मत्ती 28 - Bagheli Bible

मरेन म से यीसु के जिन्दा होब

¹ पबित्र दिन के बाद हप्ता के पहिलय दिना अइतबार काहीं, उँजिआर होतय मगदल गाँव के मरियम, अउर दूसर मरियम कब्र काहीं देखँइ गईं।

² तब उहाँ अचानक खुब तेज भुँइडोल भ, काहेकि प्रभू के एकठे दूत स्वरग से उतरें, अउर कब्र के लघे आइके उआ पथरा काहीं हटाय दिहिन, अउर ओहिन के ऊपर बइठिगें।

³ अउर उनखर रूप बिजुली कि नाईं रहा हय, अउर उनखर ओन्हा बरफ कि नाईं उजर रहा हय।

⁴ अउर स्वरगदूत के डेरन के मारे कब्र माहीं पहरा देंइ बाले सिपाही थर-थर काँपय लागें, अउर मरे कि नाईं होइगें।

⁵ तब स्वरगदूत, ऊँ मेहेरिअन से कहिन, “डेरा न, काहेकि हम जानित हएन कि तूँ पंचे यीसु काहीं ढुँढ़ते हया, जउन क्रूस माहीं चढ़ाए गे रहे हँय।

⁶ ऊँ इहाँ नहिं आहीं, पय ऊँ अपने कहे के मुताबिक जिन्दा होइगें हँय। अउर आबा, इआ जघा काहीं देखा, जहाँ प्रभू परे रहे हें,

⁷ अउर हरबिन जाइके उनखे चेलन काहीं बताबा, कि ऊँ मरेन म से जिन्दा होइगें हँय, अउर ऊँ तोंहसे पंचन से पहिले गलील प्रदेस माहीं जइहँय, अउर तूँ पंचे उहँय उनखर दरसन पइहा! अउर देखा, जउन बात हम तोंहसे कहेन हय, त ओही सुध रख्या।”

⁸ तब ऊँ मेहेरिआ डेरन के मारे, अउर बड़ी खुसी के साथ कब्र से हरबिन लउटिके यीसु के चेलन काहीं खबर बतामँइ के खातिर दउड़त चल दिहिन।

⁹ तब यीसु उनहीं मिलें अउर कहिन, कि “नबस्कार।” तब ऊँ पंचे यीसु के लघे आईं, अउर उनखर गोड़ पकड़िके, उनखे गोड़न गिरीं।

¹⁰ तब यीसु उनसे कहिन, “डेरा न; तूँ पंचे जाइके हमरे भाइन से कहि द्या, कि ऊँ पंचे गलील प्रदेस माहीं चले जाँय, अउर उहँय हमहीं देखिहँय।”

पहरेदारन के व्दारा खबर देब

¹¹ जब ऊँ पंचे खबर देंइ जातय रही हँय, तबहिनय पहरेदारन म से कुछ जने, सहर माहीं जाइके प्रधान याजकन से सगला हाल बताइन।

¹² तब ऊँ पंचे यहूदी समाज के धारमिक अँगुअन के लघे एकट्ठा होइके एकठे योजना बनाइन, अउर सिपाहिन काहीं खुब चाँदी दइके कहिन,

¹³ “तूँ पंचे इआ कह्या, कि रात माहीं जब हम पंचे सोबत रहेन हय, तब यीसु के चेला लोग आइके उनहीं चोराय लइगे हँय।

¹⁴ अउर अगर इआ बात हाकिम के कान तक पहुँच जई, त हम पंचे उनहीं मनाय लेब, अउर तोंहईं पंचन काहीं खतरा माहीं परँइ से बचाय लेब।”

¹⁵ एसे ऊँ पहरा देंइ बाले सिपाही, रुपिआ लइके जइसन सिखाए गे रहे हँय, उहयमेर किहिन; अउर इआ किस्सा आजव तक, यहूदी लोगन माहीं इहइमेर फइली हय।

¹⁶ अउर यीसु के ग्यरहँव चेला गलील प्रदेस के उआ पहार माहीं गें, जउने पहार माहीं जाँइ के खातिर यीसु उनहीं बताइन रहा हय।

¹⁷ अउर ऊँ पंचे यीसु के दरसन पाइके उनखे गोड़न गिरें, पय कुछ मनइन के मन माहीं संका रही हय, कि ईं यीसु आहीं कि न होंहीं।

¹⁸ तब यीसु उनखे लघे आइके कहिन, “स्वरग अउर धरती के सगला अधिकार हमहिन काहीं दीनगा हय।

¹⁹ एसे तूँ पंचे इहाँ से जाइके, सगले जातिअन के मनइन काहीं चेला बनाबा, अउर उनहीं पंचन काहीं पिता परमातिमा, अउर लड़िका यीसु, अउर पबित्र आत्मा के नाम से बपतिस्मा द्या।

²⁰ अउर जउने बातन काहीं, हम तोंहईं पंचन काहीं मानँइ के हुकुम दिहेन हय, उँइन बातन काहीं मानँइ के खातिर उनहूँ पंचन काहीं सिखाबा: अउर इआ बात काहीं सुध रख्या, कि संसार के अन्त तक हमेसा हम तोंहरे पंचन के साथ माहीं रहब।”