Jueses 3 - Biblia ande chib Romani

E forura kai achile ando Kanaan

¹ Gala si e forura kai o Del mukla ande phuv te zumavel e israelen kai ni sea kana mardepe te len o Kanaan.

² O Del mukla len te sai pinllaren o maripe e israelitura kai nikada ni mardeape.

³ Achile e panch gazda katar e filisteura, achile sa e kananeura, e sidoniura ta e jeveura kai zivina pe burdura ando o Libano, katar o Baal Jermon llik o Jamat.

⁴ Gia o Del mangla te zumavel e israelen, te dikhel dal kandena e zakonura kai cheres o Moises diaia e puranen.

⁵ Ta e israelitura zivisarde maskar e kananeura, e jeteura, e amorreura, e ferezeura, e ititura ta e jebuseura.

⁶ Ta e chave ta e chorra katar e israelitura zinisaile e chavenchar ta e chorrenchar katar gola forura ta blagosisarde lenge delen.

O Otoniel braduil e Israele katar o Kusan Risataim

⁷ Ta so cherde e israelitura saia bilacho angla e akha e Devleke, soke bristardepe letar ta blagosisarde e baalen ta e Asera.

⁸ Ta o Del jolailo po Israel ta dialen ande va katar o Kusan Risataim, o charo katar o Mesopotamia. Ta e israelitura sea sluge katar o Kusan Risataim ojto burs.

⁹ Ondaka e israelitura ikharde e Devle, ta o Del bichalda iekhe llene te braduil len. O lleno kai bichalda o Del ikhardola Otoniel chavo katar o Kenaz o phlal mai terno katar o Kaleb.

¹⁰ Ondaka o duo e Devleko avilo po Otoniel ta krisisarda e Israele. Chidia e israelen ta likisto te marelpe e charoia katar e Siria o Kusan Risataim, ta dobisarda le.

¹¹ Ta saia e pas ande phuv saranda burs. Ta mulo o Otoniel chavo katar o Kenaz. Mapalal kana mulo o Otoniel

O Ejud braduil e Israele

¹² e israelitura pale cherde o bilachipe angla e akha e Devleke, goleke o Del zuriarda e charo katar o Moab, o Eglon. Dia le mai but zor neko e Israele.

¹³ O Eglon achilo po alav e amonitonenchar ta e amalekitonenchar. Dia po Israel ta lia e foro katar e palmere.

¹⁴ Ande desojto burs e israelitura sea sluge katar o Eglon.

¹⁵ Ondaka ikharde e Devle ta o Del vazdia iekhe braduimari, o Ejud chavo katar o Gera katar e vicha e Benjamineki. Ta o Ejud saia stingo. Iek drom e israelitura bichalde cheres o Ejud iek ezgoda sukar e Egloneke.

¹⁶ Ta o Ejud lia iek churi ostro pe dui riga kai leko lungipe saia dopas pola, ta guruda le telal katar leke patave pe rig e chachi.

¹⁷ Mapalal llelo te inllarel e ezgoda sukar e Egloneke kai saia but thuliardo.

¹⁸ Ta kana dia e ezgoda sukar e Eglone, o Ejud likisto e llenenchar kai avilea lea,

¹⁹ ta kana avilo kai si e dela ando Gilgal, o Ejud irisailo kai o Eglon ta phenda leke: Si man te dav orba tuia po chorial. Ta o charo phenda te liken e sluge kai sea lea.

²⁰ Ta kana o Ejud achilo korkorre e Eglonea kai saia besindo ande soba katar o milai, avilo lete ta phenda leke: O alav kai si man te phenav chuke si e Devletar. Kana o Eglon asunda le ustilo katar po trono.

²¹ Ondaka o Ejud inzarda po va stingo karing pi chachi, lia e churi ta espidia la ando lli katar o Eglon.

²² Espidia la gia zuralo kai sa e churi dia ando lli katar o Eglon ta leko koi ucharda la sa, soke o Ejud ni ikanda la avri, ta likisto o gadope.

²³ Mapalal o Ejud phangla o udar, thoda e alkava ta likisto katar e penllerava.

²⁴ Kana llelotar avile e sluge kai radina e charoke ta kana dikhle kai o udar saia phanglo mislisaile kai o charo llelo peke rigate.

²⁵ Ta sar nakhlo but vreme brigisaile kana dikhena kai o charo ni likela. Ondaka lie o klucho putarde o udar ta malade lengo gazda mulo pe phuv.

²⁶ Kana e sluge jasarena vreme o Ejud naslo, ta kana nakhlo e dela ando Gilgal gurudilo ando Seirat.

²⁷ Ta kana avilo ando foro basalda ande sing po burdo katar o Efrain ta e israelitura fuliste lea katar o burdo ta vou llala angle.

²⁸ O Ejud phenda lenge te llan pala le te marenpe e moabitonenchar soke o Del ka cherel te dobin len. Ondaka llele pala le, lie e thana kai e llene nakhen o Jordan ta ni mukle te nakhel nika.

²⁹ Ta mundarde des milie moabitonen kai sea boñikura zurale ta tromane. Ni achilo llundo ni iek lendar.

³⁰ Gia e israelitura dobisarde e Moabe. Mapalal saia e pas ande phuv ojtovardes burs.

O Samgar braduil e Israele katar e filisteura

³¹ Mapalal avilo o Samgar chavo katar o Anat kai mundarda sov stotine filisteonen iekhe kastea.