Matyo 12 - Əka yi Fîə

Apítə ńté Alěláʼə́sê

¹ Nə́ akəmə ndɛd jɨ́d zə̂, Yeso a tə́ ńdaŋə̂ á mə́m əfɔ ngəsáŋə́ Alěláʼsê. Nji nə ńdzáŋ ngaŋə́zoŋə́ndzəm əjí pó chúʼə á mə́ lagtə̂ nə́ məmbəm mə́ ngəsáŋ ńkɔ́lə ághóobə́.

² Pəfalasi pə́ nə ńdzə́ənə anu jɨ ńtíʼ ə́sóŋə á mbô yí ńgə́, “Náŋə! Ngaŋə́zoŋə́ndzəm əzô ə́ tə́ faʼə̂ anu páʼ noŋkə á kě nə́ pí pô alěláʼsê.”

³ Yeso a kwěe ághɔ́b ńgə́, “Nə́ kě kə̈ fóŋə anu páʼ nji ə́ nə ńtə́ nə́ ńdzáŋə Debid pópə pɨ pó po nə ńchî nə́ a ghɛd?

⁴ A nə ńkwúnə á ndɛ̂sê ńtwáamə apéenə məkálə́ páʼ pə́ nə ńtə́g nə́ ə́wɨ́ á mbô Əsê pópə pɨ pó po nə ńchî nə́ jî páʼ noŋkə á nə ńkě nə́ ə́lɨ́d nɨd pô, noŋkə á nə ńnɨd ńgə́ mbɔʼ lə́ kɔ́d tsɔʼə ngaŋə́pêsê.

⁵ Kɨ nə kě kə̈ fóŋə á mə́m pənoŋkə pə́ Mosisə ńgə́ á pə́ alěláʼsê lə́ ngaŋə́pêsê pó chî nə́ á mə́m tə́kɔʼndɛ̂sê pó wǔ pənoŋkə pə́ alěláʼə́sê ḿbə́ ńdɔg ńgə́ pó kě anu wǔəə?

⁶ Mäŋ fiʼtə̂ áwɨ́ ńgə́ ŋwunə a chîə aliʼə́ nə́ páʼə a tsɛ nə́ tə́kɔʼndɛ̂sê.”

⁷ Aŋwaʼlə Əsê á sóŋ ńgə́, “Maŋ kɔŋə̂ akóolə́mə́lə́ŋ ńtsɛɛlə̂ afyaʼə́nuə. Mbɔʼ nə́ pěʼ ńjîə anu páʼə atsáb zəənə́ á sóŋ nə́, tə ḿbə́ mbɔʼ nə́ pěʼ ńkě anuə atû mbóʼngaŋ néŋ pô.

⁸ Ńté ńgə́ Mɔ́ Ŋwu lə́ mmaʼmbî pə alěláʼə́sê.”

Ndzaŋ Yeso kə Tsóʼ nə́ Ŋwu páʼ Táʼə Apô yə kə Kwû nə́

⁹ Yeso a fɛ́lə aliʼ wɨ́d wə̂ ńgɛnə̂ á ndɛ̂sê Pəjusə,

¹⁰ ŋwu tsə̌ páʼ táʼə apô yə á nə ńkwû nə́ a nə ńchî ə́wə́. Ndzaŋə ándó pó nə ńtə́ nə́ ńnáŋ ndúmə á mə́ wam nə́ Yeso lə́ ńtíʼ ḿbítə yí ńgə́, “Noŋkə á pí ńgə́ mbɔʼ pə́ tsóʼə ŋwunə alěláʼsê?”

¹¹ A sóŋə á mbô pó ńgə́, “Mbɔʼ ŋwu wɨ yitsə̌ a túg mbéŋ ndzɛd əjǐ ə́ yǒ ńgwǔəə á mə́mə apɛ́lə alěláʼə́sê, a kě zə́ələ́ á mə́mə apɛ́d yə wɨ́ fóg?

¹² Ńgɛd ə́lɛ́ nə́ ŋwu páʼ a lánə nə́ ńchígə́ səglə̂ ńtsɛ mbéŋ ndzɛlə? Lə́ələ́ pə́ ńgə́ noŋkə əwɛ́nə á nɨd ńgə́ á koʼnə̂ á mə́ ghɛd nə́ əshîʼnə Alěláʼsê.”

¹³ A tíʼ ə́sóŋə á mbô ŋwu wə̂ ńgə́, “Shǐəə apô azô.” A shǐəə á zə́ələ́, á féŋtə ńtíʼ ńchîə ándó yətsə́ apô.

¹⁴ Lə́ Pəfalasi pó fɛ́lə á apeŋ ńtíʼə ńtyáŋə mənaŋ ndzaŋ mbɔʼ pó jwítə yə́.

Ngaŋəfaʼ páʼ Əsê a Tsɔ́ʼ nə́

¹⁵ Ndzaŋ Yeso a nə ńdzóʼ nə́ anu zɨ́d zɨ lə́, ńtíʼ ńdǒ yə́ aliʼ yi wə́. Mboŋ pɨ zoŋə̂ yə́, a tíʼ ńtsóʼ məghɔ mɔ́b tsɔʼə mətsəmə.

¹⁶ Ńkwantə̂ ághɔ́b ńgə́ kɔ pó fiʼtə̂ ŋwu páʼ yə́ a pə́ nə́ wə́ələ́.

¹⁷ Zəənə́ á nə ńdwɛ́nkə lə́ anu páʼ Əsê a nə́ ńtsáb nə́ ńdaŋə̂ á mbô ntûsê Izaya ńgə́,

¹⁸ “Lɛ̌ ngaŋə afaʼə mə páʼ maŋ tsɔ́ʼ nə́, yi páʼ maŋ kɔŋ nə́, ntə́əmə mə kə́ ńkɔŋtə̂ ńté yə́; Maŋ yǒ néŋə ajwiə mə á mbɨ yə́, A yǒ ghɛd Pətəjǐsê pó jî nchwádkə Əsê.

¹⁹ A yǒ kë fyaʼnə̂ pó ŋwu kɨ̈ ətsáb ngye əjǐ ə́ kɔ́ʼə atǐ pô; ŋwu tsə̌ ä láʼ kě ngye əjǐ alaŋə́ zóʼ pô.

²⁰ A yǒ kě akəkaʼ páʼ a zəŋnə̂ nə́ pə́ʼ pô, kɨ nkyaʼ páʼ ə́ tə́ nə́ ḿbə́gnə, a yǒ kě pə́gtə pô, tə a láʼ ńgɛd mənu mə́ koʼnə̂ nə́ mə́ kwá mbî ntsəmə.

²¹ Ŋwu ntsəmə a yǒ néŋə akwaŋə ají nə́ yí tə́ pyáabə.”

Yeso pó Əfo Pɛ̌sê

²² Pó tíʼ ńtə́ ńgyǐəə nə́ ŋwu tsə̌ páʼ pɛ̌sê pə́ nə ńchî nə́ á mbɨ yí tə a kě əliʼ pɛ́lə ńdzə́ənə pô ńkě kə́ ḿbɛ́lə ńtséebə pô, Yeso a tsóʼə yə́, a tíʼ ńtsáb ńkə́ ńjɨ́ əliʼə́.

²³ Anu jɨ́d zəənə́ á nə ńkɨʼnə̂ á ŋwu ntsəm páʼ a nə ńchî nə́ aliʼ yi wə́, pó tíʼə ḿbítə ńgə́, “Təmbɔʼ lɛ̌ pə́ mɔ́ Debid wə̂?”

²⁴ Ndzaŋ pəfalasi pə́ nə ńdzóʼ nə́ anu zɨ́d zɨ lə́, ńtíʼ ə́sóŋ ńgə́, “A lɔgə̂ lə́ mətɨ mə́ Bɛlzebɔb páʼ a pə́ nə́ əfo pɛ̌sê lə́ ńkəmə̂ pɛ̌sê ə́wə́.”

²⁵ Yeso a jîə akwaŋə azɔ́b tsɔʼə atsəm ńtíʼ ə́sóŋə á mbô pô ńgə́, “Aláʼə atsəm páʼ á ghabtə̂ nə́ mbɨ əjǐ akwɛlə akwɛlə ḿbóʼnə tətɨ pó, á kě yǐ chî nga pɛ̌ tə ghə́ á měe pô, aláʼə atsəm kɨ ndɛ̂ ntsəm páʼ ə́ ghabnə̂ nə́ mbɨ əjǐ ə́ kě yǐ kə́ tɨ́ pô.

²⁶ Mbɔʼ satanə a kəmə̂ yitsə̌ Satan, lə́ələ́ pə́ ńgə́ a ghabnə̂ mbɨ əjǐə á ngǎ yə́. Təmbɔʼ nəfɔ jí nə́ pə̂ ńtɨ́ lə́ ə́lɛ́?

²⁷ Mbɔʼ maŋ kəmə̂ pɛ̌sê lə́ nə́ mətɨ mə́ Bɛlzebɔb tə ḿbə́ əzɨ́ ngaŋə́zoŋə́ndzəm pó kəmə̂ lə́ nə́ mətɨ mə́ ə́wə́? Á pə́ ńgə́ pó yǒ tíʼ pə́ lə́ ngaŋə́sáʼə́məsáʼ əzə́ənə́.

²⁸ Lə́, mbɔʼ maŋ kəmə̂ pɛ̌sê lə́ nə́ Ajwǐəsê, tə ḿbə́ anuə nəfoonə Əsê á pɛ́dtə ńgyǐəə á mbô pəənə́.”

²⁹ “Kɨ mbɔʼ ŋwunə a kwúnə á ndɛ̂ atyǎntə ŋwu ńtwám əpú ndɛ̂ pí lə́ ə́lɛ́, tə ńdéʼtə a peg ńgwaamə̂ ŋwu yi ńtyantə̂ nə́ wə̂ ńkwúlə yí záʼ ḿbɔŋə̂ twá əpú ndɛ̂ píə.”

³⁰ Ŋwu páʼ a kě nə́ pəg yí chî pô, lə́ ngaŋ kəpeenə́ mə, ŋwu páʼ pəg yí kě nə́ ńnɔd ńkyeetə̂ pô, a shamkə̂ lə́ shamkə̂ nə́.

³¹ Lə́ maŋ sóŋə áwɨ́ ńgə́, mə zɔ nə́ Əsê pópə təpɔŋ pɨ pə́ ghɛd nə́, pə́ yǒ ləgnə̂, lə́ mə zɔ nə́ Ajwǐəsê, pə́ yǒ kě á wɨ́d wə̂ təpɔŋ ləgnə̂ pô.

³² Ŋwu ntsəm páʼ ä tsáb nə́ təpɔŋ ńté Mɔ́ Ŋwu, pə́ yǒ ləgnə̂ təpɔŋ əyǐə, lə́ ŋwu ntsəm páʼ ä tsáb nə́ təpɔŋ ńté Ajwǐəsê pə́ yǒ kě təpɔŋ əyǐ ləgnə̂ pô, nə́ ndɛd zɨ kɨ nə́ ndɛd ə́ yǒ nə́ pɔŋə̂ yǐəə.

Atǐ pópə Mənta Míə

³³ Tsoŋkə̂ atǐə á pɔŋə̂, mənta mí mə́ yǐ kə́ pɔŋə̂, kɨ gho tsoŋkə̂ atǐə á pə́gə, mənta mí mə́ yǐ kə́ pə́gə, ńté ńgə́ pə́ jîə atǐə atsəm lə́ nə́ mənta míə.

³⁴ Ngwud mənó mə́ təpɔŋ! mbɔʼ pɨ ngaŋə́ghɛlə təpɔŋ nə́ sóŋ lə́ akə̂ anu tə á pɔŋə̂? Ńté ńgə́ atséebə ntsoolə á fɛ́lə lə́ á mə́m mənu páʼ mə́ lwɛ́nkə nə́ á ntə́əmə.

³⁵ Ŋwu yi əshîʼnə ä yǐəə nə́ mənu mimə əshîʼnə páʼ á pěʼ nə́ ńdɔʼkə̂ á mə́m ntɨ́ əyí yi əshîʼnə, ŋwu təpɔŋ á kə̈ ńgyǐəə nə́ mənu mimə́ təpɔŋ páʼ a pěʼ nə́ ńdɔʼkə̂ á mə́m ntɨ́ əyí yi təpɔŋ.

³⁶ Lə́ maŋ pə̂ ə́fiʼtə̂ áwɨ́ ńgə́, á yǒ pə́ alě asáʼə́məsáʼ lə́, ŋwu ntsəmə a sóŋə anu páʼ á nə ńgɛd nə́ yə́ a tsáb ətsáb kətaŋ ətsəm páʼ a nə ḿbɛ́d nə́ tə ńtséebə.

³⁷ Lə́ələ́ á pə́ ńgə́, pə́ yǒ lɔg ətsáb əpô ə́sáʼ əsáʼ əghô wə́, á mə́ jɨ́ nə́ ńgə́ kɨ gho lɛ ńdaŋ əsáʼ kɨ ńgwǔəə.

Akyeʼə́nuə Jona

³⁸ Pəfalasi pətsə́ pópə ngaŋə́zéʼkə pənoŋkə ə́sóŋ nə́ yí ńgə́, “Ndzéʼkə, pəg loonə̂ á mə́ jɨ́ nə́ akyeʼə́nuə á mbô gho.”

³⁹ Yeso a kwěe ńgə́, “Pɨ pə́ ngoʼ pɨ páʼ pó myaʼ nə́ Əsê ńkə́ ńgɛlə̂ təpɔŋ pó pítə akyeʼə́nuə á mbô maŋ!” Lə́ pə́ kě yətsə̌ yǐ fɛ̂ pô tə ńdéʼtə akyeʼə́nuə ntûsê Jona.

⁴⁰ Tsɔʼə ándó Jona a nə ńchî nə́ á nəpəm mɛ́ əshû əlěmbî teelə́ nə́ mətúʼ mɛ́n teelə́ lə́, lə́ ndzaŋə ándó Mɔ́ Ŋwunə a yǒ nə́ kə́ chî əlě mbî teelə́ nə́ mətúʼ mɛ́n teelə́ á ntɛ́n əsê.

⁴¹ Pɨ pə́ Ninibe pó yǒ lǒo á əsê alěsáʼə́məsáʼə ghɛd pɨ pə́ ngoʼ pɨ pó wǔ əsáʼə, ńté ńgə́ pó nə ńkwúblə məntɨ́ mɔ́b ə́fɛ́lə á mə́m təpɔŋ əghɔb ńdzoŋə̂ anǔəsê páʼ Jona a nə̈ ə́sóŋ nə́, əghâ nə́ ŋwunə a chîə aliʼə́ nə́ páʼ a tsɛ nə́ Jona.

⁴² Mɛ̂fo Shɛba a lǒo júmnə alěsáʼə́məsáʼ ə́ ghɛd pɨ pə́ ngoʼ pɨ pó wǔ əsáʼ, ńté ńgə́ a nə ə́fɛ́lə á ndwegtə mbî ńgyǐəə á mə́ jwə́ʼtə nə́ ajíənuə Solomunə, nə́ əghâ nə́, ŋwunə a tsɛ nə́ Solomunə a chîə aliʼə́ nə́.

⁴³ “Təmbɔʼ ajwiə təpɔŋə a fɛ́lə á mbɨ ŋwu, á ghɛnə̂ á mə́m kɔŋ yi njǔbtə̈ ńnáŋə aliʼə́ á mə́ chî nə́ ə́wə́, ḿbə́ ńchîə zɨ́d zɨ́ pô,”

⁴⁴ á tíʼ ə́sóŋ nə́ mbɨ əjǐ ńgə́, “Maŋ yǐ pɨ pəənə̂ á ndɛ̂ maŋ nə fɛ́d nə́ ə́wə́.” Mbɔʼ a yǐ ńtég ndɛ̂ yi wɨ́ ŋwunə a chî wɨ́ chî, pə́ zəgə̂ ájɨ́d ə́ ŋwaʼə̂, ńkə́ ńtyáŋtə əliʼ əshîʼnə.

⁴⁵ A tíʼ ḿbɨ ńgɛn ńdɔg pətsə́ əjwi təpɔŋ pɛ́n asaambɛ̂ páʼ pó túg nə́ təpɔŋ ńtsɛɛlə̂ yí, pó po yǐ ńkwúnə á ndɛ̂ yi wɨ́ ńtíʼ ńchî ə́wə́. Nchîmbî ŋwu wə̂ ə́ yǐ ńtə́ ńdwegtə̂ ḿbə́g tə ńtsɛ ndzaŋ ə́ nə ḿbeg nə́ ńchîə. Lə́ ndzaŋ á yǒ nə́ chîə á mbô pɨ pə́ təpɔŋ pə́ ngoʼ pəənə́.

Mǎpə Yeso pópə Pəlim Píə

⁴⁶ Ndzaŋə ándó Yeso a nə ńtə́ nə ḿbɛ́lə ńtséebə nə́ ŋwuməsɔŋ lə́, Mǎ əyǐ pópə pɔ́pə́mɛ́ pí pi pə́ mbyâŋnə pə́ tə́əmə apeŋ ńtə́ ńdoonə̂ á mə́ tsáb nə́ nə́ yə́.

⁴⁷ Ŋwu tsə̌ a sóŋ nə́ yí ńgə́, “Mǎ əgho pópə pɔ́pə́mɛ́ po pi pə́ mbyâŋnə pó tə́əmə apeŋ ńtə́ ńdoonə̂ á mə́ tsáb nə́ á mbô gho.”

⁴⁸ Yeso á kwěe yí ńgə́, “Mǎ mə lə́ əwə, pɔ́pə́mɛ́ mə pi pə́ mbyâŋnə pə́ kə́ ḿbə́ mbə̂kə̂?”

⁴⁹ Yeso a tíʼ ə́shiʼ ngaŋə́zoŋə́ndzəm əjí ə́sóŋ ńgə́, “Lɛ̌ Mǎ mə pópə pɔ́pə́mɛ́ mə pi pə́ mbyâŋnə.

⁵⁰ Ńté ńgə́ ŋwu ntsəm páʼ a faʼ nə́ anu Tǎ mə a nəpóolə a lɔ nə́, lə́ ndimə́ mə yi mbyâŋnə, ńkə́ ḿbə́ yi məngyě, ńkə́ ḿbə́ mǎ mə.”