Кэздэто 1 - Biblia ande chib Romani

O Del cherda

¹ Mai anglal o Del cherda o miloso ta e phuv.

² Ta e phuv saia rispime ta chuchi, ta o truniariko saia upral pe bari jar, ta o duo e Devleko miskolape upral pe paia.

³ Ondaka o Del phenda: ¡Te avel o villelo! ta o villelo avilo.

⁴ Ta o Del dikhla kai o villelo saia lacho, ta fulada o villelo katar o truniariko.

⁵ Ta thoda o anav katar o villelo llive, ta o anav katar o truniariko ikharda le riat. Ta peli e riat ta llivosaila. Gua saia o purvo llive.

⁶ Mapalal phenda o Del: Te avel iek putardipe te fulavel e paia katar e paia.

⁷ Ta o Del cherda iek putardipe te fulavel e paia kai sea telal tala o putardipe katar e paia kai sea upral katar o putardipe, ta gia avilape.

⁸ Ta o putardipe o Del ikharda le miloso. Ta peli e riat ta llivosaila. Gua saia o duito llive.

⁹ Ondaka o Del phenda: O pai kai si telal tala o miloso, te chidiniaol samo pe iek rig te sai dikhol o sukipe. Ta gia avilape.

¹⁰ Ta e rig suki o Del ikharda la phuv, ta o pai kai chidinailo ikharda le mora. Ta o Del dikhla kai saia sukar.

¹¹ Ondaka o Del phenda: Te likel katar e phuv suako patra zelene, patra te den simiche ta kasta te den septelie. Ta gia avilape.

¹² Ta e phuv dia kasta ta patra, e kasta die septelie a e patra die simiche. Ta o Del dikhla kai saia sukar.

¹³ Ta peli e riat ta llivosaila. Gua saia o trito llive.

¹⁴ Ondaka o Del phenda: Te avel ando miloso villelura te fulaven o llive katar e riat, ta te sikaven o vreme katar e slave, katar e llivesa ta e bursa.

¹⁵ Ta te kletosaren ando putardipe e milosoko ta i upral katar e phuv. Ta gia avilape.

¹⁶ Ta o Del cherda e dui villelura bare: O baro te kletosarel ollivesea, ta o minono te kletosarel orachaia. Ta i cherda e cheraia.

¹⁷ Ta o Del thoda gala villelura ando miloso te kletosaren e phuv,

¹⁸ ollivesea ta i orachaia, te sai fulavel o villelo katar o truniariko. Ta o Del dikhla kai saia sukar.

¹⁹ Ta peli e riat, ta llivosaila. Gua saia o llive starto.

²⁰ Ondaka o Del phenda: Te cherdon katar e paia suako zivirinie, ta i chiriklia te furian upral pe phuv, po putardipe e milosoko.

²¹ Ta o Del cherda e bare azdave e morake. Ta cherda sa e zivirinie kai zivin ande mora ta sa e chiriklia e milosoke. Ta o Del dikhla kai saia sukar.

²² Ta o Del blagosisarda len gale alavenchar: Te avel len but minone ta te pheren e mora, ta e chiriklia te aven but ande phuv.

²³ Ta peli e riat ta llivosaila. Gua saia o llive o panchto.

²⁴ Ondaka o Del phenda: Mangav te avel pe phuv suako zivirinia kai inai divi, ta i gola kai si dive, e sapa ta i e zivirinie e phuviake. Ta gia avilape.

²⁵ Ta o Del cherda sa gala zivirinie, ta dikhla kai sa saia sukar.

²⁶ Ondaka o Del phenda: Chera e manuse prema amende gia sar sam amen, te gazdaril pe mache e morake, pe chiriklia e milosoke, pe sa e zivirinie ta i pe gola kai terrinpe pe phuv.

²⁷ Kana o Del cherda e manuse, cherda le prema pete, murus ta diskinia cherda len,

²⁸ ta blagosisarda len ta phenda lenge: Te avel tumen but, but chaurre. Pheren e phuv ta gazdarin pe late, gazdarin pe mache ta pe chiriklia e milosoke, ta i pe sa e zivirinie kai terrinpe.

²⁹ Mapalal o Del phenda lenge: Dikhen, akana dav tumen sa e patra kai den simiche, ta sa e kasta kai den septelie te sai jan.

³⁰ A e zivirinie dive, ta golen kai terrinpe pe phuv, ta sa e chiriklien e milosoke, ka dav len te jan patra zelene. Ta gia avilape.

³¹ Ta o Del dikhla kai sa so cherda saia but sukar. Ta peli e riat ta llivosaila. Gua saia o sovto llive.