Taatusə 2 - Əka yi Fîə

Ntəgə́ Yi əshîʼnə

¹ Lə́ ńgɛn nə́ gho, zéʼkə pə́ anu páʼ á pə́ nə́ ntəgə́ yi əshîʼnə.

² Zéʼkə pətəkaŋ pə́ mbyâŋnə ńgə́ pó chî nə́ ajíə azóobə́, ńtúgə ajíənu, ńtúg mbimə́ ə́ tyantə̂, nə́ akɔŋnə pó awaamə́ntə́əmə.

³ Tsɔʼə nə́ ndú yi wɨ́, tə́gtə pətəkaŋ pə́ pəngyě ńgə́ pó chîə ándó pəngyě pó túg nə́ nchîmbî páʼ ə́ ŋwaʼ nə́, ńkɔ tə́ ńtsəŋ əlɛ́n ŋwunə, ńkɔ pə́ apoʼə məloʼə; pó chîə mə́ zéʼkə nə́ mənu mə́ pɔŋ nə́,

⁴ Ə́laŋ ə́lɨ́d ə́zéʼkə pɔ́ pə́ pəngyě ndzaŋ təmbɔʼ pó kɔŋ pəlú pɔ́b pópə pɔ́ póobə́,

⁵ ndzaŋ mbɔʼ pó túgə awaamə́mbɨ, ńkə́ ŋwaʼə̂ á ntɨ́ pó, ḿbə́ pəngyě pə́ ndɛ̂ ndzɔʼə́ pi əshîʼnə, ńgɛd əshîʼnə, ńdzóʼnə pəlú pɔ́b ńjî ńgə́ kɔ ŋwu tsə̌ tsáb təpɔŋ ńté atséebə Əsê.

⁶ Tsɔʼə nə́ ndú wɨ́d ghɛn, zéʼkə nkaŋŋwu yi mbyâŋnə ndzaŋ mbɔʼ pó túgə awaamə́mbəəmə.

⁷ Lɔg mbɨ əzo ándó fiʼnəghɔlə á mə́m mənu mimə əshîʼnə mətsəmə, á mə́m ndzeʼkə́ əzo, tséebə ndə̌ŋdəŋ ńkə́ ńtə́gə atû ə́wə́.

⁸ Gho tə́ ńdzéʼkə, gho tséebə atsáb páʼ zə́ələ́ á koʼnə̂ təmbɔʼ ŋwu tsə̌ a kě fid fɛ̂ pô, ńjî ńgə́ əsɨ́ yǐ ńkó ngaŋkə́pa əzô ńté ńgə́ pó kě túgə anuə təpɔŋ yətsə̌ təmbɔʼ pó sóŋ ńté áwɛ̂n pô.

⁹ Zéʼkə əpoʼ ńgə́ pó zóʼnə pətǎ pɔ́b ńkə́ ńgɛd mbɨ əzɔb ə́ pɔŋə̂ á mə́mə anuə atsəmə. Kɔ pó pəŋə̂ atséebə á ntso pó

¹⁰ kɨ ńdzəələ̂ ághóobə́. Pó chîə á mə́ shib nə́ nɨd əghâ atsəm lə́ ńgə́ pö faʼ əshîʼnə, ńkə̈ ə́faʼə̂ nə́ ntɨ́ əghɔ́b ətsəmə, ńjî ńgə́ á mə́mə anuə atsəm pó faʼ nə́, pó ghɛd pɨ pə́ jɨ́ ńgə́ ndzeʼkə́ ńté Əsê páʼ a pə́ nə́ Nchwádkə əwɛ̂n zɨ́d pɔŋə̂.

¹¹ Ńté ńgə́ Əsê a nə nəələ̂ apɔŋə́ntə́əmə ajíə a mə́ lɔg nə́ chwádkə ŋwu məsɔŋ ntsəm ə́wə́.

¹² Apɔŋə́ntɨ́ zəənə́ á zéʼkə áwɛ̂n lə́ ńgə́ pɛn myaʼ nchîmbî ntsəm ə́ kě nə́ apɔ́gə Əsê túg pô, ḿmyaʼə̂ alublə atsəm ńté əpú ḿbîə, ńtúgə awaamə́mbəəmə, ntɨ́ ndə̌ŋdəŋə́, ḿbɨ ńtúg nchîmbî páʼ ə́ pɔ́g nə́ Əsê,

¹³ ndzaŋ páʼ pɛn túg nə́ akwaŋ ńtə́ ḿbyáabə Alěmbîə afoʼ zə́ lə́, alěmbîə ándó nəgháʼ Əsê əzɛ̂n páʼ ə́ tsɛ nə́ ajúmə ətsəm pópə yi Nchwádkə Yeso Klisto ə́ yǐ nə́ yǐəə.

¹⁴ A nə fɛ̂ mbɨ əjǐə á mbô pɛnə̂ a mə́ tsóʼ nə́ atûə azɛ̂nə á mə́m təpɔŋ ntsəmə, ə́ pɨ kə́ ghɛd ńgə́ pɨ páʼ pó pə́ nə́ pí pó tə́ nə́ ńdoonə̂ a mə́ faʼ nə́ məfaʼ mimə əshîʼnə ńgə́ pó ŋwaʼə̂ (kɔ túg ndɔtíə).

¹⁵ Zéʼkə mənu mɨ lɛ nə́ mətɨ mô mətsəmə, ńnéŋə məntɨ́ mə́ pɨ pö jwə́ʼtə nə́ ńkə̈ ə́sáʼə pɨ pó fankə̂ nə́. Kɔ ŋwu tsə̌ a náŋə gho ńgwágə.