Matyo 20 - Əka yi Fîə

Atséebə́nə́múʼ Ńté Ngaŋə́faʼə á Mə́m Nkáʼ Mətǐ mə́ Məloʼə

¹ Anuə nəfoonə nəpóolə a chî lə́ ándó ŋwu yitsə̌ a lê fɛ́lə mɛ́ məsânə ńgɛnə̂ á mə́ náŋ nə́ pɨ pó yǐ ə́faʼə̂ á mə́m nkáʼ mətǐ mə́ məloʼ əyə́.

² Pó po nə ḿbímnə ńgə́ a yǐ ńtûə ághɔ́b nə́ nkáb páʼ ə́ koʼ nə́ alěmbîə afaʼə. A tíʼ ńtúmə ághóobə́ á mə́mə akoobə́ mətǐ mə́ məloʼ yə́.

³ Əghâ ándó mə́numə á nə sáʼ nə́ tə ńnyáʼ ńkɔ́ʼtə, a pɨ ńkə́ fɛ́d ńgɛnə̂ məta ńjɨ́ pɨ pətsə́ pə́ tɨ́mtə ə́wɨ́ ńkě ajûtsə́ tə́ faʼə̂ pô.

⁴ A tíʼ sóŋə á mbô pó ńgə́, Kə́ nə́ ńgɛn ə́faʼə̂ atɔʼ maŋə, maŋ yǐ tûə áwɨ́ nə́ ndɛn nkáb ətsəm páʼ ə́ koʼ nə́.

⁵ Pó tíʼ ńgɛnə̂. A yǐ ḿbə́ á ntɨ̌numnə pó ndzəŋ mə́nu a kə́ ḿbɨ ə́fɛ́d ńgɛn ńgɛd tsɔʼə ə́lə́ələ́.

⁶ A yǐ ḿbə́ á ńtsó mə́nu a fɛ́d ńgɛnə̂ məta ńjɨ́ pɨ pə́ kə́ ḿbɛ́d ńtɨ́mtə ə́wə́. A pítə ághɔ́b ńgə́, nə chígə́ ńtə́əmə aliʼə́ nə́ fɛ́lə məsânə ə́faʼə̂ lə́ akə̂?

⁷ Pó kwěe yí ńgə́, ‘lə́ ńté ńgə́ ŋwu tsə̌ a kě áwə́gə́ á afaʼ lɔg pô,’ A sóŋə á mbô pó ńgə́, ‘Kə́ nə́ ńgɛn ə́faʼə̂ á nkáʼ mətǐ mə́ məloʼ maŋə.’

⁸ Əghâ nkwanə́ nə ḿbɛn ńkoʼ ŋwu wə̂ a sóŋ nə́ nətû nə́ ngaŋə́faʼ əjí ńgə́, ‘fóŋ ngaŋə́faʼ zə̂ ńtû mənkáb móobə́, ńchúʼ nə pi páʼ pó pěʼ nə́ ńdwegtə̂ ndzəmə á mə́ yǐ nə́ lə́, tə́ ńkɔ́ʼ ńkoʼ nə pɨ pə́ pěʼ nə́ ńkwá mbiə.’

⁹ Ngaŋə́faʼ páʼ pó pěʼ nə́ ńchúʼə afaʼə á mɛ́dmə́nu lə́, pó pətsəm kə kwá lə́ nkéebə alěmbîə afaʼə.

¹⁰ Lə́ pɨ pə́ pěʼ nə́ ńdɔgə̂ ághóobə́ mɛ́ məsânə lə́ pó yǐ, ńkwaŋ ńgə́ pó yǐ kwá nkáb ə́ nə́ənə; lə́ ŋwu ntsəmə á mə́m pó a pə́ ńkə́ ńkwá tsɔʼə nkéebə alěmbîə afaʼə.

¹¹ Ndzaŋ pó kwá nə́ nkáb zə̂ lə́, ńchúʼə á mə́ ŋwuntə̂ nə́ ńté ŋwu wə̂.

¹² Ə́sóŋə ńgə́, ‘Ngaŋə́faʼ jɨ pə́ lɔg nə́ ághóobə́ a ndzəm lə́ pó faʼ lə́ tsɔʼə táʼ mə́numə, pəg pə̂ ḿbeʼə̂ afaʼə atsəm ə́fɛ́lə məsânə á mə́m mɛ́ mə́numə. Lə́ gho pə̂ ḿbɛ́d ńtûə ághɔ́b tsɔʼə ndzaŋ páʼ gho tû nə́ áwə́gə́!’

¹³ A pə́ ńkwěe táʼ ŋwu əghɔb yitsə̌ ńgə́,” Jwə́ʼtə ngəənə mə, maŋ kě anuə təkoʼ yətsə́ á mbô gho ghɛd pô. Pɔ pěʼ ńkě pímnə ńgə́ maŋ yǐ tûə gho lə́ nə́ nkéebə alěmbîə afaʼ?

¹⁴ Kwá nkáb əzo ńgɛnə̂. Maŋ kɔŋə̂ á mə́ tû nə́ ŋwu pə́ pěʼ nə́ ńdɔgə̂ yə́ a ndzəm lə́ tsɔʼə ndɛn páʼ maŋ tû nə gho ə́wə́.

¹⁵ Maŋ kě chîə á mə́ faʼ nə́ anuə atsəm nə́ nkéebə mə ndzaŋ maŋ kɔŋ nə́? Kɨ ndě əghô ə́ záŋə lə́ ńté ńgə́ maŋ gheebə̂ apô?

¹⁶ Yeso a tíʼ ńdwegtə̂ ńgə́ “Pɨ pə́ lwigtə̂ nə́ ndzəm pó láʼ tíʼ mbiə, pɨ pə́ kwá nə mbi pə́ tíʼ ndzəmə.”

Yeso a kə́ Ḿbɨ Ə́sóŋə Anu ńté Nəwû Əyǐə

¹⁷ Əghâ ándó Yeso a nə ńtə́ nə́ ńkɔ́ʼə ńgɛnə̂ Jɛlusalɛm lə̂, ə́fóŋ ngaŋə́zoŋə́ndzəm əjí zə̂ ntsɔb pɛ̌ pó po tə́ ńnyinə̂, a sóŋə á mbô pó ńgə́,

¹⁸ “Jwə́ʼtə nə́,” pɛn kɔ́ʼə ńgɛnə̂ lɛ̌ Jɛlusalɛm páʼ pə́ yǐ nə́ fɛ̂ Mɔ́ Ŋwunə á mbô pətə́kɔʼ pə́ ngaŋə́pêsê pópə ngaŋə́zéʼkə pənoŋkə, pó sáʼ əsáʼ əyí ḿbímnə ńgə́ pə́ jwítə yə́,

¹⁹ ə́ pɨ fɛ̂ yə́ á mbô Pətəjǐsê pô nyegnə̂ yí, ḿbɨ ə́shúmə yí ńtíʼ ńkwumtə̂ yə́. Lə́ əlě teelə́ ə́ laŋ a pɨ ńjúmnə nəwûə.

Anu Ngwě Zebedi a nə Ḿbítə nə́ ńté Pɔ́ Píə

²⁰ Mǎpə pɔ́ pə́ Zebedi a tíʼ ńgyǐəə á mbô Yeso nə pɔ́ pí pi pə́ mbyâŋnə pɛ́n pɛ̌ ńkwə́ʼtə mbi yí ḿbítə yí nə́ anu yətsə̌.

²¹ Yeso a pítə yí ńgə́ “Gho loonə̂ lə́ akə̂?” Məngyě wə̂ a kwěe ńgə́ “Pí ńgə́ táʼ móonə mə ghɛn yitsə̌ a yǐ ńnáanə a əlá apô gho yi tɨ, yitsə̌ a náanə á əlá apô gho yə kwaabə á mə́mə anuə nəfoonə azô.”

²² Yeso a kwěe yí ńgə́, “Gho kě jîə ajú gho pítə nə́ pô. Mbɔʼ pɨ nô ndɔ́ŋ páʼ maŋ yǐ nə́ nô ájɨ́d?” Pó kwěe ńgə́, “Mbɔʼ pəg nô.”

²³ Yeso a tíʼ ə́sóŋə á mbô pó ńgə́, “Pɨ yǐ nô ndɔ́ŋə mə, lə́ mə náanə nə́ á əlá apô maŋ yə tɨ kɨ yə kwab, mbɔʼ lə́ kě maŋ sóŋ pô. Əliʼ pɨ́d pɨ chî lə́ á mbô pəənə ándó Tǎ mə a nə ḿbɛ́d nə́ tə ńtsoŋkə̂ pə́ələ́ á mbô pó.”

²⁴ Ndzaŋə ándó apuʼə ngaŋə́zoŋə́ndzəm Yeso zə̂ zɛ́n nəghə́mə nə ńdzóʼ nə́ anu yə wɨ́ lə́, ndě əghɔ́b ə́ záŋ nə́ pətsə́ pə́ pɛ́n pɛ̌.

²⁵ Yeso a tíʼ ə́fóŋə ághɔ́b pətsəmə aliʼə́ mɔʼə́ ə́sóŋ nə́ pó ńgə́, “Nə jî ńgə́ pɨ pə́ sáʼ nə́ pɨ pə́ təjǐsê pó kɔ́ʼə ńnáanə lə́ á ndu pó ə́sáʼə ághóobə́. Mətû mɔ́b mə́ kə́ ńtúg mətɨ mətsəmə á ndu pó.

²⁶ Lɛ pə́ ńkě ndzaŋə a chî nə́ á mə́ chî nə́ a tətɨ pɨ pô. Ŋwu ntsəm páʼ ä lɔ nə́ á mə́ pə́ nə́ tə́kɔʼ ŋwunə á mə́m pəənə́ a shib ḿbə́ ngaŋəfaʼ əwəənə́

²⁷ Mbɔʼ ŋwu wɨ yitsə̌ a tə́ ńdoonə̂ á mə́ pə́ nə́ nkwâmbi, a shib ḿbə́ apoʼə azə́ənə́

²⁸ tsɔʼə ándó Mɔ́ Ŋwunə a nə ńkě nə́ yǐ lə́ ńgə́ pə́ faʼə̂ á mbô yi pô, a nə ḿbə́ ńgyǐ lə́ á mə́ faʼ nə́ á mbô pəənə, ə́ tû fɛ̂ nchîmbî əjǐə á mə́ jú nə́ ətû pɨ pipə nɨ́ nə́ ə́wə́.”

Yeso a Tsóʼ Pəfəg pɛ́n Pɛ̌

²⁹ Ndzaŋə ándó Yeso pópə ngaŋə́zoŋə́ndzəm əjí nə ńtə́ nə́ ə́fɛ́lə Jɛliko lə́, mboŋ ŋwu məsɔŋ zoŋə̂ yə́

³⁰ Pəfəg pɛ́n pɛ̌ pə́ nə ńnáanə nkaŋə́ alaŋə́. Ndzaŋ pó nə ńdzóʼ nə́ ńgə́ Yeso a tə́ ńdaŋə̂ lə́, ńtíʼ fóŋnə nə́ tə́kɔʼ ngye ńgə́, “Mɔ́ Debid, kó mələ́ŋ mə́gə́ Mmaʼmbî!”

³¹ Mboŋ pɨ zə̂ sáʼə ághɔ́b ńgə́ pó pɔ́ʼnə ńnaʼə̂. Pó pɨ ḿmegnə̂ ńtɔ́ŋnə ngye əzɔb kɔ́ʼə pə́ atǐ ə́sóŋ ńgə́ “Mɔ́ Debid, kó mələ́ŋ mə́gə́ Mmaʼmbî.”

³² Yeso a tɨ́ ə́fóŋə ághɔ́b ḿbítə ńgə́, “Nə loonə̂ lə́ ńgə́ maŋ ghɛd ə́lɛ́ nə́ pəənə́?”

³³ Pó kwěe ńgə́, “Mmaʼmbî, pəg loonə̂ lə́ ńgə́ gho ŋáʼ əmə́g mə́gə́!”

³⁴ Yeso a kó mələ́ŋ mɔ́b ńkwum əmə́g móobə́; tsɔʼə əghâ yi wɨ́, pó chúʼə á mə́ jɨ́ nə́ əliʼ ńtíʼ ńdzoŋə̂ yə́.