Məfaʼə 8 - Əka yi Fîə

1 Sɔlə a Tsaŋkə̂ Nkyeetə pɔ́ pə́ Əsê

¹ Pə́ kə tə́ ńjwítə Stifən lə́ Sɔl a kə kə́ ńchîə ají ə́wə́. Tsɔʼə alě wɨ́d wə̂, pə́ chúʼə á mə́ chígə́ nə́ tsaŋkə̂ nkyeetə pɔ́ pə́ Əsê á Jɛlusalɛmə. Ŋwu ntsəm páʼ a nə ḿbí nə́ nə́ Yeso pó nə shamnə̂ ə́fɛ́lə Jɛlusalɛm ńkə ńgɛn nə́ əlá aláʼə Judya pó Samalya tə ńdéʼtə məntú mə́ Yeso.

² Pɨ pətsə́ páʼ pó nə̈ ḿbɔ́g nə́ Əsê pó tíʼ ńdɔgə̂ akwûə Stifən ńgɛn ńtwə́ŋ, ńtíʼ ḿbyádnə ńkyéŋə yí məngye mɔ́b mə́ kɔ́ʼə atǐə.

³ Lə́ Sɔlə a pə́ ńchúʼə á mə́ fɛ̂ nə́ ngə́ʼ nə́ nkyeetə pɔ́ pə́ Əsê. Ə́fɛ́lə nə táʼ ndɛ̂ ńkwúnə nə́ yitsə̌ ńgwam mbyâŋnə pópə pəngyě ə́soŋə̂ ńgɛnə̂ ńnéŋə á nkáʼə atsáŋə.

1 Filibə a Sóŋə Anǔəsê á Samalya

⁴ Pə́ kə shamkə̂ nkyeetə pɔ́ pə Əsê lə́, aliʼə́ atsəm pó kwú nə́ ə́wɨ́ pó sóŋə anǔəsê.

⁵ Filibə a tsó ńgɛnə̂ á aláʼ yitsə̌ á Samalya ə́sóŋə anu ńté Yi Ńtsəʼ nə́ á mbô pó.

⁶ Mboŋ pɨ nə ńtə́gə atû ńjwə́ʼtə anu páʼ Filibə a nə̈ sóŋ nə́, ndzaŋ pó nə ńjɨ́ nə́ əkɨʼnəmə́nu páʼ a nə̈ ńgɛd nə́.

⁷ Əjwi təpɔŋ ə́ nə fɛ́lə á mə́m pɨ pi nɨ́ nə́ ńkyéŋə nə́ tə́kɔʼ ngye. Pəkɔ́ŋə́sê pópə pɨ pə́ nə ńkwû nə́ táʼ əlá pi nɨ́ nə́ pə́ nə ńgyáŋə.

⁸ Ńdaŋ ə́lɨ́d mbɨ ngaŋ tə́kɔʼ tɔ̂ŋ yi wɨ́ ə́ pyádnə ḿbɔŋə̂.

1 Saamun Ngaŋnəkaŋə a Pímə Anǔəsê

⁹ Ŋwu tsə̌ a nə ńdáʼ ńchîə aláʼə Samalya nə́ məndɛd mətsɨ́ pə́ fóŋə nə́ Saamunə, ńgɛlə̂ nəkaŋə a kɨʼnə̂ a ŋwu ntsəmə. A nə ńdɔg mbɨ əjǐ ńgə́ yí lə́ ŋwu yi ngweŋə́.

¹⁰ Ŋwu ntsəmə á mə́mə aláʼ ńchúʼ nə́ asáŋəsáŋə́ ńkɔ́ʼ ńkoʼ nə́ pɨ pi weŋə́ kə zá ńdzóʼə á mbô yí ńtíʼə ə́sóŋə ńgə́, “Ŋwu nə́ lə́ mətɨ mə́ Əsê zə̂ páʼ pə́ fóŋ nə́ nə́ ‘Mətɨ mimə weŋ lə̂.’ ”

¹¹ Pó nə̈ ńdzóʼə á mbô yí ńté ńgə́ a nə ńkɔ́g ńchwáakə á mə́ ghɛd nə́ əkɨʼnəmə́nu nə́ nəkaŋ tə ndi sagə̂.

¹² Əghâ ándó pó nə ńdzóʼ nə́ ńkə́ néŋ ntɨ́ əghɔ́b nə́ nkɨ yi əshîʼnə páʼ Filibə a nə́ ńgyǐ nə́ nə́ wɨ́d ńté Anuə Nəfoonə Əsê pó əlɛ́n Yeso Klisto lə́, ŋwu ntsəmə á tíʼ ńkwá nkǐə, mbyâŋnə pópə pəngyě.

¹³ Saamunə a kə́ néŋ əyí ntɨ́ nə́ nkɨ yi əshîʼnə wə́ ńkwá nkǐ ńtíʼə ńdzoŋə̂ Filib ńgɛnə̂ á aliʼə́ atsəm. Əkyeʼmə́nu pópə pətə́kɔʼ pə́ əkɨʼnəmə́nu páʼ a nə ńjɨ́ nə Filibə ä ghɛlə̂ ə́ nə ńkɨʼnə̂ yə́.

¹⁴ Əghâ ándó məntú mə Yeso mə́ nə ńchî nə́ á Jɛlusalɛm pó nə ńdzóʼ nə ńgə́ pɨ pə́ Samalya pó pímə anǔəsê lə̂, ńtíʼ ńtúmə Pita pó Jɔnə á mbô pó.

¹⁵ Pó nə ńgyǐ ńkoʼ ə́wɨ́ lə́ ńchaʼtə́sê atû pó ńgə́ mbɔʼ pó kwáalə Ajwǐəsê.

¹⁶ Ńté ńgə́ Ajwǐəsê a nə ńkě á mə́m ŋwu əghɔb yitsə̌ kə́ kwúnə pô. Pó nə ńkə́ ńkwá lə́ tsɔʼə nkǐ nə́ əlɛ́n Mmaʼmbî Yeso.

¹⁷ Pita pó Jɔn tíʼ ńnoŋkə̂ mbô móobə́ á ndu pó, Ajwǐəsê a tíʼ ńkwúnə á mə́m pó.

¹⁸ Saamun a jɨ́ ńgə́ Ajwǐəsê a nə̈ ńkwúnə á mə́m pɨ ńdaŋə̂ lə́ ndzaŋ məntú mə́ Yeso mə́ nə̈ ńnoŋkə̂ nə́ mbô a atû pəənə. Ńtíʼ əfɛ̂ nkáb nə́ pó,

¹⁹ ə́sóŋ ńgə́, “Fɛ̂ nə́ mətɨ mɨ nə́ maŋ ńjî ńgə́ ŋwu ntsəm maŋ noŋkə̂ nə́ á apô mə á ndu yí, Ajwǐəsê a kwúnə a mbɨ yə́.”

²⁰ Pita a kwěe ńgə́, “Pɨ pə nkáb əzo ə́ kɛ́lə á mógə́, ndzaŋ páʼ gho kwaŋ nə́ ńgə́ mbɔʼ gho júnə ajú páʼ Əsê á fɛ̂ nə́ kətaŋ lə́!

²¹ Gho kě nə́ anu yətsə́ á mə́mə afaʼ jɨ kwéʼnə ńchî pô, ńté ńgə́ ntɨ́ gho kě á mbi Əsê ŋwaʼ pô.

²² Kwúblə á mə́m ndzaŋ təpɔŋ jɨ ńtíʼ ńchaʼtə́sê á mbô Mmaʼmbî əghâ tsə́ a yǐ ńdəgnə̂ təpɔŋ əgho nə́ ndzaŋə akwaŋ páʼ gho pěʼ nə́ ńtúg lə̂.

²³ Ńté ńgə́ maŋ jɨ́ ńgə́ ŋwéetə́ á lwɛ́nkə á ntɨ́ gho, təpɔŋə á tíʼ ńdɔgə̂ gho ə́sɛlə̂ a ngaŋətsáŋ ə́wə́.”

²⁴ Saamunə a tíʼ ə́sóŋ nə́ Pita pó Jɔn ńgə́, “Chaʼtə̂ nə́ Əsê á mbô maŋ, ḿbóʼmbô nə́ Mmaʼmbî ńjî ńgə́ kɔ anu yətsə́ pɨ sóŋ nə́ á ghɛlə̂ mə.”

²⁵ Əghâ ándó pó nə sóŋ nə́ anu pó nə ńjî nə́ ńté Yeso ńkə́ ḿbɨ ə́sóŋə anǔəsê lə̂, Pita pó Jɔn tíʼ ḿbəənə̂ á Jɛlusalɛm ńnyinə̂ ə́sóŋə anǔəsê á mə́m əláʼ pi nɨ́ nə́ á Samalya.

Ngaŋəfaʼ yi Ngweŋə́ á Ntɔ́ʼ Əfo Etopya a Kwúblə Ńdzoŋ Ndzəm Yeso

²⁶ Ntseŋndɛ̂sê yi Mmaʼmbî a sóŋə á mbô Filib ńgə́, “Lǒ əsê ńtsó ńgɛnə̂ á alaŋə́sêndú páʼ á fɛ́d nə́ Jɛlusalɛm ńgɛnə̂ á Gaza lə̂.” (Pə́ kě alaŋə́ wɨ́d ghɛn ə́sɛ̂n pɛ́lə ńdaŋə̂ pô).

²⁷ A tíʼ ə́fɛ́d ńtə́ ńgɛnə̂ ńjwánə a ngaŋəfaʼ ntɔ́ʼ Etopya yi ngweŋ yitsə̌, a nə ḿbə́ lə́ ŋwu páʼ a nə̈ ńdɔʼkə̂ nə́ nkáb Kandesə páʼ a nə ḿbə́ nə́ Əfo Məngyě á Etopya. Ŋwu yi wə́ a nə ńgɛnə̂ Jɛlusalɛmə lə́ mə́ ghóʼkə nə́ Əsê.

²⁸ Ńgyǐ ńtə́ ḿbəənə̂ lə́ ńnáanə á mə́m muto əyǐ páʼ pələəmə́ pə́ sóŋ nə́ ńtə́ ə́fóŋə aŋwaʼlə ntûsê Izaya.

²⁹ Ajwǐəsê a sóŋə á mbô Filib ńgə́, “Ghɛn ńtégə muto páʼ pələəmə́ pə́ sóŋ nə́ lə́ ńtə́ ńnyinə̂ á nəpɛnə́ ə́wə́.”

³⁰ Filibə a tíʼ ńkə ńgɛnə̂ á nəpɛnə́ wɨ́ ńtíʼ ńdzóʼ ndzaŋ páʼ ŋwu wə̂ a fóŋ nə́ aŋwaʼlə ntûsê Izaya. Filibə a pítə yí ńgə́, “Gho fóŋə lɛ̌ tə ńdzóʼə anu páʼ aŋwaʼlə yəwə́ ä sóŋ nə́?”

³¹ Ŋwu wə̂ a kwěe ńgə́, “Mbɔʼ maŋ pə́ ńdzóʼ ə́lɛ́ tə ńdéʼtə ŋwu tsə̌ a tsoŋkə̂ ńtyáatə á mbô maŋə.” Ńtíʼ ńgwúnə Filib ńgə́ a yǐ ńkɔ́ʼ ńnáanə ḿbáatə yə́ á mə́m muto páʼ pələəmə́ pə́ soŋ nə́ lə̂.

³² Ngaŋəfaʼ yi ngweŋ wə̂ a nə̈ fóŋə lə́ aliʼə́ aŋwaʼlə jɨ páʼ ä sóŋ nə́ ńgə́, “A kə chîə ándó mbéŋ páʼ pə́ lɔg nə́ ńtə́ ńgɛnə̂ á mə́ wad nə́, ńkə́ ńchî lə́ ándó mɔ́ aŋkoomə páʼ pə́ tə́ nə́ ńkóomə mənoŋ míə á kě tə́ ńkyéŋə pô, ńkě ntso əyí kwíʼnə ŋ́ŋáʼ pô.

³³ Pə́ nə ńnéŋ əsə́ənə atû yí, ŋwu tsə̌ a kě ə́wɨ́ chî təmbɔʼ a sáʼ əsáʼ əyí ndə̌ŋdəŋ pô. Ŋwu tsə̌ a kě ə́wɨ́ chî təmbɔʼ a sóŋə anu ńté ngwud əjǐ pô. Ńté ńgə́ nchîmbî əjǐə á ndu mbî zɨ́d měe.”

³⁴ Ŋwu yí wə́ a tíʼ ḿbítə Filib ńgə́, “Fiʼtə̂ mə ńgə́ ntûsê a sóŋə anu jɨ ńté lə́ mbɨ əjǐ kɨ ńté lə́ ŋwu ndaʼə?”

³⁵ Filibə a tíʼ ńchúʼ tsɔʼə nə́ aliʼə́ aŋwaʼlə jɨ́d zə̂ á mə́ tsáb nə ńtíʼ ə́fiʼtə̂ yí nə́ nkɨ yí əshîʼnə ńté Yeso.

³⁶ Ndzaŋ pó nə ńtə́ nə́ ńnyinə̂ lə́, ńgyǐ ńkoʼə̂ á ntso nkǐ yitsə̌ ngaŋəfaʼ yi ngweŋ wə̂ a sóŋ nə́ Filib ńgə́, “Zə́ənə! Lɛ̌ nkǐə, akə̂ a yǐ nə́ zɔŋ ńgə́ kɔ maŋ kwá nkǐə?”

³⁸ Ŋwu wə̂ a tíʼ ə́sóŋ ńgə́ pə́ tɨ́ nə́ yə́. Pə́ tɨ́, pó Filib tíʼ ńtsó ńgɛnə̂ á mə́m nkǐ, Filibə a tíʼ ə́fɛ̂ nkǐ nə́ yə́.

³⁹ Əghâ ándó pó nə fɛ́d nə́ á mə́m nkǐ ńkɔ́ʼə á asəg lə́, Ajwǐəsê a lɔgə̂ Filib ńgɛn nə́ yə́. Ngaŋəfaʼ yi ngweŋ wə̂ a kě yí pɨ ńjɨ́ pô. Lə́ ḿbə́ ńtə́ ńgɛnə̂ yí akɔŋtə á lwɛ́nkə ntɨ́ yə́.

⁴⁰ Filibə a tíʼ ńdeŋ mbɨ əjǐə á pə́ Azotos ńtíʼə ńkéelə ńnyinə̂ á mə́m əláʼ ətsəm ńnáŋkə nkɨ yi əshîʼnə tə ńgɛn ńkoʼə̂ a Kasalya.