3 यूहन्ना 1 - Bagheli Bible

यूहन्ना के अभिबादन

¹ हम मसीही मन्डली के अँगुआ आहेन, हमरे तरफ से पियार गयुस के नाम, जेसे हम सच्चा प्रेम करित हएन।

² हे पियार साथी, हमार इआ बिनती ही, कि जउनमेर तूँ आत्मिक उन्नति कइ रहे हया, उहयमेर सगली बातन माहीं उन्नति करा, अउर नीक-सूख रहा।

³ काहेकि जब हमार कुछ बिसुआसी भाई हमरे लघे आइके, तोंहरे उआ सत्य के गबाही दिहिन, जउने माहीं तूँ सचमुच चल रहे हया, त हम खुब आनन्दित भएन।

⁴ हमहीं एसे बढ़िके अउर कउनव आनन्द नहिं आय, कि हम इआ सुनी, कि हमार लड़िका-बिटिया सत्य के गइल माहीं चलत हें।

गयुस के बड़ाई

⁵ हे पियार साथी, जउन कुछू तूँ, ऊँ भाइन के साथ करते हया, उआ बिसुआस के साथ करते हया, जबकि ऊँ पंचे तोंहरे खातिर अनजान हें।

⁶ ऊँ पंचे मसीही मन्डली माहीं तोंहरे प्रेम के गबाही दिहिन हीं। अगर तूँ उनहीं उआमेर बिदा करा, जउनमेर परमातिमा के लोगन के खातिर उचित हय, त निकहा करिहा।

⁷ काहेकि ऊँ पंचे मसीह के सेबा के खातिर निकर परे हँय, अउर जउन मनई यीसु मसीह के ऊपर बिसुआस नहीं करँय, उनसे ऊँ पंचे कउनव मदत नहीं लेंय।

⁸ एसे अइसन मनइन के मदत करँइ चाही, जउने हम पंचे सत्य के पच्छ माहीं उनखर सहायता करँइ बाले होइ जई।

दियुत्रिफेस अउर दिमेत्रियुस

⁹ एकठे चिट्ठी हम मसीही मन्डली काहीं लिखेन रहा हय, पय दियुत्रिफेस जउन उन माहीं अँगुआ बनँइ चाहत हय, त जउन कुछू हम पंचे कहित हएन, ओही उआ सोइकार नहीं करय।

¹⁰ एसे जब हम अउब, त ओखे कामन काहीं जउन उआ कइ रहा हय, सुधि देबाउब, कि उआ हमरे बारे माहीं बुरी-बुरी बात कहत हय; अउर एखे बादव ओही सन्तोस नहीं मिलय, अउर खुदय बिसुआसी भाइन काहीं सोइकार नहीं करय, अउर उनहीं जउन हमरे बातन काहीं अपनामँइ चाहत हें, बरज देत हय, अउर मसीही मन्डली से निकार देत हय।

¹¹ हे पियार साथी, बुराई काहीं नहीं, बलकिन भलाई काहीं अपनामँइ बाले बना, जे कोऊ भलाई करत हय, उआ परमातिमा कइत से हय; पय जे कोऊ बुराई करत हय, उआ परमातिमा काहीं नहीं देखिस आय।

¹² दिमेत्रियुस के बारे माहीं सबय कोऊ सराहत हें, बलकिन सत्य घलाय खुदय गबाह हय, अउर हमहूँ पंचे घलाय सराहित हएन, अउर तूँ त जनतेन हया, कि हमार पंचन के गबाही सही हय।

अन्तिम अभिबादन

¹³ तोंहईं लिखँइ के खातिर हमरे लघे खुब बातँय हईं, पय उनहीं स्याही अउर कलम से लिखँइ नहीं चाही।

¹⁴ पय हमहीं आसा ही, कि हम तोंहसे हरबिन मिलब, तब हम तोंहसे आमने-सामने बातचीत करब।

¹⁵ तोंहईं सान्ति मिलत रहय। इहाँ के सगले साथी तोंहईं नबस्कार कहत हें। उहाँ के साथिन से नाम लइ-लइके नबस्कार कहि दिहा।