Mikeas 3 - Biblia ande chib Romani

E dos katar e gazda bilache

¹ Asunen akana, gazda katar o Israel: ¿ni saia te llanen tumen so si orta?

² A tumen murzin po lachipe ta volin o bilachipe, ikanen lengi mozga ta o mas katar mo foro lligo ni muken le samo ande kokala.

³ Jan o mas me foroko ikanen leki mozga ta phagen leke kokala chinen le sargo o mas kai chiradol ande kavi.

⁴ Goleke kana ka ikharen e Devle, vou ni ka del tumen anglal. Ande gua vreme vou ka duriol tumendar pala e ezgode bilache kai tumen cherden.

E dos katar e poraukura kojamne

⁵ Gia phenel o Del e profetonenge kai kojaven e foro, kai den orba katar e pas golenge kai den len te jan, ta marenpe e llenenchar kai ni den len niso

⁶ Tumari poroka ka cherdol riat, ta tumaro apogodipe ka cherdol truniariko. O kham ka perel gole profetonenge, ta o llive ka cherdol lenge truniariko.

⁷ ¡Gola poraukura ka achen ando lallao! ¡Gola llene kai apogodin, ni ka llanen so te cheren! ¡Lengo mui ka achel phanglo, soke o Del ni ka del lenge orba!

⁸ A o duo e Devleko cherel te avav zuralo, te phukavav so cherel o Jakob ta o bilachipe katar o Israel.

E zatrania katar o Jerusalem

⁹ Asunen akana, e gazda katar o Jakob ta e kapitanura katar o Israel, kai murzin po chachipe ta bangaren sa so si orta,

¹⁰ kai vazden o Sion mundarimaia ta o Jerusalem e bilachimaia.

¹¹ E krisaria chinen kris prema e love, e popura len love kana sikaven, ta e poraukura bichinen e poroka ta phenen ando Del: ¿inai chachipe kai o Del si amenchar? niso bilacho sai perel pe amende.

¹² Goleke, pala tumari dos, o Sion ka avel radime sargo iek vostano, o Jerusalem ka achel sargo umpa phagipe, ta o burdo katar o cher e Devleko ka achel sa uchardo katar e fafurruke.