Ester 6 - Biblia ande chib Romani

O Mardokeo dobil

¹ Isto goia riag, o charo nasti sovela, ta mangla te anen leke o lil kai si pisime sa e bare ezgode kai nakhena ande leki phuv, ta mangla te chitin leke.

² Ta kote likela sar llangla o Mardokeo kai e eunukura kai ikhardon Bigtan ta Teres, llene kai arakhena o than kai delpe ando cher e charoko, ta sa von mangena te mundaren e charo e Asuero.

³ Ondaka o charo puchla: ¿Savo liubao ta so dobisarda o Mardokeo kai cherda gaia ezgoda? Von phende leke: Ni dobisarda niso.

⁴ Ondaka dia o Aman ande bar kai dela kai e sobe e charoke, te mangel letar te umblaven e Mardokeo po than kai vou phendaia te lacharen. Ondaka o charo phenda: ¿Ko llal kotar?

⁵ A e llene kai radina leke phende: Gua si o Aman. Ondaka o charo phenda: ¡Phenen leke te del andre!

⁶ Kana o Aman dia andre, o charo puchla le: ¿So morabi te cherel o charo, kana mangel te del liubao iekhe llene? A o Aman mislisailo: Man ka del gua liubao soke inai aver lleno sargo me.

⁷ Ta vou phenda leke: Gole manuse kai o charo mangel te del gua liubao,

⁸ morabi te anen leke isto gola patave kai thovel o charo, ta iek katar e gra kai o charo llal pe lende ta eik korona charoki kai si pe leko soro.

⁹ E patave ta o gra morabi te del len lete o lleno mai glamno katar leki charoina, ta gua lleno te thovel e patave po lleno kai o charo mangel te del liubao, ta po gra te phiravel le pe plasa, ta te urkil angla lete: ¡Gia cherdol e llenea kai o charo mangel te del liubao!

¹⁰ Ondaka o charo phenda gia e Amaneke: Sigar, le e patave ta e graste isto gia sar phendan ta cher isto gua e judioia kai ikhardol Mardokeo, kai besel po udar katar o cher e charoko. Cher sa so phendan ta na bristar niso.

¹¹ Ondaka o Aman lia e patave ta e graste, ta thoda e patave po Mardokeo ta inllarda le po gra ta phirada le pe plasa e foroki, ta urkila: ¡Gia cherdol e llenea kai o charo mangel te del le liubao!

¹² Kana achilo o phiradipe, o Mardokeo irisailo kai o udar katar o cher e charoko, ta o Aman llelotar oma kai po cher, uchardo leko soro ta pherdo zalba.

¹³ Kana avilo chere phenda pe rromiake e Zeresake ta pe amalenge sa so nakhla, ta von phende leke gia: Gua o Mardokeo kai cherda te jasare o gazdaripe, te si judio, nasti ka dobi le, ta ka jasare sa.

¹⁴ Ta kana vou dela orba, avile e eunukura e charoke te inllaren e Amane kote kai cherdaia o jape e Ester.