Oseas 13 - Biblia ande chib Romani

E zatrania katar o Israel

¹ Kana o Efrain dela orba ogola viche asunena liubaimaia, a o Efrain mulo kana cherdilo dosalo soke blagosisarda e Baale.

² ¡Ta ni mukel te cherel o bilachipe! Katar lengo rup cheren delen prema so mislin e llene kai radin ando rup. Mapalal phenen: ¡Den le kurbanura! ta e llene chumiden e delen kai si sargo guruv.

³ Goleke ka aven sargo e tufina kai si thiarinako, ta kana pechal peke rano ta llaltar, sargo e char suki kai inllarel la o balav.

⁴ A me sem cho Del sar kana sana ando Ejipto. Ni ka pinllare avere dele, sargo me, ta ni ka pinllare avere braduimari, samo man.

⁵ Me pinllardem tut ande phuv suki.

⁶ A kana sea tumen but jape, tumaro lio pherdilo katar o istardipe, ta bristardepe mandar.

⁷ Goleke ka avav lenge sargo liono, sargo leopardo ka aduricharel po drom.

⁸ Ka likav sargo melleda kai jasarde pe melledura minone, ta ka zatriv lengo lio. Sargo liono ka jav len isto kote, sargo zivirinia divi, ka pharradav len.

⁹ Jasailan, ioi Israel a mande si cho pomozipe.

¹⁰ ¿Kaitalo cho charo, te sai arakhel sa che foronen, che krisarien, kai manglan le kana phendan: De man charo ta gazda?

¹¹ Ta diem tu charo ande murni joli, ta ka lav le tutar jolinaia.

¹² O bilachipe katar o Efrain si pisime, leko bilachipe gurudino.

¹³ Ka avel leke dukha sargo kana iek diskinia si te maladol lake, a o chavo si dilo soke ollikana saia te thovelpe sar morabi te sai biandol.

¹⁴ Me ka bradui len katar o maripe. Ioi meripe, me ka avav cho meripe. Ta me ka avav chi zatrania, ioi Seol Ni ka avel mange ios zalba pe gala llene.

¹⁵ Makar ka bariol o Israel sargo e char, ka avel o balav katar e rig kai likel o kham, o zuralo balav kai phurdel katar o pusto, ta ka sukarel e bunaria ta e paia. O dusmano ka lel lendar lenge sukar chea ta angrusta.

¹⁶ E Samaria ka avel zatrime soke vazdinaili po Del. E jarnienchar ka mundaren len, e minonen ka chuden len pe phuv ta ka putaren e diskinien khamne.