Markos 16 - Biblia ande chib Romani

O Jesus ustel katar o meripe

¹ Kana peli e riat ta nakhlo o sabado, e Maria Magdalena, e Maria e dei e Santiagoki ta e Salome, chinde merisura te thoven pe esnaga e Jesuseki.

² Thiarinako rano kana pharrona e zore katar o purvo llive katar e efta, llele kai o limori.

³ Ta phenena iek averiake: ¿Ko ka ikanel o barr katar o udar e limoreko?

⁴ A kana dikhle, thode sama kai gua barr kai saia but baro, ni saia pe po than.

⁵ Ta kana die ando limori dikhle, kai pe rig e chachi besela iek lleno terno kai saia furiado ande patave parrne ta lunge. Ta e diskinie daraile,

⁶ a gua lleno phenda lenge: Na daran. Tumen roden e Jesuse katar o Nazaret, gole kai krustosarde le. Vou ustilo katar o meripe ta inai talo kate. Dikhen o than kai thode le.

⁷ Llan ta phenen leke disipulonenge ta e Pedroke kai o Jesus llal ande Galilea te chidel tumen pale. Ta kote ka dikhen le, isto gia sar phenda tumenge.

⁸ Ondaka e diskinie nasle katar o limori, soke izdrana daratar. Ta ni phende niso nikake, soke darana.

E Maria Magdalena dikhel e Jesuse

⁹ Kana o Jesus ustilo katar o meripe thiarinako rano ando purvo llive katar e efta, mai anglal sikadilo e Mariake e Magdalena, kai tradiaia latar efta llavolonen.

¹⁰ Voi avili kai e disipulura ta von rovena soke o Jesus muloa, a voi phenda lenge kai o Jesus saia llundo.

¹¹ Kana von asunde kai o Jesus zivila ta kai voi dikhla le, ni pachaie la.

Dui disipulura dikhen e Jesuse

¹² Mapalal o Jesus sikadilo duie disipulonenge kai phirena karing e droma.

¹³ Gala dui disipulura llele ta phende ogolenge, a ni len ni pachaie.

¹⁴ Mapalal, o Jesus sikadilo e desuiekhe disipulonenge, kana von besena pe sinia. Vou dia pe lende soke ni saia len pachape ta ni kandena, soke ni pachaie golen kai dikhlea le kana ustilo katar o meripe.

¹⁵ Ta phenda lenge: Llan ande sa e phuvia ta phenen saurrenge e lachi viasta.

¹⁶ Gua kai ka pachal ta ka avel kristime ka avel braduime, a gua kai ni ka pachal, ni ka avel braduime.

¹⁷ Ta gola llene kai ka pachan ka cheren bare ezgode ande mo anav, ka traden e llavolonen, ka den orba ande neve chibia,

¹⁸ ka istaren ande pe va e sapen, ta te piena vareso kai sai mundarel len, ni ka cherel lenge niso, ka thoven pe va pe nasuale ta e nasuale ka saston.

O Jesus llaltar ando miloso

¹⁹ A kana o Gazda o Jesus dia lenchar orba, avilo vazdino ando miloso ta beslo pe rig e chachi e Devleki.

²⁰ Von llele te phenen e lachi viasta pe suako rig, ta o Gazda pomozila len e bare ezgodenchar Devlikane kai cherena.