Matyo 24 - Əka yi Fîə

Yeso a Sóŋ Ndzaŋ Pə́ Yǒ nə́ Shaʼtə̂ Tə́kɔʼndɛ̂sê

¹ Yeso a fɛ́lə Tə́kɔʼndɛ̂sê ńtə́ ńgɛnə̂, ngaŋə́zoŋə́ndzəm əjí tíʼ ńdzoŋ ə́fóŋə yí á mə́ nɨd nə́ yí ndzaŋ pə́ pɔ́ nə́ ndɛ̂ yi wə́.

² Yeso a pítə ághɔ́b ńgə́, “Nə́ jɨ́ əpú pɨ tsɔʼə ətsəm? Mäŋ fiʼtə̂ áwɨ́ nə́ ndə̌ŋdəŋ ńgə́ tsɔʼə táʼ ngɔʼə aliʼə́ nə́ a yǒ kě a ndu yitsə̌ pɨ noŋnə̂ pô. Pə́ yǒ kwɛlə̂ ajúmə atsəmə á əsê.”

Məngə́ʼ pópə Mə Tsaŋkə̂ nə́ Pɔ́ pə Yeso

³ Ndzaŋə ándó Yeso a nə ńnáanə nə́ á ndu Nkwəənə mətǐ mə́ Olif lə́, ngaŋə́zoŋə́ndzəm əjí yǐəə á mbô yə́ a ndzəmə ndzəm ə́sóŋ nə́ yí ńgə́, “Fiʼtə̂ áwə́g nə́ ndɛlə́ ándó ndɛn mənu ghɛn ətsəm ə́ ghɛd nə́ lɔgə̂ aliʼə́, ńkə́ ḿbə́ nə́ əkyeʼmə́nu ə́ ghɛd nə́ nɨd ńgə́ ndɛd əzo á mə́ yǐ nə́ ə́ koʼ pópə ndwigtə mbîə.”

⁴ Yeso a kwěe ághɔ́b ńgə́, “Lɔg nə́ ndɛlə́, kɔ nə́ ghɛd ŋwu tsə̌ a fɨgə̂ áwə́ənə́.

⁵ Ńté ńgə́ pɨ pə́ nɨ́ nə́ pə́ yǒ yǐ nə́ əlɛ́nə mə̈ ə́sóŋə ńgə́, ‘Maŋ lə́ Nchwádkə!’ ə́ tíʼ fɨg pɨ pə́ nɨ́ nə́.

⁶ Nə́ yǒ zóʼ ndzaŋ pə̈ lə́ʼ nə́ məntsoolə ə́ kə́ zóʼ ndzaŋ pə́ sóŋ nə́ anu ńté məntsoolə. Lə́, nə́ ghɛd ńdzóʼ, kɔ nə́ pɔ́gə. Ndɛn mənu wɨ́d ghɛn ə́ chîə á mə́ lɔg nə́ aliʼə́, lə́ ndɛd ndwigtə mbî ə́ pə́ ḿbɛ́d pɔŋə́ yǐəə.

⁷ Atúmə á yǒ lǒo á əsê sɔb məsɔŋə́ á ndzəm yətsə́, əláʼ páʼ pəfo pə́ sáʼ nə́ ə́ lǒo á əsê ə́sɔb məsɔŋə́ á ndzəm pətsə́. Nji ə́ yǒ gháʼə, ndəsê ə́ chiʼnə̂ aliʼə́ aliʼə́.

⁸ Ndɛn mənu ghɛn ətsəm ə́ ghɛd chî lə́ tsɔʼə ándó məngyě nəpəmə a zóʼə móonə.”

⁹ Pə́ yǒ tíʼ waamə̂ áwɨ́ ghɛd nə́ chigə ńjɨ́ ngə́ʼ pə kə́ ńjwítə áwə́ənə́. Mbî ntsəm ə́ peenə̂ áwɨ́ ńté atûə mə.

¹⁰ Á ghɛd pə́ nə́ ndɛd yi wɨ́ lə́, pɨ pə́ nɨ́ nə́ pó myaʼ mbimə́ əzɔb ə́fi məmbɨ mɔ́b, ə́ kə́ pa məmbɨ móobə́.

¹¹ Məntú mə́ Əsê mə́ məfɨg mimə nɨ́ nə́ mə́ yǒ ə́fɛ́d fɨg pɨ pipə nɨ́ nə́.

¹² Ndzaŋ təpɔŋə á yǒ nə́ nɨ́ tə́shú lə́, akɔŋnə pɨ pə́ nɨ́ nə́ á póolə.

¹³ Lə́ ŋwu ntsəm páʼ a tɨ́ nə́ ńtyantə̂ tə ńkoʼə̂ a ndwigtə á yǒ chwáalə.

¹⁴ Pə́ yǒ náŋkə nkɨ yi əshîʼnə ghɛn ńté Anuə Nəfoonə Nəpóolə á mbô mbî ntsəm, ńjî ńgə́ mbî ntsəm ə́ zóʼə, kɔ ŋwu tsə̌ á yǒ ə́sóŋ ńgə́ maŋ nə ńkě zóʼ pô, záʼ ndwigtə mbî ə́ tíʼ ḿbɔŋə́ yǐəə.

Ajúmə Təpɔŋ páʼ Əsê a Pa nə́

¹⁵ “Nə́ yǐ zə́ənə́ Ajúmə Təpɔŋ páʼ Əsê a Pa nə́ páʼ ntûsê Danyal a nə sóŋ nə́ lə́, zə́ələ́ á tə́əmə aliʼ yə ŋwaʼ nə́.” (Pɨ pə̈ fóŋ nə́ pó lɔg ndɛlə á mə́ chígə́ nə́ zóʼə anu yəwə́)

¹⁶ “Mbɔʼ nə́ jɨ́ lɛ, pɨ pə́ chî nə́ á Judya pó tíʼ ńkə ndə̌ ńkɔ́ʼə á məŋnkwəənə.

¹⁷ Ŋwunə a chî nə́ atûndɛ̂ kɔ a tsóolə á ndɛ̂ yə́ á mə́ lɔg nə́ ajú yətsə́.

¹⁸ Ŋwunə a chî nə́ afoonə kɔ a pɨ ḿbəənə̂ mə́ lɔg nə́ kód əyǐə.

¹⁹ Əlě pə wɨ́ ə́ yǒ tyantə̂ á mbô pəngyě pə́ nəpəm pópə pəngyě pə́ tə́ nə́ ńnɔ́ŋkə á pə́ ə́lɛ́ lôo!

²⁰ Tə́ nə̈ ńchaʼtə́sê ńgə́ mənu mɨ́d mɨ kɔ mə́ yǐ ńtégə áwɨ́ nə́ ndɛd páʼ əfə́g ə́ chî nə́ apeŋ kəənə Alěláʼə́sê.

²¹ Ńté ńgə́ ngə́ʼə alě yə wɨ́ ə́ yǒ chaanə̂ tə tsɛ ngə́ʼ ntsəm ə́ nə ḿbɛ́d nə́ tə́ ńchîə á mbî ə́fɛ́lə nəchwaakənə́ mbî tə ńkoʼə̂ alě yí wə́. Yitsə̌ ə́ láʼ ə́ kě ándó yi wɨ́ kə́ ḿbɨ́ ńchî pô.

²² Mbɔʼ Əsê a nə ńchî əlě pi wɨ́ lə́g pô, tə ḿbə́ ŋwu tsə̌ a ghɛd ńkě chwád pô. A pɛn yǒ lə́g əlěmbî pə wɨ́ ńté pɨ pí páʼ a nə ńtsɔ́ʼ nə́.”

²³ Á yǒ nə́ ḿbə́ nə́ ndɛd yi wɨ́ ŋwu tsə̌ a sóŋə á mbô pɨ ńgə́, “Náŋ nə́, yi páʼ Əsê a Tsəʼ nə́ a ghɛnə́, kɨ ńgə́ a yǐəə!” Kɔ nə́ pímə atséebə ajíə.

²⁴ Ńté ńgə́ məsê mə́ məfɨg pópə məntúmə́sê mə́ məfɨg mə́ yǒ yǐ ghɛd pətə́kɔʼ pə́ əkyeʼmə́nu pópə əkɨʼnəmə́nuə á mə́ fɨg nə́ pəənə, tə pá pɨ páʼ Əsê a tsɔ́ʼ nə́ ághɔ́b lə́ ə́wə́, páʼ təmbɔʼ ndú ə́ chî ə́wə́.

²⁵ Jɨ́ nə́! maŋ fiʼtə̂ áwɨ́ záʼ ndɛd pɔŋə̂ koʼə̂.

²⁶ Lə́ələ́ pə́ ńgə́ mbɔʼ ŋwu tsə̌ a sóŋə á mbô pɨ ńgə́, jɨ́ nə́, a chîə á kɔŋ mənkwâʼlə̌! Kɔ nə́ ghɛn ə́wə́; Kɨ ə́sóŋ nə pɨ ńgə́ a pánə aliʼə́ nə́! Kɔ nə́ pímə.

²⁷ Ndzaŋə ándó nəfaŋ nə́ ŋwaŋkə̂ nə́ ə́fɛ́lə á əsáʼmə́nu ńgɛnə̂ á mɛ́dmə́nu lə́, lə́ tsɔʼə ndzaŋə ándó Mɔ́ Ŋwunə a lǒo nə́ yǐəə.

²⁸ Aliʼə́ atsəmə akwûə ajúmə á chî nə́ ə́wɨ́, lə́ aliʼ páʼ əntsônə́ngwúmnə́ ə́ kyeetə̂ nə́ ə́wə́.

Ndzaŋ Ándó Mɔ́ Ŋwunə a Yǒ nə́ Pɨ Yǐəə

²⁹ “Tsɔʼə əghâ páʼ ngə́ʼ əlě pə wɨ́ ə́ yǒ nə́ laŋ lə̂, mə́numə á yǒ sɛ́nə, sáŋə á kě nkyaʼ pɨ fɛ̂ pô, pɔ́ pə́ sáŋ pə́ lǒo á nəpó ńgwǔəə á ndəsê, mətɨ mə́ nəpó mə́ chiʼnə̂.”

³⁰ Əghâ yí wɨ́ lə́, akyeʼə́nuə Mɔ́ Ŋwunə á fɛ́lə nəpóolə, ngwud ŋwu məsɔŋ ntsəmə á ndu ndəsê ə́ kyéŋə, pó yǒ zə́ənə́ Mɔ́ Ŋwunə a yǐəə á mə́mə alə́mə á nəpóolə, nə́ mətɨ pópə tə́kɔʼ nəgháʼ əyǐə.

³¹ A yǒ tíʼ tú pətseŋpə́ndɛ̂ pí nə́ ntaŋ páʼ jɨ́d ə́ pyádnə nə́ ńchûə, pó kyeetə̂ pɨ pí páʼ a tsɔʼ nə́ á mə́m məlá mə́ mbî mɛ́n nəkwa. Ə́fɛ́d nə́ táʼ əlá nəpó ńkoʼ nə́ yitsə̌.

Anu Mbɔʼ pə́ Zéʼ ńté Atǐə Figə

³² “Əghâ nə́, zéʼ nə́ anu zəənə́ á mbô atǐə figə. Əghâ ándó məfag mí mimə pwɔ́d mə́ tô nə́ tə ńtíʼə ə́fógə məfǔ lə́, nə́ jî ńgə́ ndɛd mbəŋ ə́ páatə.

³³ Lə́ələ́ pə́ ńgə́, mbɔʼ nə́ yǒ ńjɨ́ mənu mɨ mətsəm, nə́ jî ńgə́ a páatə, tə ńkoʼə̂ á ntsǒnkáʼə.

³⁴ Mäŋ fiʼtə̂ áwɨ́ nə́ ndə̌ŋdəŋ ńgə́, pɨ pə́ ngoʼ pɨ pó yǒ kě pətsəm kwúkə tsɔʼə tə ghə́ mənu mɨ mətsəm mə́ lɔgə̂ aliʼ pô.

³⁵ Nəpó pó ndəsê ə́ ghɛd laŋ kətaŋə, lə́ atséebə mə á pə́ ńdáʼ ńkě kətaŋ laŋ pô.”

Ŋwu tsə̌ a kě Ndɛd kɨ Alě Yə́ wɨ́ Jî pô

³⁶ “Ŋwu tsə̌ a kě anu jî ńté alěmbî yə wɨ́ kɨ ndɛd yi wɨ́ pô, á lǒo pətseŋpə́ndɛ̂ pí páʼ pə́ chî nə́ nəpó pə́ kě jî pô, kɨ Mɔ́ Ŋwunə tə ńdə́ʼtə Tǎ páʼ a jî nə́ anu ńté.

³⁷ Ndzaŋə ándó á nə́ ńchî nə́ nə́ əlěmbî Nwâ lə́, lə́ ndzaŋə ándó á lǒo nə́ chîə əghâ Mɔ́ Ŋwunə a lǒo nə́ yǐəə.

³⁸ Á nə ḿbə́ nə́ ndɛd záʼ ə́ nkǐ yǒ ḿbɔŋə̂ kɔ́ʼ lə́, pɨ pə́ nə̈ ńjîə ńkə́ ńnô, ńdzɔ́ʼə ńkə́ fɛ̂ pɔ́ póobə́ á ndɛ̂ ndzɔʼə́, tə ńkoʼ nə́ ndɛd Nwâ a nə́ ńkwú nə́ á mə́mə apáŋə.

³⁹ Pó pə́ ńkě jîə anuə á yǐ nə́ laŋ pô tə nkǐ ə́ yǐ ńkɔ́ʼ ńdɔgə̂ ághɔ́b pətsəm ńgɛnə̂. Lə́ ndzaŋə á yǒ nə́ kə́ chî nə́ ndɛd páʼ Mɔ́ Ŋwunə a yǒ nə́ yǐəə.

⁴⁰ Mbyâŋnə zɛ́n pɛ̌ ə́ yǒ chîə afoonə, pə́ lɔgə̂ táʼ ḿmɛdtə̂ táʼə.

⁴¹ Pəngyě pɛ́n pɛ̌ pə́ tə́ ńgɔʼə̂ apéenə á nəghǒ, pə́ lɔgə̂ táʼ ḿmɛdtə̂ táʼə.”

⁴² Lə́ələ́ pə́ ńgə́, nə́ lɔg ndɛd ńté ńgə́ nə́ kě jîə alě páʼ Mmaʼmbî əwəənə́ a yǒ nə́ yǐ pô.

⁴³ Lə́ jí nə́ anu zə́ənə́, təmbɔʼ ngaŋndɛ̂ a nə ńjî ndɛlə́ á nətúʼ páʼ ndzə̌lə a yǐ nə́ yǐ, tə ḿbə́ a nə́ ńtə́ ḿbyáabə, ńkě mɛdtə̂ ndɛ̂ əjǐ pə́ pə́ʼ pô.

⁴⁴ Lə́ələ́ pə́ ńgə́, nə́ kə́ ńtə́ ḿbyáabə ńté ńgə́ Mɔ́ Ŋwunə a yǒ yǐ nə́ ndɛd páʼ nə́ pěʼ nə́ ńkě tə́ ḿbyáabə pô.

Ngaŋə́faʼ yi Əshîʼnə pó Ngaŋə́faʼ yi Təpɔŋə

⁴⁵ “Lə́ əwə ngaŋəfaʼ páʼ tǎ afaʼə a náakə nə́ yí ńgə́ a tə́ ńnáŋə yitsə́ ngaŋə́faʼ á mə́m ndɛ̂ yí, a néŋ nə́ ntɨ́ əyí nə́ afaʼ ńkə́ ńgyáŋ ə́fɛ̈ məjî nə́ pó nə́ ndɛd páʼ ə́ koʼnə̂ nə́?

⁴⁶ Á yǐ pɔŋə̂ á mbô ngaŋəfaʼ yi wɨ́ páʼ təmbɔʼ tǎ afaʼ əyǐə a tə́ ńkwə̂ ńdzə́ənə yə́ a tə́ faʼ əshîʼnə.

⁴⁷ Mäŋ fiʼtə̂ áwɨ́ nə́ ndə̌ŋdəŋ ńgə́, Tǎ afaʼ əyǐə a yǐ ghɛlə̂ a tə́ ńnáŋə apeʼə ají tsɔʼə atsəmə.

⁴⁸ Lə́ mbɔʼ ngaŋə afaʼ wə́ á pə́ yi təpɔŋ á sóŋ nə́ mbɨ əjɨ ńgə́: Tǎ afaʼə mə a yǐ twiʼə̂ á mə́ kwə̂ nə́,

⁴⁹ ńtíʼ ńchúʼə á mə́ shúm nə́ yitsə́ ngaŋə́faʼ ńtûə ńjîə ńkə́ ńnô pópə əpɛ̌mə́loʼə.

⁵⁰ Tǎ afaʼ ngaŋəfaʼ wə́ a yǒ ńkwə̂ nə́ alě páʼ a pěʼ nə́ ńkě tə́ ḿbyáabə pô, kɨ nə́ ndɛd páʼ a pěʼ nə́ ńkě jî ńgə́ a tə́ ńgyǐəə pô.

⁵¹ Tǎ afaʼ əyǐə á yǐ ə́ chígə́ ə́shúmə yí ə́ tíʼ ə́fɛ̂ aliʼə́ ajíə á mə́m ngaŋmə́fɨgə, aliʼ páʼ pə́ yǒ nə̈ ə́ kyéŋə kə́ kɔ́lə məsɔŋ ə́wə́.”