Magə 6 - Əka yi Fîə

Pə́ Kǐəə Yeso a Nazalɛlə

¹ Yeso a fɛ́lə aliʼ yí wɨ́ ḿbɨ ḿbəənə̂ aláʼ pó, ngaŋə́zoŋə́ndzəm əjí ə́ zoŋə̂ yə́.

² Alěláʼə́sê á yǒ ńkoʼə̂ a chúʼə á mə́ zéʼkə nə́ á ndɛ̂sê Pəjusə. Ndzeʼkə́ əjǐ ə́ nə ńkɨʼnə̂ pɨ pipə nɨ́ nə́ pó tíʼ ḿbítə ńgə́, “Ŋwu nə́ a nə ńdɔg ndɛn mənu ghɛn lə́ ə́fó? Lɛ̌ zə́ənə́ ndzaŋə ayáŋ pə́ fɛ̂ nə́ nə́ yí tə a kə́ ńtûə ńgɛd əkɨʼnəmə́nuə?

³ Lɛ̌ kě nkɔ̂pú wə́ pô? Lɛ̌ kě mɔ́ Mɛɛlə páʼ pɔ́pə́mɛ́ pí pi pə́ mbyâŋnə pó pə́ nə́ Jɛmsə pó Josef nə́ Judas ḿbéenə Saamun pô? Pɔ́pə́mɛ́ pí pi pə́ pəngyě pə́ kě lə́ pɛ̌npo ə́fɛ̂ chîə?” Ńdɔg ə́lɨ́d pó kǐəə yə́.

⁴ Yeso a sóŋə á mbô pó ńgə́, “Pə̈ ghóʼkə ntûsê aliʼə́ atsəmə, lə́ ḿbə́ ńkě yə́ aláʼ pó ghóʼkə pô, pəlim pí pópə ndɛ̂ əzɔb kě yí kə́ ńgóʼkə pô.”

⁵ A nə ńkě əkɨʼnəmə́nu pətsə́ ə́wɨ́ ghɛd pô, tə ńdéʼtə ńgə́ a noŋkə̂ mbô míə atû pɔ́ pə́ ntaʼlə pəghɔ pətsə́ ńtsóʼə ághóobə́.

⁶ Á nə ńkɨʼnə̂ Yeso ndzaŋ pó nə ńkě nə́ mbimə́ túg pô. Yeso a tíʼə ńkéelə ńnyinə̂ ńdzéʼkə, ə́fɛ́lə nə́ táʼə aláʼ ńkwúnə nə́ yətsə́.

Yeso a Tú Ngaŋə́zoŋə́ndzəm əjí zə̂ Ntsɔb Pɛ̌ á Apeŋə́

⁷ Ə́fóŋ ngaŋə́zoŋə́ndzəm əjí zə̂ ntsɔb pɛ̌ ńtúmə ághóobə́ á apeŋ pə́ pɛ̌ pə́ pɛ̌ ńkə́ ə́fɛ̂ mətəənə á mbô pó á mə́ kəm nə́ əjwi təpɔŋə.

⁸ A nə sóŋə á mbô pó ńgə́, “Kɔ nə́ lɔgə̂ ajûtsə́ á mə́ ghɛn nə́ nə́ zə́ələ́ á nənyi ghɛn tə ńdéʼtə mbaŋə, kɔ nə lɔg məjîə, kəənə apeemə nənyinə, kɨ nkéebə á apa pəənə́.

⁹ Wê nə́ ngwubə, lə́ kɔ nə́ pə́ ḿmaʼə̂ atsəʼə́ á ndu yi páʼə á pɛ́d nə́ tə ńchîə á mbɨ pəənə́.”

¹⁰ A nə ńkə́ ə́sóŋə á mbô pó ńgə́, “Mbɔʼ nə́ ghɛn ńkwúnə á ndɛ̂ nə́ kwú nə́ ə́wɨ́, kə́ nə̈ ńchîə tsɔʼə á ndɛ̂ yi wɨ́ tə ńdáʼ ə́fɛ́lə á tɔ̂ŋ yi wə́.

¹¹ Lə́ mbɔʼ nə́ yǐ ńkwúnə aliʼ yətsə́ pə́ chîə áwɨ́ ə́wɨ́ əshîʼnə lɔg pô, kɨ ńchîə anu pɨ sóŋ nə́ tə́ jwə́ʼtə pô, nə́ kɔdtə̂ akəpóglə́ páʼə á chî nə́ á məko pɨ ńgɛnə̂ áwə́ənə́. Zəənə́ a yǐ chîə ándó akwantə anuə á mbô pó.”

¹² Pó fɛ́d ńgɛnə̂ á apeŋ ə́sóŋə anǔəsê ńgə́ pɨ pə́ kwúblə á mə́m pətəpɔŋ póobə́.

¹³ Pó nə ńkəm pɛ̌sê pə nɨ́ nə́, ńkə́ ńtû ńdzɔ́ʼ pəghɔ pi nɨ́ nə́ nə́ məghɔ́d pó yáŋə.

Ndzaŋ Jɔn Əfɛ̂nkǐə a nə Ńkwû nə́

¹⁴ Əfo Ɛlɔdə a zóʼ mənu mɨ tsɔʼə mətsəm ńté ńgə́ əlɛ́n Yeso ə́ nə ńnyinə̂ á mə́mə aláʼə atsəmə. Pɨ pətsə́ pə́ nə̈ sóŋə ńgə́, “Lə́ Jɔn Əfɛ̂nkǐə páʼə a pɨ nə́ ńjúmnə á nəwûə! Lə́ ghɛd ə́lɨ́d a túg mətəənə á mə́ faʼ nə́ əkɨʼnəmə́nu pəənə́.”

¹⁵ Pətsə́ pə́ sóŋ ńgə́, “Lə́ Elayija.” Lə́ pətsə́ pə́ pə́ ńkə́ ḿbɛ́d ə́sóŋ ńgə́, “Lə́ ntûsê ándó táʼ ntûsê ngoʼ pəchə́ yitsə̌.”

¹⁶ Əghâ ándó Ɛlɔdə a nə ńdzóʼ nə́ anu jɨ lə́ ńtíʼ sóŋ ńgə́, “Jɔn páʼ maŋ nə ńdə́g nə́ atûə ají lə́ a pɨ ńjúmnə nəwûə!”

¹⁷ Ńté ńgə́ Ɛlɔd nə́ nkɔ̌ʼmbɨ əyí a nə ńgɛd pə́ waamə̂ Jɔn ńkwúd ńnéŋə a nkáʼə atsáŋə. A nə ńgɛd ə́lɨ́d lə́ ńté ńgə́ a nə ńdzɔ́ʼə Ɛlɔdyasə páʼə a nə ḿbə́ nə́ ngwě mɔ́mɛ́ əyǐ Filibə.

¹⁸ Jɔnə a nə ḿbə́ ə́fiʼtə̂ Ɛlɔd ńgə́, “Noŋkə á kě pí ńgə́ təmbɔʼ a zɔ́ʼə ngwě mɔ́mɛ́ əyǐ pô!”

¹⁹ Ńdaŋ ə́lɨ́d, Ɛlɔdyasə a tíʼ ńtúgə azáŋə́ndé ńté Jɔnə. Ńtíʼə ńnáŋ ndúmə á mə́ jwítə nə́ yí, ndú ə́ pə́ ńkě ə́wɨ́ chî pô.

²⁰ Ńté ńgə́ Ɛlɔdə a nə ḿbɔ́gə Jɔn ńté ńgə́ a nə ńjî ńgə́ Jɔn lə́ ŋwu páʼə a tɨ́ nə́ ndə̌ŋdəŋ ńkə́ ŋwaʼə̂. Ńtíʼə ńkɨ́ʼə yí ńgə́ kɔ anu yətsə́ á ghɛlə̂ yə́. Əghâ ətsəm páʼ Ɛlɔdə a nə ńdzóʼ nə́ atséebə Jɔn lə́ á pyádnə ńjwaʼə̂ yə́, lə́ a pə́ ḿbɛ́d ńkɔŋə̂ á mə́ jwə́ʼtə nə́ á mbô yə́.

²¹ Á ndwigtə, Ɛlɔdyasə a jɨ́ ndúmə anuə a nə ḿběʼ nə́ ńdoonə̂ á mə́ ghɛd nə́ lə́. Lə́ nə́ ḿbə́ alě pə́ nə ḿbî nə́ Ɛlɔd, páʼə a nə ńgɛd nə́ akɔŋtə á mbô pəkəm pə́ aláʼ tsɔʼə pətsəm, ḿbɨ́ ḿbə́ nə́ mətû mə́ ngaŋə́maʼə́ntso mətsəm pópə mətû mə́ aláʼ mətsəmə á Galiliə.

²² Mɔ́ Ɛlɔdyasə yi məngyě a yǐ ḿbɛ́nə apɛ́n, anu yəwə́ á kwéʼnə ḿbɔŋə̂ Ɛlɔd pópə pɨ páʼə a nə ńgwú nə́ ághóobə́. Əfo wə̂ a sóŋə á mbô mɔ̂ məngyě wə̂ ńgə́, “Pítə mə nə́ ajúmə atsəm páʼ gho kɔŋ nə́, maŋ yǐ fɛ̂ á mbô gho.”

²³ A tíʼ ńdaʼnə̂ yí tə ńgɛlə̂ atyǎntə ndaʼnə ńgə́, “Ɛlɔdə a yǐ fɛ̂ ajúmə atsəmə á mbô yí páʼə a pítə nə́, kəənə á pə́ pə́ táʼ əlá aláʼ əyí yətsə́!”

²⁴ A tíʼ ə́fɛ́d ńgɛn ḿbítə mǎ əyǐ ńgə́, “Maŋ pítə akə̂?” A kwěe ńgə́, “Pítə atûə Jɔn Əfɛ̂nkǐə.”

²⁵ Mɔ̂ məngyě wə̂ a tɔ́g ńgə́glə ńgɛnə̂ á mbô Əfo ə́sóŋ ńgə́, “Maŋ loonə̂ ńgə́ gho fɛ̂ atûə Jɔn Əfɛ̂nkǐə á mbô maŋ əghâ nə́ á mə́mə apagə akáŋə!”

²⁶ Ndzaŋ páʼə a nə ḿbítə nə́ atûə Jɔn Əfɛ̂nkǐ lə́, əfo yi wə́ a fɨnə̂ lɛ tətətə. Lə́, ńté atyǎntə ndaʼnə páʼə a nə ḿbɛ́d nə́ tə ńgɛd pó mɔ̂ məngyě wə̂ a mbi pɨ páʼə a nə ńgwú nə́ lə́, a tíʼ ńdoonə̂ á mə́ ghɛd nə́ tsɔʼə ndzaŋ páʼə a nə ńdaʼnə̂ nə́.

²⁷ A tíʼ ńtɔ́g ńtúmə táʼ ngaŋəmaʼə́ntso yitsə̌ páʼə a nə̈ ḿbyáb nə́ yí lə́ ńgə́ a ghɛn ńgyǐ nə́ atûə Jɔnə. Ngaŋəmaʼə́ntso wə̂ a mɛdtə̂ ághɔ́b ńgɛnə̂ á nkáʼə atsáŋ, ńdə́gə atûə Jɔnə;

²⁸ ńtíʼ ńgyǐ nə́ zə́ələ́ á mə́mə apagə akáŋ ə́fɛ̂ á mbô mɔ̂ məngyě wə̂, a tíʼ ə́fɛ̂ á mbô mǎ əyǐə.

²⁹ Əghâ ándó ngaŋə́zoŋə́ndzəm Jɔn ə́ nə ńdzóʼ nə́ anu yə́ wɨ́ lə́, ńtíʼ ńgyǐ ńdɔgə̂ akwûə ají ńgɛn ńtwə́ŋə.

Yeso a Zə́g Pɨ Tɔsə Tênə

³⁰ Məntú mə́ Yeso mə́ páʼə a nə ńtú nə́ ághɔ́b lə́, pó nə́ ḿbɨ ə́fiʼtə̂ yí nə́ anuə atsəm pó faʼ nə́ ńkə́ ńdzéʼkə.

³¹ Pɨ pə́ nə̈ ńgyǐ nə́ ńkə́ ńgɛnə̂ pó nə́ nɨ́ tə́shú tə Yeso pópə ngaŋə́zoŋə́ndzəm əjí kě túg ndɛd təmbɔʼ pó jîə ajú pô. A tíʼ ə́sóŋə á mbô pó ńgə́, “Yǐ nə́ pɛn ghɛnə̂ aliʼ yitsə̌ tsɔʼə pɛn pɛn ńjî ńgə́ mbɔʼ nə́ nyáʼ ńjwitə̂.”

³² Pó tíʼ ńkwúnə á mə́m aŋkənúʼə́ ńgɛnə̂ ngǎ pó aliʼ páʼ ŋwunə a kě nə́ ə́wɨ́ chî pô.

³³ Pɨ pi nɨ́ nə́ pó pə̂ ńdzə́ənə ághɔ́b əghâ ándó pó nə ńtə́ nə́ ńgɛnə̂ lə́, ńdeŋə̂ ághɔ́b ńkə́ ńtɔ́g ńjî pɨ páʼ pó pə́ nə́ pɨ́d, ńtíʼ ə́fɛ́d ḿmɛdtə̂ əláʼ əpɔ́b, ńkwá mbi ḿbegə̂ á aliʼ yi wɨ́ záʼ Yeso pópə ngaŋə́zoŋə́ndzəm əjí ə́ pɔŋə̂ tə́ yǐəə.

³⁴ Əghâ ándó Yeso a nə fɛ́d nə́ á mə́mə aŋkənúʼə́ lə́, ńjɨ́ mboŋ pɨ, ńtíʼ ńtúgə akóolə́mə́lə́ŋə á mbô pó ńté ńgə́ pó nə́ ńchî lə́ ándó məmbéŋ mə́ ndzɛd mə́ tə ntseŋnə. Ńtíʼ ńchwáakə á mə́ zéʼkə nə́ ághɔ́b nə́ mənu mimə nɨ́ nə́.

³⁵ Ndzaŋ túʼə á nə ńtə́ nə́ ə́sɛ́nə lə́, ngaŋə́zoŋə́ndzəm əjí ə́ yǐəə á mbô yí ə́sóŋ ńgə́, “Ndɛd ə́ pɛ́d tə ńgɛn tə́shúnə́, lɛ̌ kə́ ḿbə́ aliʼə́ tə́ ŋwunə.

³⁶ Ghɛd ŋwu ntsəmə a ghɛnə̂ á mə́m əfɔ pópə əláʼ ə́ páatə nə́ ńjî ńgə́ pó jú məjî ə́wɨ́ ńjîə.”

³⁷ Yeso a kwěe ńgə́, “Fɛ̂ nə́ ajú pó jîə.” Pó pítə yí ńgə́, “Gho loonə̂ lə́ ńgə́ pəg ghɛn ńjúnə apéenə məkálə́ páʼə á koʼ nə́ nkáb əpa pɛ̌ ə́fɛ̂ á mbô pó?”

³⁸ Yeso a tíʼ ḿbítə ághɔ́b ńgə́, “Nə́ túgə apá lə́ ntáʼ zɛ́n ə́shíʼə́? Ghɛn nə́ ńnáŋə.” Ndzaŋə ándó pó nə ńgɛn nə́ ńnáŋ lə́, ńtíʼ fiʼtə̂ yí ńgə́, “Lə́ apá ntáʼ tâ nə́ əshû ntáʼ pɛ̌.”

³⁹ Yeso a tíʼ ə́sóŋə á mbô ngaŋə́zoŋə́ndzəm əjí ńgə́ pó ghabtə̂ ŋwu ntsəm nə́ əkwɛlə́ pó náanə á ndəsê á ndu ngɔ́n yi féŋtə nə́.

⁴⁰ Pó tíʼ ńnáanə á ndəsê á əkwɛlə́, əkwɛlə́, pətsə́ táʼ nkɛd, pətsə́ məghə́m mɛ́n tênə.

⁴¹ Yeso a lɔgə̂ apá zə̂ ntáʼ tâ nə́ əshû zə̂ ntáʼ pɛ̌ ńtíʼ ńnáŋ nəpó fɛ̂ ndǎ á mbô Əsê, ḿbagtə̂ apá zə̂ ə́fɛ̂ á mbô ngaŋə́zoŋə́ndzəm əjí, pó tíʼ ńgabtə̂ á mbô ŋwu ntsəmə. A kə́ mbɨ ńgabtə̂ əshû zə̂ ntáʼ pɛ̌ á mbô ŋwu ntsəmə.

⁴² Ŋwu ntsəmə a nə ńjî tə ńdzɛ́lə.

⁴³ Ngaŋə́zoŋə́ndzəm əjí ə́ tíʼ ńdagtə̂ əpuʼ əpá pópə əpuʼ əshû ə́ nə ḿbɛ́d nə́, ə́ pə́ mənka ntsɔb pɛ̌.

⁴⁴ Ndɛn mbyâŋnə páʼ ə́ nə ńkɔ́d nə́ apá yə wɨ́ ə́ nə́ ḿbə́ tɔsə tênə.

Yeso a Nyinə̂ á Ndu Nkǐə

⁴⁵ Tsɔʼə əghâ yi wɨ́, Yeso a tíʼ ńgɛd ngaŋə́zoŋə́ndzəm əjí ə́ kwúnə á mə́mə aŋkənúʼə́ ńkwá mbi ńgɛnə̂ á Bɛdsada, a tíʼ ńtə́ ńgɛlə̂ ńgə́ pɨ pó kwə́əkə,

⁴⁶ ndzaŋə a nə ḿbookə̂ nə́ ághɔ́b lə́, ńtíʼ ńkɔ́ʼ ńgɛnə̂ á ndu nkwəənə á mə́ chaʼtə̂ nə́ Əsê.

⁴⁷ Á nə ḿbɛn ḿbə́ á ndɛd nkwanə́, aŋkənúʼə́ zə̂ á chîə á tətɨ əfooghəəmə́, lə́ Yeso a pə́ ḿbɛ́lə á asəg tsɔʼə yí təjiʼə.

⁴⁸ A jɨ́ ńgə́ ngaŋə́zoŋə́ndzəm əjí ə́ tə́ ńjɨ́ ngə́ʼə á mə́ tɛ́n nə́ aŋkənúʼə́ ńté ńgə́ kəfəələ á nə́ ńtə́ ńkɔ́ʼə á ndú páʼə aŋkənúʼə́ á nə ńchî nə́ ə́wə́. Á yǐ ḿbə́ ándó pəmə́nu pɛ́n teelə́ á ndú mbî, Yeso a nyinə̂ á ndu nkǐ ńgɛn ńtég ngaŋə́zoŋə́ndzəm əjíə. A nə ńdoonə̂ mə́ laŋ nə́ ə́ tóokə ághóobə́.

⁴⁹ Lə́ əghâ pó nə ńjɨ́ nə́ yə́ a tə́ ńnyinə̂ á ndu nkǐ lə́, pó kwaŋ ńgə́ lə́ nkwûsê, ńtíʼ ḿbóʼ məngoŋə,

⁵⁰ ńté ńgə́ pó pətsəm nə ńdzə́ənə́ yí ńtíʼ ḿbɔ́gə. Tsɔʼə əghâ yi wɨ́, Yeso a tséebə á mbô pó ə́sóŋ ńgə́, “Wam nə́ ntɨ́ wə́ənə́! lə́ maŋə, kɔ nə́ pɔ́gə!”

⁵¹ A tíʼ ńkwú ńtégə ághóobə́ á mə́mə aŋkənúʼə́, kəfɨd wə̂ á měe yə́. Anu yəwə́ á nə ńchígə́ ńkɨʼnə̂ ngaŋə́zoŋə́ndzəm əjíə.

⁵² Atûə azóobə́ a nə ńkě lánə ńdá nə́ anu ńté apá zə́ pô, ńté ńgə́ pə́ nə́ fwɔnə̂ ajíə anuə azóobə́.

Yeso a Tsóʼə Ngoonə́ á Jɛnɛsɛlɛlə

⁵³ Pó nə ńtú nkǐ tə ńkoʼə̂ á ndzɛnə́ Jɛnɛsɛlɛlə, ńtəŋnə̂ aŋkənúʼə́ azɔ́b ə́wə́.

⁵⁴ Əghâ ándó pó nə fɛ́d nə́ á mə́mə aŋkənúʼə́ lə́, pɨ pə́ tɔ́g ńdeŋə̂ Yeso.

⁵⁵ Ńtíʼ ńkə ndə̌ ńdíblə aláʼ tsɔʼə atsəm, ńtwá pəghoonə́ á ndu pə mə́ta ńgɛn nə́ pó aliʼə́ atsəm pó nə ńdzóʼ nə́ ńgə́ Yeso a chî ə́wə́.

⁵⁶ Aliʼə́ atsəm Yeso a nə ńgɛn nə́ ə́wɨ́, á mə́mə aláʼ kəənə á mə́m tɔ̂ŋ, kəənə á mə́m əfɔ, pɨ pə̈ lɔgə̂ pəghɔ ńgyǐəə nə́ pó á əliʼ məta, ńtíʼə ḿbóʼmbô nə́ yí ńgə́ a tíʼ pó kwum tsɔʼə nəlwî nə́ atsəʼə́ ajíə. Lə́ ŋwu ntsəm páʼə a nə ńkwum nə́ yə́ a nə ńgyáŋə.