Magə 4 - Əka yi Fîə

Atséebə́nə́múʼ ńté Ngaŋə́pǐə Əpú yitsə̌

¹ Yeso a kə́ ḿbɨ ńchúʼə á mə́ zéʼkə nə́ á nkaŋ əfooghɨ Galiliə. Ŋwu məsɔŋə́ a nə ńtɨ́ nə́ ńdíblə yə́ a nə ńnɨ́ tə́shú tə a tíʼ ńkwú ńnáanə pə́ á mə́mə aŋkənúʼə́ á mə́m nkǐə, ŋwu ntsəmə a tíʼ ńtə́əmə á nkǎŋkǐə.

² A zéʼkə ághɔ́b nə́ mənu mimə nɨ́ nə́ nə́ ətsábnə́múʼə́. Ńdzéʼkə ághɔ́b ə́sóŋə ńgə́:

³ “Jwə́ʼtə nə́! Ŋwu tsə̌ a nə ńdáʼ ńgɛnə̂ á mə́ pǐ nə́ əpú əpíə.

⁴ Ndzaŋə a nə ńtə́ nə́ ḿmaʼ mbǐpú lə́, yitsə̌ ə́ wukə̂ á alaŋə́ pəsə́ŋ pə́ yǐ ḿbyá ńkɔ́lə ághóobə́.

⁵ Yitsə̌ ə́ wukə̂ á ndu ngwúb aliʼ páʼ ndəsê ə́ nə ńkě nə́ ə́wɨ́ chî ńnɨ́ pô, ńdzaŋkə̂ ə́sáʼ ńté ńgə́ ndəsê ə́ nə ńkě shǐ pô.

⁶ Lə́ əghâ ándó mə́numə á nə sáʼ nə́ lə́ ńtoonə̂ zə́ələ́, ə́ júmə ájɨ́d ńté ńgə́ məŋaŋ mí mə́ nə ńkě á əsê kwú pô.

⁷ Yitsə̌ mbǐpú yi wɨ́ ə́ wukə̂ á mə́m məsɔbsoobə, məsɔbsɔb mə́ kɔ́ʼ ńkwúlə ájɨ́d ə́ kě mənta zə́m pô.

⁸ Lə́ yitsə̌ mbǐpú ə́ pə́ ńgwǔəə á ndu ndəsê yi əshîʼnə, ə́sáʼ, ńkə́ ńdzə́m mənteemə́: yitsə̌ ə́ zə́m mbəm məghə́m mɛ́n mə́ teelə́, yitsə̌ ə́ zə́m mbəm məghə́m mɛ́n ntogə́, yitsə̌ ə́ zə́m mbəm nkɛlə́.”

⁹ Yeso a tíʼ sóŋ ńgə́, “Ŋwu páʼ a túg nə́ mətôglə á mə́ zóʼ nə́ a zóʼə.”

Anuə á Ghɛd nə́ Yeso ä Tséebə nə́ Atséebə́nə́múʼə́

¹⁰ Əghâ ándó Yeso a nə ńchî nə́ á ngǎ yí, pɨ pətsə́ páʼ pə́ nə ńdzóʼ nə́ atséebə ají, pópə ngaŋə́zoŋə́ndzəm əjí ə́ yǐəə á mbô yí ḿbítə yí nə́ anu páʼ ətsábnə́múʼ pə́ ə̈ sóŋ nə́.

¹¹ Yeso a fiʼtə̂ ághɔ́b ńgə́, “Pə́ fɛ̂ ajíənu nə́ pɨ mbɔʼ nə́ jî mənu mə́ nəlyaŋnə́ mətsəm ńté Anuə Nəfoonə Əsê,” Ńgɛn nə́ pɨ pə́ ndaʼ páʼ pó chî nə́ á apeŋ, pə́ sóŋə anuə atsəm nə́ pó lə́ nə́ ətsábnə́múʼə́,

¹² ńjî ńgə́, Mbɔʼ pó náŋə ḿbə́ ńkě jɨ́ pô, ńjwə́ʼtə, atûə azóobə́ á pə́ ńkě ə́wɨ́ lá pô. Tə ḿbə́ pó yǐ kwúblə pə́ ləgnə̂ pətəpɔŋ póobə́.

Yeso a Fiʼtə̂ Nətɛ́n nə́ Atséebə́nə́múʼ yəwə́

¹³ Yeso a tíʼ ḿbítə ághɔ́b ńgə́, “Nə́ kě anu páʼ atséebə́nə́múʼ zəənə́ ä sóŋ nə́ jî? Nə́ yǒ pə́ tíʼ lǎa ə́lɛ́ pɔŋə̂ jîə atséebə́nə́múʼ yətsə́?

¹⁴ Mbipú wə̂ a pǐ lə́ atséebə Əsê.

¹⁵ Pɨ pətsə́ pə́ chî lə́ ándó mbǐpúmə á alaŋə́ páʼ pə́ pǐ nə́ atséebə Əsê ə́wə́. Ndzaŋə ándó pó kə́ nə́ ńgə́ zóʼə ájɨ́d lə́, Satanə a yǐ fógə atsáb yəwə́ á mə́m pó.

¹⁶ Pətsə́ pɨ pə́ chî lə́ ándó mbǐpú pə́ maʼ nə́ á ndu ngwúbə, pó zóʼə atsáb yə wɨ́ ńtɔ́g ńdɔgə̂ ájɨ́d nə́ akɔŋtə.

¹⁷ Lə́ ndzaŋ pó kě nə́ məŋaŋ túg pô lə́, ḿbí tsɔʼə nə́ mɔ́ akəmə ndɛlə́, á yǐ ḿbə́ əghâ páʼ ngə́ʼ ə́ yǐ nə́ á mbô pó kɨ pə́ tsaŋkə̂ ághɔ́b ńté atséebə Əsê lə́, pó zaŋkə̂ ńgwǔ ḿbɨ nə́ ndzəmə.

¹⁸ Pətsə́ pɨ pó chî lə́ ándó mbǐpú pə́ pǐ nə́ á mə́m məsɔbsoobə. Lɛ̌ lə́ pɨ pə́ zóʼ nə́ atséebə Əsê,

¹⁹ lə́ nətáŋ mbî, pópə afoʼə mbî, nə́ mə́ kɔŋ nə́ əpú mbî ə́ kwúlə ághɔ́b pó kě chî təmbɔʼ pó zə́m mənta pô.

²⁰ Lə́ pətsə́ pɨ pə́ pə́ ńchî lə́ ándó mbǐpú pə́ maʼ nə́ á ndu ndəsê yi əshîʼnə. Pó zóʼə atséebə Əsê, ḿbímə ájɨ́d ńtíʼ ńdzə́m mənteemə́. Pətsə́ pə́ zə́m məghə́m mɛ́n mə́ teelə́, pətsə́ pə́ zə́m məghə́m mɛ́n ntogə́, pətsə́ pə́ zə́m nkɛlə́.”

Lámə á Ntɛ́n Əkwunə́

²¹ Yeso a ghɛn nə́ mbiə á mə́ sóŋ nə́ ńgə́, “Ŋwu tsə̌ a chî ə́wɨ́ mbɔʼ a yǐ nə́ lám ńkə́bkə áwɨ́d nə́ atsɛ̂káŋ kɨ ńnéŋə a ntɛ́n əkwu? A kě áwɨ́d lə́ á ndu nəchwɛ́d yǐ tə́g?

²² Anuə atsəm páʼ pə́ lyáŋ nə́, pə́ yǒ kyaʼə̂. Anuə atsəm pə́ kə́ nə́ ńkə́bkə, pə́ yǒ ŋ́ŋáʼə.

²³ Mbɔʼ ŋwu ntsəmə a túg mətôglə á mə́ zóʼ nə́, a zóʼə!”

²⁴ Yeso a ghɛn nə́ mbiə á mə́ sóŋ nə́ nə́ pó ńgə́, “Lɔg nə́ ndɛd nə́ anuə atsəm páʼ nə́ zóʼ nə́ ńté ńgə́ ndzaŋ páʼ gho kə́ʼ nə́ ə́fɛ̂ nə́ pɨ lə́, lə́ ndzaŋ páʼ pə́ yǒ nə́ kə́ kə́ʼ ə́fɛ̂ nə́ gho tə pɨ pegtə̂.

²⁵ Ŋwu ntsəm páʼə a túg nə ajú, pə́ yǐ pegə̂ ajíə á nə́ənə; lə́ ŋwu ntsəm páʼə a kě nə́ ajú túg, á lǒo mɔ́ aliʼ páʼ a túg nə́, pə́ yǐ kwáalə á mbô yə́.”

Atséebə́nə́múʼ Ńté Mbǐpú ə́ tə́ nə́ Ńkɔ́ʼə

²⁶ Yeso a kə́ ə́sóŋ ńgə́, “Anuə Nəfoonə Əsê á chî lə́ ándó ŋwunə a maʼ mbǐpúmə alíʼ yə́

²⁷ Nətúʼ pópə ənumnə, kəənə a lê, kɨ ńjimnə̂, mbǐpú zə̂ ə́ sáʼ ńkə́ ńkɔ́ʼə. Lə́ a pə́ ńkě jî ndzaŋ páʼ ə́ lǎa nə́ ḿbɔŋə́ sáʼ kɨ ńkɔ́ʼ pô.

²⁸ Ndəsê yi wə̂ á ngǎ yí ə́ ghɛd mbǐpú zə̂ ə́ sáʼ, ə́fóg məfǔ, ńkɔ́ʼ ńtíʼ ńdzə́m mənteemə́; ńchúʼ nə́ məfǔ mə́ ngəsáŋ ńkoʼ nə́ akɔŋ ńtíʼ ńkoʼ nə́ atsoʼə.

²⁹ Əghâ ándó ngəsáŋə́ a kə́ nə́ ńgə́ təənə̂, a néŋ ngaŋə́faʼ á mə́m ə́wɨ́ ńté ńgə́ ndɛlə́ á pə́ʼə ngəsáŋ ə́ koʼə̂.”

Atséebə́nə́múʼ Ńté Mbaŋ Fɔ́lə́sə

³⁰ Yeso a kə́ ḿbɨ ə́sóŋ ńgə́, “Mbɔʼ pɛn sóŋ ńgə́ Anuə Nəfoonə Əsê á chî lə́ ándó akə̂?” Kɨ mbɔʼ pɛn lɔgə̂ azə́ənə́ atséebə́nə́múʼ ńdyaʼtə̂ ə́wə́?

³¹ Anuə nəfoonə Əsê á chî lə́ ándó mbaŋ fɔ́lə́sə páʼ ə́ kə́g nə́ ńtsɛ mbǐpú ətsəm páʼ pə̈ pǐ nə́ á ndəsê.

³² Ndzaŋ pə́ pǐ nə́ zɨ́d lə́, ə́ sáʼ ńtíʼ ńkɔ́ʼ ḿbə́ chigə tə́kɔʼə atǐə á mə́m mətǐ mə́ nkáʼ mətsəm nə́ pətə́kɔʼ pə́ məfag, pəsə́ŋ pə́ tíʼə ńgyǐəə ńkwúlə mənka mɔ́b ə́wə́.

³³ Yeso a sóŋə anǔəsê á mbô pó nə́ ətsábnə́múʼ pə nɨ́ nə́ ándó pəənə́. A nə sóŋə á mbô pó nə́ ndú ətsəm mbɔʼ pó zóʼə.

³⁴ A nə ńkě anu yətsə́ á mbô pó sóŋ tsɔʼə tə ghə́ ä tséebə pə́ nə́ atséebə́nə́múʼ pô, lə́ əghâ páʼə a yǐ nə́ ńtíʼ ńchî tsɔʼə pópə ngaŋə́zoŋə́ndzəm əjí lə́, a tíʼ ńtsoŋkə̂ ə́fiʼtə̂ anuə atsəmə á mbô pó.

Yeso a Pwɔ́dkə Atyǎntə Kəfəələ

³⁵ A nə mbɛn ḿbə́ ndɛd nkwanə́ alě yi wɨ́, Yeso a sóŋə á mbô ngaŋə́zoŋə́ndzəm əjí ńgə́, “Pɛn túmə əfooghɨ ńgɛnə̂ ndzɛnə́.”

³⁶ Pó mɛdtə̂ ŋwu məsɔŋ wə̂ á ndzəmə; ngaŋə́zoŋə́ndzəm əjí ə́ tíʼ ńkwúnə á mə́mə aŋkənúʼə́ páʼ Yeso a pěʼ nə́ ḿbɛ́dtə ńnáanə ə́wɨ́ ńtíʼ ńdɔgə̂ yí pó po ghɛnə̂. Pətsə́ əŋkənúʼə́ ə́ nə ńkə́ ńchî ə́wə́.

³⁷ Atyǎntə kəfəələ á chúʼə á mə́ kɔ́ʼ nə́, nkǐ ə́ tíʼə ńtóʼnə ńkɔ́ʼə ńkwúnə á mə́mə aŋkənúʼə́ tə ńtíʼə ńdwɛ́nkə zə́ələ́.

³⁸ Yeso a nə noŋnə̂ á mə́mə aŋkənúʼə́ á ndzəm ńdiʼə̂ atûə ají nə́ pilo ńtə́ ńdê yə́. Ngaŋə́zoŋə́ndzəm əjí ə́ jimkə̂ yí ə́sóŋ ńgə́, “Ndzéʼkə, gho kě kwág pô lə́ ńkě jî ńgə́ mbɔʼ pɛn kwûə á mə́m nkǐ ghɛn?”

³⁹ Yeso a lǒo á əsê ńtíʼ sáʼə kəfɨd wə̂ ə́sóŋ ńgə́, “Pɔ́ʼnə ńnaʼə̂!” ńtíʼ sóŋ nə́ nkǐ wə̂ ə́ tóʼnə nə́ lə́ ńgə́, “Pwɔ́dnə!” kəfɨd wə̂ á kě əliʼ pɛ́lə ńchiʼə̂ pô tə əliʼ ətsəm ə́ kə́ ḿbwɔ́dnə.

⁴⁰ Yeso a tíʼ sóŋə á mbô ngaŋə́zoŋə́ndzəm əjí ńgə́, “Nə́ lánə ńchígə́ ḿbɔ́gə lə́ akə̂? Nə́ kě mbimə́ kə́ túg?”

⁴¹ Pó pɔ́g lɛ tətə ńtíʼə ə́sóŋə á mə́m pó ńgə́, “Lɛ̌ əwə ŋwu tə kəfɨd pópə nkǐ yi kɔ́ʼ nə́ ə́ kə̈ ńdzóʼnə yí lɛ?”