Proverbios 7 - Biblia ande chib Romani

Sar ikharel e diskinia kai llal avere murusenchar

¹ Thou sama pe me alava, chaurrea, ta guruv ande che mislura me zakonura.

² Kande me zakonura ta mo sikadipe, guruv len sargo iek baro barvalipe, ta ka zivi

³ phande len pe che naia, pisisar len ande che mislura.

⁴ Cher te avel cho phlal o bizaipe, cher te avel cho amal o llanglipe.

⁵ Von ka braduin tut katar e diskinia zinime kai llal avere murusenchar, e diskinia kai ni pinllare ta kai lake alava den tut dragostia.

⁶ Iek llive dikhava maskar e kastorra katar mi penllerava

⁷ nesave llenen ternorre kai ni llanen but, ta dikhava pe iek kai saia o mai dilorro.

⁸ Ta kana reslo kai o gua drom, nakhlo pe ogoia rig karing o cher katar goia diskinia,

⁹ Lela te perel e riat, ta cherdola truniariko.

¹⁰ Ondaka e diskinia likisti te maladol lea, dikhola ta miscolape sargo iek kurvichka,

¹¹ izdramni ta ni achela pe iek than, achardola kai nasti achela chere

¹² ta kai llala pe droma ta pe plase te istarel e purve llene kai ka nakhel.

¹³ E diskinia abrasisarda e ternorre chumidia le, ta phenda leke bi lallaimaia:

¹⁴ Allive cherdem o kurbano katar e pas kai diem mo alav te cherav.

¹⁵ Goleke likistem te maladivav tuia, ¡mangava te dikhav tut, ta maladem tut!

¹⁶ Pe mo kerveto inzardem iek chiti cherdo katar o lino ejipsio but sukar,

¹⁷ thodem pe lete meriso katar e mirra, aloe ta karanfili.

¹⁸ Aide, te mativa katar o volipe, dragostiamen katar o volipe lligo ni llivosaol,

¹⁹ soke mo rrom inai chere, baro drom llelo te phirel,

²⁰ inllarda peke iek ambava lovenchar ta ni ka irilpe llik kai o llive kai phenda,

²¹ Gia guglimaia dia leke orba kai cherda pe lako,

²² ta llelo pala late: sargo iek guruv kai llal te mundaren le sargo iek siervo kai istaren le e manusa

²³ ta mapalal iek llida putarel leko lio, sargo iek chirikli kai furial karing e mreza ta ni llanel kai goleke ka merel.

²⁴ Goleke, chaurrea, asun man, thov sama pe me alava.

²⁵ Te na llan che mislura pe goia diskinia, ta na jasar o drom cheres la,

²⁶ soke but llene mule cheres la, ¡bute llenen mundarda!

²⁷ Te istare o drom kai llal karing lako cher istare o drom karing o meripe.