Matyo 14 - Əka yi Fîə

Ndzaŋ pə́ nə Ńjwítə nə́ Jɔn Əfɛ̂nkǐə

¹ Əghâ yi wɨ́, Ɛlɔd páʼ a nə ḿbə́ nə́ əfo Mboʼ Galili a zóʼə atsáb ńté Yeso.

² Ńtíʼ ə́sóŋə á mbô ngaŋə́faʼ əjí ńgə́, “Lɛ̌ pyádnə ḿbə́ Jɔn Əfɛ̂nkǐə; a pɨ nə́ ńjúmnə á nəwûə! Lə́ ghɛd ə́lə́ələ́ a túg mətəənə á mə́ ghɛd nə́ əkɨʼnəmə́nuə.”

³ Ńté ńgə́ Ɛlɔdə a nə ḿbɛ́d tə ńgɛd pə́ waamə̂ Jɔn ńkwúd ńnéŋə á nkáʼə atsáŋ ńté Ɛlɔdyas páʼ a nə ḿbə́ nə́ ngwě ndim yi Filibə.

⁴ Ńté ńgə́ Jɔnə a nə ə́sóŋə Ɛlɔd ńgə́, á kě koʼnə̂ á mbô yə́ mə́ zɔ́ʼ nə́ Ɛlɔdyas pô.

⁵ Ɛlɔdə a nə ḿbǎtə ńtə́ ńdoonə̂ mə́ jwítə nə́ yí lə́ ḿbə́ ńtə́ ḿbɔ́gə Pəjusə.

⁶ A nə ḿbɛn ḿbə́ alě Ɛlɔdə a nə ńtə́ nə́ ńgɛlə̂ dína ńté alě pə́ nə ḿbî nə́ yí lə́, mɔ́ Ɛlɔdyas yi məngyě a yǐ ḿbɛ́nə apɛ́nə a mbi ŋwu ntsəm anu yəwə́ á kwíʼnə ḿbɔŋə̂ Ɛlɔd lɛ tətə

⁷ a tíʼ ńdaʼnə̂ yí tə pó yí wad əka ńgə́ Ɛlɔdə a yǐ fɛ̂ ajúmə atsəm nə́ yí páʼ a pítə nə́.

⁸ Mǎ əyǐə a toʼkə̂ yí ńgə́ a ghɛn sóŋə á mbô Ɛlɔd ńgə́, “Fɛ̂ atûə Jɔn Əfɛ̂nkǐə á mbô maŋ əghâ nə́ á mə́mə apagə akáŋə!”

⁹ Əfo yi wə́ a nə fɨnə̂, lə́ əka páʼ a nə ḿbɛ́d nə́ tə ńgwaalə̂ áwɨ́d pó mɔ̂ məngyě wə̂ a mbi ngaŋnə́ghá əjí ə́ ghɛlə̂ a sóŋ ńgə́ pə fɛ̂ zə́ələ́ á mbô yə́.

¹⁰ A tíʼ ńgɛd pə́ lə́gə atûə Jɔnə a nkáʼə atsáŋə.

¹¹ Pə́ nə ńgyǐ nə́ atûə Jɔnə á mə́mə apagə akáŋ ə́fɛ̂ nə́ mɔ̂ məngyě wə̂ a tíʼ ńdɔg ńgɛn fɛ̂ á mbô mǎ əyǐə.

¹² Ngaŋə́zoŋə́ndzəm Jɔn yǐ ńdɔgə̂ akwûə ají ńgɛn ńtwə́ŋ ńtíʼ ńgɛn fiʼtə̂ Yeso.

Ndzaŋə Ándó Yeso a nə Ńdzə́g nə́ Pɨ Tɔsə Tênə

¹³ Əghâ ándó Yeso a nə ńdzóʼ nə́ anu páʼ a laŋ nə́ nə́ Jɔn lə́, ə́fɛ́lə aliʼ yi wɨ́ yí təjiʼ ńkwúnə aŋkənúʼə́ ńgɛnə̂ aliʼ páʼ ŋwunə a kě nə́ ə́wɨ́ chî pô. Ndzaŋə ándó apoŋə pɨ zə́ á kə zóʼ nə́ ńgə́ a kwúnə aŋkənúʼə́ ńgɛnə̂ yí lə, ə́fɛ́d ḿmɛdtə̂ əláʼ pɔ́b ńdzoŋə̂ yə́ a məkoolə.

¹⁴ Yeso a fɛ́lə á mə́mə aŋkənúʼə́, ndzaŋə a kə jɨ́ nə́ apoŋə pɨ lə́ ńtúgə akóolə́mə́lə́ŋə á mbô pó ńtíʼ ńtsóʼ məghɔ móobə́.

¹⁵ Ndzaŋə ándó nkwanə́ kə koʼ nə́ lə́, ngaŋə́zoŋə́ndzəm əjí yǐəə á mbô yí sóŋ ńgə́, “Ndɛd pɛ́d tə ńgɛnə̂, lɛ̌ kə́ ḿbə́ aliʼə́ tə ŋwunə. Ghɛlə̂ apoŋə pɨ zəənə́ á ghɛnə̂ á mə́m əláʼ ə́ páatə nə́ ńjî ńgə́ pó jú məjî móobə́.”

¹⁶ Yeso a kwěe ághɔ́b ńgə́, “Pó kě chîə mə́ ghɛn nə́ pô. Fɛ̂ nə́ ajú pó jîə!”

¹⁷ Pó kwěe ńgə́, “ndaʼə ajú ə́ chî nə́ á mbô pəgə́ aliʼə́ nə lə́ tsɔʼə apéenə məkálə́ ntáʼ tâ nə́ əshû ntáʼ pɛ̌.”

¹⁸ Yeso a sóŋ ńgə́, “yǐ nə́ fɛ̂ nə́ maŋə.”

¹⁹ A tíʼ sóŋ ŋwu ntsəmə a náanə a ndəsê a ndu ngɔ́n, a tíʼ ńdɔgə̂ apá zə̂ ntáʼ tâ nə́ əshû zə̂ ntáʼ pɛ̌ ńnáŋ nəpó ə́fɛ̂ ndǎ á mbô Əsê, ḿbagtə̂ apá zə̂ ə́fɛ̂ á mbô ngaŋə́zoŋə́ndzəm əjíə. Ngaŋə́zoŋə́ndzəm əjí tíʼ fɛ̂ á mbô apoŋə pɨ zə̂.

²⁰ Ŋwu ntsəmə a jî ńdzɛ́d tə ngaŋə́zoŋə́ndzəm əjí lagtə̂ əpuʼ nə ḿbɛ́d nə́ ə́ pə́ mənka ntsɔb pɛ̌.

²¹ Mbyâŋnə nə ńjî nə́ məjî mimə wɨ́ lə́ nə ḿbə́ ándó pó tɔsə tênə ḿbɔŋə̂ pá pəngyě pópə pɔ̂nkə̂.

Yeso a Nyinə̂ a Ndu Nkǐə

²² Yeso a tíʼ ńgɛd ngaŋə́zoŋə́ndzəm əjí kwúnə aŋkənúʼə́ ńkwá mbi ńtə́ ńtú nkǐ ńgɛnə̂ á ndzɛnə́, a tíʼ ńgɛlə̂ apoŋə pɨ zə́ á kwə́əkə.

²³ Ndzaŋ a nə ńgɛd nə́ apoŋə pɨ zə́ kwə́əkə lə́, a tíʼ ńkɔ́ʼ ńgɛnə̂ a ndu nkwəənə a ngǎ yə́ á mə́ chaʼtə̂ nə́ əsê. A yǐ ḿbə́ ndɛd nkwanə́ Yeso a chîə alíʼ yi wə́ a ngǎ yə́.

²⁴ Əghâ yi wɨ́ lə́, aŋkənúʼə́ a chîə á mə́m nkǐ tə ndi sagə̂, nkǐ tíʼə ńtóʼnə ńtwáamə aŋkənúʼə́ ńté ńgə́ kəfəələ a nə ńtə́ ńkɔ́ʼə á ndú páʼ aŋkənúʼə́ á chî nə́ ə́wə́.

²⁵ A nə ḿbɛn ḿbə́ ándó pəmə́nu pɛ́n nəkwa a ndú mbî, Yeso a fɛ́d ńnyinə̂ a ndu nkǐ ńgɛn ńtég ngaŋə́zoŋə́ndzəm əjíə.

²⁶ Ndzaŋ ngaŋə́zoŋə́ndzəm əjí nə ńjɨ́ nə́ yə a tə ńnyinə̂ a ndu nkǐ lə́, pó pɔ́g lɛ tətə ńtíʼ sóŋ ńgə́, “Lə́ nkwûsê,” apɔ́gə a ghɛd pó tíʼə ńkyéŋə nə́ tə́kɔʼ ngye.

²⁷ Lə́ Yeso a tɔ́g sóŋə á mbô po ńgə́, “Wam nə́ ńtɨ́ əwə́ənə́! lə́ maŋə. Kɔ nə pɔ́gə!”

²⁸ Pita a sóŋ ńgə́, “Mmaʼmbî, mbɔʼ lə́ lánə ḿbə́ gho, gho ghɛd maŋ nyinə̂ a ndu nkǐ ńgyǐ ńtégə gho.”

²⁹ Yeso a sóŋ ńgə́, “yǐəə” Pita a tíʼ fɛ́lə á mə́mə aŋkənúʼə́ ńchúʼə á mə́ nyi nə á ndu nkǐ ghɛn tégə Yeso.

³⁰ Ndzaŋə ándó Pita a nə ńjɨ́ nə́ kəfɨd lə́, ḿbɔ́gə, ńtíʼ ńchúʼə á mə́ mɛ́d nə́ á mə́m nkǐə. Ńkyéŋ sóŋ ńgə́, “Mmaʼmbî chwádkə mə!”

³¹ Yeso a kə́ ńtɔ́g ńnɛdkə̂ apô ají ńgwaamə̂ yí ə́wɨ́ ə́sóŋ ńgə́, “Mbimə́ əzo chígə́ ńkə́g lɛ̌ ə́lɛ́? Lə́ pěʼ ńgɛlə̂ akə̂ atûə azô a koʼlə̂?”

³² Əghâ ándó pó yí nə ńkwú nə́ á mə́mə aŋkənúʼə́ lə́, kəfɨd wə̂ a měe yə́.

³³ Ngaŋə́zoŋə́ndzəm Yeso páʼ ə́ pěʼ nə́ ńchîə á mə́mə aŋkənúʼə́ tíʼ ńgóʼkə yí ə́sóŋ ńgə́, “Lə́ ndə̌ŋdəŋə́, gho lə́ Mɔ́ Əsê.”

Yeso a Tsóʼ Pəghoonə́ a Jɛnɛsɛlɛlə

³⁴ Ndzaŋə ándó pó nə ńtú nə́ nkǐ lə́, ńkoʼə̂ a Jɛnɛsɛlɛlə.

³⁵ Ndzaŋə ándó ngaŋə́láʼ yi wɨ́ nə ńdeŋ nə́ Yeso lə́, ńtíʼ ńtú nkɨ nə́ əláʼ ətsəm ə́ páatə nə́ ághóobə́. Pɨ pə́ yǐ nə́ pəghɔ póobə́ a mbô yí

³⁶ ńtíʼə ḿbóʼmbô nə́ yí ńgə́ a tíʼ pəghɔ pi wɨ́ pə́ kwum tsɔʼə nəlwî nə́ atsəʼə́ ajíə. Ŋwu ntsəm páʼ a nə ńkwum nə́ zə́ələ́, a nə ńgyáŋə.