Jueses 21 - Biblia ande chib Romani

E vicha katar o Benjamin pale vazdiniaol

¹ E israelitura jale sovel ande Mispa kai ni ka den lenge chorren te zininpe ni iekhe llenea katar e vicha e Benjamineki.

² Mapalal chidinaile ando Betel ta sea angla o Del llik kana peli e riat, rovena ta ande bari avazi phenena:

³ ¡Ioi Gazda Del e Israeleko! ¿Soke sumbisaili iek vicha ando Israel?

⁴ Thiarinako rano e israelitura cherde iek altar ta die kurbanura e Devleke ta die ezgode dine te sai prostil o Del.

⁵ Ta puchena: ¿Ko amendar ni saia ando Mispa kana amen chidinailam?, soke jalea sovel kai ka mundaren e llene kai ni lleloia.

⁶ E israelitura sea but tristome andar so nakhlaia e llenenge katar o Benjamin ta phenena: Gava llive jasaili iek vicha ando Israel.

⁷ ¿Sar ka chera te da diskinie e llenenge katar o Benjamin kai ni mule? Soke amen achilam pe orba e Devlea kai ni ka da lenge amare chorra te zininpe lenchar.

⁸ ¿Si kate iek lleno israelita kai ni saia angla o Del ande Mispa? Ta dikhle kai niko katar o Jabes Galaad aviloa ando Mispa.

⁹ Soke llinde e foro ta ni saia kote ni iek lleno katar gua foro.

¹⁰ Ondaka o foro bichalda desudui milie katar e mai lache boñikura ta phende lenge te mundaren saurren ando Jabes ta i te mundaren e minonen ta e diskinien.

¹¹ Ta phende lenge te mundaren e murusen ta suakone diskinia kai sovti iekhe murusea.

¹² Ta ande Jabes zivina star stotine chorra kai nikada ni soute iekhe murusea ta ande len karing o pero katar o Silo ando Kanaan.

¹³ Ondaka o foro bichalde te ikharen e llenen katar o Benjamin kai sea ande pechina katar o Rimon, ta ikharde len ande pas.

¹⁴ E llene katar o Benjamin irisaile ta e israelitura die len e chorren kai andea katar o Jabes. A ni resle e chorra suakoneke.

¹⁵ E israelen saia zao e llenendar katar o Benjamin soke o Del muklaia iek putardipe maskar e viche katar o Israel.

¹⁶ Ta e gazda katar o foro puchena: ¿Sar ka chera te da diskinien ogolen kana inai ios diskinie katar o Benjamin?

¹⁷ Andar e llene kai ni mule, e vicha e Benjamineki morabi te achel pe po than maskar amare viche, gia te na jasaol iek vicha ando Israel.

¹⁸ Amen nasti te da len amare chorren te zininpe lenchar, soke jalam sovel kai lenge ni ka da amare chorren.

¹⁹ A suako burs si bari slava e Devleke ando Silo kai si ando norte katar o Betel, po drom kai llal katar o Betel karing o Sikem ta ando sur katar o Lebona.

²⁰ Ondaka e gazda katar o Israel bichalde te phenen e llenenge katar o Benjamin: Llan kai e vostanura drakhake kai si pasa o Silo,

²¹ Kana ka dikhen kai e chorra katar o Silo liken ando chelipe, liken i tumen te lel suako tumendar iek diskinia ta llantar ande tumari phuv.

²² Te si kai e dada ta e phlalen katar e chorra aven te puchen amen soke cherdam gia, amen ka phena lenge gia: Moli amen tumenge te de len amen, soke ando maripe e Jabesea ni resle e diskinie suakoneke. Ta ni bangaren o alav soke tumen ni die len.

²³ Ta e llene katar o Benjamin cherde le gia, ta lie diskinien kai likistea ando chelipe. Lleletar ta irisaile kai lengi phuv, vazdie pale e forura ta zivisarde ande len.

²⁴ Ta i ogola israelitura lleletar ta suako lleno irisailo kai pi phuv, kai pi vicha ta kai pi familia.

²⁵ Ande gua vreme ni saia charo ando Israel ta suako lleno cherela so mislilape orta.