Magə 16 - Əka yi Fîə

Ndzaŋə Ándó Yeso a nə Ńjúmnə nə́ á Nəwûə

¹ Ndzaŋə ándó páʼə Alěláʼə́sê á nə ńdaŋ nə́ lə́, Mɛɛlə Magdalɛn pó Mɛɛlə mǎpə Jɛmsə, ḿbɨ ḿbə́ nə́ Salomɛ pó jú məghɔ́d mimə ləmkə̂ nə́ á mə́ ghɛn nə́ ə́zɔ́ʼə akwubə Yeso wə́.

² Chigə mɛ́ məsânə á ntsɛɛmbiə alě á mə́m ngeebə, á əsáʼmə́nu, pó ghɛnə̂ á nəse

³ ńtíʼ ḿbítə məmbɨ mɔ́b ńgə́, “Əwə a yǐ kabkə̂ ngɔʼ zə̂ á ntso nəse ə́fɛ̂ nə́ pɛnə̂?”

⁴ Əghâ ándó pó nə ńnáŋ nə́ atǐ lə́, pó nə ńjɨ́ ńgə́ ngɔʼ zə̂ páʼ ə́ nə ḿbyádnə nə́ fáŋ lə́, pə́ nə ńkabkə̂ zə́ələ́.

⁵ Ndzaŋ pó nə ńkwú nə́ á mə́m nəse lə́, ńdzə́ənə mɔ́ nkaŋŋwu yitsə̌ a wê fúfúə atsəʼ ńnáanə á əlá yi təənə, pó tíʼ ḿbɔ́gə.

⁶ A sóŋ nə́ pó ńgə́, “Kɔ nə́ pɔ́gə, Maŋ jî ńgə́ pɨ náŋə lə́ Yeso mɔ́ Nazalɛd páʼ pə́ nə ńkwumtə̂ nə́ yí lə́. A júmnə á nəwûə, a kě aliʼə́ nə́ chî pô, jɨ́ nə́ aliʼ páʼ pə́ nə ńnoŋkə̂ nə́ yí ə́wə́.

⁷ Ghɛn nə́ ə́fiʼtə̂ ngaŋə́zoŋə́ndzəm əjí pópə Pita ńgə́, A chîə á mbi pɨ ńtə́ ńgɛnə̂ Galiliə. Nə́ yǐ zə́ənə yə́ aliʼ yi wɨ́ tsɔʼə ndzaŋ a nə ə́fiʼtə̂ nə́ áwɨ́ lə̂.”

⁸ Pó tíʼ ə́fɛ́lə á mə́m nəse ńkəələ̂ ághóobə́, ńté ńgə́ pó nə́ ńtə́ ḿbɛ́nkə, á tûə ńkɨʼnə̂ ághóobə́. Pó nə ńkě anu yitsə̌ á mbô ŋwu tsə̌ sóŋ pô ńté ńgə́ pó nə ńtə́ ḿbɔ́gə.

Yeso a Nɨd Mbɨ Əjǐə á Mbô Mɛɛlə Magdalɛn

⁹ Ndzaŋ Yeso a nə ńjúmnə nə́ á nəwû lə́, á yǒ ḿbə́ á ntsɛɛmbiə alě á mə́m ngab, Yeso a nɨd mbɨ əjǐə á mbô Mɛɛlə Madalɛnə, páʼə a nə ńkəm nə́ pɛ̌sê pɛ́n asaambɛ̂ á mbɨ yí lə̂.

¹⁰ A nə ńgɛn ə́fiʼtə̂ zə́ələ́ á mbô ngaŋmə́ko əjí páʼ pó nə̈ ńkyéŋ nə́ ńtûə ə́fɨnə̂.

¹¹ Ndzaŋ pó nə ńdzóʼ nə́ ńgə́ Yeso a chîə á mbî tə a kə́ ńdzə́ənə yí lə́, pó nə ńkě pí pô.

Yeso a Nɨd Mbɨ Əjǐ á Mbô Ngaŋə́zoŋə́ndzəm Əjí Zɛ́n Pɛ̌

¹² Zɨ́d zəənə́ anu á laŋ, Yeso a jáʼə á mbi pɨ pə̂ pə́ pɛ̌ nə́ ndzaŋ yi ndaʼə, á əghâ ándó pó nə ńchî nə́ á alaŋə́ ńtə́ ńgɛnə̂ aláʼə.

¹³ Pó sɛdnə̂ ḿbɨ ə́fiʼtə̂ anu zəənə́ á mbô pətsə́ pəənə, pó pə́ ńkě pí pô.

Yeso a Jáʼə á Mbi Ngaŋə́zoŋə́ndzəm Əjí Zə̂ Ntsɔb Mɔʼə́

¹⁴ Tsɔʼə ngǎ pɛ̌, Yeso a jáʼə á mbi ngaŋə́zoŋə́ndzəm əjí zə̂ ntsɔb mɔʼə́ á əghâ ándó pó nə ńtə́ nə́ ńjîə məjîə. A sáʼə ághɔ́b ńté ńgə́ pó nə ńkě mbimə́ túg pô, ńkə́ ńkwúd məntɨ́ móobə́, ńkə́ ńkǐəə á mə́ pí nə́ nə́ pɨ páʼ pə́ nə ńjɨ́ nə́ yə́ a júmnə á nəwûə.

¹⁵ A sóŋə á mbô pó ńgə́, “Ghɛn nə́ á mə́m mbî ntsəm ə́fiʼtə̂ nkɨ yi əshîʼnə ghɛnə́ á mbô ŋwu ntsəmə.

¹⁶ Ŋwu ntsəm páʼə a túg nə́ mbimə́ ńkə́ ńkwá nkǐ, a yǒ chwáalə, lə́ ŋwu ntsəm páʼə a kě nə́ mbimə́ túg pô, pə́ yǒ tsaŋkə̂ yə́.

¹⁷ Pɨ pə́ túg nə́ mbimə́ nə́ maŋ, pó yǒ túg əkyeʼmə́nu pəənə́, nə́ əlɛ́nə mə pó yǒ kəm əjwi təpɔŋə, pó yǒ tsáb ətsáb pəfîə;

¹⁸ pó yǒ pyá mənó nə́ mbô móobə́, kɨ kə́ nô ndíʼ təpɔŋ ə́ kě anu yitsə̌ nə́ pó ghɛd pô, pó yǒ noŋkə̂ mbô móobə́ atû pəghɔ pó yáŋə.”

Ndzaŋ Yeso a nə́ Ńkɔ́ʼ nə́ Ńgɛnə̂ á Nəpóolə

¹⁹ Əghâ ándó Mmaʼmbî Yeso a nə ḿməgtə̂ nə́ á mə́ tsáb nə́ pó po lə́, Əsê a lɔgə̂ yí ńkɔ́ʼə á nəpó ńnáakə yə́ á əlá apô yí yə təənə.

²⁰ Ngaŋə́zoŋə́ndzəm əjí pó tíʼ ə́fɛ́d ńgɛ̈n ə́sóŋə anǔəsê aliʼə́ atsəmə, Mmaʼmbîə ä tíʼə ə́faʼə̂ pó po, ńkə́ ńnɨd ńgə́ afaʼ páʼ pö faʼ nə́ lə́ pö faʼə̂ lə́ ndə̌ŋdəŋ ńté əkyeʼmə́nu páʼə a fɛ̂ nə́ á mbô pó. Amɛn.