Amos 4 - Biblia ande chib Romani

¹ Asunen guruva katar o Basan, glamne diskinie katar e Samaria kai ustaven golen kai si chorre ta patin e llenen kai trubul len, kai phenen alav pe rromenge te anen lenge mol te pien.

² O Del jala sovel pe pete kai si santo: aven llivesa kai e sastrura bangarde ka inllaren tumen phangle, ta tumare chaven kai inllaren len pe udiche machenge.

³ Ta ka liken katar o putardipe iek pe iek, ta ka chuden tumen katar o baro cher. Gia phenda le o Del.

Ni sikon

⁴ Llan ando Betel ta ando Gilgal, ¡cheren ios bilachipe! Inllaren tumaro kurbano thiarinako ta tumaro diesmo suako trin llive.

⁵ Phabaren o marrno kai inai le levadura ta phenen pe suako rig tumari ofrenda, soke gia drago tumenge.

O Israel nakhel duk a ni sikol

⁶ Me cherdem te nakhen bari bok ande sa tumare forura. Cherdem te na avel tumen jape ande sa e thana e phuviake, ¡a tumen ni irisailen mande! Gia phenda le o Del.

⁷ Ta i cherdem te na delpeke trin chon mai anglal te chiden e septelie. Cherdem te delpeke ande iek foro, ta ande aver iok. Diapeke ande iek umal, ta aver sukili soke ni saia pai.

⁸ Foro forote llana e llene te roden pai, ta ni resle te pien so trubula len, ¡a tumen ni irisailen mande! Gia phenda le o Del.

⁹ Andem pe tumende e balav tati ta e muke. Cherdem te sukon tumare simochine ta tumare vostanura drakhake, e langosta jala tumare simochine ta tumare maslinke, ¡a tumen ni irisailen mande! Gia phenda le o Del.

¹⁰ Cherdem te perel pe tumende iek muka sargo po Ejipto, cherdem te meren ando maripe tumare murusa terne, ta tumare dusmanura te len tumare gra. Cherdem te khandel o meripe ande tumare umalia, ¡a tumen ni irisailen mande! Gia phenda le o Del.

¹¹ Zatrisardem tumen sargo kana zatrisardem e Sodoma ta e Gomorra. Tumen dikhona sargo iek angar ikando katar e iag, ¡a tumen ni irisailen mande! Gia phenda le o Del.

¹² Goleke, Israel, isto gia ka cherav tuia, ta soke ka cherav le, ¡lachar tut te malado che Devlea!

¹³ Soke o Del kai cherel e burdura ta e balav, kai vacharel e manusenge so mislil te cherel, kai boldel o truniariko ando villelo, kai nakhel upral pe thana vazdine katar e phuv, o Gazda, o Del kai si le sa e zor si leko anav.