Matyo 4 - Əka yi Fîə

Pə́ Kwaʼlə̂ Yeso

¹ Ajwǐəsê a tíʼ ńdɔgə̂ Yeso ńgɛn nə́ yə́ á kɔŋ yi njǔbtə ńgə́ Dɛbəələ a kwaʼlə̂ yə́.

² Ndzaŋə ándó Yeso a nə ńchî nə́ əlěmbî məghə́m mɛ́n nəkwa pópə pənətúʼ məghə́m nəkwa ńchaʼtə́sê tə jî məjî lə́, nji ə́ záŋə yə́.

³ Dɛbəələ a yǐəə á mbi yí ə́sóŋ ńgə́, “Mbɔʼ gho pə́ mɔ́ Əsê, gho sóŋ nə́ məngɔʼ mɨ ńgə́ mə́ sɛlə̂ apéenə məkálə́.”

⁴ Yeso a kwěe yí ńgə́, “Pə́ ŋwaʼlə̂ á mə́m Aŋwaʼlə Əsê ńgə́, ‘ŋwunə a kě á mbî chîə ńté lə́ tsɔʼə apá pô, ḿbə́ ńchîə ńté lə́ atséebə atsəm páʼə ä fɛ́d nə́ á ntso Əsê.’ ”

⁵ Dɛbəələ a tíʼ ńdɔgə̂ yí ńgɛn nə́ á Jɛlusalɛmə, Aláʼ yə Ŋwaʼ nə́, ńgɛlə̂ a tə́əmə á ndu nəloŋ nə́ Tə́kɔʼndɛ̂sê.

⁶ Ńtíʼ ə́sóŋ nə́ yí ńgə́, “Mbɔʼ gho pə́ mɔ́ Əsê gho lǒo á nəloŋ nə́ ndɛ̂ nə ngwǔəə əsê ńté ńgə́ aŋwaʼlə Əsê a sóŋ ńgə́, ‘Əsê a yǐ sóŋ nə́ pətseŋpə́ndɛ̂ pí pó pyáabə gho, pó yǐ waamə̂ gho tsɔʼə atǐə atǐ nə́ mbô mɔ́b ńjî ńgə́ kɔ gho tô akoolə azô nə́ ngɔʼə.’ ”

⁷ Yeso a kwěe yí ńgə́, “Aŋwaʼlə Əsê á kə́ ə́sóŋ ńgə́, kɔ gho kwaʼlə̂ Mmaʼmbî páʼ a pə́ nə́ Əsê Əzo.”

⁸ Ngǎ yitsə̌, Dɛbəəl wə̂ á pɨ ńkə́ ńdɔgə̂ yí ńgɛnə̂ á ndu nkwəənə páʼ ə́ pyádnə nə́ ŋ́ŋáŋnə, ńnəələ̂ yí nə əláʼə á mə́m mbî tsɔʼə ətsəm pópə nəgháʼ əghoobə́, əláʼ páʼ pəfo pə́ sáʼ nə́.

⁹ Ə́sóŋ ńgə́, “Maŋ yǐ fɛ̂ əpú pɨ tsɔʼə ətsəm nə́ gho páʼ mbɔʼ gho kwə́ʼtə á məko maŋ ńgóʼkə mə.”

¹⁰ Yeso a sóŋ nə́ yí ńgə́, “Lǒo gho á nəpɛnə́ maŋə, Satan! Aŋwaʼlə Əsê á sóŋ ńgə́, gho yǐ shib ghóʼkə tsɔʼə Mmaʼmbî a pə́ nə́ Əsê əzo; ə́ kə́ ə́faʼ tsɔʼə á mbô yí təjiʼə.”

¹¹ Əghâ yí wɨ́, Dɛbəələ a tíʼ ḿmɛdtə̂ yə́, pətseŋpə́ndɛ́pə́sê pə́ tíʼ ńgyǐ ńkwáalə yə́.

Yeso a Chúʼə Afaʼə ajíə á Galiliə

¹² Ndzaŋ Yeso a nə ńdzóʼ nə́ ńgə́ pə́ néŋə Jɔnə á atsáŋ lə́ ə́fɛ́d ńgɛnə̂ á Galiliə.

¹³ A fɛ́lə Nazalɛd ńgɛn ńtíʼ ńchîə á Kapanawum páʼ lə́ nə ḿbə́ nə́ aláʼ yətsə́ ńchîə á nkaŋ Əfooghɨ Galiliə, ḿbáatə mboʼ Zɛbulɔn pó Naftaliə.

¹⁴ Pə́ nə ńgɛlə̂ á jɨ lə́ ńjî ńgə́ anu páʼ ntûsê Izaya a nə sóŋ nə́, á lɔgə̂ aliʼə́.

¹⁵ Aláʼə Zɛbulɔn pó aláʼə Naftaliə, páʼ ə́ chî nə́ á ndú nə́ənə á chî nə́ ə́wə́ á ndzɛnə́ nkǐ Jodanə, Galiliə, aláʼə pətəjǐsê!

¹⁶ Pɨ pə́ nə ńchî nə́ á mə́m ndzəmə́ pə́ zə́ənə tə́kɔʼ nkyaʼə, Nkyaʼ ə́ kɛ́d nə́ á mbɨ pɨ páʼ pó nə ńchî nə́ á mə́mə aláʼə ndzəmə́, nəwûə a chî nə́ ə́wə́.

¹⁷ Ə́fɛ́d nə́ ndɛd jɨ́d zə̂, Yeso a chúʼə á mə́ sóŋ nə́ anǔəsê ńgə́, “Mɛdtə̂ nə́ mənu mə́ təpɔŋ pɨ ghɛd nə́ ńté ńgə́ anuə nəfoonə nəpóolə á páatə.”

Yeso a Chúʼə á mə́ Fóŋ nə́ Ngaŋə́zoŋə́ndzəm Əjíə

¹⁸ Ndzaŋ Yeso a nə́ ńtə́ nə ńnyinə̂ á nkaŋ əfooghɨ Galili lə́, ńdzə́ənə ŋwu pó ndim yə, Saamun páʼ pə́ fóŋ nə́ nə́ Pita lə́ pó Andəlu. Pó nə ńtə́ ńtéemə məŋkɛd mɔ́b á mə́ kó nə́ əshûə á mə́m əfooghɨ ńté ńgə́ pó nə ḿbə́ lə́ ngaŋə́kóolə́shûə.

¹⁹ “Yeso a sóŋ nə́ pó ńgə́ yǐ nə́ ńdzoŋə̂ a mə, maŋ yǐ lɔgə̂ áwɨ́ ghɛd ngaŋə́kóolə pɨ ə́wə́.”

²⁰ Pó tɔ́g ḿmɛdtə̂ məŋkɛd mɔ́b ńdzoŋə̂ yə́.

²¹ Pó fɛ́lə aliʼ yi wɨ́ ńtə́ ńgɛnə̂, Yeso a zə́ənə Zebedi pópə pɔ́ pí pɛ́n pɛ̌ pó chîə á mə́m aŋkənúʼə́ ńtə́ ńtsoŋkə̂ məmɔ́b məŋkɛlə́. Lə́ nə́ ḿbə́ Jɛmsə pó Jɔnə a fóŋə ághóobə́.

²² Pó kə́ ńtɔ́g ḿmɛdtə̂ tǎ əghɔb pópə aŋkənúʼə́ zə́ ńdzoŋə̂ Yeso.

Yeso a Zéʼkə, Ə́sóŋə Anǔəsê ńkə́ Ńtsóʼə Pəghoonə́

²³ Yeso a nyinə̂ á mə́mə aláʼə Galili tsɔʼə atsəm ńdzéʼkə á mə́m məndɛ̂ məsê mə́ Pəjusə ḿbəənə̂ ə́sóŋə anu ńté Anuə Nəfoonə Əsê, ńkə́ ńtsóʼə pɨ nə́ ntê məghɔ ntsəm mə́ nə ńchî nə́ á mbɨ pó.

²⁴ Atséebə a tíʼ ńnyinə̂ a mə́mə aláʼə Silya tsɔʼə atsəm ńté yə́. Pɨ pə́ tíʼə ńgyǐəə nə́ pəghoonə́ á mbô yí páʼ pó ghɔ nə́ nə́ ntê məghɔ ntsəm, pópə mbɨ yi ńdzáŋnə nə́, pɨ pɛ̌sê ə́ nə́ ńchî nə́ á mbɨ pó, nə́ pɨ pó nə̈ ńgwǔ nə́ akəpuʼ, nə́ pəkɔ́ŋə́sê, a tíʼə ńtsóʼə ághóobə́.

²⁵ Apoŋə pəənə a nə ńtíʼ ə́fɛ́lə á Galiliə, á Jɛlusalɛm, á Judya ḿbɨ́ ḿbə́ nə́ pə tə́kɔʼ pə́ əláʼ pɔ́b pətsə́ pɛ́n nəghə́m ńdzoŋ ḿbə́ nə́ ngǎŋ ndzɛnə́ Jodan ńdzoŋə̂ yə́.