Jueses 12 - Biblia ande chib Romani

O Jefte ta e vicha e Efraineki

¹ E murusa katar e vicha e Efraineki chidinaile te nakhen o Jordan te llan ando Safon, ta phende e Jefteeke: ¿Soke llelan te mareto e amonitonenchar bi te ikhare amen? ¡Akana amen ka phabara cho cher ta tu andre!

² Ta o Jefte phenda lenge: Murne llene ta me saia iek chingar e amonitonenchar ta me ikhardem tumen, a tumen ni avilen.

³ Kana dikhlem kai tumen ni avena, thodem murno zivoto ande bari dar ta mardeman e amonitonenchar ta o Del cherda te dobiv. ¿Soke tumen aven te maren tumen manchar?

⁴ Ondaka o Jefte chidia sa e murusen katar o Galaad ta mardape e llenenchar katar o Efrain ta dobisarda len. E llene katar o Efrain phenena kai e galaaditura kai zivina maskar o Efrain ta o Manases, muklea e Efraine.

⁵ Ta e galaaditura lie katar o Efrain e umalia katar o Jordan, ta kana fiko katar o Efrain nasela ta mangela te muken le te nakhel, von puchena le dal nasela katar o Efrain. Te phenela kai iok,

⁶ mangena letar te phenel Chibolet a te phenela Sibolet soke nasti phenela le sukar, mundarena le isto kote pasa e umalia katar o Jordan. Ta mule katar o Efrain saranda ta dui milie llene.

⁷ O Jefte saia gazda katar e israelitura sov burs. Kana mulo, prajosarde le ando Galaad.

⁸ Mapalal katar o Jefte gazdarisarda e israelen o Ibsan katar o Belen,

⁹ ta sea le tranda chave ta tranda chorra. Ta saurren zinisarde len e llenenchar kai ni sea katar o foro e Israeleko. O Ibsan saia gazda ando Israel efta burs,

¹⁰ ta kana mulo prajosarde le ando Belen.

¹¹ Mapalal letar gazdarisarda o Elon katar e vicha e Zabulonoki. O Elon saia gazda ando Israel des burs,

¹² ta kana mulo prajosarde le ando Aialon ande phuv katar o Zabulon.

¹³ Mapalal letar gazdarisarda o Abdon chavo katar o Ilel piratonita.

¹⁴ O Abdon saia gazda ando Israel ojto burs, ta sea le saranda chave ta tranda unukura kai llana pe magarchura.

¹⁵ Ta kana mulo o Abdon prajosarde le ando Piraton katar o Efrain po burdo Amalek.