀ múɛɛ bũ̌ ɖekè. Hwɛ̀ ké Dèɓé kè ɔ nyɔ séín ɓěɔ̀ kɔ́ìn ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe.

Éézùɖùɛ̀-nyɔ̀ ɓěɔ̀ vɔ̃ Féɖésìà-nyɔ̀ ɓěɔ̀ gbo

⁴ Sɔ̀ìn ɓóɛ gboɛɛ, Éézùɖùɛ̀-nyɔ̀ ɓěɔ̀ kè Féɖésìà-nyɔ̀ ɓěɔ̀ vɔ̃ ma to ɖò ɖé Gézɛ̀-hwɔ̀ɖɔ̀ɔ̀ mú. Ɖé toɔ̀ gboɛɛ, Sìɓɛ́kàì ɓɛ́ ɔ sɔ̀ ma ɖé Húsà-hwɔ̀ɖɔ̀ɔ̀ múɛɛ ɖáɓá ma Sáfì ɓɛ́ ɔ mɔ̀ ma gàa-zà-nyɔ̀ ɓúá dyai ɖòɛ. Sáfì mɔ̀ ma Wɛ́ɖɛ́fàà gbǒ-xwíníín-gàà ɓěɔ̀ ɖò. Ké wa ɖu ma Féɖésìà-nyɔ̀ ɓěɔ̀ toún.

⁵ Ké to ɖìè ɖò kpá ma ɓó Féɖésìà-nyɔ̀ ɓěɔ̀ kè Éézùɖùɛ̀-nyɔ̀ ɓěɔ̀ pṹa ɖe. Ɖé toɔ̀ nyɔ nìà kɛ gboɛɛ, Ɛ̀hánà mɔ̀à Jáwìɖìɛ̀ dyú-gààɔ̀ kɛɛ ɖáɓá ma Ɖámì ɓɛ́ ɔ mɔ̀ Gòɖádyà mɔ̀à Gátì-nyɔ̀ɔ̀ kɛɛ ɖíí-gàà kɛ. Ɔ ɖíɔ̀ ɖo kè sú ɓɛ́ìn ma ní.

⁶ Ké to ɖò kpá ma ɖe ɖé Gátì-hwɔ̀ɖɔ̀ɔ̀ mú. Ɖé toɔ̀ nyɔ nìà kɛ gboɛɛ, Féɖésìà-gàà ɓúá dyai ɖò nì ma ɓó. Ɔ ɓéɖé ma jìì-dyùà ɓaɖa-bùè sè sɔ̃́ kè ɓìɛ̀-dyùà ɓaɖa-bùè sè sɔ̃́. Gàaɔ̀ mɔ̀ ma Wɛ́ɖɛ́fàà gbǒ-xwíníín-gàà ɓěɔ̀ ɖò ɖekè.

⁷ Ké Féɖésìà-gààɔ̀ po ma Éézùɖùɛ̀-nyɔ̀ ɓěɔ̀ sóɖó, ké Jònétɔ̃̀ mɔ̀à Símìà mɔ̀à Dèɓéɛ̀ ɖíí-gààɔ̀ kɛɛ dyú-gààɔ̀ kɛɛ ɖáɓá ma ɔ.

⁸ Kǎà Dèɓé kè ɔ gàa ɓěɔ̀ nyu ma gàa-zà-nyɔ̀ ɓúá dyai ɓě ɓɛ́ wa mɔ̀ ma kà Wɛ́ɖɛ́fà ɓɛ́ ɔ sɔ̀ ma kà ɖé Gátì-hwɔ̀ɖɔ̀ɔ̀ múɛɛ gbǒ-xwíníín-gàà ɓěɔ̀ kɛɛ ɖáɓáa.