Salmos 4 - Biblia ande chib Romani

Sa e vera si ando Del

E lleneke kai sikavel te llilaben. Ande basalde kai si len kuerde. Llili katar o David.

¹ Devla tu arakhe man, ¡de anglal kana ikharav tut! Tu kai lian mandar me nuzde, ¡te avel chuke zalba mandar, ta asun man kana moliv man chuke!

² Tumen kai istardon gia glamne, ¿Gachin droma ios ka kusen man? ¿Gachin ios ka zelin ta ka roden e ezgode kai ni mol len niso, ta e ezgode kojamne?

³ E Devleke si drago e llene kai si chache lea, o Del asunel man kana ikharav le.

⁴ ¡Daran, ta na cheren ios o bilachipe! Kana ka thoven tumen te soven, mislin tumen ande sa so cherden,

⁵ den kurbanura chache ta te avel tumen vera ando Del.

⁶ But llene phenen gia: ¿ko ka sikavel amenge o lachipe? ¡Devla, dik pe amende lachimaia!

⁷ Tu thodan ande mo lio mai but veselia neko ande llenengo kai si len lliu ta but mol.

⁸ Me perav mange esmiro ta sovav oma, soke tu Devla de man e vera te ziviu.