Proverbios 23 - Biblia ande chib Romani

- 6 -

¹ Kana iek lleno glamno ka besel tuia pe sinia, dik bizaimaia so si angla tute,

² te san but bokhalo terpisar chi bok,

³ na zelisar lengo sukar jape soke pala o jape sai kojado.

- 7 -

⁴ Na trudisao te ave barvalo, na thov chi briga pe goia ezgoda.

⁵ Dik po barvalipe ta ka achare kai ni mol le niso, soke llaltar sargo iek agila, barion leke pakha ta furial.

- 8 -

⁶ Na bes pe sinia iekhe llenea kai si lakomo, ta na zelisar leko jape

⁷ soke vou si sar si leko lio, phenel chuke: Ja ta pi, a ni phenel le e liea.

⁸ Ka chade leko jape ta ni ka mol len niso e sukar alava kai phendan leke.

- 9 -

⁹ Na de orba e dileke, soke ka asal peke katar e alava bizai kai phene leke.

- 10 -

¹⁰ Na bariar chi umal e purani ta na le iek kotor katar umal e bidadengi.

¹¹ Soke gua kai arakhel len si zuralo, ta ka chinel lenge kris pe tute.

- 11 -

¹² Thou che mislura ando sikadipe ta asun o bizaipe.

- 12 -

¹³ Na muk te sikave e terne, soke ni ka merel te chaladan le e kastea.

¹⁴ Ka chalave le e kastea ta ka bradui le katar o meripe.

- 13 -

¹⁵ Chaurea kana ka rese te ave bizai ka veselilpe mi lio.

¹⁶ Ka avel mange iek dragostia but bari kana ka de orbe chache.

- 14 -

¹⁷ Na zelisar e ezgode katar e bilache mai sukar achi sorro llive ando liubao e Devleko.

¹⁸ Ta gia ka rese te ave veselo ta ni ka zatrilpe so adurichare.

- 15 -

¹⁹ Thou sama chaurrea ta sikiu, ta ortosar che mislura pe cho drom.

²⁰ Na lla e matarnenchar, ni golenchar kai izdran po jape,

²¹ soke e matarne ta e bokhale ka chorraon, ta o leno llal furiado ande dronie.

- 16 -

²² Thou sama che dadeke kai cherda tut, ta na muk che da kana ka phuriol.

²³ Chin o chachipe, o llanglipe, o sikadipe, o bizaipe ¡ta na bichin len!

²⁴ O dad veselilpe ande po chaurro lacho ta drago leke kai si o dad katar iek chaurro bizai.

²⁵ Te avel dragostia che dadeke ta che dake, ta te veselinpe soke die tut o zivoto.

- 17 -

²⁶ Chaurea de man cho lio ta dik pe me droma.

²⁷ Iek bari jar si e kurvichka, iek bunari tanguno si e diskinia avereki.

²⁸ Gurudol ta prezol sargo iek kochkari, ta cherel te jasaon but murusa.

- 18 -

²⁹ ¿Ko nakhel nuzda? ¿Ko nakhel duk? ¿Ko marelpe? ¿Ko rovel? ¿Ka chalaven a inai dosalo? ¿Kake akha si ande modriche?

³⁰ Gola kai si matarne ta roden te amin iek mol ande aver.

³¹ Na dik pe mol kana loloil ta dikhol sukar o lolipe ando taso. Ta gia sukar nakhave le poloke,

³² a mapalal dandarel sargo iek sap, ta dukhavel.

³³ Ka dikhe ezgode kai ni dikhlan nikada ta ka de orbe bilache.

³⁴ Ka ave zalime sargo ande mora sargo kana san upre po kas katar e llimia.

³⁵ Ta ka phene: Chalade man a ni dukhaia man marde man a ni achardem niso, kana ka llungadivav pale ka rodav e mol.