Oseas 11 - Biblia ande chib Romani

O Del volil pe foro kai ni kandel

¹ Kana o Israel saia minono, me voliva le, ta katar o Ejipto ikhardem me chaurre.

² Ta kana ios ikharava le ios duriola mandar. Mo foro dela kurbanura e delenge, ta phabarela lenge o taimano.

³ A me inllardem e foro katar o Efrain sikadem le te phirel, ta ni pinllarda kai me arakhava le.

⁴ E volimaia andem le mande. Sema lenge sargo o lleno kai lel o pharipe, ta thodem angla len o jape.

⁵ Ni ka irilpe ande phuv katar o Ejipto, isto o asirio ka avel lengo charo, soke ni kam le te irinpe.

⁶ E jarni ka perel pe lengo forura ta ka zatril lenge forichura, ka zatril len pala lenge ezgode bilache kai mislin te cheren.

⁷ Mo foro ni kamel te kandel man, makar ikharen man, niko ni blagosil man chachimaia.

⁸ ¿Sar ka mukav tut, ioi Efrain? ¿Sar ka mukav tut, Israel? ¿Sar ka cherav chuke sar cherdem e Admaeke, ta so cherdem e Zeboimeke? ¡Mo lio si but tristome, zao mange tutar!

⁹ Ni ka cherav prema murni joli, ni ka zatriv pale e Efraine, soke sem Del, ta na manus, o Santo maskar tute ta ni avilem te zatriv tut.

¹⁰ Ka llan pala o Del, vou ka basel sargo liono. Ka basel ta leke chave ka aven ando izdrape katar e rig kai likel o kham.

¹¹ Sargo chirikli ka aven sigarde katar o Ejipto, ta sargo gulubo ka aven katar e Asiria, ta ka cherav te zivin pale ande lenge chera. Me o Del phenav le.

O bilachipe katar o foro e Devleko

¹² O Efrain truisarda man ando kojaipe, ta i o foro katar o Israel truisarda man ando kojaipe. O Juda ni mukla te gazdaril e Devlea, ta llal chachimaia e santonenchar.