Taatusə 1 - Əka yi Fîə

¹ Aŋwaʼlə zəənə́ á lǒo lə́ á mbô pɔlə, ngaŋəfaʼ Əsê, ḿbə́ ntú Yeso Klisto. Pə́ kə tsɔ́ʼə á mə ńtú lə́ ńgə́ maŋ kwáatə ńgɛd mbimə́ pɨ pə́ Əsê páʼ a tsɔ́ʼ nə́, zɨ́d kwéŋə, ńkə́ ńgɛd pó túgə ajíənuə ńté ndə̌ŋdəŋ páʼ ä ghɛd nə́ pó pɔ́g Əsê,

² ndə̌ŋdəŋ ghɛnə́ á chî lə́ á ndumə akwaŋ ńtə́ ḿbyáabə ńté nchîmbî páʼ zɨ́d mɛdnə̂ nə́ ngǎ mɔʼə́. Əsê páʼ a kě nə́ ntsɨd tsəələ̂ pô, a nə ńdaʼnə̂ áwɛ̂n nə́ nchîmbî zɨ́d zɨ ə́fɛ́lə ngoʼ pəchə́.

³ Əghâ chigə ndɛd yi wɨ́ nə ńkoʼ nə́ lə́ a nəələ̂ áwɛ̂n nə́ zə́ələ́ á mə́m nkɨ əyə́. Pə́ nə fɛ̂ nkɨ wɨ́d ghɛnə́ á mbô maŋə, maŋ kə́ ńnáŋkə áwɨ́d nə́ ndú páʼ Əsê páʼ a pə́ nə́ Nchwádkə əwɛ̂nə a nə ńdɔ nə́.

⁴ Mäŋ ŋwaʼlə̂ aŋwaʼlə zɨ lə́ á mbô Taatusə, ndə̌ŋdəŋ móonə mə á mə́m mbimə́ páʼ pəg yí nɔd nə́ ńchî ə́wə́. Ńgə́ Əsê páʼ a pə́ nə́ Tǎ pó Klisto Yeso páʼ a pə́ nə́ Nchwádkə əwɛ̂n, pó fɛ̂ á gho nə́ apɔŋə́ntɨ́ pó mbwɔ́dnə.

Afaʼə Taatusə á Mə́mə Aláʼə Kəletə

⁵ Maŋ kə ḿmɛdtə̂ a gho á mə́mə aláʼə Kəletə lə́ ńgə́ gho shitə̂ mənu páʼ mə́ nə́ ḿbɛ́d nə́ tə tyáŋtə, ńkə́ ḿbɨ́ ńtsɔ́ʼtə mətûə á mə́m pətɔ̂ŋ pətsəmə, tsɔʼə ndzaŋ maŋ kə tə́gtə nə́ gho lə́:

⁶ Nətû nə́ shib ḿbə́ ŋwu pə́ jî nə́ yə́ ándó ŋwu yi əshîʼnə, a shib ńtúg tsɔʼə táʼ məngyě, pɔ́ pí pə́ kə́ ḿbə́ pɨ pó néŋ nə́ məntɨ́ mɔ́b nə́ Əsê, ńkě ntɨ́ təpɔŋ pópə atyǎntə atû túg pô.

⁷ Ndzaŋə ándó nətû nə́ nkyeetə pɔ́ pə́ Əsê nə́ pə́ nə́ ŋwunə a tə́ nə́ ńnáŋə afaʼə Əsê lə́, a pə́ ŋwu pə́ jî nə́ yə́ ándó ŋwu yi əshîʼnə. Kɔ a pə́ ŋwunə á chánə nə́ kɨ ńtúgə atsə́gə́ntə́əmə, kɨ ḿbə́ apɛ̌lə məloʼə, ḿbóʼnə məlaʼə́, kɨ ńtúg əfóʼńdé nə́ nkéebə.

⁸ A chîə mə́ shib nə́ ŋ́ŋáʼ ndɛ̂ əjǐə á mbô ngaŋnə́ghéenə, ə́ kə́ kɔŋə̂ anu páʼ á pɔŋ nə́, ə́ tɨ́ ndə̌ŋdəŋə́, ə́ ŋwaʼə̂, ə́ kə́ túgə awaamə́mbəəmə.

⁹ A chîə á mə́ tɨ́ nə́ ə́ tyantə̂ á mə́m nkɨ wə́ páʼ wɨ́d pə́ nə́ nkɨ tə fɨgə̂ ŋwu lə́, ńjî ńgə́ a chî mbɔʼ a fɛ̂ ndzeʼkə́ páʼ ə́ koʼnə̂ nə́, ńkə́ ńchî mbɔʼ a nɨd ńgə́ pɨ páʼ pó zéʼkə nə́ ajúmə ndaʼ lə́ pó ghɛlə̂ lə́ anuə təkoʼə.

¹⁰ Pɨ pipə nɨ́ nə́ pó chî ə́wɨ́ tə ḿbə́ pə́ nə́ pɨ pó mɛdtə̂ nə́ anǔəsê Pəjus ńdzoŋə̂ áwɛ̂n, páʼ pó kǐ nə́ mə zóʼnə nə́ ńtíʼə ə́fɨgə̂ pəənə.

¹¹ Pə́ chîə mə́ shib nə́ naʼkə̂ ntso əghóobə́, ndzaŋə ándó pö maʼ nə́ ajwaʼlə á mə́m məngwud mimə nɨ́ nə́ nə́ ndzeʼkə́ ape əzɔb zə́ lə̂, lə́ kě aliʼə́nuə azóobə́ mə́ zéʼkə mbô ndzeʼkə́ zə́ pô.

¹² Táʼ ŋwunə á mə́m pó páʼ a nə ḿbə́ nə́ ntûsê əghoobə́ a nə sóŋ ńgə́, “Pɨ pə́ Kəletansə kə́ ḿbə́ lə́ tsɔʼə ngǎŋntsəələ, məna mə́ nəyeŋə́ ntɨ́ əghɔ́b pə́g nə́, pəlɔŋə̈ ńkə́ ńjîə tə́shúnə́.”

¹³ Atsáb zɨ lə́ ndə̌ŋdəŋə́, lə́ pə́ ńgə́ gho chîə á mə́ chigə nə́ sáʼə ághɔ́b ńté təpɔŋ əghɔb ńjî ńgə́ mbɔʼ pó túg mbimə́ ə́ tyantə̂ nə́,

¹⁴ ńkě pɛ́d ńgwaamə̂ pə́ pəpóʼ pə́ Pəjus pópə məntəgə́ mə́ lǒo nə́ á mbô pɨ pó kǐ nə́ ághóobə́ ndə̌ŋdəŋ pô.

¹⁵ Ajúmə atsəmə á ŋwaʼə̂ á mbô pɨ páʼ pó kə́ nə́ ŋ́ŋwaʼə̂ azɔ́b nə́ nkɔ̌ʼmbɨ əghóobə́. Lə́ ajûtsə́ á pə́ ńkě ŋwaʼə̂ á mbô pɨ páʼ pö féŋkə nə́ mbɨ əzɔb pô, ńkě kə́ néŋ ntɨ́ əghɔ́b nə́ Əsê pô, ńté ńgə́ akwaŋə azɔ́b pópə məntɨ́ (ajúmə ä ghɛd nə́ ŋwunə kó əsə́ənə) mɔ́b mə́ pɛ́dtə ə́féŋə.

¹⁶ Pó sóŋə ńgə́ pó jî Əsê ḿbə́ ńkǐə yi nə́ ngɛdmə́nu əghóobə́. Pó túgə kəpa pópə atyǎntə atûə, ńkě chîə á mə́ ghɛd nə́ anu yə əshîʼnə yətsə́ pô.