Magə 8 - Əka yi Fîə

Yeso a Zə́g Pɨ Tɔsə Nəkwa

¹ Nə́ əlěmbî pipə wɨ́, mboŋ pɨ pətsə́ pó yǐ ńtsɛntə̂. Ndzaŋə ándó pó nə́ ńkě nə́ ajú túgə á mə́ jî nə́ lə́, Yeso a fóŋ ngaŋə́zoŋə́ndzəm əjí ə́sóŋ nə́ pó ńgə́,

² “Maŋ túgə akóolə́mə́lə́ŋ ńté pɨ pəənə́, ńté ńgə́ pó pɛ́d tə ńchî pə̌gpo lɛ̌ əlěmbî pɛ́n teelə́, ḿbə́ ńkě ajú túg mbɔʼ pó jî pô.

³ Təmbɔʼ maŋ ghɛd pó kwə̂ məngyaʼə́ pó, tə ghə́ maŋ zə́gə ághɔ́b, tə ḿbə́ pó yǐ wǔ njiə alaŋə́ ndúmə, ńté ńgə́ pɨ pətsə́ pó fɛ́d məndi mɔ́b mə́ sakə̂.”

⁴ Ngaŋə́zoŋə́ndzəm əjí pó pítə yí ńgə́, “Mbɔʼ ŋwunə a lánə ńdɔg məjî lə́ ə́fó aliʼə́ tə́ ŋwu ghɛn mə́ koʼə̂ á mə́ zə́g nə́ ndɛn pɨ ghɛn ə́wə́?”

⁵ Yeso a pítə ághɔ́b ńgə́ “Pɨ túgə apá lə́ ntáʼ ə́shíʼə́?” Pó kwěe ńgə́, “ntáʼə asaambɛ̂.”

⁶ A tíʼ ńgɛd mboŋ pɨ zə̂ ə́ náanə á ndəsê. A kwáalə apá zə̂ ntáʼə asaambɛ̂ ə́fɛ̂ ndǎ á mbô Əsê, ḿbagtə̂ ázɨ́d ə́fɛ̂ á mbô ngaŋə́zoŋə́ndzəm əjí ńgə́ pó ghabtə̂ á mbô pɨ pə̂; pó kə́ ńgɛd ə́lə́ələ́.

⁷ Pó nə ńkə́ ńtúg pɔ́ pə́ ntáʼ pə́ kə́yé əshûə. Yeso a kə́ fɛ̂ ndǎ nə́ zə́ələ́, ńtíʼ fɛ̂ á mbô ngaŋə́zoŋə́ndzəm əjí ńgə́ pó ghabtə̂ zə́ələ́ á mbô pó.

⁸ Ŋwu ntsəmə a nə ńjî tə ńdzɛ́lə. Ngaŋə́zoŋə́ndzəm əjí tíʼ ńdagtə̂ əpuʼ ə́ nə ḿbɛ́d nə́ ə́ lwɛ́nkə mənka mɛ́n asaambɛ̂.

⁹ Mbyâŋnə ə́ nə ńchî nə́ aliʼ yi wɨ́ ə́ nə ḿbə́ ándó tɔsə zɛ́n nəkwa. A tíʼ ńgɛd ńgə́ pó kwə́əkə,

¹⁰ ńkwúnə á mə́mə aŋkənúʼə́ pópə ngaŋə́zoŋə́ndzəm əjí ə́ tíʼ ńgɛnə̂ á əlá aláʼə Dalmanuta.

Pəfalasi pó Pítə Akyeʼə́nuə

¹¹ Pəfalasi pətsə́, pó yǐəə á mbô Yeso ńchúʼə á mə́ zɔŋnə̂ nə́ atséebə. Pó nə̈ ńdoonə̂ lə́ á mə́ kwaʼlə̂ nə́ yə́, ńtíʼ ḿbítə yi nə́ akyeʼə́nu páʼə á lǒo nə́ á nəpóolə.

¹² Yeso a pyádnə ńtsámnə ńtíʼ ə́sóŋ ńgə́, “Lə́ ghɛlə̂ akə̂ pɨ pə́ ngoʼ pɨ pə́ pítə akyeʼə́nuə? Maŋ sóŋə áwɨ́ nə́ ndə̌ŋdəŋ ńgə́, pə́ kě akyeʼə́nu yətsə́ á mbô pó yǐ fɛ̂ pô!”

¹³ A tíʼ ḿmɛdtə̂ ághɔ́b mbɨ ńkwúnə aŋkənúʼə́ ńtú ńgɛnə̂ ndzɛnə́.

Mbê Apéenə Məkálə́ Pəfalasi pópə Ɛlɔdə

¹⁴ Ngaŋə́zoŋə́ndzəm Yeso nə ńdəgnə̂ á mə́ nyi nə́ nə́ apéenə məkálə́. Tə ńdéʼtə táʼ pó nə́ ńtúg nə́ á mə́mə aŋkənúʼə́.

¹⁵ Yeso a kwantə̂ ághɔ́b ńgə́, “Pó lɔg ndɛlə,” ńté mbê apá Pəfalasi pópə yǐ Ɛlɔdə.

¹⁶ Pó chúʼə á mə́ tsáb nə́ á mə́m pó ə́sóŋə ńgə́: “A sóŋ lɛ̌ ńté ńgə́ pɛn kě apá túg pô.”

¹⁷ Yeso a pə́ ńjîə anu pö sóŋ nə́ ńtíʼ ḿbítə ághɔ́b ńgə́, “Lə́ ghɛlə̂ akə̂ nə́ tséebə ńté pə́ anu nə́ kě nə́ apá túg pô? Nə́ kě kə́ zə́ənə kɨ atûə azə́ənə́ á kě kə́ léenə? Məntɨ́ mɨ́ mə́ chígə́ ńtyantə̂ á pə́ ə́lɛ́?

¹⁸ Nə́ túg əmə́g, ḿbə́ ńkě chî mbɔʼ nə́ jɨ́, ńkə́ ńtúg mətôglə ḿbə́ ńkě kə́ ńchî mbɔʼ nə́ zóʼ? Nə́ kě tə́ ńkwúmtə

¹⁹ ndzaŋ maŋ nə ḿbagtə̂ nə́ apá zə̂ ntáʼ tâ á mbô pɨ pə̂ tɔsə tâ? Pɨ nə ńdagtə̂ əpuʼ lə́ mənka mɛ́n ə́shíʼə́?” Pó kwěe ńgə́, “Ntsɔb pɛ̌.”

²⁰ “Ńkə́ ḿbə́ nə́ ndzaŋ maŋ nə ḿbagtə̂ nə́ apá ntáʼə asaambɛ̂ á mbô pɨ pə̂ tɔsə nəkwa,” Pɨ nə́ ńdagtə̂ əpuʼ lə́ mənka mɛ́n ə́shíʼə́? Pó kwěe ńgə́ “Mɛ́n asaambɛ̂.”

²¹ A pítə ághɔ́b ńgə́, “Atûə azə́ənə́ á kě kə́ ḿbɛ́d ńdá?”

Yeso a Tsóʼə Əfəg Yitsə̌ á Bɛdsada

²² Pó yǐ ńkwúnə Bɛdsada, pɨ pətsə́ pó yǐ nə́ əfəg yitsə̌ ńtíʼə ḿbóʼmbô nə́ Yeso ńgə́ a kwumə̂ yə́.

²³ A waamə̂ apô əfəg wə̂ ńdɔgə̂ yí ə́fɛ́d nə́ yə́ á mə́mə aláʼə. Əghâ ándó Yeso a nə ńtwǐ nə́ mətwê á əmə́g ŋwu wə̂ ńtíʼ noŋkə̂ mbô míə á ndu yí lə́ ḿbítə yí ńgə́, “Təmbɔʼ gho zə́ənə ajûtsə́?”

²⁴ Ŋwu wə̂ a tíʼ ńnáŋə atǐ ə́sóŋ ńgə́ “Maŋ jɨ́ pɨ pó chîə pə́ ándó mətǐ mə́ tə́ nə́ ńkéelə ńnyinə̂.”

²⁵ Yeso a kə́ ḿbɨ ńnoŋkə̂ mbô míə á əmə́g ŋwu wə̂. A tíʼ ə́fóokə əmə́g mí ńnáŋ əliʼ, əmə́g mí mə́ ŋwaʼə̂, a tíʼ ńdzə́ənə ajúmə atsəm əshîʼnə.

²⁶ Yeso a ghɛlə̂ a kwə̂ ngyaʼə́ yí ḿbə́ ńkwantə̂ yi ńgə́, “Kɔ gho pɨ ńkwúnə á mə́mə aláʼə.”

Pita a Fiʼtə̂ Ŋwu Páʼ Yeso a pə́ nə́ Wə́ələ́

²⁷ Yeso pópə ngaŋə́zoŋə́ndzəm əjí pó tə́m ńgɛn nə́ əláʼ ə́ chî nə́ Seselya á mboʼ Filipi. Ndzaŋə ándó pó po nə́ ńtə́ nə́ ńgɛnə̂ lə́, Yeso a pítə ághɔ́b ńgə́, “Pɨ pə̈ sóŋə ńgə́ maŋ lə́ ə́wə́?”

²⁸ Pó kwěe ńgə́, “Pɨ pətsə́ pə̈ sóŋə ńgə́ gho lə́ Jɔn Əfɛ̂nkǐə, pətsə́ pə́ ghə́ gho lə́ Elayija, pətsə́ pə́ pɨ ńgə́ gho lə́ táʼ ntûsê yitsə̌.”

²⁹ Yeso a pítə ághɔ́b ńgə́, “Ńgɛd ə́lɛ́ nə́ pəənə́? Nə̈ sóŋə azɨ́ ńgə́ maŋ lə́ əwə?” Pita a kwěe ńgə́ “Gho lə́ Nchwádkə.”

³⁰ Yeso a kwantə̂ ághɔ́b ńgə́, “Kɔ nə́ fiʼtə̂ ŋwu tsə̌ nə́ ŋwu maŋ pə́ nə́ wə́ələ́.”

Yeso a Sóŋə Anu Ńté Ngə́ʼ Əjǐ pó Nəwû Əyǐə

³¹ Yeso a chúʼə á mə́ zéʼkə nə́ ngaŋə́zoŋə́ndzəm əjí ńgə́: “Mɔ́ Ŋwunə a chîə á mə́ zɨ́ nə́ ngə́ʼ yi nɨ́ nə́, mətû mə́ aláʼ pópə pətə́kɔʼ pə́ ngaŋə́pêsê ḿbɨ ḿbə́ nə́ ngaŋə́zéʼkə pənoŋkə pə kǐəə yə. Pə́ yǒ jwítə yə́, lə́ əlě teelə́ ə́ laŋ a júmnə nəwûə.”

³² A nə ḿbyádnə ə́sóŋə anu yə́ ə́wə́ á ŋwaʼə̂ á mbô pó. Pita a pə́ ńdɔgə̂ yi ńgɛnə̂ á ntsəmə́ ńchúʼə á mə́ sáʼ nə́ yə́.

³³ Lə́ Yeso a sɛdnə̂ ńnáŋ ngaŋə́zoŋə́ndzəm əjí ńtíʼ əsáʼə Pita ə́sóŋ ńgə́, “Lǒo gho á ndzəm maŋə, Satan,” Akwaŋə azô lə́ akwaŋə pəənə, lə́ kě akwaŋə Əsê pô.

³⁴ Yeso a tíʼ ə́fóŋə apoŋə pɨ zə̂ pópə ngaŋə́zoŋə́ndzəm əjí ə́sóŋə á mbô pó ńgə́, “Mbɔʼ ŋwu tsə́ a tə́ ńdoonə̂ á mə́ zoŋ nə́ mə, a shib ńkǐ mbɨ əjǐ ńtwáamə atǐəpagləpaglə ají ńdzoŋə̂ mə.

³⁵ Ńté ńgə́ ŋwu ntsəm páʼə ä lɔ nə́ á mə́ chwádkə nə́ nchîmbî əjǐ, a yǐ péŋkə zə́ələ́; lə́ ŋwu ntsəm páʼə a péŋkə nə́ nchîmbî əjǐ ńté mə pópə Anǔəsê a yǐ chwádkə zə́ələ́.

³⁶ Ape páʼ ŋwunə a yǐ nə́ jî á yǐ pə́ lə́ akə̂ páʼ təmbɔʼ a kamtə̂ mbî jɨ ntsəm ḿbə́ ḿbéŋkə nchîmbî əjǐə?

³⁷ Kɨ mbɔʼ ŋwunə a fɛ̂ lə́ akə̂ ńdɔg ńkwúblə nchîmbî əjǐ ə́wə́?

³⁸ Mbɔʼ ŋwunə a kó əshɨ́ ńté mə pópə ndzeʼkə́ mə á mə́m ngoʼ mbî pɨ pə́ tə́ jî Əsê jɨ, pó ngoʼ ngaŋə́ghɛlə təpɔŋ jɨ, tə ḿbə́ Mɔ́ Ŋwunə a yǒ kə́ kó əshɨ́ té yə́ á əghâ ándó Mɔ́ Ŋwunə a yǒ nə́ tə́ yǐəə pópə məntúmə́sê mimə ŋwaʼ nə́ á mə́m nəgháʼ Tǎ əyǐə.”