Salmos 5 - Biblia ande chib Romani

Thiarinako e Devlea

Katar o lleno kai sikavel te llilaben ando firo. Llili e Davideki.

¹ Devla, asun me alava, de anglal soke moliv man chuke,

² thov sama kai mangav tutar, tu san mo Del ta mo Charo, chuke ka moliv man.

³ ¡Ioi Devla! thiarinako ka asune mo avazi, but rano ka phenav chuke so si mange, ta rano ka aduricharav te de anglal.

⁴ Tu san iek Del kai inai chuke drago o bilachipe, goleke e bilache llene nasti aven pasa tu,

⁵ ta ni e llene zilne, ta ni terpi e llenen kai cheren o bilachipe,

⁶ zatri e kojamnen, ta trade e llenen kai ni cheren pe chiro, ta golen kai mundaren.

⁷ A me, pala cho baro volipe sai dav ande cho cher, ¡sai blagosiv tut changenchar, ta sai dikhav karing cho santo cher daraia!

⁸ Devla, cheres me dusmanura cher te phirav ande cho chachipe, inllar man po lacho drom.

⁹ Von nikada ni den orba chachimaia, ¡von si cherne andral! Sargo iek limori putardo si lengo gurtano, ¡lengi chib si kojamni!

¹⁰ ¡Dukhav len Devla! ¡Cher te peren pe lende lenge bilache mislura! Chude len tutar pala e but ezgode bilache kai cheren, soke ni kamen te cheren pe chiro.

¹¹ Veselia si te avel e llenenge kai mangen tutar te arakhe len, llilaben veselimatar suako llive soke tu arakhe len. Gola kai volin tut, veselinpe cheres tu,

¹² soke tu Devla, blagosi e llene kai si tuia chacho, chi zalba si truial letar sargo iek eskudo.