लूका 22 - Bagheli Bible

यीसु के बिरोध माहीं सड़यन्त्र

¹ बिना खमीर के रोटी खाँइ बाला तेउहार, जउन फसह कहाबत रहा हय, आमँइ बाला रहा हय;

² अउर प्रधान याजक लोग अउर मूसा के बिधान सिखामँइ बाले, इआ बात के मोका माहीं रहे हँय, कि यीसु काहीं कउनवमेर से मारि डारी, पय ऊँ पंचे तेउहार माहीं आए मनइन से डेरात रहे हँय।

यहूदा इस्करियोती के बिसुआस घात

³ तब सइतान यहूदा इस्करियोती काहीं अपने काबू माहीं कइ लिहिस, जउन बारा चेलन माहीं गिना जात रहा हय।

⁴ उआ जाइके प्रधान याजकन अउर पहरा देंइ बाले सिपाहिन के मुखिअन से बात किहिस, कि यीसु काहीं कउनमेर से उनखे हाँथ माहीं पकड़बाई।

⁵ ऊँ पंचे खुब खुसी भें, अउर ओही रुपिआ देंइ के करार कइ लिहिन।

⁶ यहूदा इस्करियोती राजी होइगा, अउर इआ मोका ढूँढ़ँइ लाग, कि जब भीड़ न होई, तब यीसु काहीं उनखे हाँथ माहीं पकड़बाय देय।

चेलन के साथ फसह के अन्तिम भोज

⁷ तब बिना खमीर के रोटी खाँय के तेउहार आबा, जउने माहीं बोकरी के बच्चा के बली चढ़ाउब जरूरी रहत रहा हय।

⁸ तब यीसु पतरस अउर यूहन्ना काहीं इआ कहिके पठइन: “तूँ पंचे जाइके हमरे खाँय के खातिर फसह के खाना तइआर किहा।”

⁹ ऊँ दोनव जने यीसु से पूँछिन, “अपना कहाँ चाहित हएन, कि हम पंचे जाइके खाना तइआर करी?”

¹⁰ यीसु उनसे कहिन, “देखा, जइसय सहर माहीं पहुँचिहा, त तोंहईं एकठे मनई मूँड़े माहीं गघरा लए मिली; उआ जउने घर माहीं जाय; त तूँ पंचे ओखे पीछे-पीछे चले जया,

¹¹ अउर उआ घर के मालिक से कह्या: ‘गुरू तोंहसे पूँछिन हीं, कि उआ अँटरिया कहाँ ही, जउने माहीं हम अपने चेलन के साथ तेउहार के खाना खई?’

¹² उआ घर के मालिक तोंहईं एकठे सजी-सजाई बड़ी काहीं अँटारी देखाय देई; उहँइ खाना तइआर किहा।

¹³ अउर चेला लोग जाइके, जइसा यीसु कहिन तय, उहयमेर पाइन अउर फसह के खाना तइआर किहिन।

प्रभू-भोज

¹⁴ जब खाना खाँइके के जूना होइगे, तब यीसु बरहँव खास चेलन के साथ खाना खाँय बइठें।

¹⁵ अउर यीसु उनसे कहिन, ‘हमार बड़ी इच्छा रही हय, कि दुख सहँइ से पहिले, इआ फसह के तेउहार के खाना तोंहरे साथ खई।’

¹⁶ काहेकि हम तोंहसे कहित हएन, कि जब तक परमातिमा के राज माहीं इआ फसह के तेउहार के उद्देस्य पूर न होई, तब तक हम इआमेर खाना कबहूँ न खाब।

¹⁷ तब यीसु अंगूर के रस से भरा खोरबा लइके परमातिमा काहीं धन्यबाद दिहिन, अउर चेलन से कहिन, ‘एही ल्या, अउर आपस माहीं बाँटिके पि ल्या।’

¹⁸ काहेकि हम तोंहसे कहित हएन, कि जब तक परमातिमा के राज दुसराय न आय जई, तब तक हम अंगूर के रस अब से कबहूँ न पिअब।

¹⁹ ओखे बाद यीसु एकठे रोटी लिहिन, अउर परमातिमा काहीं धन्यबाद दइके टोरिन, अउर चेलन काहीं इआ कहिके दिहिन, ‘इआ हमार देंह आय, जउन तोंहरे खातिर दीन जात ही: हमरे यादगारी माहीं इहइमेर करत रह्या।’

²⁰ इहइमेर से यीसु खाना खाए के बाद, अंगूर के रस से भरा खोरबा लइके, इआ कहिके चेलन काहीं दिहिन, ‘इआ हमार खून आय जउन तोंहरे खातिर बहाबा जात हय, इआ खून परमातिमा के नई करार के प्रतीक आय।’

²¹ पय देखा, हमहीं बिरोधिन के हाँथ माहीं पकड़ामँइ बाला हमरे साथय माहीं खाना खाँइ बइठ हय।

²² काहेकि मनई के लड़िका त जइसा परमातिमा ओखे खातिर ठहराइन हीं, जातय हय, पय जउन मनई धोखा दइके मनई के लड़िका काहीं पकड़ामँइ बाला हय, ओही परमातिमा से खुब सजा मिली!”

²³ तबहिनय चेला लोग आपस माहीं पूँछँइ लागें, कि हमरे बीच म से इआ काम को करँइ बाला हय?

सबसे बड़ा को हय? एखे खातिर बिबाद

²⁴ चेलन माहीं इआ बिबाद होंइ लाग, कि हमरे पंचन म से सबसे बड़ा को हय?

²⁵ यीसु उनसे कहिन, “गैरयहूदी जातिअन माहीं उनखर राजा उनखे ऊपर हुकुम चलाबत हें; त जे उनखे ऊपर अधिकार जताबत हें; ऊँ पंचे मनइन के उपकार करँइ बाले माने जात हें।

²⁶ पय तूँ पंचे इआमेर न होया; बलकिन जउन तोंहरे बीच माहीं सगलेन से बड़ा हय, उआ सगलेन से छोट कि नाईं बनय, अउर जउन मुखिया हय, उआ सगलेन के सेबा करँइ बाले कि नाईं बनय।

²⁷ काहेकि बड़ा को हय, उआ जउन खाँय बइठ हय, इआ कि जउन सेबा करत हय? का उआ नहीं जउन खाँय बइठ हय? पय हम तोंहरे बीच माहीं सेबक कि नाईं हएन।

²⁸ ऊँ पंचे तुहिन आह्या, जउन हमरे परिच्छन माहीं हमेसा हमरे साथ रहे हया;

²⁹ एसे जइसन हमार पिता परमातिमा हमहीं राज करँइ के खातिर एकठे राज दिहिन हीं, उहयमेर हमहूँ तोंहईं राज चलामँइ के हक्क देब,

³⁰ जउने तूँ पंचे हमरे राज माहीं हमरे साथ खा-पिआ, अउर सिंहासनन माहीं बइठिके इजराइल के बरहँव गोत्रन के न्याय करा।”

पतरस के इनकार के बारे माहीं यीसु के भबिस्सबानी

³¹ यीसु कहिन, “समौन हे समौन! देखा, सइतान परमातिमा से तोंहईं माँग लिहिसी, कि गोहूँ कि नाईं फटकय मतलब जाँचय-परखय,

³² पय हम तोंहरे खातिर परमातिमा से बिनती किहेन हय, कि तोंहार बिसुआस कमजोर न होय, पय जब तूँ पुनि बिसुआस माहीं मजबूत होइहा, तब अपने भाइन काहीं स्थिर किहा।”

³³ समौन यीसु से कहिन, “हे प्रभू हम अपना के साथ जेल माहीं जाँइ के खातिर, अउर मरऊँ खातिर तइआर हएन।”

³⁴ यीसु उनसे कहिन, “हे पतरस हम तोंहसे कहित हएन, कि आजय मुरगा के बोलँइ से पहिले, तूँ तीन बेरकी इनकार करिहा, कि हम यीसु काहीं नहीं जानी।”

बटुआ, झोरिया, अउर तलबार

³⁵ पुनि यीसु अपने चेलन से कहिन, “जब हम तोंहईं बिना बटुआ, झोरिया अउर पनहीं के पठयन तय, त तोंहईं कउनव चीज के कमी भे रही हय का?” ऊँ चेला लोग कहिन, “कउनव चीज के कमी नहीं भे तय।”

³⁶ पुनि यीसु चेलन से कहिन, “पय अब जेखे लघे बटुआ होय त ओही लइ लेय, अउर उहयमेर झोरिया लइ लेय, अउर जेखे लघे तलबार न होय, त उआ आपन ओन्हा बेंचिके एकठे तलबार खरीद लेय,

³⁷ काहेकि हम तोंहसे कहित हएन कि, इआ जउन पबित्र सास्त्र माहीं लिखा हय, कि ‘उआ अपराधिन के साथ गिना जई’, उआ बात के हमरे ऊपर पूर होब जरूरी हय; काहेकि हमरे बारे माहीं पबित्र सास्त्र माहीं लिखी बात पूर होंय बाली हईं।”

³⁸ ऊँ चेला लोग कहिन, “हे प्रभू, देखी इहाँ दुइठे तलबार हईं।” यीसु उनसे कहिन, “बस होइगा।”

जैतून पहार के ऊपर यीसु के प्राथना

³⁹ तब यीसु उहाँ से उठिके रोज कि नाईं जैतून पहार माहीं चलेगें, तब उनखर चेला लोग घलाय उनखे पीछे-पीछे चलेगें।

⁴⁰ यीसु उआ जघा माहीं पहुँचिके उनसे कहिन, “प्राथना करा, जउने तूँ पंचे परिच्छा माहीं न परा।”

⁴¹ अउर यीसु उनसे थोर काहीं आँगे जाइके, टिहुनी के बल बइठिके प्राथना करँइ लागें,

⁴² “हे पिता परमातिमा, अगर अपना चाही, त हमरे ऊपर आमँइ बाले इआ भारी कस्ट काहीं दूर कइ सकित हएन, तऊ हमार नहीं, पय अपना के इच्छा पूर होय।”

⁴³ तब स्वरग से एकठे दूत यीसु काहीं देखान, जउन उनहीं सामर्थ देत रहा हय।

⁴⁴ यीसु आमँइ बाले संकट से खुब ब्याकुल होइके, हिरदँय माहीं खुब दुखी होइके अउर जादा प्राथना करँइ लागें; अउर उनखे देंह से पसीना, खून कि नाईं अउर बड़े-बड़े बूँदन कि नाईं भुँइ माहीं गिरत रहे हँय।

⁴⁵ तबहिनय यीसु प्राथना कइके उठें, अउर अपने चेलन के लघे गें, अउर उनहीं उदासी के मारे सोबत पाइन।

⁴⁶ तब यीसु उनसे कहिन, “काहे सोउते हया? उठा, प्राथना करा, जउने तूँ पंचे परिच्छा माहीं न परा।”

यीसु काहीं धोखे से पकड़ा जाब

⁴⁷ जब यीसु ईं बातन काहीं कहतय रहे हँय, तबहिनय एकठे भीड़ उनखे लघे आई, अउर ऊँ बारा चेलन म से एकठे जेखर नाम यहूदा इस्करियोती रहा हय, भीड़ के आँगे-आँगे आबत रहा हय। उआ यीसु के लघे आबा, कि उनखर चूमा लेय।

⁴⁸ यीसु ओसे कहिन, “हे यहूदा, का तूँ चूमा लइके मनई के लड़िका काहीं पकड़बउते हया?”

⁴⁹ उनखर चेला लोग जब देखिन, कि का होंइ बाला हय, तब कहिन “हे प्रभू का हम पंचे तलबार चलाई?”

⁵⁰ यीसु के कुछू बोलँइ से पहिलेन, चेलन म से एक जने महायाजक के दास के ऊपर तलबार चलाइके, ओखर दहिना कान काटि लिहिन।

⁵¹ तब यीसु कहिन, “बस अब कुछू न करा।” अउर ओखे कान काहीं छुइके नीक कइ दिहिन।

⁵² तब यीसु प्रधान याजकन अउर मन्दिर माहीं पहरा देंइ बालेन के अधिकारिन अउर, यहूदी धारमिक अँगुअन से, जउन उनहीं पकड़ँइ आए रहे हँय, कहिन, “का तूँ पंचे हमहीं डाँकू जानिके तलबारन अउर लाठिन काहीं लइके पकड़ँइ आए हया?

⁵³ जब हम मन्दिर माहीं रोज तोंहरे साथ रहत रहेन हय, तब तूँ पंचे हमहीं गिरफतार नहीं किहा, पय अब तोंहरे इच्छा के मुताबिक हमहीं पकड़ँइ के समय हय, काहेकि तूँ पंचे सब सइतान के काबू माहीं आय गया हय।”

पतरस के इनकार करब

⁵⁴ तब ऊँ पंचे यीसु काहीं पकड़िके चल दिहिन, अउर महायाजक के घर माहीं लइ आएँ। अउर पतरस दूरिन-दूरी यीसु के पीछे-पीछे जात रहे हँय।

⁵⁵ अउर जब ऊँ पंचे अँगना माहीं आगी बारिके एकट्ठा बइठिगें, तब पतरस घलाय उनखे बीच माहीं बइठिगें।

⁵⁶ तब एकठे दासी पतरस काहीं आगी के उँजिआरे माहीं बइठे देखिस, अउर ओखी कइती ध्यान से देखिके कहँइ लाग, “इहव घलाय यीसु के साथ रहा हय।”

⁵⁷ पय पतरस इआ कहिके इनकार किहिन, “हे महिला, हम उनहीं नहीं जानी।”

⁵⁸ थोरी देर बाद एक जने अउर पतरस काहीं देखिके कहिस, “तुहूँ घलाय उनहिन म से आह्या।” पतरस कहिन, “हे भाई हम उनमा से न होंहेन।”

⁵⁹ थोरी देर बाद एकठे अउर मनई जोर दइके कहँइ लाग, “निस्चित इहव घलाय यीसु के साथय रहा हय, काहेकि इहव गलील प्रदेस माहीं रहँइ बाला आय।”

⁶⁰ पतरस कहिन, “हे भाई, हम नहीं जानी कि तूँ का कहते हया!” जब पतरस इआ बात कहतय रहे हँय, ओतनिनदार मुरगा बोलिस।

⁶¹ तब प्रभू मुड़िके पतरस कइती निहारिन, अउर पतरस काहीं प्रभू के कही बात याद आइगे, जउन ऊँ कहिन रहा हय: “आज मुरगा के बोलँइ से पहिले तूँ तीन बेरकी हमहीं इनकार करिहा।”

⁶² तब पतरस बहिरे निकरिके फूट-फूटिके रोमँइ लागें।

यीसु के अपमान

⁶³ जउन मनई यीसु काहीं पकड़े रहे हँय, ऊँ पंचे यीसु के हँसी उड़ाइके मारँइ लागें;

⁶⁴ अउर उनखर आँखी मूदिके उनसे पूँछँइ लागें, “भबिस्यबानी कइके बताबा, कि तोंहईं को मारिस ही!”

⁶⁵ अउर ऊँ पंचे उनखर खुब अपमान करत अउर अपमानजनक बातँय कहत रहे हँय।

महासभा के आँगे यीसु

⁶⁶ जब सकार भ, तब यहूदी धारमिक अँगुआ लोग, अउर प्रधान याजक लोग, अउर मूसा के बिधान सिखामँइ बाले एकट्ठा भें, अउर यीसु काहीं अपने महासभा माहीं लइ जाइके पूँछिन,

⁶⁷ “अगर तूँ मसीह आह्या, त हमहीं बताय द्या!” यीसु उनसे कहिन, “अगर हम तोंहसे कही, त तूँ पंचे बिसुआस न मनिहा;

⁶⁸ अउर अगर हम मसीह के बारे माहीं पूँछी त तूँ पंचे बताए न पइहा।

⁶⁹ पय अब से मनई के लड़िका सर्बसक्तिमान परमातिमा के दहिने कइती बइठ रही।”

⁷⁰ ईं बातन काहीं सुनिके सगले जन कहिन, “का तूँ परमातिमा के लड़िका आह्या?” यीसु उनसे कहिन, “तूँ पंचे खुदय कहते हया, काहेकि हम उहय आहेन।”

⁷¹ तब ऊँ पंचे कहिन, “अब हमहीं कउनव गबाही के जरूरत नहिं आय, काहेकि हम पंचे खुदय ओखे मुँहे से सुन लिहेन हय; कि उआ अपने काहीं परमातिमा के लड़िका कहत हय।”