2 Pedro 1 - Biblia ande chib Romani

Salami

¹ Me, o Simon Pedro, esluga ta apostol e Jesukristoko, bichalav salami e llenenge kai si len iek pachape gia sukar sargo amen, soke o Del o Jesukristo kai si amaro Braduimari si lacho.

² Me mangav e Devletar te len but volipe ta pas katar o sikadipe kai si tumen katar o Del ta katar o Jesus amaro Gazda.

Te chera e Devleki buchi

³ O Del cheres pi zor dia amen sa so trubul amen te sai zivi sargo vou mangel kana cherda te pinllara e Jesukristo kai ikharda amen katar o baripe katar e bare ezgode kai cherdam.

⁴ Pala sa gala ezgode vou dia amen sa so phenda kai ka del amen ezgode kuch ta bare. Ta gia i tumen te aven sargo vou ta na sargo e llene bilache kai si ando sueto, kai zatrin avere pala lengo bilachipe.

⁵ Goleke morabi te trudin tumen te aven ios mai lache ta ios mai bizai.

⁶ Te gazdarin pe tumare esnage, te terpin ta te cheren sogo vou mangel.

⁷ Te molintumen e Devleke, te volin tumare phlalen, ta te avel tumen volipe.

⁸ Te cherena gala, ezgode ka aven ios mai lache ta ni ka zivin samo gia soke pinllarden e Jesukristo.

⁹ A o lleno kai ni cherela gala ezgode si sargo korro o sargo iek lleno kai ni dikhel sukar; bristardape kai o Del chistosarda le katar o bilachipe.

¹⁰ Goleke phlalalen, o Del ikharda tumen ta esvirisarda tumen te aven katar leko foro, a te mangena te avelpe, morabi te aven vrene te cheren sa gala ezgode lache. Te cherenalen nikada ni ka peren,

¹¹ ta ka putaon tumenge e udara katar e charoina ostade kai si katar amaro Gazda ta Braduimari o Jesukristo.

O chachuno sikadipe

¹² Goleke suako drom ka phenav tumenge sa gala ezgode i kana tumen llanenlen ta llan orta ando chachipe kai sikadem tumen.

¹³ Gaia si e buchi kai morabi te cherav so avela man zivoto, te phenav tumenge gala ezgode suako drom.

¹⁴ Amaro Gazda o Jesukristo, phenda mange kai ni ka nakhel but vreme ta me ka merav;

¹⁵ ta ka trudiu man te cherav te sikon ta gia kana ka merav te den tumen golli katar gala ezgode kai sikadem tumen.

¹⁶ So amen sikadam tumen katar e zor e Gazdaki e Jesukristoki ta o vreme kana ka avel pale inai paramiche kai amen ikandam amare bizaimaia, soke isto amen amare akhenchar dikhlam e Gazda ande po baripe.

¹⁷ Ta dikhlam le kana o Del o Dad dia le o baripe ta o liubao, kana e Devleko avazi dragostimaia phenda: Vou si mo Chavo kai voliv le, ande le si man veselia.

¹⁸ Isto amen asundam gava avazi kai avela e milosostar, soke amen sama e Gazdaia po burdo santo.

¹⁹ Goleke me pachau kai so phenena e poraukura si o chachipe, ta tumen cheren sukar kai thoven lenge sama soke e alava kai von phende si sargo iek memeli kai kletosarel ando truniariko llik kana ka llivosaol ta e cherain e thiarinaki ka likel te klichil pe tumare lie.

²⁰ Na bristaren tumen kai ni iek poroka ando Pisipe nasti sikadol sar o manus mangel,

²¹ soke e poraukura ni die orba von petar; von die orba e Devletar kai o Santo Duo phenda lenge save alava saia te phenen.