Рындоря 11 - Biblia ande chib Romani

O Pedro ando Jerusalem phenel so cherda e llenenge katar e khanlliri

¹ E apostolura ta e phlal kai sea ande Judea asunde kai i e llene kai inai judiura pachaie ande leke alava.

² A kana o Pedro irisailo ando Jerusalem, nesave llene kai pachana ta sea katar e judiura dena leke orbe.

³ Ta puchle le: ¿Soke llelan kai e llene kai inai judiura, ta jalan lenchar?

⁴ O Pedro phenda lenge sa so avilape. Ta phenda:

⁵ Me sema ando foro katar o Jope, ta kana molivaman sikadila mange sargo iek suno: Dikhlem sargo iek baro chiti kai saia phanglo pe star riga kai fuliela katar o miloso llik kote kai sema me.

⁶ Ondaka dikhlem mai sukar te sai llanav so saia andre, ta dikhlem zivirinie stare porrnenge, ta sapa ta chiriklia.

⁷ Ta asundem iek avazi kai phenda mange: Uste Pedro; mundar ta ja.

⁸ Me phendem: Na Gazda, soke nikada ni jalem niso melalo.

⁹ Ondaka o avazi kai avela katar o miloso dia manchar orba pale ta phenda mange: So o Del chistosarda, na phen tu kai si melalo.

¹⁰ Gava avilape trin droma, ta mapalal sa so dikhlem llelotar upre ando miloso.

¹¹ Ondaka, trin llene bichalde katar e Sesarea avile te roden man kai o cher kai me ziviva.

¹² O Duo phenda mange te na darav niso ta te llau lenchar. Ta llele manchar i gala sou phlal. Sa diam ando cher katar iek lleno,

¹³ kai phenda amenge sar dikhlaia iekhe suecho ande po cher, kai achilo pe porrne ta phenda leke: Bichal vareka ando foro katar o Jope te anen e Simono, kai phenen leke Pedro;

¹⁴ vou ka phenel chuke sar sai ave braduime, tu ta i sa chi familia.

¹⁵ Kana thode man te dav lenge orba, o Santo Duo avilo pe lende isto sar omanglal aviloia pe amende.

¹⁶ Ondaka mislisailem so phendaia o Gazda: Chachimaia o Juan kristisarda e paiea, a tumen ka aven kristime e Santone Duoia.

¹⁷ Ta dia len o Del isto so dia amen kai pacha ando Gazda o Jesukristo, ¿a ko sem me te phenav e Devleke kai gua nasti avelpe?

¹⁸ Kana e phlal katar o Jerusalem asunde gaia orba, ni die ios orbe jolinaia ta blagosisarde e Devle, ta phenena: ¡O Del ikharel te irinpe lete i golen kai inai judiura ta te len o zivoto ostade!

E khanlliri katar e Antiokia

¹⁹ Kana mulo o Esteban, mapalal thode te roden e llenen kai pachana ando Jesus te maren len, ta nesave saia te nasen ta lleletar ande Fenisia, ando Chipre ta ande Antiokia. Kote phende e judionenge e lachi viasta.

²⁰ A nesave llene kai pachana kai sea katar o Chipre ta katar o Sirene avile ande Antiokia ta die orba i e llenenge kai inai sea judiura, ta phenena lenge e lachi viasta e Jesukristoki, o Gazda.

²¹ E zor e Gazdaki saia lenchar, ta gia but llene mukle po pachape o purano ta pachaie ando Gazda.

²² E llene e khanllirake katar o Jerusalem, kana asunde gaia viasta, bichalde e Bernabee ande Antiokia.

²³ Kana avilo o Bernabe dikhla sar o Del blagosisardaia len, ta veselisailo but ta phenda saurrenge te llan chachimaia pala o Gazda sa pe liea.

²⁴ Soke o Bernabe saia iek lleno lacho, pherdo katar o Santo Duo ta pherdo pachape ta gia but llene diepe kai o Gazda.

²⁵ Mapalal kana nakhle gala ezgode, o Bernabe llelo ando Tarso te rodel e Saulo,

²⁶ ta kana malada le, inllarda le ande Antiokia ta kote achile e llenenchar katar e khanlliri burs llive, ta sikavena bute llenen. Kote ande Antiokia saia e purvo drom kai ikharde len kristianura.

²⁷ Ande gola llivesa nesave poraukura llele katar o Jerusalem ande Antiokia.

²⁸ Ta iek lendar kai ikhardola Agabo, thodape pe porrne ta o Duo cherda le te del orba, ta phenda kai ka avel but bari bok ande sa o sueto, ta gua avilape ande llivesa katar o charo o Klaudio.

²⁹ Ondaka ande Antiokia e llene kai pachana ando Jesus mangle te pomozin e phlalen kai zivina ande Judea, ta bichalde lenge prema so sai dela suako lleno,

³⁰ Ta gia cherde le, chidie love ta die len kai o Bernabe ta kai o Saulo te inllaren len kai e phure katar e Judea.