KIDUNG 1 - Cakepan Suci

CAKEPAN SANE KAPING PISAN (Kidung 1–41 ) Indik bagia sane sujati

¹ Bagia anake sane nenten ngidepang pitutur jadmane dursila, sane nenten nulad laksanan jadmane madosa, wiadin sruron ring jadmane sane tan paguna ring ayun Ida Sang Hyang Widi Wasa,

² nanging ipun molih kaliangan sajeroning nglaksanayang pidabdab Ida Sang Hyang Widi Wasa, saha ipun mlajahin pidabdabe punika rahina wengi.

³ Anake punika waluya sakadi taru sane mentik ring sisin tukade sane mawoh ngamasa, sane daun-daunnyane nenten layu. Ipun labda karya ring saluiring laksananipune.

⁴ Nanging jadmane sane dursila nenten kadi asapunika. Ipun tan bina sakadi gumpang sane kampehang antuk angin.

⁵ Jadmane madosa jaga kasisipang antuk Ida Sang Hyang Widi Wasa, tur ipun pacang kanehang saking kaula druen Idane.

⁶ Jadmane sane patut tansah katantan miwah kasayubin antuk Ida Sang Hyang Widi Wasa, nanging pamargin jadmane dursila ngungsi ka pati loka.