Proverbios 9 - Biblia ande chib Romani

O bizaipe ta o dilipe

¹ O bizaipe cherda po cher, thoda efta direkura te dikhol sukar,

² mundarda zivirinie te cherel o jape, lacharda iek mol glamni, thoda e sinia

³ ta bichalda pe slugen te urkin katar o than mai vazdino e foroko:

⁴ ¡Aven kate, ternalen kai ni llanen but! Bichalda te phenel gia e dilenge:

⁵ ¡Aven te jan katar mo marrno ta te pien katar e mol kai lachardem.

⁶ Na cheren o dilipe ta ka zivin, llan po zivoto sar llan e llene bizai!

⁷ De po lleno bilacho kai kusel, ta ka chere te kusel tut ta te dukhavel tut.

⁸ De po lleno kai kusel ta ka murzil pe tute, de po bizai ta ka chere te volil tut.

⁹ De e bizaie ta ka avel ios mai bizai, sikav e llene kai llanel ta ka llanel ios.

¹⁰ O mai baro bizaipe si te blagosi e Devle, te pinllare gole kai si Santo gua si o bizaipe.

¹¹ Me, o bizaipe, ka cherav te zivi but burs, ka bariarav e bursa katar cho zivoto.

¹² Ta san bizai, chiro ka avel o chari, te san barikano, e dos ka avel pe tute.

¹³ O dilipe si sargo iek diskinia balavi, kai ni llanel niso, ni so del orba.

¹⁴ Besel pe iek stolicha angla o udar katar po cher, po than mai vazdino katar o foro

¹⁵ ta ikharel e llenen kai phiren po lacho drom ta phenel:

¹⁶ ¡Aven kate, e terne kai ni llanen! E llenenge kai llan dilimaia phenel gia:

¹⁷ O pai kai chorde le si mai lacho, ta o marrno kai jalpe po chorial si mai guglo.

¹⁸ A von ni llanen kai gua cher si e limoria, ta kai e llene kai llele, akana si ando limori.