लूका 17 - Bagheli Bible

ठोकर के कारन बनँइ बालेन काहीं दन्ड

¹ यीसु अपने चेलन से कहिन, मनइन काहीं पाप म गिरामँइ बाली चीज त रहतिन हईं, पय जउन मनई दुसरे मनइन काहीं पाप माहीं गिराबत हें, त उनहीं परमातिमा से खुब सजा मिली।

² जे कोऊ हमरे ऊपर बिसुआस करँइ बालेन काहीं, चाह उआ छोट क लड़िकय होय, उनसे पाप कराबत हय, त उआ मनई के खातिर इआ ठीक कहाई, कि एकठे बड़ी काहीं चक्की के जेतबा ओखे गरे माहीं बाँधिके, समुद्र माहीं फेंक दीन जाय, काहेकि परमातिमा के सजा एहू से जादा मिली।

³ सतरक रहा; अगर तोंहार भाई कउनव गलती करय, त ओही समझाबा, अउर अगर उआ अपने गलती काहीं सोइकार कइके पचिताय, त ओही माफ करा।

⁴ अगर तोंहार भाई दिन भरे माहीं सात बेरकी तोंहसे गलती करय, अउर सातव बेरकी तोंहरे लघे आइके कहय, “हम पचितइत हएन” अउर माफी माँगय, त ओही माफ करा।

बिसुआस

⁵ तब सगले खास चेला प्रभू से कहिन, “परमातिमा के ऊपर हमरे बिसुआस काहीं बढ़ाई।”

⁶ प्रभू उनसे कहिन, “अगर परमातिमा के ऊपर राई के दानव के बराबर तोंहार सच्चा बिसुआस होत, त तूँ पंचे इआ सहतूत के बिरबा से कह त्या, कि जर से उँखड़िके समुद्र माहीं लगि जा, त उआ तोंहार बात मान लेत।”

दास के करतब्य

⁷ “मानि ल्या, कि तोंहरे पंचन म से कोहू के लघे एकठे दास हय, जऊँ हर जोतत हय, इआ कि गाड़र चराबत हय, अउर जब उआ खेत से लउटिके आबय, त का ओखर स्वामी ओसे कही, कि ‘हरबी आइके हमरे साथ खाना खाँय बइठ’?

⁸ अउर का उआ अपने सेबक से इआ न कही, कि ‘हमरे खातिर खाना तइआर कर, अउर जब तक हम खाय-पी न लेई, तब तक करिहा बाँधिके हमार सेबा कर; ओखे बाद तहूँ खाय-पी लिहे’?

⁹ का उआ मालिक सेबक के एहसान मानी? काहेकि उआ उहय काम किहिस जउने काम काहीं करँइ के हुकुम दीन ग रहा हय? नहीं।

¹⁰ इहइमेर से तुहूँ पंचे जब उन सगले कामन काहीं कइ चुका, जउने कामन काहीं करँइ के हुकुम तोंहईं दीनगा रहा हय, तब कह्या, ‘हम पंचे निकम्मे दास आहेन; जऊँ हमहीं करँइ चाही त केबल हम पंचे उहय किहेन हँय’।”

कोढ़ के दसठे रोगिन काहीं निकहा करब

¹¹ अइसन भ, कि जब यीसु यरूसलेम सहर जाँइ के समय सामरिया प्रदेस, अउर गलील प्रदेस के बीच से होइके जात रहे हँय।

¹² त कउनव गाँव माहीं घुसत समय उनहीं दसठे कोढ़ी मिलें।

¹³ ऊँ पंचे दूरी ठाढ़ होइके खुब चन्डे से चिल्लाइके कहँइ लागें, “हे यीसु, हे मालिक, हमरे ऊपर दया करी!”

¹⁴ यीसु उनहीं देखिके कहिन, “जा, अउर अपने काहीं याजकन काहीं देखाबा।” अउर जातय-जात ऊँ सगले सुद्ध होइगें।

¹⁵ तब उनमा से एकठे, इआ देखिके कि हम नीक होइ गएन हय, खुब चंडे से परमातिमा के बड़ाई करत लउटि आबा,

¹⁶ अउर उआ सामरिया प्रदेस के रहँइ बाला मनई जउन नीक होइगा रहा हय, यीसु के गोड़न गिरिके धन्यबाद देंइ लाग;

¹⁷ तब यीसु ओसे कहिन, “का दसँव जने नहीं सुद्ध भें, त पुनि ऊँ नव जने कहाँ हें?

¹⁸ का इआ गैरयहूदी जाति के अलाबा अउर कउनव नहीं निकरा, जउन परमातिमा के बड़ाई करत?”

¹⁹ तब यीसु ओसे कहिन, “उठिके चले जा; तोंहार हमरे ऊपर बिसुआस होंइ के कारन तूँ निकहा होइ गया हय।”

परमातिमा के राज के आउब

²⁰ एक बेरकी फरीसी लोग यीसु से पूँछिन, कि परमातिमा के राज कबय अई, तब यीसु उनहीं जबाब दिहिन, “परमातिमा के राज जाहिर रूप माहीं नहीं आबय।

²¹ अउर मनई इआ न कइहँय कि, ‘देखा, इहाँ हय, इआ उहाँ हय।’ काहेकि देखा, परमातिमा के राज तोंहरे बीच माहीं हय।”

²² पुनि यीसु अपने चेलन से कहिन, “ऊँ दिन अइहँय, जउने माहीं तूँ मनई के लड़िका के दिनन म से एक दिन काहीं देखँइ चइहा, पय देखँइ काहीं न पइहा।

²³ खुब मनई तोंहसे कइहँय, ‘देखा, मसीह उहाँ हें! इआ देखा इहाँ हें! पय तूँ पंचे उनखे बातन के बिसुआस मानिके, उनखे पीछे चले न जया।

²⁴ काहेकि जइसन बिजुली अकास के एक छोर से चमकिके, दुसरे छोर तक चमकत ही, उहइमेर मनई के लड़िका, अपने दिन माहीं अई।

²⁵ पय पहिले जरूरी हय, कि उआ खुब दुख उठाई, अउर इआ समय के मनई ओही तुच्छ जनिहँय।

²⁶ जइसन नूह के दिनन माहीं भ रहा हय, उहयमेर मनई के लड़िका के आमँइ के समय माहीं होई।

²⁷ जउने दिन तक नूह जिहाज माहीं चढ़ नहीं गें, तब तक सगले मनई खात-पिअत रहे हँय, अउर ऊँ पंचे काज-बिआह करत रहे हँय, अउर उनखे जिहाज माहीं चढ़तय, जल-प्रलय आइके सब काहीं नास कइ दिहिस।

²⁸ अउर इहइमेर लूत के दिनन माहीं भ रहा हय, सगले मनई खात-पिअत रहे हँय, एक दुसरे से लेन-देन करत रहे हँय, बिरबा लगाबत अउर घर बनाबत रहे हँय;

²⁹ पय जउने दिन लूत परिबार समेत सदोम सहर से निकरें, उहय दिन आगी अउर गन्धक अकास से बरसें, अउर सगलेन काहीं जलाइके राख कइ दिहिन।

³⁰ मनई के लड़िका के आमँइ के दिन घलाय अइसय होई।

³¹ यीसु पुनि कहिन, “उआ दिन जे कोऊ छत माहीं होय, अउर ओखर समान घर के भीतर होय, त उआ ओही लेंइ के खातिर नीचे न उतरय; अउर उहयमेर जे कोऊ खेत माहीं होय, उआ पीछे न लउटय।

³² लूत के मेहेरिआ काहीं सुध रक्खा! जइसन उआ परमातिमा के हुकुम नहीं मानिस अउर नोन के खम्भा बनिगे।

³³ जे कोऊ आपन प्रान बचामँइ चाही, उआ ओही गमाय देई, अउर जे कोऊ हमरे खातिर आपन प्रान तक देंइ काहीं तइआर रही, उआ ओही बचाए पाई।

³⁴ यीसु कहिन, हम तोंहसे कहित हएन, उआ दिन दुइठे मनई एकठे खटिया माहीं होइहँय; उनमा से एक जने उठाय लीन जई, अउर दूसर छोंड़ दीन जई।

³⁵ उहयमेर एक साथ जेतबा पीसत दुइठे मेहेरिअन म से, एकठे ऊपर उठाय लीन जई, अउर दूसर छोंड़ि दीन जई।

³⁶ (दुइ जने खेत माहीं होइहँय, एक जने उठाय लीन जई, अउर दूसर छोंड़ दीन जई।)”

³⁷ एतना सुनिके चेला लोग यीसु से पूँछिन, “हे प्रभू इआ कबय होई?” यीसु उनसे कहिन, “जहाँ चील्ह एकट्ठा होती हँय, त इआ जाने मिलत हय, कि उहाँ लहास ही, उहइमेर ईं चिन्हारिन काहीं देखिके, जान लिहा, कि मनई के लड़िका के दुसराय आमँइ के दिन लघेन आइगा हय।”