मत्ती 12 - Bagheli Bible

यीसु पबित्र दिन के घलाय प्रभू आहीं

¹ यीसु पबित्र दिन काहीं अपने चेलन के साथ, खेतन के किनारे-किनारे जात रहे हँय, अउर उनखे चेलन काहीं भूँख लगी रही हय, एसे ऊँ पंचे गोहूँ के बाली टोरि-टोरिके खाँइ लागें।

² तब फरीसी लोग उनहीं देखिके, यीसु से कहँइ लागें, “देखी, अपना के चेला लोग उआ काम काहे करत हें, जउन मूसा के बिधान के मुताबिक पबित्र दिन काहीं करब उचित नहिं आय।”

³ तब यीसु उनहीं जबाब दिहिन, “काहे तूँ पंचे पबित्र सास्त्र माहीं इआ नहीं पढ़े आह्या, कि जब राजा दाऊद, अउर उनखर साथी भूँखे रहे हँय, त ऊँ का किहिन तय?

⁴ ऊँ परमातिमा के घर माहीं घुसिके, परमातिमा काहीं भेंट चढ़ाई रोटिन काहीं कइसन खाइन तय? जबकि उनहीं अउर उनखे साथिन काहीं ऊँ रोटिन काहीं खाब मूसा के बिधान के खिलाफ रहा हय। काहेकि ऊँ भेंट के रोटिन काहीं केबल याजक लोग खाय सकत रहे हँय।”

⁵ अउर काहे तूँ पंचे मूसा के बिधान माहीं नहीं पढ्या, कि “याजक पबित्र दिन काहीं मन्दिर म पबित्र दिन के बिधी काहीं टोरे के बादव, निरदोस ठहरत हय।”

⁶ पय हम तोंहसे पंचन से बताइत हएन, कि “इहाँ ऊँ हें, जउन मन्दिर से बढ़िके हें।”

⁷ अउर अगर तूँ पंचे इआ बात के मतलब जन त्या, कि “हम दया करँइ से प्रसन्न होइत हएन, बलिदान से नहीं।” त तूँ पंचे निरदोस काहीं दोसी न ठहरउ त्या।

⁸ इआ जानिल्या, कि “मनई के लड़िका पबित्र दिन के घलाय प्रभू आहीं।”

एकठे मनई के झुरान हाँथ काहीं नीक करब

⁹ यीसु उहाँ से चलिके यहूदी लोगन के सभाघर माहीं गें।

¹⁰ उहाँ एकठे मनई रहा हय, जउने के एकठे हाँथ झुरान रहा हय। एसे उहाँ बइठ मनई यीसु के ऊपर दोस लगामँइ के खातिर उनसे पूँछिन, “का पबित्र दिन काहीं कउनव बिमार मनई काहीं नीक करब उचित हय?”

¹¹ तब यीसु उनसे कहिन, “तोंहरे पंचन म से अइसन को होई, कि जेखे एकठेरिन गाड़र होय, अउर उआ पबित्र दिन काहीं गड्ढा माहीं गिर जाय, त का उआ ओही पकड़िके बहिरे न निकारी?

¹² मनई के कीमत त गाड़र से बढ़िके हय; एसे मूसा के बिधान के मुताबिक पबित्र दिन काहीं भलाई करब उचित हय।”

¹³ तब यीसु उआ मनई से कहिन, “आपन हाँथ बढ़ाबा।” अउर उआ आपन हाँथ बढ़ाइस तबहिनय ओखर हाँथ दुसरे हाँथ कि नाईं निकहा होइगा।

¹⁴ तब फरीसी लोग सभाघर से बहिरे जाइके, यीसु के बिरोध माहीं साहुत करँइ लागें, कि यीसु काहीं कउनमेर से मार डारा जाय?

परमातिमा के चुना सेबक

¹⁵ यीसु इआ बात काहीं जानिके उहाँ से चल दिहिन; तब खुब मनई उनहीं पछिआय लिहिन, अउर यीसु सगले जनेन काहीं नीक किहिन।

¹⁶ अउर यीसु उनहीं चेतउनी दइके कहिन, कि हमरे बारे माहीं न बताबा, कि “हम को आहेन।”

¹⁷ इआ बात यीसु एसे कहिन, कि जउन बचन परमातिमा के सँदेस बतामँइ बाले यसायाह के व्दारा कहा ग रहा हय, उआ पूर होय:

¹⁸ कि “देखा, ईं हमार सेबक आहीं, जिनहीं हम चुनेन हय; इनसे हम खुब प्रेम करित हएन, अउर इनसे हमार मन खुस हय: हम आपन आत्मा इनखे ऊपर डारब; अउर ईं गैरयहूदी लोगन काहीं परमातिमा के न्याय के खुसी के खबर सुनइहँय।

¹⁹ ईं न त कोहू से लड़ाई-झगड़ा करिहँय, अउर न चन्डे से चिल्लाबय करिहँय; अउर न कोऊ बजारन माहीं इनखर बोलय सुनी।

²⁰ ईं कुचरे सरकन्डा काहीं न टोरिहँय; अउर धुँआ देत बाती काहीं न बुझइहँय, जब तक न्याय के जीत न होइ जाय, डँटे रइहँय।

²¹ अउर गैरयहूदी लोग उनखे नाम के ऊपर आसा रखिहँय।”

यीसु अउर बालजबूल

²² जब यीसु ईं बातन काहीं कहतय रहे हँय, तबहिनय कुछ लोग एकठे आँधर अउर गूँगा मनई काहीं जउने माहीं बुरी आत्मा सकान रही हय, उनखे लघे लइ आएँ; अउर यीसु ओही नीक कइ दिहिन, तब उआ मनई देखँइ अउर बोलँइ लाग।

²³ इआ देखिके सगले मनई अचरज मानिके कहँइ लागें, “का ईं राजा दाऊद के सन्तान होइ सकत हें?”

²⁴ पय फरीसी लोग इआ बात काहीं सुनिके कहँइ लागें, कि “यीसु त बुरी आत्मन के मुखिया अरथात सइतान के मदत से, बुरी आत्मन काहीं मनइन से निकारत हें।”

²⁵ पय यीसु उनखे मन के बात काहीं जानिके कहिन, कि “जउने राज के मनई आपस माहीं लड़ाई-झगड़ा करँइ लागत हें, त उआ राज के नास होइ जात हय; अउर अगर कउनव सहर इआ कि घर माहीं फूट परि जात ही, त उआ बरबाध होइ जात हय।

²⁶ त अगर सइतानय, सइतान काहीं निकारी, त उआ अपनय बिरोधी होइ जई; पुनि सइतान के राज कइसा बना रही? ओखर त नासय होइ जई।

²⁷ अगर हम सइतान के मदत से बुरी आत्मन काहीं निकारित हएन, त तोंहार सन्तान केखे मदत से बुरी आत्मन काहीं निकारत हें? एसे उँइन तोंहार फँइसला करिहँय।

²⁸ पय अगर हम परमातिमा के आत्मा के मदत से, बुरी आत्मन काहीं निकारित हएन, त तूँ पंचे इआ जानिल्या, कि परमातिमा के राज तोंहरे लघे पहुँचिगा हय।

²⁹ सोचा कउनव मनई, कउनव बलमान मनई के घर माहीं घुसिके ओखर धन-सम्पत्ती कइसन लूट सकत हय, जब तक कि उआ मनई, उआ बलमान मनई काहीं बाँधि न देय, ओही बाँधे के बादय, उआ मनई ओखे घर काहीं लूट सकत हय।

³⁰ जे हमार बात नहीं मानय, उआ हमरे बिरोध माहीं काम करत हय, उआ मनइन काहीं हमरे लघे नहीं ले आबय, बलकिन उनसे पाप कर बाइके हमसे दूर करत हय।

³¹ एसे हम तोंहसे कहित हएन, कि मनइन के हरेकमेर के पाप अउर बुराई माफ कइ दीन जइहँय, पय जे कोऊ पबित्र आत्मा के बुराई करी ओखर इआ पाप कबहूँ माफ न कीन जई।

³² अउर जे कोऊ मनई के लड़िका के बिरोध माहीं कउनव बात कही, ओखर इआ अपराध माफ कइ दीन जई, पय जे कोऊ पबित्र आत्मा के बिरोध माहीं कुछू कही, त ओखर इआ अपराध न त इआ संसार माही माफ कीन जई, अउर न त स्वरग माहीं माफ कीन जई।”

बिरबा अउर ओखर फर

³³ “अगर बिरबा काहीं निकहा कहा त ओखे फरव काहीं निकहा कहा, इआ कि बिरबा काहीं खराब कहा, त ओखे फरव काहीं खराब कहा, काहेकि बिरबा अपने फरय से पहिचाना जात हय।

³⁴ हे साँप के बच्चन कि नाईं बुरे मनइव, तूँ पंचे बुरे होइके कइसन निकही बात कहि सकते हया? काहेकि जउन मन माहीं भरा हय, उहय मुँहे से निकरत हय।

³⁵ निकहा मनई अपने मन के निकहे भन्डार से निकही बात निकारत हय; अउर बुरा मनई अपने मन के बुरे भन्डार से बुरी बात निकारत हय।”

³⁶ अउर हम तोंहसे पंचन से इहव कहित हएन, कि “जउन-जउन बुरी बातँय मनई कइहँय, उनहीं परमातिमा के न्याय करँइ के दिन हरेक निकम्मी बातन के लेखा देंइ परी।

³⁷ काहेकि तूँ पंचे अपनेन बातन के कारन निरदोस, अउर अपनेन बातन के कारन दोसी ठहराए जइहा।”

यीसु से स्वरग के अदभुत चिन्हारी देखामँइ के माँग

³⁸ इआ बात काहीं सुनिके मूसा के बिधान सिखामँइ बाले कुछ जने, अउर कुछ फरीसी लोग यीसु से कहिन, “हे गुरू, हम अपना से एकठे अदभुत चिन्हारी देखँइ चाहित हएन।”

³⁹ इआ सुनिके यीसु उनहीं जबाब दिहिन, कि “इआ जुग के बुरे अउर ब्यभिचारी लोग अदभुत चिन्हारी ढूँढ़त हें, पय योना नबी के जीबन माहीं जउन अदभुत काम परमातिमा किहिन तय, ओखे अलाबा अउर कउनव अदभुत चिन्हारी उनहीं न देखाई जई।

⁴⁰ जइसन योना नबी तीन दिन अउर तीन रात तक मछरी के पेटे माहीं रहे हँय, उहयमेर मनई के लड़िका घलाय तीन दिना तक रातव-दिन धरती के भीतर रही।

⁴¹ नीनवे सहर के मनई, परमातिमा के न्याय करँइ के दिन, इआ समय के मनइन काहीं दोसी ठहरइहँय, काहेकि नीनवे सहर के मनई योना के प्रचार सुनिके, पाप करब छोंड़ दिहिन तय, अउर देखा इहाँ ऊँ हें, जउन योना से घलाय बड़े हँय।

⁴² इजराइल देस के दक्खिन दिसा के सीबा देस के रानी, परमातिमा के न्याय करँइ के दिन, इआ समय के मनइन के साथ ठाढ़ होइके, उनहीं दोसी ठहरइहँय, काहेकि ऊँ खुब दूरी से इजराइल के राजा सुलैमान के ग्यान के बातँय सुनँय के खातिर आई रही हँय, अउर देखा इहाँ ऊँ हें, जउन राजा सुलैमान से घलाय बड़े हँय।”

अधूरे सुधार से बिपत्ती के आउब

⁴³ “जब बुरी आत्मा मनई से बहिरे निकर जात ही, तब अराम करँइ के खातिर झुरान जघा ढूँढ़त फिरत ही, अउर उआ बुरी आत्मा जब झुरान जघा नहीं पाबय।

⁴⁴ त कहत ही, कि ‘हम अपने उहय घर माहीं लउटि जाब, जहाँ से निकरिके आएन तय।’ अउर उआ बुरी आत्मा लउटिके उआ घर काहीं खाली, झारा बटोरा, अउर सजा-सजाबा पाबत ही।

⁴⁵ तब उआ जाइके, अपने से अउर बुरी सातठे आत्मन काहीं अपने साथ लइ आबत ही, अउर उआ मनई के भीतर सगली सकाइके रहँय लगती हँय, अउर उआ मनई के हालत पहिले से अउर जादा खराब होइ जात ही। इआ समय के बुरे मनइन के दसा घलाय इहइमेर होई।”

यीसु के महतारी अउर भाई

⁴⁶ जब यीसु भीड़ के मनइन से ईं बातँय करतय रहे हँय, कि तबहिनय उनखर महतारी अउर भाई लोग बहिरे ठाढ़ भें, अउर ऊँ पंचे यीसु से बात करँइ चाहत रहे हँय।

⁴⁷ तब कोऊ आइके यीसु से बताइस; कि देखी, अपना के महतारी अउर भाई लोग बहिरे ठाढ़ हें, अउर अपना से बात करँइ चाहत हें।

⁴⁸ इआ सुनिके यीसु बोलामँइ बालेन से कहिन, “हमार महतारी अउर भाई को आहीं?”

⁴⁹ अउर अपने चेलन कइती अँगुरि आइके कहिन; “देखा हमार महतारी अउर भाई लोग ईं पंचे आहीं।

⁵⁰ काहेकि जे कोऊ स्वरग माहीं रहँइ बाले हमरे पिता परमातिमा के मरजी के मुताबिक चलत हय, उहय हमार भाई, बहिनी अउर महतारी आय।”