मत्ती 14 - Bagheli Bible

यूहन्ना बपतिस्मा देंइ बाले के कतल

¹ हेरोदेस राजा अपने भाई फिलिप्पुस के मेहेरिआ हेरोदियास के कारन, यूहन्ना बपतिस्मा देंइ बाले काहीं पकड़बाइके बँधबाइन, अउर ओखे बाद जेल माहीं डरबाय दिहिन तय।

² काहेकि यूहन्ना बपतिस्मा देंइ बाले कइअक बेरकी उनसे कहिन तय, कि “अपने भाई के जिन्दय ओखे मेहेरिआ काहीं राखब तोंहईं उचित नहिं आय।”

³ इआ कारन से हेरोदेस राजा उनहीं मारि डारँय चाहत रहे हँय, पय मनइन से डेरात रहे हँय, काहेकि ऊँ पंचे यूहन्ना बपतिस्मा देंइ बाले काहीं परमातिमा के सँदेस बतामँइ बाले मानत रहे हँय।

⁴ पय जब राजा हेरोदेस के जनम दिन आबा, तब हेरोदियास के बिटिया सभा माहीं नाच देखाइके, हेरोदेस राजा काहीं खुसी कइ दिहिस।

⁵ एसे हेरोदेस राजा कसम खाइके बचन दिहिन, कि “तूँ जउन कुछू मगिहा, हम ओही तोहईं जरूर देब।”

⁶ तब उआ बिटिया अपने महतारी हेरोदियास के उकसाए से कहिस, कि “अपना हमहीं यूहन्ना बपतिस्मा देंइ बाले के मूँड़ टठिआ माहीं धइके मगबाय देई।”

⁷ इआ सुनिके राजा हेरोदेस खुब दुखी भें, पय अपने कसम खाँय के कारन, अउर साथ माहीं बइठँय बाले के कारन, सेबकन काहीं हुकुम दिहिन कि, “यूहन्ना बपतिस्मा देंइ बाले के मूँड़ कटबाइके, उआ बिटिया काहीं दइ दीन जाय।”

⁸ तब ऊँ सिपाहिन काहीं जेल माहीं पठइके, यूहन्ना बपतिस्मा देंइ बाले के मूँड़ कटबाय लिहिन।

⁹ अउर उनखर मूँड़ टठिया माहीं धइके लइ आबा ग, अउर उआ बिटिया काहीं दइ दीनगा; तब उआ बिटिया ओही अपने महतारी के लघे लइगे।

¹⁰ इआ बात काहीं जानिके यूहन्ना बपतिस्मा देंइ बाले के चेला लोग, आइके उनखे लहास काहीं लइ जाइके गाड़ दिहिन, अउर जाइके इआ बात यीसु काहीं बताइन।

¹¹ जब चउथाई देस के राजा हेरोदेस, यीसु के बारे माहीं सुनिन।

¹² तब अपने सेबकन से कहिन, “ईं यूहन्ना बपतिस्मा देंइ बाले आहीं, जउन मरेन म से जिन्दा होइगे हँय, इहयकारन से ऊँ अचरज के काम कइके देखाबत हें।”

यीसु पाँच हजार मनइन काहीं खाना खबाइन

¹³ जब यीसु इआ बात काहीं सुनिन, त नाव म चढ़िके सुनसान जघा माहीं एकान्त माहीं चलेगें; अउर इआ बात काहीं खुब मनई जानिगें, एसे ऊँ पंचे अपने-अपने सहरन से आइके, पइदलय यीसु के पीछे चल दिहिन।

¹⁴ अउर जब यीसु उहाँ से बहिरे निकरें, त खुब बड़ी भीड़ देखिन, तब यीसु काहीं उनखे ऊपर बड़ी दया आइगे, अउर उनखे साथ माहीं आए बिमारन काहीं नीक कइ दिहिन।

¹⁵ जब साँझ होइगे, त उनखर चेला लोग उनखे लघे आइके कहिन, कि “इआ सुनसान जघा ही, अउर साँझ होंइ लाग ही, एसे मनइन काहीं बिदा करी। जउने ऊँ पंचे आस-पास के मोहल्लन म जाइके अपने खातिर खाना खरीद लेंय।”

¹⁶ पय यीसु उनसे कहिन, कि “उनखर जाब जरूरी नहिं आय, तुहिन पंचे इनहीं खाँइका द्या।”

¹⁷ तब चेला लोग यीसु से कहिन, “इहाँ हमरे लघे पाँचठे रोटी अउर दुइठे मछरिन काहीं छोंड़िके, अउर कुछू नहिं आय।”

¹⁸ तब यीसु उनसे कहिन, कि “उनहीं इहाँ हमरे लघे लइ आबा।”

¹⁹ अउर भीड़ के मनइन से कहिन, कि “चारय माहीं बइठि जा।” अउर उन पाँचठे रोटी अउर दोनहूँ मछरिन काहीं लिहिन; अउर स्वरग कइती निहारिके धन्यबाद दिहिन, अउर रोटिन काहीं टोरि-टोरिके चेलन काहीं दिहिन, अउर चेला लोग, सगले मनइन काहीं परस दिहिन।

²⁰ अउर जब सगले जन खाइके संतुस्ट होइगें, तब चेला लोग खाए से बचे रोटिन के टुकड़न काहीं बारा टोपरी भरिके उठाय लाएँ।

²¹ अउर खाँइ बइठ मनइन माहीं, मेहेरिआ अउर लड़िकन काहीं छोंड़े, पाँच हजार के करीब मंसेरुआ रहे हँय।

पानी माहीं यीसु के रेंगब

²² ओखे बाद यीसु तुरन्तय अपने चेलन काहीं नाव माहीं चढ़ँइ के खातिर मजबूर किहिन, कि ऊँ पंचे उनसे पहिले झील के दुसरे पार चले जाँय, जब तक ऊँ भीड़ के मनइन काहीं बिदा करँय।

²³ अउर यीसु भीड़ के मनइन काहीं बिदा कइके, प्राथना करँइ के खातिर अकेलेन पहार माहीं चढ़िगें; अउर साँझिके ऊँ उहाँ अकेलेन रहे हँय।

²⁴ अउर तब तक नाव झील के बीच माहीं पहुँचिगे रही हय, अउर सँउहेन से तेज हबा चलत रही हय, एसे नाव लहरन से डगमगात रही हय।

²⁵ तबहिनय यीसु भिनसरहय करीब तीन से छय बजे के बीच, झील के पानी माहीं रेंगत उनखे लघे आएँ।

²⁶ तब चेला लोग उनहीं झील के पानी माहीं रेंगत देखिके घबराइगें! अउर कहँइ लागें, “उआ भूत आय।” अउर डेरन के मारे चिल्लाय उठें।

²⁷ तब यीसु तुरन्तय उनसे बात किहिन, अउर कहिन, “हिम्मत बाँधा; डेरा न; हम आहेन।”

²⁸ तब पतरस उनहीं जबाब दिहिन, “हे प्रभू, अगर अपनय आहेन, त हमहीं अपने लघे पानी माहीं रेंगिके आमँइ के हुकुम देई।”

²⁹ तब यीसु उनसे कहिन, “आबा” तब पतरस नाव से उतरिके यीसु के लघे जाँइ के खातिर, पानी माहीं रेंगँइ लागें।

³⁰ पय तेज आँधी काहीं देखिके डेराइगें, अउर जब पानी माहीं बूड़ँइ लागें, तब चिल्लाइके कहिन, “हे प्रभू, हमहीं बचाई।”

³¹ तब यीसु तुरन्तय आपन हाँथ बढ़ाइके उनहीं पकड़ लिहिन, अउर उनसे कहिन, “हे अल्प बिसुआसी, तूँ काहे अपने मन माहीं संका किहा?”

³² जब ऊँ दोनव जने नाव माहीं चढ़िगें, तब आँधी बन्द होइगे।

³³ इआ देखिके जेतने जने नाव माहीं चढ़े रहे हँय, सगले जने उनखे गोड़न गिरिके कहिन; “सचमुच अपना परमातिमा के लड़िका आहेन।”

³⁴ अउर ऊँ पंचे झील के दुसरे पार गन्नेसरत प्रदेस माहीं पहुँचे।

³⁵ अउर उहाँ के रहँइ बाले मनई उनहीं पहिचान लिहिन, अउर आस-पास के सगले गाँमन माहीं खबर पठबाय दिहिन, कि यीसु इहँय हें, एसे उहाँ के खुब मनई, बिमारन काहीं उनखे लघे लइ आएँ।

³⁶ अउर यीसु से बिनती करँइ लागें, कि अपना बिमारन काहीं, अपने ओन्हा के छोरव काहीं छुइ लेंइ देई: अउर जेतने जने उनहीं छुइन, ऊँ सगले जन नीक होइगें।