Ezekiel 1 - Biblia ande chib Romani

Sargo suno katar e zor e Devleki

¹ Ando llive panchto katar o chon starto katar o burs tranda, kana me sema maskar e phangle pasa e len kai ikhardol Kebar, putailo mange o miloso ta dikhlem sargo sune katar o Del.

² Kana cherela panch burs ta panch chon sar kai ikandea katar leki phuv e charo e Joakine,

³ o Del dia orba e popoia e Ezekeielea chavo katar o Buzi, ande phuv katar e kaldeura pasa e len kai ikhardol Kebar. Kote o va e Devleko avilo pe lete.

⁴ Dikhlem kai avela katar o norte iek bari balav, ta iek baro oblako kai phabola, ta klichila truial, ta po maskaral katar e iag saia sargo iek ezgoda tuchni kai klichila,

⁵ ta po maskaral lako dikhona star zivotura. Ta von sea gia: Dikhona sargo manusa.

⁶ Suako iek saia le star muia ta star pakha.

⁷ Ta lenge porrne sea orta, ta e porrne chak tele sea sargo porrne guruvane, ta klichina sargo o tuch kana si but mordo.

⁸ Telal katar leke pakha pe star riga, saia le va manuseke, ta pe star riga saia le muia ta pakha.

⁹ E pakhenchar thovenape iek pasa aver. Ni dikhena pala pete kana phirena soke suako iek phirela orta angle.

¹⁰ Ta lenge muia sea sargo manuseke ta lionoke pe rig e chachi katar e star, ta mui guruveko pe rig e stingo, ta saia len i mui sargo e agila e staren.

¹¹ Ta lenge pakha sea inzarde upral, suako iek saia le dui pakha kai dodina iek averia, ta ogole duienchar ucharena pi esnaga.

¹² Ta suako iek phirela orta angle. Karing o duo cherela len te llan, von llana, ta kana llana ni iek lendar ni dikhela palpale.

¹³ E zivotura sea sargo angara phabarde, o sargo memelia kai llana maskar e zivotura, ta e iag kletosarela ta andral katar e iag likena esterliche.

¹⁴ Ta e zivotura prastena ta avena sargo esterliche.

¹⁵ Kana me dikhava pe zivotura, dikhlem kai upral pe phuv pasa e zivotura pe star riga saia po iek tochko.

¹⁶ Ta e tochkura dikhona sargo kana sea cherde katar o topasio. Ta e star sea isto sargo iek, dikhona kai sea cherde sargo iek tochko ande aver tochko.

¹⁷ Kana llana, miskonape karing pe star riga, ni irinape kana llana.

¹⁸ Ta lenge kolura e tochkonenge sea bare ta darane ta pherde akha truial pe star.

¹⁹ Ta kana e zivotura llana, i e tochkura llana lenchar. Ta kana e zivotura vazdiniaona katar e phuv, i e tochkura vazdiniaona.

²⁰ Kote kai o duo cherela len te llan, kote llana. Kote kai o duo cherela len te llan, e tochkura vazdiniaona lenchar, soke o duo katar e zivotura saia ande tochkura.

²¹ Kana e zivotura llana, i von llana, a kana e zivotura achena, i von achena. Ta kana e zivotura vazdiniaona, i e tochkura vazdiniaona lenchar, soke o duo katar e zivotura saia ande tochkura.

²² Ta upral pe sore katar e zivotura saia iek putardipe ande glamni serchava kai saia buliardi upral pe lenge sore.

²³ Ta telal katar gua than, lenge pakha sea orta, inzarde iek karing aver ta suako iek saia le dui pakha kai ucharena lengi esnaga.

²⁴ Ta asundem sar basena lenge pakha, basena sargo but paia, sargo o avazi katar Del kai si le sa e zor, sargo kana asundon but llene, sargo e boñikura kana asundon. Kana achena, peravena pe pakha,

²⁵ ta kana achena ta peravena pe pakha, asundola iek avazi upral katar o putardipe kai saia upral pe lengo soro.

²⁶ Ta upral po putardipe kai saia upral pe lengo soro, dikhola iek trono sargo katar o barr vuneto, ta upral po trono saia sargo iek esnaga manuseki kai besela upral.

²⁷ Saia sargo o tuch kana klichil, sargo kana andre saia e iag ta i truial, katar o maskar upre, ta katar o maskar tele, dikhlem kai saia sargo e iag, ta klichila truial.

²⁸ Sargo e kustik kai dikhol pe oblakura ando llive kai delpeke, isto gia dikhola o klichipe truial. Gava saia sargo suno katar e glamni zor e Devleki. Ondaka inzilem ta mo mui saia pe phuv ta asundem iek avazi kai dela orba.